၁၂. စန္ဒာထေရီဂါထာ

၁၂၂. ‘‘ဒုဂ္ဂတာဟံ ပုရေ အာသိံ၊ ဝိဓဝါ စ အပုတ္တိကာ၊

ဝိနာ မိတ္တေဟိ ဉာတီဟိ၊ ဘတ္တစောဠဿ နာဓိဂံ.

၁၂၃. ‘‘ပတ္တံ ဒဏ္ဍဉ္စ ဂဏှိတွာ၊ ဘိက္ခမာနာ ကုလာ ကုလံ၊

သီတုဏှေန စ ဍယှန္တီ၊ သတ္တ ဝဿာနိ စာရိဟံ.

၁၂၄. ‘‘ဘိက္ခုနိံ ပုန ဒိသွာန၊ အန္နပါနဿ လာဘိနိံ၊

ဥပသင်္ကမ္မ အဝေါစံ [အဝေါစိံ (က.)]၊ ‘ပဗ္ဗဇ္ဇံ အနဂါရိယံ’.

၁၂၅. ‘‘သာ စ မံ အနုကမ္ပာယ၊ ပဗ္ဗာဇေသိ ပဋာစာရာ၊

တတော မံ ဩဝဒိတွာန၊ ပရမတ္ထေ နိယောဇယိ.

၁၂၆. ‘‘တဿာဟံ ဝစနံ သုတွာ၊ အကာသိံ အနုသာသနိံ၊

အမောဃော အယျာယောဝါဒေါ၊ တေဝိဇ္ဇာမှိ အနာသဝါ’’တိ.

။ စန္ဒာ ထေရီ။.

ပဉ္စကနိပါတော နိဋ္ဌိတော.