၁၀. ပဋာစာရာထေရီဂါထာ

၁၁၂. ‘‘နင်္ဂလေဟိ ကသံ ခေတ္တံ၊ ဗီဇာနိ ပဝပံ ဆမာ၊

ပုတ္တဒါရာနိ ပေါသေန္တာ၊ ဓနံ ဝိန္ဒန္တိ မာဏဝါ.

၁၁၃. ‘‘ကိမဟံ သီလသမ္ပန္နာ၊ သတ္ထုသာသနကာရိကာ၊

နိဗ္ဗာနံ နာဓိဂစ္ဆာမိ၊ အကုသီတာ အနုဒ္ဓတာ.

၁၁၄. ‘‘ပါဒေ ပက္ခာလယိတွာန၊ ဥဒကေသု ကရောမဟံ၊

ပါဒေါဒကဉ္စ ဒိသွာန၊ ထလတော နိန္နမာဂတံ.

၁၁၅. ‘‘တတော စိတ္တံ သမာဓေသိံ၊ အဿံ ဘဒြံဝဇာနိယံ၊

တတော ဒီပံ ဂဟေတွာန၊ ဝိဟာရံ ပါဝိသိံ အဟံ၊

သေယျံ ဩလောကယိတွာန၊ မဉ္စကမှိ ဥပါဝိသိံ.

၁၁၆. ‘‘တတော သူစိံ ဂဟေတွာန၊ ဝဋ္ဋိံ ဩကဿယာမဟံ၊

ပဒီပဿေဝ နိဗ္ဗာနံ၊ ဝိမောက္ခော အဟု စေတသော’’တိ.

။ ပဋာစာရာ ထေရီ။.