၁. အညတရာထေရီဂါထာ

၆၇. ‘‘ပဏ္ဏဝီသတိဝဿာနိ၊ ယတော ပဗ္ဗဇိတာ အဟံ၊

နာစ္ဆရာသင်္ဃာတမတ္တမ္ပိ၊ စိတ္တဿူပသမဇ္ဈဂံ.

၆၈. ‘‘အလဒ္ဓါ စေတသော သန္တိံ၊ ကာမရာဂေနဝဿုတာ၊

ဗာဟာ ပဂ္ဂယှ ကန္ဒန္တီ၊ ဝိဟာရံ ပါဝိသိံ အဟံ.

၆၉. ‘‘သာ ဘိက္ခုနိံ ဥပါဂစ္ဆိံ၊ ယာ မေ သဒ္ဓါယိကာ အဟု၊

သာ မေ ဓမ္မမဒေသေသိ၊ ခန္ဓာယတနဓာတုယော.

၇၀. ‘‘တဿာ ဓမ္မံ သုဏိတွာန၊ ဧကမန္တေ ဥပါဝိသိံ၊

ပုဗ္ဗေနိဝါသံ ဇာနာမိ၊ ဒိဗ္ဗစက္ခု ဝိသောဓိတံ.

၇၁. ‘‘စေတောပရိစ္စဉာဏဉ္စ [စေတောပရိယဉာဏဉ္စ (က.)]၊ သောတဓာတု ဝိသောဓိတာ၊

ဣဒ္ဓီပိ မေ သစ္ဆိကတာ၊ ပတ္တော မေ အာသဝက္ခယော၊

ဆဠဘိညာ [ဆ မေဘိညာ (သျာ. က.)] သစ္ဆိကတာ၊ ကတံ ဗုဒ္ဓဿ သာသန’’န္တိ.

။ အညတရာ ထေရီ ။.