၅. သုဘာကမ္မာရဓီတုထေရီဂါထာ

၃၃၉. ‘‘ဒဟရာဟံ သုဒ္ဓဝသနာ၊ ယံ ပုရေ ဓမ္မမဿုဏိံ၊

တဿာ မေ အပ္ပမတ္တာယ၊ သစ္စာဘိသမယော အဟု.

၃၄၀. ‘‘တတောဟံ သဗ္ဗကာမေသု၊ ဘုသံ အရတိမဇ္ဈဂံ၊

သက္ကာယသ္မိံ ဘယံ ဒိသွာ၊ နေက္ခမ္မမေဝ [နေက္ခမ္မညေဝ (သီ.)၊ နေက္ခမ္မဿေဝ (သျာ.)] ပီဟယေ.

၃၄၁. ‘‘ဟိတွာနဟံ ဉာတိဂဏံ၊ ဒါသကမ္မကရာနိ စ၊

ဂါမခေတ္တာနိ ဖီတာနိ၊ ရမဏီယေ ပမောဒိတေ.

၃၄၂. ‘‘ပဟာယဟံ ပဗ္ဗဇိတာ၊ သာပတေယျမနပ္ပကံ၊

ဧဝံ သဒ္ဓါယ နိက္ခမ္မ၊ သဒ္ဓမ္မေ သုပ္ပဝေဒိတေ.

၃၄၃. ‘‘နေတံ [န မေတံ (သီ. သျာ.)] အဿ ပတိရူပံ၊ အာကိဉ္စညဉှိ ပတ္ထယေ၊

ယော [ယာ (သျာ.)] ဇာတရူပံ ရဇတံ၊ ဆဍ္ဍေတွာ [ထပေတွာ (က.)] ပုနရာဂမေ [ပုနရာဂဟေ (က.)].

၃၄၄. ‘‘ရဇတံ ဇာတရူပံ ဝါ၊ န ဗောဓာယ န သန္တိယာ၊

နေတံ သမဏသာရုပ္ပံ၊ န ဧတံ အရိယဒ္ဓနံ.

၃၄၅. ‘‘လောဘနံ မဒနဉ္စေတံ၊ မောဟနံ ရဇဝဍ္ဎနံ၊

သာသင်္ကံ ဗဟုအာယာသံ၊ နတ္ထိ စေတ္ထ ဓုဝံ ဌိတိ.

၃၄၆. ‘‘ဧတ္ထ ရတ္တာ ပမတ္တာ စ၊ သင်္ကိလိဋ္ဌမနာ နရာ၊

အညမညေန ဗျာရုဒ္ဓါ၊ ပုထု ကုဗ္ဗန္တိ မေဓဂံ.

၃၄၇. ‘‘ဝဓော ဗန္ဓော ပရိက္လေသော၊ ဇာနိ သောကပရိဒ္ဒဝေါ၊

ကာမေသု အဓိပန္နာနံ၊ ဒိဿတေ ဗျသနံ ဗဟုံ.

၃၄၈. ‘‘တံ မံ ဉာတီ အမိတ္တာဝ၊ ကိံ ဝေါ ကာမေသု ယုဉ္ဇထ၊

ဇာနာထ မံ ပဗ္ဗဇိတံ၊ ကာမေသု ဘယဒဿိနိံ.

၃၄၉. ‘‘န ဟိရညသုဝဏ္ဏေန၊ ပရိက္ခီယန္တိ အာသဝါ၊

အမိတ္တာ ဝဓကာ ကာမာ၊ သပတ္တာ သလ္လဗန္ဓနာ.

၃၅၀. ‘‘တံ မံ ဉာတီ အမိတ္တာဝ၊ ကိံ ဝေါ ကာမေသု ယုဉ္ဇထ၊

ဇာနာထ မံ ပဗ္ဗဇိတံ၊ မုဏ္ဍံ သင်္ဃာဋိပါရုတံ.

၃၅၁. ‘‘ဥတ္တိဋ္ဌပိဏ္ဍော ဥဉ္ဆော စ၊ ပံသုကူလဉ္စ စီဝရံ၊

ဧတံ ခေါ မမ သာရုပ္ပံ၊ အနဂါရူပနိဿယော.

၃၅၂. ‘‘ဝန္တာ မဟေသီဟိ ကာမာ၊ ယေ ဒိဗ္ဗာ ယေ စ မာနုသာ၊

ခေမဋ္ဌာနေ ဝိမုတ္တာ တေ၊ ပတ္တာ တေ အစလံ သုခံ.

၃၅၃. ‘‘မာဟံ ကာမေဟိ သင်္ဂစ္ဆိံ၊ ယေသု တာဏံ န ဝိဇ္ဇတိ၊

အမိတ္တာ ဝဓကာ ကာမာ၊ အဂ္ဂိက္ခန္ဓူပမာ ဒုခါ.

၃၅၄. ‘‘ပရိပန္ထော ဧသ ဘယော၊ သဝိဃာတော သကဏ္ဋကော၊

ဂေဓော သုဝိသမော စေသော [လေပေါ (သီ.)]၊ မဟန္တော မောဟနာမုခေါ.

၃၅၅. ‘‘ဥပသဂ္ဂေါ ဘီမရူပေါ၊ ကာမာ သပ္ပသိရူပမာ၊

ယေ ဗာလာ အဘိနန္ဒန္တိ၊ အန္ဓဘူတာ ပုထုဇ္ဇနာ.

၃၅၆. ‘‘ကာမပင်္ကေန သတ္တာ ဟိ၊ ဗဟူ လောကေ အဝိဒ္ဒသူ၊

ပရိယန္တံ န ဇာနန္တိ၊ ဇာတိယာ မရဏဿ စ.

၃၅၇. ‘‘ဒုဂ္ဂတိဂမနံ မဂ္ဂံ၊ မနုဿာ ကာမဟေတုကံ၊

ဗဟုံ ဝေ ပဋိပဇ္ဇန္တိ၊ အတ္တနော ရောဂမာဝဟံ.

၃၅၈. ‘‘ဧဝံ အမိတ္တဇနနာ၊ တာပနာ သံကိလေသိကာ၊

လောကာမိသာ ဗန္ဓနီယာ၊ ကာမာ မရဏဗန္ဓနာ [စရဏဗန္ဓနာ (သီ.)].

၃၅၉. ‘‘ဥမ္မာဒနာ ဥလ္လပနာ၊ ကာမာ စိတ္တပ္ပမဒ္ဒိနော၊

သတ္တာနံ သင်္ကိလေသာယ၊ ခိပ္ပံ [ခိပံ (သီ.)] မာရေန ဩဍ္ဍိတံ.

၃၆၀. ‘‘အနန္တာဒီနဝါ ကာမာ၊ ဗဟုဒုက္ခာ မဟာဝိသာ၊

အပ္ပဿာဒါ ရဏကရာ၊ သုက္ကပက္ခဝိသောသနာ [ဝိသောသကာ (သီ.)].

၃၆၁. ‘‘သာဟံ ဧတာဒိသံ ကတွာ၊ ဗျသနံ ကာမဟေတုကံ၊

န တံ ပစ္စာဂမိဿာမိ၊ နိဗ္ဗာနာဘိရတာ သဒါ.

၃၆၂. ‘‘ရဏံ ကရိတွာ [တရိတွာ (သီ.)] ကာမာနံ၊ သီတိဘာဝါဘိကင်္ခိနီ၊

အပ္ပမတ္တာ ဝိဟဿာမိ၊ သဗ္ဗသံယောဇနက္ခယေ.

၃၆၃. ‘‘အသောကံ ဝိရဇံ ခေမံ၊ အရိယဋ္ဌင်္ဂိကံ ဥဇုံ၊

တံ မဂ္ဂံ အနုဂစ္ဆာမိ၊ ယေန တိဏ္ဏာ မဟေသိနော’’.

၃၆၄. ဣမံ ပဿထ ဓမ္မဋ္ဌံ၊ သုဘံ ကမ္မာရဓီတရံ၊

အနေဇံ ဥပသမ္ပဇ္ဇ၊ ရုက္ခမူလမှိ ဈာယတိ.

၃၆၅. အဇ္ဇဋ္ဌမီ ပဗ္ဗဇိတာ၊ သဒ္ဓါ သဒ္ဓမ္မသောဘနာ၊

ဝိနီတုပ္ပလဝဏ္ဏာယ၊ တေဝိဇ္ဇာ မစ္စုဟာယိနီ.

၃၆၆. သာယံ ဘုဇိဿာ အနဏာ၊ ဘိက္ခုနီ ဘာဝိတိန္ဒြိယာ၊

သဗ္ဗယောဂဝိသံယုတ္တာ၊ ကတကိစ္စာ အနာသဝါ.

၃၆၇. တံ သက္ကော ဒေဝသံဃေန၊ ဥပသင်္ကမ္မ ဣဒ္ဓိယာ၊

နမဿတိ ဘူတပတိ၊ သုဘံ ကမ္မာရဓီတရန္တိ.

။ သုဘာ ကမ္မာရဓီတာ ထေရီ။.

ဝီသတိနိပါတော နိဋ္ဌိတော.