၃. ဘဒ္ဒတ္ထေရဂါထာ

၄၇၃. ‘‘ဧကပုတ္တော အဟံ အာသိံ၊ ပိယော မာတု ပိယော ပိတု၊

ဗဟူဟိ ဝတစရိယာဟိ၊ လဒ္ဓေါ အာယာစနာဟိ စ.

၄၇၄. ‘‘တေ စ မံ အနုကမ္ပာယ၊ အတ္ထကာမာ ဟိတေသိနော၊

ဥဘော ပိတာ စ မာတာ စ၊ ဗုဒ္ဓဿ ဥပနာမယုံ’’.

၄၇၅. ‘‘ကိစ္ဆာ လဒ္ဓေါ အယံ ပုတ္တော၊ သုခုမာလော သုခေဓိတော၊

ဣမံ ဒဒါမ တေ နာထ၊ ဇိနဿ ပရိစာရကံ’’.

၄၇၆. ‘‘သတ္ထာ စ မံ ပဋိဂ္ဂယှ၊ အာနန္ဒံ ဧတဒဗြဝိ၊

‘ပဗ္ဗာဇေဟိ ဣမံ ခိပ္ပံ၊ ဟေဿတျာဇာနိယော အယံ.

၄၇၇. ‘‘ပဗ္ဗာဇေတွာန မံ သတ္ထာ၊ ဝိဟာရံ ပါဝိသီ ဇိနော၊

အနောဂ္ဂတသ္မိံ သူရိယသ္မိံ၊ တတော စိတ္တံ ဝိမုစ္စိ မေ.

၄၇၈. ‘‘တတော သတ္ထာ နိရာကတွာ၊ ပဋိသလ္လာနဝုဋ္ဌိတော၊

‘ဧဟိ ဘဒ္ဒါ’တိ မံ အာဟ၊ သာ မေ အာသူပသမ္ပဒါ.

၄၇၉. ‘‘ဇာတိယာ သတ္တဝဿေန၊ လဒ္ဓါ မေ ဥပသမ္ပဒါ၊

တိဿော ဝိဇ္ဇာ အနုပ္ပတ္တာ၊ အဟော ဓမ္မသုဓမ္မတာ’’တိ.

။ ဘဒ္ဒေါ ထေရော။.