၄. သောပါကတ္ထေရဂါထာ

၄၈၀. ‘‘ဒိသွာ ပါသာဒဆာယာယံ၊ စင်္ကမန္တံ နရုတ္တမံ၊

တတ္ထ နံ ဥပသင်္ကမ္မ၊ ဝန္ဒိဿံ [ဝန္ဒိသံ (သီ. ပီ.)] ပုရိသုတ္တမံ.

၄၈၁. ‘‘ဧကံသံ စီဝရံ ကတွာ၊ သံဟရိတွာန ပါဏယော၊

အနုစင်္ကမိဿံ ဝိရဇံ၊ သဗ္ဗသတ္တာနမုတ္တမံ.

၄၈၂. ‘‘တတော ပဉှေ အပုစ္ဆိ မံ၊ ပဉှာနံ ကောဝိဒေါ ဝိဒူ၊

အစ္ဆမ္ဘီ စ အဘီတော စ၊ ဗျာကာသိံ သတ္ထုနော အဟံ.

၄၈၃. ‘‘ဝိဿဇ္ဇိတေသု ပဉှေသု၊ အနုမောဒိ တထာဂတော၊

ဘိက္ခုသံဃံ ဝိလောကေတွာ၊ ဣမမတ္ထံ အဘာသထ’’.

၄၈၄. ‘‘လာဘာ အင်္ဂါနံ မဂဓာနံ၊ ယေသာယံ ပရိဘုဉ္ဇတိ၊

စီဝရံ ပိဏ္ဍပါတဉ္စ၊ ပစ္စယံ သယနာသနံ၊

ပစ္စုဋ္ဌာနဉ္စ သာမီစိံ၊ တေသံ လာဘာ’’တိ စာဗြဝိ.

၄၈၅. ‘‘အဇ္ဇတဂ္ဂေ မံ သောပါက၊ ဒဿနာယောပသင်္ကမ၊

ဧသာ စေဝ တေ သောပါက၊ ဘဝတု ဥပသမ္ပဒါ’’.

၄၈၆. ‘‘ဇာတိယာ သတ္တဝဿောဟံ၊ လဒ္ဓါန ဥပသမ္ပဒံ၊

ဓာရေမိ အန္တိမံ ဒေဟံ၊ အဟော ဓမ္မသုဓမ္မတာ’’တိ.

။ သောပါကော ထေရော။.