၂. တေကိစ္ဆကာရိတ္ထေရဂါထာ

၃၈၁. ‘‘အတိဟိတာ ဝီဟိ၊ ခလဂတာ သာလီ၊

န စ လဘေ ပိဏ္ဍံ၊ ကထမဟံ ကဿံ.

၃၈၂. ‘‘ဗုဒ္ဓမပ္ပမေယျံ အနုဿရ ပသန္နော၊

ပီတိယာ ဖုဋသရီရော ဟောဟိသိ သတတမုဒဂ္ဂေါ.

၃၈၃. ‘‘ဓမ္မမပ္ပမေယျံ အနုဿရ ပသန္နော၊

ပီတိယာ ဖုဋသရီရော ဟောဟိသိ သတတမုဒဂ္ဂေါ.

၃၈၄. ‘‘သံဃမပ္ပမေယျံ အနုဿရ ပသန္နော၊

ပီတိယာ ဖုဋသရီရော ဟောဟိသိ သတတမုဒဂ္ဂေါ.

၃၈၅. ‘‘အဗ္ဘောကာသေ ဝိဟရသိ၊ သီတာ ဟေမန္တိကာ ဣမာ ရတျော၊

မာ သီတေန ပရေတော ဝိဟညိတ္ထော၊ ပဝိသ တွံ ဝိဟာရံ ဖုသိတဂ္ဂဠံ.

၃၈၆. ‘‘ဖုသိဿံ စတဿော အပ္ပမညာယော၊ တာဟိ စ သုခိတော ဝိဟရိဿံ၊

နာဟံ သီတေန ဝိဟညိဿံ၊ အနိဉ္ဇိတော ဝိဟရန္တော’’တိ.

။ တေကိစ္ဆကာရီ [တေကိစ္ဆကာနိ (သီ. သျာ. ပီ.)] ထေရော။.