၃. မဟာနာဂတ္ထေရဂါထာ

၃၈၇. ‘‘ယဿ သဗြဟ္မစာရီသု၊ ဂါရဝေါ နူပလဗ္ဘတိ၊

ပရိဟာယတိ သဒ္ဓမ္မာ၊ မစ္ဆော အပ္ပေါဒကေ ယထာ.

၃၈၈. ‘‘ယဿ သဗြဟ္မစာရီသု၊ ဂါရဝေါ နူပလဗ္ဘတိ၊

န ဝိရူဟတိ သဒ္ဓမ္မေ၊ ခေတ္တေ ဗီဇံဝ ပူတိကံ.

၃၈၉. ‘‘ယဿ သဗြဟ္မစာရီသု၊ ဂါရဝေါ နူပလဗ္ဘတိ၊

အာရကာ ဟောတိ နိဗ္ဗာနာ [နိဗ္ဗာဏာ (သီ.)]၊ ဓမ္မရာဇဿ သာသနေ.

၃၉၀. ‘‘ယဿ သဗြဟ္မစာရီသု၊ ဂါရဝေါ ဥပလဗ္ဘတိ၊

န ဝိဟာယတိ သဒ္ဓမ္မာ၊ မစ္ဆော ဗဝှေါဒကေ [ဗဟွောဒကေ (သီ.)၊ ဗဟောဒကေ (သျာ.)] ယထာ.

၃၉၁. ‘‘ယဿ သဗြဟ္မစာရီသု၊ ဂါရဝေါ ဥပလဗ္ဘတိ၊

သော ဝိရူဟတိ သဒ္ဓမ္မေ၊ ခေတ္တေ ဗီဇံဝ ဘဒ္ဒကံ.

၃၉၂. ‘‘ယဿ သဗြဟ္မစာရီသု၊ ဂါရဝေါ ဥပလဗ္ဘတိ၊

သန္တိကေ ဟောတိ နိဗ္ဗာနံ [နိဗ္ဗာဏံ (သီ.)]၊ ဓမ္မရာဇဿ သာသနေ’’တိ.

။ မဟာနာဂေါ ထေရော။.