၈. အင်္ဂုလိမာလတ္ထေရဂါထာ

၈၆၆. ‘‘ဂစ္ဆံ ဝဒေသိ သမဏ ‘ဋ္ဌိတောမှိ’၊ မမဉ္စ ဗြူသိ ဌိတမဋ္ဌိတောတိ၊

ပုစ္ဆာမိ တံ သမဏ ဧတမတ္ထံ၊ ‘ကထံ ဌိတော တွံ အဟမဋ္ဌိတောမှိ’’’.

၈၆၇. ‘‘ဌိတော အဟံ အင်္ဂုလိမာလ သဗ္ဗဒါ၊ သဗ္ဗေသု ဘူတေသု နိဓာယ ဒဏ္ဍံ၊

တုဝဉ္စ ပါဏေသု အသညတောသိ၊ တသ္မာ ဌိတောဟံ တုဝမဋ္ဌိတောသိ’’.

၈၆၈. ‘‘စိရဿံ ဝတ မေ မဟိတော မဟေသီ၊ မဟာဝနံ သမဏော ပစ္စပါဒိ [ပစ္စုပါဒိ (သဗ္ဗတ္ထ)]၊

သောဟံ စဇိဿာမိ သဟဿပါပံ၊ သုတွာန ဂါထံ တဝ ဓမ္မယုတ္တံ’’.

၈၆၉. ဣစ္စေဝ စောရော အသိမာဝုဓဉ္စ၊ သောဗ္ဘေ ပပါတေ နရကေ အနွကာသိ [အကိရိ (မ. နိ. ၂.၃၄၉)]၊

အဝန္ဒိ စောရော သုဂတဿ ပါဒေ၊ တတ္ထေဝ ပဗ္ဗဇ္ဇမယာစိ ဗုဒ္ဓံ.

၈၇၀. ဗုဒ္ဓေါ စ ခေါ ကာရုဏိကော မဟေသိ၊ ယော သတ္ထာ လောကဿ သဒေဝကဿ၊

‘တမေဟိ ဘိက္ခူ’တိ တဒါ အဝေါစ၊ ဧသေဝ တဿ အဟု ဘိက္ခုဘာဝေါ.

၈၇၁. ‘‘ယော စ ပုဗ္ဗေ ပမဇ္ဇိတွာ၊ ပစ္ဆာ သော နပ္ပမဇ္ဇတိ၊

သောမံ လောကံ ပဘာသေတိ၊ အဗ္ဘာ မုတ္တောဝ စန္ဒိမာ.

၈၇၂. ‘‘ယဿ ပါပံ ကတံ ကမ္မံ၊ ကုသလေန ပိဓီယတိ [ပိထီယတိ (သီ. သျာ.)]၊

သောမံ လောကံ ပဘာသေတိ၊ အဗ္ဘာ မုတ္တောဝ စန္ဒိမာ.

၈၇၃. ‘‘ယော ဟဝေ ဒဟရော ဘိက္ခု၊ ယုဉ္ဇတိ ဗုဒ္ဓသာသနေ၊

သောမံ လောကံ ပဘာသေတိ၊ အဗ္ဘာ မုတ္တောဝ စန္ဒိမာ.

၈၇၄. [ဒိသာ ဟိ (သျာ. က.၊ မ. နိ. ၂.၃၅၂)] ‘‘ဒိသာပိ မေ ဓမ္မကထံ သုဏန္တု၊ ဒိသာပိ မေ ယုဉ္ဇန္တု ဗုဒ္ဓသာသနေ၊

ဒိသာပိ မေ တေ မနုဇေ ဘဇန္တု၊ ယေ ဓမ္မမေဝါဒပယန္တိ သန္တော.

၈၇၅. ‘‘ဒိသာ ဟိ မေ ခန္တိဝါဒါနံ၊ အဝိရောဓပ္ပသံသိနံ၊

သုဏန္တု ဓမ္မံ ကာလေန၊ တဉ္စ အနုဝိဓီယန္တု.

၈၇၆. ‘‘န ဟိ ဇာတု သော မမံ ဟိံသေ၊ အညံ ဝါ ပန ကိဉ္စနံ [ကဉ္စိနံ (သီ. သျာ.)၊ ကဉ္စနံ (?)]၊

ပပ္ပုယျ ပရမံ သန္တိံ၊ ရက္ခေယျ တသထာဝရေ.

၈၇၇. [ထေရဂါ. ၁၉] ‘‘ဥဒကဉှိ နယန္တိ နေတ္တိကာ၊ ဥသုကာရာ နမယန္တိ [ဒမယန္တိ (က.)] တေဇနံ၊

ဒါရုံ နမယန္တိ [ဒမယန္တိ (က.)] တစ္ဆကာ၊ အတ္တာနံ ဒမယန္တိ ပဏ္ဍိတာ.

၈၇၈. ‘‘ဒဏ္ဍေနေကေ ဒမယန္တိ၊ အင်္ကုသေဘိ ကသာဟိ စ၊

အဒဏ္ဍေန အသတ္ထေန၊ အဟံ ဒန္တောမှိ တာဒိနာ.

၈၇၉. ‘‘‘အဟိံသကော’တိ မေ နာမံ၊ ဟိံသကဿ ပုရေ သတော၊

အဇ္ဇာဟံ သစ္စနာမောမှိ၊ န နံ ဟိံသာမိ ကိဉ္စနံ [ကဉ္စိနံ (သီ. သျာ.)၊ ကဉ္စနံ (?)].

၈၈၀. ‘‘စောရော အဟံ ပုရေ အာသိံ၊ အင်္ဂုလိမာလောတိ ဝိဿုတော၊

ဝုယှမာနော မဟောဃေန၊ ဗုဒ္ဓံ သရဏမာဂမံ.

၈၈၁. ‘‘လောဟိတပါဏိ ပုရေ အာသိံ၊ အင်္ဂုလိမာလောတိ ဝိဿုတော၊

သရဏဂမနံ ပဿ၊ ဘဝနေတ္တိ သမူဟတာ.

၈၈၂. ‘‘တာဒိသံ ကမ္မံ ကတွာန၊ ဗဟုံ ဒုဂ္ဂတိဂါမိနံ၊

ဖုဋ္ဌော ကမ္မဝိပါကေန၊ အနဏော ဘုဉ္ဇာမိ ဘောဇနံ.

၈၈၃. ‘‘ပမာဒမနုယုဉ္ဇန္တိ၊ ဗာလာ ဒုမ္မေဓိနော ဇနာ၊

အပ္ပမာဒဉ္စ မေဓာဝီ၊ ဓနံ သေဋ္ဌံဝ ရက္ခတိ.

၈၈၄. ‘‘မာ ပမာဒမနုယုဉ္ဇေထ၊ မာ ကာမရတိသန္ထဝံ [သန္ဓဝံ (က.)]၊

အပ္ပမတ္တော ဟိ ဈာယန္တော၊ ပပ္ပေါတိ ပရမံ သုခံ.

၈၈၅. ‘‘သွာဂတံ နာပဂတံ၊ နေတံ ဒုမ္မန္တိတံ မမ၊

သဝိဘတ္တေသု ဓမ္မေသု၊ ယံ သေဋ္ဌံ တဒုပါဂမံ.

၈၈၆. ‘‘သွာဂတံ နာပဂတံ၊ နေတံ ဒုမ္မန္တိတံ မမ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၈၈၇. ‘‘အရညေ ရုက္ခမူလေ ဝါ၊ ပဗ္ဗတေသု ဂုဟာသု ဝါ၊

တတ္ထ တတ္ထေဝ အဋ္ဌာသိံ၊ ဥဗ္ဗိဂ္ဂမနသော တဒါ.

၈၈၈. ‘‘သုခံ သယာမိ ဌာယာမိ၊ သုခံ ကပ္ပေမိ ဇီဝိတံ၊

အဟတ္ထပါသော မာရဿ၊ အဟော သတ္ထာနုကမ္ပိတော.

၈၈၉. ‘‘ဗြဟ္မဇစ္စော ပုရေ အာသိံ၊ ဥဒိစ္စော ဥဘတော အဟု၊

သောဇ္ဇ ပုတ္တော သုဂတဿ၊ ဓမ္မရာဇဿ သတ္ထုနော.

၈၉၀. ‘‘ဝီတတဏှော အနာဒါနော၊ ဂုတ္တဒွါရော သုသံဝုတော၊

အဃမူလံ ဝဓိတွာန၊ ပတ္တော မေ အာသဝက္ခယော.

၈၉၁. ‘‘ပရိစိဏ္ဏော မယာ သတ္ထာ၊ ကတံ ဗုဒ္ဓဿ သာသနံ၊

ဩဟိတော ဂရုကော ဘာရော၊ ဘဝနေတ္တိ သမူဟတာ’’တိ.

။ အင်္ဂုလိမာလော ထေရော။.