၈. အဋ္ဌမဝဂ္ဂေါ

၇၁. ‘‘သုသုခုမနိပုဏတ္ထဒဿိနာ၊ မတိကုသလေန နိဝါတဝုတ္တိနာ၊

သံသေဝိတဝုဒ္ဓသီလိနာ [သံသေဝိတဗုဒ္ဓသီလိနာ (က.)]၊ နိဗ္ဗာနံ န ဟိ တေန ဒုလ္လဘ’’န္တိ.

။ ဝစ္ဆပါလော ထေရော။.

၇၂. ‘‘ယထာ ကဠီရော သုသု ဝဍ္ဎိတဂ္ဂေါ၊ ဒုန္နိက္ခမော ဟောတိ ပသာခဇာတော၊

ဧဝံ အဟံ ဘရိယာယာနိတာယ၊ အနုမညံ မံ ပဗ္ဗဇိတောမှိ ဒါနီ’’တိ.

။ အာတုမော ထေရော။.

၇၃. ‘‘ဇိဏ္ဏဉ္စ ဒိသွာ ဒုခိတဉ္စ ဗျာဓိတံ၊ မတဉ္စ ဒိသွာ ဂတမာယုသင်္ခယံ၊

တတော အဟံ နိက္ခမိတူန ပဗ္ဗဇိံ၊ ပဟာယ ကာမာနိ မနောရမာနီ’’တိ.

။ မာဏဝေါ ထေရော။.

၇၄. ‘‘ကာမစ္ဆန္ဒော စ ဗျာပါဒေါ၊ ထိနမိဒ္ဓဉ္စ [ထီနမိဒ္ဓဉ္စ (သီ. သျာ.)] ဘိက္ခုနော၊

ဥဒ္ဓစ္စံ ဝိစိကိစ္ဆာ စ၊ သဗ္ဗသောဝ န ဝိဇ္ဇတီ’’တိ.

။ သုယာမနော ထေရော။.

၇၅. ‘‘သာဓု သုဝိဟိတာန ဒဿနံ၊ ကင်္ခါ ဆိဇ္ဇတိ ဗုဒ္ဓိ ဝဍ္ဎတိ၊

ဗာလမ္ပိ ကရောန္တိ ပဏ္ဍိတံ၊ တသ္မာ သာဓု သတံ သမာဂမော’’တိ.

။ သုသာရဒေါ ထေရော။.

၇၆. ‘‘ဥပ္ပတန္တေသု နိပတေ၊ နိပတန္တေသု ဥပ္ပတေ၊

ဝသေ အဝသမာနေသု၊ ရမမာနေသု နော ရမေ’’တိ.

။ ပိယဉ္ဇဟော ထေရော။.

၇၇. ‘‘ဣဒံ ပုရေ စိတ္တမစာရိ စာရိကံ၊ ယေနိစ္ဆကံ ယတ္ထကာမံ ယထာသုခံ၊

တဒဇ္ဇဟံ နိဂ္ဂဟေဿာမိ ယောနိသော၊ ဟတ္ထိပ္ပဘိန္နံ ဝိယ အင်္ကုသဂ္ဂဟော’’တိ.

။ ဟတ္ထာရောဟပုတ္တော ထေရော။.

၇၈. ‘‘အနေကဇာတိသံသာရံ၊ သန္ဓာဝိဿံ အနိဗ္ဗိသံ၊

တဿ မေ ဒုက္ခဇာတဿ၊ ဒုက္ခက္ခန္ဓော အပရဒ္ဓေါ’’တိ.

။ မေဏ္ဍသိရော ထေရော။.

၇၉. ‘‘သဗ္ဗော ရာဂေါ ပဟီနော မေ၊ သဗ္ဗော ဒေါသော သမူဟတော၊

သဗ္ဗော မေ ဝိဂတော မောဟော၊ သီတိဘူတောသ္မိ နိဗ္ဗုတော’’တိ.

။ ရက္ခိတော ထေရော။.

၈၀. ‘‘ယံ မယာ ပကတံ ကမ္မံ၊ အပ္ပံ ဝါ ယဒိ ဝါ ဗဟုံ၊

သဗ္ဗမေတံ ပရိက္ခီဏံ၊ နတ္ထိ ဒါနိ ပုနဗ္ဘဝေါ’’တိ.

။ ဥဂ္ဂေါ ထေရော။.

ဝဂ္ဂေါ အဋ္ဌမော နိဋ္ဌိတော.

တဿုဒ္ဒါနံ –

ဝစ္ဆပါလော စ ယော ထေရော၊ အာတုမော မာဏဝေါ ဣသိ၊

သုယာမနော သုသာရဒေါ၊ ထေရော ယော စ ပိယဉ္ဇဟော၊

အာရောဟပုတ္တော မေဏ္ဍသိရော၊ ရက္ခိတော ဥဂ္ဂသဝှယောတိ.