၉. နဝမဝဂ္ဂေါ

၈၁. ‘‘ယံ မယာ ပကတံ ပါပံ၊ ပုဗ္ဗေ အညာသု ဇာတိသု၊

ဣဓေဝ တံ ဝေဒနီယံ၊ ဝတ္ထု အညံ န ဝိဇ္ဇတီ’’တိ.

။ သမိတိဂုတ္တော ထေရော။.

၈၂. ‘‘ယေန ယေန သုဘိက္ခာနိ၊ သိဝါနိ အဘယာနိ စ၊

တေန ပုတ္တက ဂစ္ဆဿု၊ မာ သောကာပဟတော ဘဝါ’’တိ.

။ ကဿပေါ ထေရော။.

၈၃. ‘‘သီဟပ္ပမတ္တော ဝိဟရ၊ ရတ္တိန္ဒိဝမတန္ဒိတော၊

ဘာဝေဟိ ကုသလံ ဓမ္မံ၊ ဇဟ သီဃံ သမုဿယ’’န္တိ.

။ သီဟော ထေရော။.

၈၄. ‘‘သဗ္ဗရတ္တိံ သုပိတွာန၊ ဒိဝါ သင်္ဂဏိကေ ရတော၊

ကုဒါဿု နာမ ဒုမ္မေဓော၊ ဒုက္ခဿန္တံ ကရိဿတီ’’တိ.

။ နီတော ထေရော။.

၈၅. ‘‘စိတ္တနိမိတ္တဿ ကောဝိဒေါ၊ ပဝိဝေကရသံ ဝိဇာနိယ၊

ဈာယံ နိပကော ပတိဿတော၊ အဓိဂစ္ဆေယျ သုခံ နိရာမိသ’’န္တိ.

။ သုနာဂေါ ထေရော။.

၈၆. ‘‘ဣတော ဗဟိဒ္ဓါ ပုထု အညဝါဒိနံ၊ မဂ္ဂေါ န နိဗ္ဗာနဂမော ယထာ အယံ၊

ဣတိဿု သံဃံ ဘဂဝါနုသာသတိ၊ သတ္ထာ သယံ ပါဏိတလေဝ ဒဿယ’’န္တိ.

။ နာဂိတော ထေရော။.

၈၇. ‘‘ခန္ဓာ ဒိဋ္ဌာ ယထာဘူတံ၊ ဘဝါ သဗ္ဗေ ပဒါလိတာ၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ.

။ ပဝိဋ္ဌော ထေရော။.

၈၈. ‘‘အသက္ခိံ ဝတ အတ္တာနံ၊ ဥဒ္ဓါတုံ ဥဒကာ ထလံ၊

ဝုယှမာနော မဟောဃေဝ၊ သစ္စာနိ ပဋိဝိဇ္ဈဟ’’န္တိ.

။ အဇ္ဇုနော ထေရော။.

၈၉. ‘‘ဥတ္တိဏ္ဏာ ပင်္ကပလိပါ၊ ပါတာလာ ပရိဝဇ္ဇိတာ၊

မုတ္တော ဩဃာ စ ဂန္ထာ စ၊ သဗ္ဗေ မာနာ ဝိသံဟတာ’’တိ.

။ ဒေဝသဘော ထေရော။.

၉၀. ‘‘ပဉ္စက္ခန္ဓာ ပရိညာတာ၊ တိဋ္ဌန္တိ ဆိန္နမူလကာ၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ.

။ သာမိဒတ္တော ထေရော။.

ဝဂ္ဂေါ နဝမော နိဋ္ဌိတော.

တဿုဒ္ဒါနံ –

ထေရော သမိတိဂုတ္တော စ၊ ကဿပေါ သီဟသဝှယော၊

နီတော သုနာဂေါ နာဂိတော၊ ပဝိဋ္ဌော အဇ္ဇုနော ဣသိ၊

ဒေဝသဘော စ ယော ထေရော၊ သာမိဒတ္တော မဟဗ္ဗလောတိ.