၇. သတ္တမဝဂ္ဂေါ

၆၁. ‘‘ပဿတိ ပဿော ပဿန္တံ၊ အပဿန္တဉ္စ ပဿတိ၊

အပဿန္တော အပဿန္တံ၊ ပဿန္တဉ္စ န ပဿတီ’’တိ.

။ ဝပ္ပေါ ထေရော။.

၆၂. ‘‘ဧကကာ မယံ အရညေ ဝိဟရာမ၊ အပဝိဒ္ဓံဝ ဝနသ္မိံ ဒါရုကံ၊

တဿ မေ ဗဟုကာ ပိဟယန္တိ၊ နေရယိကာ ဝိယ သဂ္ဂဂါမိန’’န္တိ.

။ ဝဇ္ဇိပုတ္တော ထေရော။.

၆၃. ‘‘စုတာ ပတန္တိ ပတိတာ၊ ဂိဒ္ဓါ စ ပုနရာဂတာ၊

ကတံ ကိစ္စံ ရတံ ရမ္မံ၊ သုခေနနွာဂတံ သုခ’’န္တိ.

။ ပက္ခော ထေရော။.

၆၄. ‘‘ဒုမဝှယာယ ဥပ္ပန္နော၊ ဇာတော ပဏ္ဍရကေတုနာ၊

ကေတုဟာ ကေတုနာယေဝ၊ မဟာကေတုံ ပဓံသယီ’’တိ.

။ ဝိမလကောဏ္ဍညော ထေရော။.

၆၅. ‘‘ဥက္ခေပကတဝစ္ဆဿ၊ သင်္ကလိတံ ဗဟူဟိ ဝဿေဟိ၊

တံ ဘာသတိ ဂဟဋ္ဌာနံ၊ သုနိသိန္နော ဥဠာရပါမောဇ္ဇော’’တိ.

။ ဥက္ခေပကတဝစ္ဆော ထေရော။.

၆၆. ‘‘အနုသာသိ မဟာဝီရော၊ သဗ္ဗဓမ္မာန ပါရဂူ၊

တဿာဟံ ဓမ္မံ သုတွာန၊ ဝိဟာသိံ သန္တိကေ သတော၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ.

။ မေဃိယော ထေရော။.

၆၇. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ.

။ ဧကဓမ္မသဝနီယော ထေရော။.

၆၈. [ဥဒါ. ၃၇၊ ပါစိ. ၁၅၃] ‘‘အဓိစေတသော အပ္ပမဇ္ဇတော၊ မုနိနော မောနပထေသု သိက္ခတော၊

သောကာ န ဘဝန္တိ တာဒိနော၊ ဥပသန္တဿ သဒါ သတီမတော’’တိ.

။ ဧကုဒါနိယော ထေရော။.

၆၉. ‘‘သုတွာန ဓမ္မံ မဟတော မဟာရသံ၊ သဗ္ဗညုတညာဏဝရေန ဒေသိတံ၊

မဂ္ဂံ ပပဇ္ဇိံ [ပပဇ္ဇံ (က.)] အမတဿ ပတ္တိယာ၊ သော ယောဂက္ခေမဿ ပထဿ ကောဝိဒေါ’’တိ.

။ ဆန္နော ထေရော။.

၇၀. ‘‘သီလမေဝ ဣဓ အဂ္ဂံ၊ ပညဝါ ပန ဥတ္တမော၊

မနုဿေသု စ ဒေဝေသု၊ သီလပညာဏတော ဇယ’’န္တိ.

။ ပုဏ္ဏော ထေရော။.

ဝဂ္ဂေါ သတ္တမော နိဋ္ဌိတော.

တဿုဒ္ဒါနံ –

ဝပ္ပေါ စ ဝဇ္ဇိပုတ္တော စ၊ ပက္ခော ဝိမလကောဏ္ဍညော၊

ဥက္ခေပကတဝစ္ဆော စ၊ မေဃိယော ဧကဓမ္မိကော၊

ဧကုဒါနိယဆန္နာ စ၊ ပုဏ္ဏတ္ထေရော မဟဗ္ဗလောတိ.