၆. ဆဋ္ဌဝဂ္ဂေါ

၅၁. ‘‘ဝဿတိ ဒေဝေါ ယထာ သုဂီတံ၊ ဆန္နာ မေ ကုဋိကာ သုခါ နိဝါတာ၊

စိတ္တံ သုသမာဟိတဉ္စ မယှံ၊ အထ စေ ပတ္ထယသိ ပဝဿ ဒေဝါ’’တိ.

။ ဂေါဓိကော ထေရော။.

၅၂. ‘‘ဝဿတိ ဒေဝေါ ယထာ သုဂီတံ၊ ဆန္နာ မေ ကုဋိကာ သုခါ နိဝါတာ၊

စိတ္တံ သုသမာဟိတဉ္စ ကာယေ၊ အထ စေ ပတ္ထယသိ ပဝဿ ဒေဝါ’’တိ.

။ သုဗာဟုတ္ထေရော။.

၅၃. ‘‘ဝဿတိ ဒေဝေါ ယထာ သုဂီတံ၊ ဆန္နာ မေ ကုဋိကာ သုခါ နိဝါတာ၊

တဿံ ဝိဟရာမိ အပ္ပမတ္တော၊ အထ စေ ပတ္ထယသိ ပဝဿ ဒေဝါ’’တိ.

။ ဝလ္လိယော ထေရော။.

၅၄. ‘‘ဝဿတိ ဒေဝေါ ယထာ သုဂီတံ၊ ဆန္နာ မေ ကုဋိကာ သုခါ နိဝါတာ၊

တဿံ ဝိဟရာမိ အဒုတိယော၊ အထ စေ ပတ္ထယသိ ပဝဿ ဒေဝါ’’တိ.

။ ဥတ္တိယော ထေရော။.

၅၅. ‘‘အာသန္ဒိံ ကုဋိကံ ကတွာ၊ ဩဂယှ အဉ္ဇနံ ဝနံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ.

။ အဉ္ဇနဝနိယော ထေရော။.

၅၆. ‘‘ကော ကုဋိကာယံ ဘိက္ခု ကုဋိကာယံ၊ ဝီတရာဂေါ သုသမာဟိတစိတ္တော၊

ဧဝံ ဇာနာဟိ အာဝုသော၊ အမောဃာ တေ ကုဋိကာ ကတာ’’တိ.

။ ကုဋိဝိဟာရိတ္ထေရော။.

၅၇. ‘‘အယမာဟု ပုရာဏိယာ ကုဋိ၊ အညံ ပတ္ထယသေ နဝံ ကုဋိံ၊

အာသံ ကုဋိယာ ဝိရာဇယ၊ ဒုက္ခာ ဘိက္ခု ပုန နဝါ ကုဋီ’’တိ.

။ ဒုတိယကုဋိဝိဟာရိတ္ထေရော။.

၅၈. ‘‘ရမဏီယာ မေ ကုဋိကာ၊ သဒ္ဓါဒေယျာ မနောရမာ၊

န မေ အတ္ထော ကုမာရီဟိ၊ ယေသံ အတ္ထော တဟိံ ဂစ္ဆထ နာရိယော’’တိ.

။ ရမဏီယကုဋိကော ထေရော။.

၅၉. ‘‘သဒ္ဓါယာဟံ ပဗ္ဗဇိတော၊ အရညေ မေ ကုဋိကာ ကတာ၊

အပ္ပမတ္တော စ အာတာပီ၊ သမ္ပဇာနော ပတိဿတော’’တိ [ပဋိဿတောတိ (က.)].

။ ကောသလဝိဟာရိတ္ထေရော။.

၆၀. ‘‘တေ မေ ဣဇ္ဈိံသု သင်္ကပ္ပါ၊ ယဒတ္ထော ပါဝိသိံ ကုဋိံ၊

ဝိဇ္ဇာဝိမုတ္တိံ ပစ္စေသံ၊ မာနာနုသယမုဇ္ဇဟ’’န္တိ.

။ သီဝလိတ္ထေရော။.

ဝဂ္ဂေါ ဆဋ္ဌော နိဋ္ဌိတော.

တဿုဒ္ဒါနံ –

ဂေါဓိကော စ သုဗာဟု စ၊ ဝလ္လိယော ဥတ္တိယော ဣသိ၊

အဉ္ဇနဝနိယော ထေရော၊ ဒုဝေ ကုဋိဝိဟာရိနော၊

ရမဏီယကုဋိကော စ၊ ကောသလဝှယသီဝလီတိ.