၅. ပဉ္စမဝဂ္ဂေါ

၄၁. ‘‘ဝိဝရမနုပတန္တိ ဝိဇ္ဇုတာ၊ ဝေဘာရဿ စ ပဏ္ဍဝဿ စ၊

နဂဝိဝရဂတော စ ဈာယတိ၊ ပုတ္တော အပ္ပဋိမဿ တာဒိနော’’တိ.

။ သိရိဝဍ္ဎော ထေရော။.

၄၂. ‘‘စာလေ ဥပစာလေ သီသူပစာလေ ( ) [(စာလာ ဥပစာလာ၊ သီသူပစာလာ) (က.)] ပတိဿတာ [ပဋိဿတိကာ (သျာ. က.)] နု ခေါ ဝိဟရထ၊

အာဂတော ဝေါ ဝါလံ ဝိယ ဝေဓီ’’တိ.

။ ခဒိရဝနိယော ထေရော။.

၄၃. ‘‘သုမုတ္တိကော သုမုတ္တိကော သာဟု၊ သုမုတ္တိကောမှိ တီဟိ ခုဇ္ဇကေဟိ၊

အသိတာသု မယာ နင်္ဂလာသု၊ မယာ ခုဒ္ဒကုဒ္ဒါလာသု မယာ.

ယဒိပိ ဣဓမေဝ ဣဓမေဝ၊ အထ ဝါပိ အလမေဝ အလမေဝ၊

ဈာယ သုမင်္ဂလ ဈာယ သုမင်္ဂလ၊ အပ္ပမတ္တော ဝိဟရ သုမင်္ဂလာ’’တိ.

။ သုမင်္ဂလော ထေရော။.

၄၄. [သံ. နိ. ၁.၂၃၉] ‘‘မတံ ဝါ အမ္မ ရောဒန္တိ၊ ယော ဝါ ဇီဝံ န ဒိဿတိ၊

ဇီဝန္တံ မံ အမ္မ ပဿန္တီ၊ ကသ္မာ မံ အမ္မ ရောဒသီ’’တိ.

။ သာနုတ္ထေရော။.

၄၅. ‘‘ယထာပိ ဘဒ္ဒေါ အာဇညော၊ ခလိတွာ ပတိတိဋ္ဌတိ၊

ဧဝံ ဒဿနသမ္ပန္နံ၊ သမ္မာသမ္ဗုဒ္ဓသာဝက’’န္တိ.

။ ရမဏီယဝိဟာရိတ္ထေရော။.

၄၆. ‘‘သဒ္ဓါယာဟံ ပဗ္ဗဇိတော၊ အဂါရသ္မာနဂါရိယံ၊

သတိ ပညာ စ မေ ဝုဍ္ဎာ၊ စိတ္တဉ္စ သုသမာဟိတံ၊

ကာမံ ကရဿု ရူပါနိ၊ နေဝ မံ ဗျာဓယိဿသီ’’တိ [ဗာဓယိဿသီတိ (သီ.)၊ ဗျာထယိဿသီတိ (?)].

။ သမိဒ္ဓိတ္ထေရော။.

၄၇. ‘‘နမော တေ ဗုဒ္ဓ ဝီရတ္ထု၊ ဝိပ္ပမုတ္တောသိ သဗ္ဗဓိ၊

တုယှာပဒါနေ ဝိဟရံ၊ ဝိဟရာမိ အနာသဝေါ’’တိ.

။ ဥဇ္ဇယော ထေရော။.

၄၈. ‘‘ယတော အဟံ ပဗ္ဗဇိတော၊ အဂါရသ္မာနဂါရိယံ၊

နာဘိဇာနာမိ သင်္ကပ္ပံ၊ အနရိယံ ဒေါသသံဟိတ’’န္တိ.

။ သဉ္ဇယော ထေရော။.

၄၉. ‘‘စိဟစိဟာဘိနဒိတေ [ဝိဟဝိဟာဘိနဒိတေ (သီ. သျာ.)]၊ သိပ္ပိကာဘိရုတေဟိ စ၊

န မေ တံ ဖန္ဒတိ စိတ္တံ၊ ဧကတ္တနိရတံ ဟိ မေ’’တိ.

။ ရာမဏေယျကော ထေရော။.

၅၀. ‘‘ဓရဏီ စ သိဉ္စတိ ဝါတိ၊ မာလုတော ဝိဇ္ဇုတာ စရတိ နဘေ၊

ဥပသမန္တိ ဝိတက္ကာ၊ စိတ္တံ သုသမာဟိတံ မမာ’’တိ.

။ ဝိမလော ထေရော။.

ဝဂ္ဂေါ ပဉ္စမော နိဋ္ဌိတော.

တဿုဒ္ဒါနံ –

သိရီဝဍ္ဎော ရေဝတော ထေရော၊ သုမင်္ဂလော သာနုသဝှယော၊

ရမဏီယဝိဟာရီ စ၊ သမိဒ္ဓိဥဇ္ဇယသဉ္ဇယာ၊

ရာမဏေယျော စ သော ထေရော၊ ဝိမလော စ ရဏဉ္ဇဟောတိ.