၄. စတုတ္ထဝဂ္ဂေါ

၃၁. ‘‘ဖုဋ္ဌော ဍံသေဟိ မကသေဟိ၊ အရညသ္မိံ ဗြဟာဝနေ၊

နာဂေါ သံဂါမသီသေဝ၊ သတော တတြာဓိဝါသယေ’’တိ.

။ ဂဟွရတီရိယော ထေရော။.

၃၂. ‘‘အဇရံ ဇီရမာနေန၊ တပ္ပမာနေန နိဗ္ဗုတိံ၊

နိမိယံ [နိမ္မိဿံ (သီ.)၊ နိရာမိသံ (သျာ.)၊ နိမိနေယျံ (?)] ပရမံ သန္တိံ၊ ယောဂက္ခေမံ အနုတ္တရ’’န္တိ.

။ သုပ္ပိယော ထေရော။.

၃၃. ‘‘ယထာပိ ဧကပုတ္တသ္မိံ၊ ပိယသ္မိံ ကုသလီ သိယာ၊

ဧဝံ သဗ္ဗေသု ပါဏေသု၊ သဗ္ဗတ္ထ ကုသလော သိယာ’’တိ.

။ သောပါကော ထေရော။.

၃၄. ‘‘အနာသန္နဝရာ ဧတာ၊ နိစ္စမေဝ ဝိဇာနတာ၊

ဂါမာ အရညမာဂမ္မ၊ တတော ဂေဟံ ဥပါဝိသိ [ဥပါဝိသိံ (သီ.)]၊

တတော ဥဋ္ဌာယ ပက္ကာမိ၊ အနာမန္တေတွာ [အနာမန္တိယ (သီ.)] ပေါသိယော’’တိ.

။ ပေါသိယော ထေရော။.

၃၅. ‘‘သုခံ သုခတ္ထော လဘတေ တဒါစရံ၊ ကိတ္တိဉ္စ ပပ္ပေါတိ ယသဿ ဝဍ္ဎတိ၊

ယော အရိယမဋ္ဌင်္ဂိကမဉ္ဇသံ ဥဇုံ၊ ဘာဝေတိ မဂ္ဂံ အမတဿ ပတ္တိယာ’’တိ.

။ သာမညကာနိတ္ထေရော။.

၃၆. ‘‘သာဓု သုတံ သာဓု စရိတကံ၊ သာဓု သဒါ အနိကေတဝိဟာရော၊

အတ္ထပုစ္ဆနံ ပဒက္ခိဏကမ္မံ၊ ဧတံ သာမညမကိဉ္စနဿာ’’တိ.

။ ကုမာပုတ္တော ထေရော။.

၃၇. ‘‘နာနာဇနပဒံ ယန္တိ၊ ဝိစရန္တာ အသညတာ၊

သမာဓိဉ္စ ဝိရာဓေန္တိ၊ ကိံသု ရဋ္ဌစရိယာ ကရိဿတိ၊

တသ္မာ ဝိနေယျ သာရမ္ဘံ၊ ဈာယေယျ အပုရက္ခတော’’တိ.

။ ကုမာပုတ္တတ္ထေရဿ သဟာယကော ထေရော။.

၃၈. ‘‘ယော ဣဒ္ဓိယာ သရဘုံ အဋ္ဌပေသိ၊ သော ဂဝမ္ပတိ အသိတော အနေဇော၊

တံ သဗ္ဗသင်္ဂါတိဂတံ မဟာမုနိံ၊ ဒေဝါ နမဿန္တိ ဘဝဿ ပါရဂု’’န္တိ.

။ ဂဝမ္ပတိတ္ထေရော။.

၃၉. [သံ. နိ. ၁.၂၁၊ ၉၇]‘‘သတ္တိယာ ဝိယ ဩမဋ္ဌော၊ ဍယှမာနောဝ [ဍယှမာနေဝ (သဗ္ဗတ္ထ)] မတ္ထကေ၊

ကာမရာဂပ္ပဟာနာယ၊ သတော ဘိက္ခု ပရိဗ္ဗဇေ’’တိ.

။ တိဿော ထေရော။.

၄၀. ‘‘သတ္တိယာ ဝိယ ဩမဋ္ဌော၊ ဍယှမာနောဝ မတ္ထကေ၊

ဘဝရာဂပ္ပဟာနာယ၊ သတော ဘိက္ခု ပရိဗ္ဗဇေ’’တိ.

။ ဝဍ္ဎမာနော ထေရော။.

ဝဂ္ဂေါ စတုတ္ထော နိဋ္ဌိတော.

တဿုဒ္ဒါနံ –

ဂဟွရတီရိယော သုပ္ပိယော၊ သောပါကော စေဝ ပေါသိယော၊

သာမညကာနိ ကုမာပုတ္တော၊ ကုမာပုတ္တသဟာယကော၊

ဂဝမ္ပတိ တိဿတ္ထေရော၊ ဝဍ္ဎမာနော မဟာယသောတိ.