၃. တတိယဝဂ္ဂေါ

၂၁. ‘‘နာဟံ ဘယဿ ဘာယာမိ၊ သတ္ထာ နော အမတဿ ကောဝိဒေါ၊

ယတ္ထ ဘယံ နာဝတိဋ္ဌတိ၊ တေန မဂ္ဂေန ဝဇန္တိ ဘိက္ခဝေါ’’တိ.

။ နိဂြောဓော ထေရော။.

၂၂. ‘‘နီလာ သုဂီဝါ သိခိနော၊ မောရာ ကာရမ္ဘိယံ [ကာရံဝိယံ (သီ.)၊ ကာရဝိယံ (သျာ.)] အဘိနဒန္တိ၊

တေ သီတဝါတကီဠိတာ [သီတဝါတကဒ္ဒိတကလိတာ (သီ.)၊ သီတဝါတကလိတာ (သျာ.)]၊ သုတ္တံ ဈာယံ [ဈာနံ (သျာ.)၊ ဈာယိံ (?)] နိဗောဓေန္တီ’’တိ.

။ စိတ္တကော ထေရော။.

၂၃. ‘‘အဟံ ခေါ ဝေဠုဂုမ္ဗသ္မိံ၊ ဘုတွာန မဓုပါယသံ၊

ပဒက္ခိဏံ သမ္မသန္တော၊ ခန္ဓာနံ ဥဒယဗ္ဗယံ၊

သာနုံ ပဋိဂမိဿာမိ၊ ဝိဝေကမနုဗြူဟယ’’န္တိ.

။ ဂေါသာလော ထေရော။.

၂၄. ‘‘အနုဝဿိကော ပဗ္ဗဇိတော၊ ပဿ ဓမ္မသုဓမ္မတံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ.

။ သုဂန္ဓော ထေရော။.

၂၅. ‘‘ဩဘာသဇာတံ ဖလဂံ၊ စိတ္တံ ယဿ အဘိဏှသော၊

တာဒိသံ ဘိက္ခုမာသဇ္ဇ၊ ကဏှ ဒုက္ခံ နိဂစ္ဆသီ’’တိ.

။ နန္ဒိယော ထေရော။.

၂၆. ‘‘သုတွာ သုဘာသိတံ ဝါစံ၊ ဗုဒ္ဓဿာဒိစ္စဗန္ဓုနော၊

ပစ္စဗျဓိံ ဟိ နိပုဏံ၊ ဝါလဂ္ဂံ ဥသုနာ ယထာ’’တိ.

။ အဘယော ထေရော။.

၂၇. ‘‘ဒဗ္ဗံ ကုသံ ပေါဋကိလံ၊ ဥသီရံ မုဉ္ဇပဗ္ဗဇံ၊

ဥရသာ ပနုဒိဿာမိ၊ ဝိဝေကမနုဗြူဟယ’’န္တိ.

။ လောမသကင်္ဂိယော ထေရော။.

၂၈. ‘‘ကစ္စိ နော ဝတ္ထပသုတော၊ ကစ္စိ နော ဘူသနာရတော၊

ကစ္စိ သီလမယံ ဂန္ဓံ၊ ကိံ တွံ ဝါယသိ [ကစ္စိ သီလမယံ ဂန္ဓံ၊ တွံ ဝါသိ (သျာ.)] နေတရာ ပဇာ’’တိ.

။ ဇမ္ဗုဂါမိကပုတ္တော ထေရော။.

၂၉. ‘‘သမုန္နမယမတ္တာနံ၊ ဥသုကာရောဝ တေဇနံ၊

စိတ္တံ ဥဇုံ ကရိတွာန၊ အဝိဇ္ဇံ ဘိန္ဒ ဟာရိတာ’’တိ.

။ ဟာရိတော ထေရော။.

၃၀. ‘‘အာဗာဓေ မေ သမုပ္ပန္နေ၊ သတိ မေ ဥဒပဇ္ဇထ၊

အာဗာဓော မေ သမုပ္ပန္နော၊ ကာလော မေ နပ္ပမဇ္ဇိတု’’န္တိ.

။ ဥတ္တိယော ထေရော။.

ဝဂ္ဂေါ တတိယော နိဋ္ဌိတော.

တဿုဒ္ဒါနံ –

နိဂြောဓော စိတ္တကော ထေရော၊ ဂေါသာလထေရော သုဂန္ဓော၊

နန္ဒိယော အဘယော ထေရော၊ ထေရော လောမသကင်္ဂိယော၊

ဇမ္ဗုဂါမိကပုတ္တော စ၊ ဟာရိတော ဥတ္တိယော ဣသီတိ.