၂. ဒုတိယဝဂ္ဂေါ

၁၁. ‘‘ပါမောဇ္ဇဗဟုလော ဘိက္ခု၊ ဓမ္မေ ဗုဒ္ဓပ္ပဝေဒိတေ၊

အဓိဂစ္ဆေ ပဒံ သန္တံ၊ သင်္ခါရူပသမံ သုခ’’န္တိ.

။ စူဠဝစ္ဆော [စူလဂဝစ္ဆော (သီ.)] ထေရော။.

၁၂. ‘‘ပညာဗလီ သီလဝတူပပန္နော၊ သမာဟိတော ဈာနရတော သတီမာ၊

ယဒတ္ထိယံ ဘောဇနံ ဘုဉ္ဇမာနော၊ ကင်္ခေထ ကာလံ ဣဓ ဝီတရာဂေါ’’တိ.

။ မဟာဝစ္ဆော [မဟာဂဝစ္ဆော (သီ.)] ထေရော။.

၁၃. ‘‘နီလဗ္ဘဝဏ္ဏာ ရုစိရာ၊ သီတဝါရီ သုစိန္ဓရာ၊

ဣန္ဒဂေါပကသဉ္ဆန္နာ၊ တေ သေလာ ရမယန္တိ မ’’န္တိ.

။ ဝနဝစ္ဆော ထေရော။.

၁၄. ‘‘ဥပဇ္ဈာယော မံ အဝစ၊ ဣတော ဂစ္ဆာမ သီဝက၊

ဂါမေ မေ ဝသတိ ကာယော၊ အရညံ မေ ဂတော မနော၊

သေမာနကောပိ ဂစ္ဆာမိ၊ နတ္ထိ သင်္ဂေါ ဝိဇာနတ’’န္တိ.

။ သိဝကော သာမဏေရော။.

၁၅. ‘‘ပဉ္စ ဆိန္ဒေ ပဉ္စ ဇဟေ၊ ပဉ္စ စုတ္တရိ ဘာဝယေ၊

ပဉ္စသင်္ဂါတိဂေါ ဘိက္ခု၊ ဩဃတိဏ္ဏောတိ ဝုစ္စတီ’’တိ.

။ ကုဏ္ဍဓာနော ထေရော။.

၁၆. ‘‘ယထာပိ ဘဒ္ဒေါ အာဇညော၊ နင်္ဂလာဝတ္တနီ သိခီ၊

ဂစ္ဆတိ အပ္ပကသိရေန၊ ဧဝံ ရတ္တိန္ဒိဝါ မမ၊

ဂစ္ဆန္တိ အပ္ပကသိရေန၊ သုခေ လဒ္ဓေ နိရာမိသေ’’တိ.

။ ဗေလဋ္ဌသီသော ထေရော။.

၁၇. ‘‘မိဒ္ဓီ ယဒါ ဟောတိ မဟဂ္ဃသော စ၊ နိဒ္ဒါယိတာ သမ္ပရိဝတ္တသာယီ၊

မဟာဝရာဟောဝ နိဝါပပုဋ္ဌော၊ ပုနပ္ပုနံ ဂဗ္ဘမုပေတိ မန္ဒော’’တိ.

။ ဒါသကော ထေရော။.

၁၈. ‘‘အဟု ဗုဒ္ဓဿ ဒါယာဒေါ၊ ဘိက္ခု ဘေသကဠာဝနေ၊

ကေဝလံ အဋ္ဌိသညာယ၊ အဖရီ ပထဝိံ [ပဌဝိံ (သီ. သျာ.)] ဣမံ၊

မညေဟံ ကာမရာဂံ သော၊ ခိပ္ပမေဝ ပဟိဿတီ’’တိ [ပဟီယဘိ (သဗ္ဗတ္ထ ပါဠိယံ)].

။ သိင်္ဂါလပိတာ [သီဂါလပိတာ (သီ.)] ထေရော။.

၁၉. [ဓ. ပ. ၈၀၊ ၁၄၅ ဓမ္မပဒေပိ] ‘‘ဥဒကံ ဟိ နယန္တိ နေတ္တိကာ၊ ဥသုကာရာ နမယန္တိ [ဒမယန္တိ (က.)] တေဇနံ၊

ဒါရုံ နမယန္တိ တစ္ဆကာ၊ အတ္တာနံ ဒမယန္တိ သုဗ္ဗတာ’’တိ.

။ ကုလော [ကုဏ္ဍလော (သီ.)၊ ကုဠော (သျာ. က.)] ထေရော။.

၂၀. ‘‘မရဏေ မေ ဘယံ နတ္ထိ၊ နိကန္တိ နတ္ထိ ဇီဝိတေ၊

သန္ဒေဟံ နိက္ခိပိဿာမိ၊ သမ္ပဇာနော ပဋိဿတော’’တိ [ပတိဿတောတိ (သီ. သျာ.)].

။ အဇိတော ထေရော ။.

ဝဂ္ဂေါ ဒုတိယော နိဋ္ဌိတော.

တဿုဒ္ဒါနံ –

စူဠဝစ္ဆော မဟာဝစ္ဆော၊ ဝနဝစ္ဆော စ သီဝကော၊

ကုဏ္ဍဓာနော စ ဗေလဋ္ဌိ၊ ဒါသကော စ တတောပရိ၊

သိင်္ဂါလပိတိကော ထေရော၊ ကုလော စ အဇိတော ဒသာတိ.