၁၁. ဧကာဒသမဝဂ္ဂေါ

၁၀၁. ‘‘ဟိတွာ ဂိဟိတ္တံ အနဝေါသိတတ္တော၊ မုခနင်္ဂလီ ဩဒရိကော ကုသီတော၊

မဟာဝရာဟောဝ နိဝါပပုဋ္ဌော၊ ပုနပ္ပုနံ ဂဗ္ဘမုပေတိ မန္ဒော’’တိ.

။ ဗေလဋ္ဌာနိကော ထေရော။.

၁၀၂. ‘‘မာနေန ဝဉ္စိတာသေ၊ သင်္ခါရေသု သံကိလိဿမာနာသေ၊

လာဘာလာဘေန မထိတာ၊ သမာဓိံ နာဓိဂစ္ဆန္တီ’’တိ.

။ သေတုစ္ဆော ထေရော။.

၁၀၃. ‘‘နာဟံ ဧတေန အတ္ထိကော၊ သုခိတော ဓမ္မရသေန တပ္ပိတော၊

ပိတွာ [ပီတွာန (သီ. သျာ.)] ရသဂ္ဂမုတ္တမံ၊ န စ ကာဟာမိ ဝိသေန သန္ထဝ’’န္တိ.

။ ဗန္ဓုရော [ဗန္ဓနော (က.)] ထေရော။.

၁၀၄. ‘‘လဟုကော ဝတ မေ ကာယော၊ ဖုဋ္ဌော စ ပီတိသုခေန ဝိပုလေန၊

တူလမိဝ ဧရိတံ မာလုတေန၊ ပိလဝတီဝ မေ ကာယော’’တိ.

။ ခိတကော ထေရော။.

၁၀၅. ‘‘ဥက္ကဏ္ဌိတောပိ န ဝသေ၊ ရမမာနောပိ ပက္ကမေ၊

န တွေဝါနတ္ထသံဟိတံ၊ ဝသေ ဝါသံ ဝိစက္ခဏော’’တိ.

။ မလိတဝမ္ဘော ထေရော။.

၁၀၆. ‘‘သတလိင်္ဂဿ အတ္ထဿ၊ သတလက္ခဏဓာရိနော၊

ဧကင်္ဂဒဿီ ဒုမ္မေဓော၊ သတဒဿီ စ ပဏ္ဍိတော’’တိ.

။ သုဟေမန္တော ထေရော။.

၁၀၇. ‘‘ပဗ္ဗဇိံ တုလယိတွာန၊ အဂါရသ္မာနဂါရိယံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ.

။ ဓမ္မသဝေါ ထေရော။.

၁၀၈. ‘‘သ ဝီသဝဿသတိကော၊ ပဗ္ဗဇိံ အနဂါရိယံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ.

။ ဓမ္မသဝပိတု ထေရော။.

၁၀၉. ‘‘န နူနာယံ ပရမဟိတာနုကမ္ပိနော၊ ရဟောဂတော အနုဝိဂဏေတိ သာသနံ၊

တထာဟယံ ဝိဟရတိ ပါကတိန္ဒြိယော၊ မိဂီ ယထာ တရုဏဇာတိကာ ဝနေ’’တိ.

။ သင်္ဃရက္ခိတော ထေရော။.

၁၁၀. ‘‘နဂါ နဂဂ္ဂေသု သုသံဝိရူဠှာ၊ ဥဒဂ္ဂမေဃေန နဝေန သိတ္တာ၊

ဝိဝေကကာမဿ အရညသညိနော၊ ဇနေတိ ဘိယျော ဥသဘဿ ကလျတ’’န္တိ.

။ ဥသဘော ထေရော။.

ဝဂ္ဂေါ ဧကာဒသမော နိဋ္ဌိတော.

တဿုဒ္ဒါနံ –

ဗေလဋ္ဌာနိကော သေတုစ္ဆော၊ ဗန္ဓုရော ခိတကော ဣသိ၊

မလိတဝမ္ဘော သုဟေမန္တော၊ ဓမ္မသဝေါ ဓမ္မသဝပိတာ၊

သင်္ဃရက္ခိတတ္ထေရော စ၊ ဥသဘော စ မဟာမုနီတိ.