၁၂. ဒွါဒသမဝဂ္ဂေါ

၁၁၁. ‘‘ဒုပ္ပဗ္ဗဇ္ဇံ ဝေ ဒုရဓိဝါသာ ဂေဟာ၊ ဓမ္မော ဂမ္ဘီရော ဒုရဓိဂမာ ဘောဂါ၊

ကိစ္ဆာ ဝုတ္တိ နော ဣတရီတရေနေဝ၊ ယုတ္တံ စိန္တေတုံ သတတမနိစ္စတ’’န္တိ.

။ ဇေန္တော ထေရော။.

၁၁၂. ‘‘တေဝိဇ္ဇောဟံ မဟာဈာယီ၊ စေတောသမထကောဝိဒေါ၊

သဒတ္ထော မေ အနုပ္ပတ္တော၊ ကတံ ဗုဒ္ဓဿ သာသန’’န္တိ.

။ ဝစ္ဆဂေါတ္တော ထေရော။.

၁၁၃. ‘‘အစ္ဆောဒိကာ ပုထုသိလာ၊ဂေါနင်္ဂုလမိဂါယုတာ၊

အမ္ဗုသေဝါလသဉ္ဆန္နာ၊ တေ သေလာ ရမယန္တိ မ’’န္တိ.

။ ဝနဝစ္ဆော ထေရော။.

၁၁၄. ‘‘ကာယဒုဋ္ဌုလ္လဂရုနော၊ ဟိယျမာနမှိ [ဟီယမာနမှိ (သီ.)] ဇီဝိတေ၊

သရီရသုခဂိဒ္ဓဿ၊ ကုတော သမဏသာဓုတာ’’တိ.

။ အဓိမုတ္တော ထေရော။.

၁၁၅. ‘‘ဧသာဝဟိယျသေ ပဗ္ဗတေန၊ ဗဟုကုဋဇသလ္လကိကေန [သလ္လကိတေန (သီ.)၊ သလ္လရိကေန (သျာ.)]၊

နေသာဒကေန ဂိရိနာ၊ ယသဿိနာ ပရိစ္ဆဒေနာ’’တိ.

။ မဟာနာမော ထေရော။.

၁၁၆. ‘‘ဆဖဿာယတနေ ဟိတွာ၊ ဂုတ္တဒွါရော သုသံဝုတော၊

အဃမူလံ ဝမိတွာန၊ ပတ္တော မေ အာသဝက္ခယော’’တိ.

။ ပါရာပရိယော [ပါရာသရိယော (သီ.)၊ ပါရံပရိယော (က.)] ထေရော ။.

၁၁၇. ‘‘သုဝိလိတ္တော သုဝသနော၊သဗ္ဗာဘရဏဘူသိတော၊

တိဿော ဝိဇ္ဇာ အဇ္ဈဂမိံ၊ ကတံ ဗုဒ္ဓဿ သာသန’’န္တိ.

။ ယသော ထေရော။.

၁၁၈. ‘‘အဘိသတ္တောဝ နိပတတိ၊ ဝယော ရူပံ အညမိဝ တထေဝ သန္တံ၊

တဿေဝ သတော အဝိပ္ပဝသတော၊ အညဿေဝ သရာမိ အတ္တာန’’န္တိ.

။ ကိမိလော [ကိမ္ဗိလော (သီ. သျာ.)] ထေရော။.

၁၁၉. ‘‘ရုက္ခမူလဂဟနံ ပသက္ကိယ၊ နိဗ္ဗာနံ ဟဒယသ္မိံ ဩပိယ၊

ဈာယ ဂေါတမ မာ စ ပမာဒေါ၊ ကိံ တေ ဗိဠိဗိဠိကာ ကရိဿတီ’’တိ.

။ ဝဇ္ဇိပုတ္တော ထေရော။.

၁၂၀. ‘‘ပဉ္စက္ခန္ဓာ ပရိညာတာ၊ တိဋ္ဌန္တိ ဆိန္နမူလကာ၊

ဒုက္ခက္ခယော အနုပ္ပတ္တော၊ပတ္တော မေ အာသဝက္ခယော’’တိ.

။ ဣသိဒတ္တော ထေရော။.

ဝဂ္ဂေါ ဒွါဒသမော နိဋ္ဌိတော.

တဿုဒ္ဒါနံ –

ဇေန္တော စ ဝစ္ဆဂေါတ္တော စ၊ ဝစ္ဆော စ ဝနသဝှယော၊

အဓိမုတ္တော မဟာနာမော၊ ပါရာပရိယော ယသောပိ စ၊

ကိမိလော ဝဇ္ဇိပုတ္တော စ၊ ဣသိဒတ္တော မဟာယသောတိ.

ဧကကနိပါတော နိဋ္ဌိတော.