၁. ပဌမဝဂ္ဂေါ

၁. ‘‘ဆန္နာ မေ ကုဋိကာ သုခါ နိဝါတာ၊ ဝဿ ဒေဝ ယထာသုခံ၊

စိတ္တံ မေ သုသမာဟိတံ ဝိမုတ္တံ၊ အာတာပီ ဝိဟရာမိ ဝဿ ဒေဝါ’’တိ.

ဣတ္ထံ သုဒံ [ဣတ္ထံ သုမံ (က. အဋ္ဌ.)] အာယသ္မာ သုဘူတိတ္ထေရော ဂါထံ အဘာသိတ္ထာတိ.

၂. ‘‘ဥပသန္တော ဥပရတော၊ မန္တဘာဏီ အနုဒ္ဓတော၊

ဓုနာတိ ပါပကေ ဓမ္မေ၊ ဒုမပတ္တံဝ မာလုတော’’တိ.

ဣတ္ထံ သုဒံ အာယသ္မာ မဟာကောဋ္ဌိကော [မဟာကောဋ္ဌိတော (သီ. သျာ.)] ထေရော ဂါထံ အဘာသိတ္ထာတိ.

၃. ‘‘ပညံ ဣမံ ပဿ တထာဂတာနံ၊ အဂ္ဂိ ယထာ ပဇ္ဇလိတော နိသီထေ၊

အာလောကဒါ စက္ခုဒဒါ ဘဝန္တိ၊ ယေ အာဂတာနံ ဝိနယန္တိ ကင်္ခ’’န္တိ.

ဣတ္ထံ သုဒံ အာယသ္မာ ကင်္ခါရေဝတော ထေရော ဂါထံ အဘာသိတ္ထာတိ.

၄. ‘‘သမ္ဘိရေဝ သမာသေထ၊ ပဏ္ဍိတေဟတ္ထဒဿိဘိ၊

အတ္ထံ မဟန္တံ ဂမ္ဘီရံ၊ ဒုဒ္ဒသံ နိပုဏံ အဏုံ၊

ဓီရာ သမဓိဂစ္ဆန္တိ၊ အပ္ပမတ္တာ ဝိစက္ခဏာ’’တိ.

ဣတ္ထံ သုဒံ အာယသ္မာ ပုဏ္ဏော မန္တာဏိပုတ္တော [မန္တာနိပုတ္တော (သျာ. က.)] ထေရော ဂါထံ အဘာသိတ္ထာတိ.

၅. ‘‘ယော ဒုဒ္ဒမိယော ဒမေန ဒန္တော၊ ဒဗ္ဗော သန္တုသိတော ဝိတိဏ္ဏကင်္ခေါ၊

ဝိဇိတာဝီ အပေတဘေရဝေါ ဟိ၊ ဒဗ္ဗော သော ပရိနိဗ္ဗုတော ဌိတတ္တော’’တိ.

ဣတ္ထံ သုဒံ အာယသ္မာ ဒဗ္ဗော ထေရော ဂါထံ အဘာသိတ္ထာတိ.

၆. ‘‘ယော သီတဝနံ ဥပဂါ ဘိက္ခု၊ ဧကော သန္တုသိတော သမာဟိတတ္တော၊

ဝိဇိတာဝီ အပေတလောမဟံသော၊ ရက္ခံ ကာယဂတာသတိံ ဓိတိမာ’’တိ.

ဣတ္ထံ သုဒံ အာယသ္မာ သီတဝနိယော ထေရော ဂါထံ အဘာသိတ္ထာတိ.

၇. ‘‘ယောပါနုဒီ မစ္စုရာဇဿ သေနံ၊ နဠသေတုံဝ သုဒုဗ္ဗလံ မဟောဃော၊

ဝိဇိတာဝီ အပေတဘေရဝေါ ဟိ၊ ဒန္တော သော ပရိနိဗ္ဗုတော ဌိတတ္တော’’တိ.

ဣတ္ထံ သုဒံ အာယသ္မာ ဘလ္လိယော ထေရော ဂါထံ အဘာသိတ္ထာတိ.

၈. ‘‘ယော ဒုဒ္ဒမိယော ဒမေန ဒန္တော၊ ဝီရော သန္တုသိတော ဝိတိဏ္ဏကင်္ခေါ၊

ဝိဇိတာဝီ အပေတလောမဟံသော၊ ဝီရော သော ပရိနိဗ္ဗုတော ဌိတတ္တော’’တိ.

ဣတ္ထံ သုဒံ အာယသ္မာ ဝီရော ထေရော ဂါထံ အဘာသိတ္ထာတိ.

၉. ‘‘သွာဂတံ န ဒုရာဂတံ [နာပဂတံ (သီ. သျာ.)]၊ နယိဒံ ဒုမန္တိတံ မမ၊

သံဝိဘတ္တေသု ဓမ္မေသု၊ ယံ သေဋ္ဌံ တဒုပါဂမိ’’န္တိ.

ဣတ္ထံ သုဒံ အာယသ္မာ ပိလိန္ဒဝစ္ဆော [ပိလိန္ဒိဝစ္ဆော (သီ.)] ထေရော ဂါထံ အဘာသိတ္ထာတိ.

၁၀. ‘‘ဝိဟရိ အပေက္ခံ ဣဓ ဝါ ဟုရံ ဝါ၊ ယော ဝေဒဂူ သမိတော ယတတ္တော၊

သဗ္ဗေသု ဓမ္မေသု အနူပလိတ္တော၊ လောကဿ ဇညာ ဥဒယဗ္ဗယဉ္စာ’’တိ.

ဣတ္ထံ သုဒံ အာယသ္မာ ပုဏ္ဏမာသော ထေရော ဂါထံ အဘာသိတ္ထာတိ.

ဝဂ္ဂေါ ပဌမော နိဋ္ဌိတော.

တဿုဒ္ဒါနံ –

သုဘူတိ ကောဋ္ဌိကော ထေရော၊ ကင်္ခါရေဝတသမ္မတော၊

မန္တာဏိပုတ္တော ဒဗ္ဗော စ၊ သီတဝနိယော စ ဘလ္လိယော၊

ဝီရော ပိလိန္ဒဝစ္ဆော စ၊ ပုဏ္ဏမာသော တမောနုဒေါတိ.