၂. တိဿမေတ္တေယျမာဏဝပုစ္ဆာ

၁၀၄၆. ‘‘ကောဓ သန္တုသိတော လောကေ၊ (ဣစ္စာယသ္မာ တိဿမေတ္တေယျော)

ကဿ နော သန္တိ ဣဉ္ဇိတာ၊

ကော ဥဘန္တမဘိညာယ၊ မဇ္ဈေ မန္တာ န လိပ္ပတိ [လိမ္ပတိ (က.)]၊

ကံ ဗြူသိ မဟာပုရိသောတိ၊ ကော ဣဓ သိဗ္ဗိနိမစ္စဂါ’’.

၁၀၄၇. ‘‘ကာမေသု ဗြဟ္မစရိယဝါ၊ (မေတ္တေယျာတိ ဘဂဝါ)

ဝီတတဏှော သဒါ သတော၊

သင်္ခါယ နိဗ္ဗုတော ဘိက္ခု၊ တဿ နော သန္တိ ဣဉ္ဇိတာ.

၁၀၄၈. ‘‘သော ဥဘန္တမဘိညာယ၊ မဇ္ဈေ မန္တာ န လိပ္ပတိ၊

တံ ဗြူမိ မဟာပုရိသောတိ၊ သော ဣဓ သိဗ္ဗိနိမစ္စဂါ’’တိ.

တိဿမေတ္တေယျမာဏဝပုစ္ဆာ ဒုတိယာ နိဋ္ဌိတာ.