၁၄. ပေါသာလမာဏဝပုစ္ဆာ

၁၁၁၈. ‘‘ယော အတီတံ အာဒိသတိ၊ (ဣစ္စာယသ္မာ ပေါသာလော) အနေဇော ဆိန္နသံသယော၊

ပါရဂုံ သဗ္ဗဓမ္မာနံ၊ အတ္ထိ ပဉှေန အာဂမံ.

၁၁၁၉. ‘‘ဝိဘူတရူပသညိဿ၊ သဗ္ဗကာယပ္ပဟာယိနော၊

အဇ္ဈတ္တဉ္စ ဗဟိဒ္ဓါ စ၊ နတ္ထိ ကိဉ္စီတိ ပဿတော၊

ဉာဏံ သက္ကာနုပုစ္ဆာမိ၊ ကထံ နေယျော တထာဝိဓော’’.

၁၁၂၀. ‘‘ဝိညာဏဋ္ဌိတိယော သဗ္ဗာ၊ (ပေါသာလာတိ ဘဂဝါ) အဘိဇာနံ တထာဂတော၊

တိဋ္ဌန္တမေနံ ဇာနာတိ၊ ဝိမုတ္တံ တပ္ပရာယဏံ.

၁၁၂၁. ‘‘အာကိဉ္စညသမ္ဘဝံ ဉတွာ၊ နန္ဒီ သံယောဇနံ ဣတိ၊

ဧဝမေတံ အဘိညာယ၊ တတော တတ္ထ ဝိပဿတိ၊

ဧတံ [ဧဝံ (သျာ. က.)] ဉာဏံ တထံ တဿ၊ ဗြာဟ္မဏဿ ဝုသီမတော’’တိ.

ပေါသာလမာဏဝပုစ္ဆာ စုဒ္ဒသမာ နိဋ္ဌိတာ.