၉. မာဂဏ္ဍိယသုတ္တံ

၈၄၁. ‘‘ဒိသွာန တဏှံ အရတိံ ရဂဉ္စ [အရတိဉ္စ ရာဂံ (သျာ. က.)]၊ နာဟောသိ ဆန္ဒော အပိ မေထုနသ္မိံ၊

ကိမေဝိဒံ မုတ္တကရီသပုဏ္ဏံ၊ ပါဒါပိ နံ သမ္ဖုသိတုံ န ဣစ္ဆေ’’.

၈၄၂. ‘‘ဧတာဒိသံ စေ ရတနံ န ဣစ္ဆသိ၊ နာရိံ နရိန္ဒေဟိ ဗဟူဟိ ပတ္ထိတံ၊

ဒိဋ္ဌိဂတံ သီလဝတံ နု ဇီဝိတံ [သီလဝတာနုဇီဝိတံ (သီ. ပီ. က.)]၊ ဘဝူပပတ္တိဉ္စ ဝဒေသိ ကီဒိသံ’’.

၈၄၃. ‘‘ဣဒံ ဝဒါမီတိ န တဿ ဟောတိ၊ (မာဂဏ္ဍိယာတိ [မာဂန္ဒိယာတိ (သီ. သျာ. ပီ.)] ဘဂဝါ)

ဓမ္မေသု နိစ္ဆေယျ သမုဂ္ဂဟီတံ၊

ပဿဉ္စ ဒိဋ္ဌီသု အနုဂ္ဂဟာယ၊

အဇ္ဈတ္တသန္တိံ ပစိနံ အဒဿံ’’.

၈၄၄. ‘‘ဝိနိစ္ဆယာ ယာနိ ပကပ္ပိတာနိ၊ (ဣတိ မာဂဏ္ဍိယော [မာဂန္ဒိယော (သီ. သျာ. ပီ.)] )

တေ ဝေ မုနီ ဗြူသိ အနုဂ္ဂဟာယ၊

အဇ္ဈတ္တသန္တီတိ ယမေတမတ္ထံ၊

ကထံ နု ဓီရေဟိ ပဝေဒိတံ တံ’’.

၈၄၅. ‘‘န ဒိဋ္ဌိယာ န သုတိယာ န ဉာဏေန၊ (မာဂဏ္ဍိယာတိ ဘဂဝါ)

သီလဗ္ဗတေနာပိ န သုဒ္ဓိမာဟ၊

အဒိဋ္ဌိယာ အဿုတိယာ အဉာဏာ၊

အသီလတာ အဗ္ဗတာ နောပိ တေန၊

ဧတေ စ နိဿဇ္ဇ အနုဂ္ဂဟာယ၊

သန္တော အနိဿာယ ဘဝံ န ဇပ္ပေ’’.

၈၄၆. ‘‘နော စေ ကိရ ဒိဋ္ဌိယာ န သုတိယာ န ဉာဏေန၊ (ဣတိ မာဂဏ္ဍိယော)

သီလဗ္ဗတေနာပိ န သုဒ္ဓိမာဟ၊

အဒိဋ္ဌိယာ အဿုတိယာ အဉာဏာ၊

အသီလတာ အဗ္ဗတာ နောပိ တေန၊

မညာမဟံ မောမုဟမေဝ ဓမ္မံ၊

ဒိဋ္ဌိယာ ဧကေ ပစ္စေန္တိ သုဒ္ဓိံ’’.

၈၄၇. ‘‘ဒိဋ္ဌဉ္စ နိဿာယ အနုပုစ္ဆမာနော၊ (မာဂဏ္ဍိယာတိ ဘဂဝါ)

သမုဂ္ဂဟီတေသု ပမောဟမာဂါ [သမောဟမာဂါ (သျာ. က.)]၊

ဣတော စ နာဒ္ဒက္ခိ အဏုမ္ပိ သညံ၊

တသ္မာ တုဝံ မောမုဟတော ဒဟာသိ.

၈၄၈. ‘‘သမော ဝိသေသီ ဥဒ ဝါ နိဟီနော၊ ယော မညတီ သော ဝိဝဒေထ တေန၊

တီသု ဝိဓာသု အဝိကမ္ပမာနော၊ သမော ဝိသေသီတိ န တဿ ဟောတိ.

၈၄၉. ‘‘သစ္စန္တိ သော ဗြာဟ္မဏော ကိံ ဝဒေယျ၊ မုသာတိ ဝါ သော ဝိဝဒေထ ကေန၊

ယသ္မိံ သမံ ဝိသမံ ဝါပိ နတ္ထိ၊ သ ကေန ဝါဒံ ပဋိသံယုဇေယျ.

၈၅၀. ‘‘ဩကံ ပဟာယ အနိကေတသာရီ၊ ဂါမေ အကုဗ္ဗံ မုနိ သန္ထဝါနိ [သန္ဓဝါနိ (က.)]၊

ကာမေဟိ ရိတ္တော အပုရေက္ခရာနော၊ ကထံ န ဝိဂ္ဂယှ ဇနေန ကယိရာ.

၈၅၁. ‘‘ယေဟိ ဝိဝိတ္တော ဝိစရေယျ လောကေ၊ န တာနိ ဥဂ္ဂယှ ဝဒေယျ နာဂေါ၊

ဇလမ္ဗုဇံ [ဧလမ္ဗုဇံ (သီ. သျာ.)] ကဏ္ဍကံ ဝါရိဇံ ယထာ၊ ဇလေန ပင်္ကေန စနူပလိတ္တံ၊

ဧဝံ မုနီ သန္တိဝါဒေါ အဂိဒ္ဓေါ၊ ကာမေ စ လောကေ စ အနူပလိတ္တော.

၈၅၂. ‘‘န ဝေဒဂူ ဒိဋ္ဌိယာယကော [န ဝေဒဂူ ဒိဋ္ဌိယာ (က. သီ. သျာ. ပီ.)] န မုတိယာ၊ သ မာနမေတိ န ဟိ တမ္မယော သော၊

န ကမ္မုနာ နောပိ သုတေန နေယျော၊ အနူပနီတော သ နိဝေသနေသု.

၈၅၃. ‘‘သညာဝိရတ္တဿ န သန္တိ ဂန္ထာ၊ ပညာဝိမုတ္တဿ န သန္တိ မောဟာ၊

သညဉ္စ ဒိဋ္ဌိဉ္စ ယေ အဂ္ဂဟေသုံ၊ တေ ဃဋ္ဋယန္တာ [ဃဋ္ဋမာနာ (သျာ. က.)] ဝိစရန္တိ လောကေ’’တိ.

မာဂဏ္ဍိယသုတ္တံ နဝမံ နိဋ္ဌိတံ.