၁၀. ပုရာဘေဒသုတ္တံ

၈၅၄. ‘‘ကထံဒဿီ ကထံသီလော၊ ဥပသန္တောတိ ဝုစ္စတိ၊

တံ မေ ဂေါတမ ပဗြူဟိ၊ ပုစ္ဆိတော ဥတ္တမံ နရံ’’.

၈၅၅. ‘‘ဝီတတဏှော ပုရာ ဘေဒါ၊ (ဣတိ ဘဂဝါ) ပုဗ္ဗမန္တမနိဿိတော၊

ဝေမဇ္ဈေ နုပသင်္ခေယျော၊ တဿ နတ္ထိ ပုရက္ခတံ.

၈၅၆. ‘‘အက္ကောဓနော အသန္တာသီ၊ အဝိကတ္ထီ အကုက္ကုစော၊

မန္တဘာဏီ [မန္တာဘာဏီ (သျာ. ပီ.)] အနုဒ္ဓတော၊ သ ဝေ ဝါစာယတော မုနိ.

၈၅၇. ‘‘နိရာသတ္တိ အနာဂတေ၊ အတီတံ နာနုသောစတိ၊

ဝိဝေကဒဿီ ဖဿေသု၊ ဒိဋ္ဌီသု စ န နီယတိ [နိယျတိ (ဗဟူသု)].

၈၅၈. ‘‘ပတိလီနော အကုဟကော၊ အပိဟာလု အမစ္ဆရီ၊

အပ္ပဂဗ္ဘော အဇေဂုစ္ဆော၊ ပေသုဏေယျေ စ နော ယုတော.

၈၅၉. ‘‘သာတိယေသု အနဿာဝီ၊ အတိမာနေ စ နော ယုတော၊

သဏှော စ ပဋိဘာနဝါ [ပဋိဘာဏဝါ (သျာ. ပီ.)]၊ န သဒ္ဓေါ န ဝိရဇ္ဇတိ.

၈၆၀. ‘‘လာဘကမျာ န သိက္ခတိ၊ အလာဘေ စ န ကုပ္ပတိ၊

အဝိရုဒ္ဓေါ စ တဏှာယ၊ ရသေသု နာနုဂိဇ္ဈတိ.

၈၆၁. ‘‘ဥပေက္ခကော သဒါ သတော၊ န လောကေ မညတေ သမံ၊

န ဝိသေသီ န နီစေယျော၊ တဿ နော သန္တိ ဥဿဒါ.

၈၆၂. ‘‘ယဿ နိဿယနာ [နိဿယတာ (သီ. သျာ. ပီ.)] နတ္ထိ၊ ဉတွာ ဓမ္မံ အနိဿိတော၊

ဘဝါယ ဝိဘဝါယ ဝါ၊ တဏှာ ယဿ န ဝိဇ္ဇတိ.

၈၆၃. ‘‘တံ ဗြူမိ ဥပသန္တောတိ၊ ကာမေသု အနပေက္ခိနံ၊

ဂန္ထာ တဿ န ဝိဇ္ဇန္တိ၊ အတရီ သော ဝိသတ္တိကံ.

၈၆၄. ‘‘န တဿ ပုတ္တာ ပသဝေါ၊ ခေတ္တံ ဝတ္ထုဉ္စ ဝိဇ္ဇတိ၊

အတ္တာ ဝါပိ နိရတ္တာ ဝါ [အတ္တံ ဝါပိ နိရတ္တံ ဝါ (ဗဟူသု)]၊ န တသ္မိံ ဥပလဗ္ဘတိ.

၈၆၅. ‘‘ယေန နံ ဝဇ္ဇုံ ပုထုဇ္ဇနာ၊ အထော သမဏဗြာဟ္မဏာ၊

တံ တဿ အပုရက္ခတံ၊ တသ္မာ ဝါဒေသု နေဇတိ.

၈၆၆. ‘‘ဝီတဂေဓော အမစ္ဆရီ၊ န ဥဿေသု ဝဒတေ မုနိ၊

န သမေသု န ဩမေသု၊ ကပ္ပံ နေတိ အကပ္ပိယော.

၈၆၇. ‘‘ယဿ လောကေ သကံ နတ္ထိ၊ အသတာ စ န သောစတိ၊

ဓမ္မေသု စ န ဂစ္ဆတိ၊ သ ဝေ သန္တောတိ ဝုစ္စတီ’’တိ.

ပုရာဘေဒသုတ္တံ ဒသမံ နိဋ္ဌိတံ.