၁၃. သမ္မာပရိဗ္ဗာဇနီယသုတ္တံ

၃၆၁. ‘‘ပုစ္ဆာမိ မုနိံ ပဟူတပညံ၊

တိဏ္ဏံ ပါရင်္ဂတံ ပရိနိဗ္ဗုတံ ဌိတတ္တံ၊

နိက္ခမ္မ ဃရာ ပနုဇ္ဇ ကာမေ၊ ကထံ ဘိက္ခု

သမ္မာ သော လောကေ ပရိဗ္ဗဇေယျ’’.

၃၆၂. ‘‘ယဿ မင်္ဂလာ သမူဟတာ၊ (ဣတိ ဘဂဝါ)

ဥပ္ပါတာ သုပိနာ စ လက္ခဏာ စ၊

သော မင်္ဂလဒေါသဝိပ္ပဟီနော၊

သမ္မာ သော လောကေ ပရိဗ္ဗဇေယျ.

၃၆၃. ‘‘ရာဂံ ဝိနယေထ မာနုသေသု၊ ဒိဗ္ဗေသု ကာမေသု စာပိ ဘိက္ခု၊

အတိက္ကမ္မ ဘဝံ သမေစ္စ ဓမ္မံ၊ သမ္မာ သော လောကေ ပရိဗ္ဗဇေယျ.

၃၆၄. ‘‘ဝိပိဋ္ဌိကတွာန ပေသုဏာနိ၊ ကောဓံ ကဒရိယံ ဇဟေယျ ဘိက္ခု၊

အနုရောဓဝိရောဓဝိပ္ပဟီနော၊ သမ္မာ သော လောကေ ပရိဗ္ဗဇေယျ.

၃၆၅. ‘‘ဟိတွာန ပိယဉ္စ အပ္ပိယဉ္စ၊ အနုပါဒါယ အနိဿိတော ကုဟိဉ္စိ၊

သံယောဇနိယေဟိ ဝိပ္ပမုတ္တော၊ သမ္မာ သော လောကေ ပရိဗ္ဗဇေယျ.

၃၆၆. ‘‘န သော ဥပဓီသု သာရမေတိ၊ အာဒါနေသု ဝိနေယျ ဆန္ဒရာဂံ၊

သော အနိဿိတော အနညနေယျော၊ သမ္မာ သော လောကေ ပရိဗ္ဗဇေယျ.

၃၆၇. ‘‘ဝစသာ မနသာ စ ကမ္မုနာ စ၊ အဝိရုဒ္ဓေါ သမ္မာ ဝိဒိတွာ ဓမ္မံ၊

နိဗ္ဗာနပဒါဘိပတ္ထယာနော၊ သမ္မာ သော လောကေ ပရိဗ္ဗဇေယျ.

၃၆၈. ‘‘ယော ဝန္ဒတိ မန္တိ နုဏ္ဏမေယျ [နုန္နမေယျ (?)]၊ အက္ကုဋ္ဌောပိ န သန္ဓိယေထ ဘိက္ခု၊

လဒ္ဓါ ပရဘောဇနံ န မဇ္ဇေ၊ သမ္မာ သော လောကေ ပရိဗ္ဗဇေယျ.

၃၆၉. ‘‘လောဘဉ္စ ဘဝဉ္စ ဝိပ္ပဟာယ၊ ဝိရတော ဆေဒနဗန္ဓနာ စ [ဆေဒနဗန္ဓနတော (သီ. သျာ.)] ဘိက္ခု၊

သော တိဏ္ဏကထံကထော ဝိသလ္လော၊ သမ္မာ သော လောကေ ပရိဗ္ဗဇေယျ.

၃၇၀. ‘‘သာရုပ္ပံ အတ္တနော ဝိဒိတွာ၊ နော စ ဘိက္ခု ဟိံသေယျ ကဉ္စိ လောကေ၊

ယထာ တထိယံ ဝိဒိတွာ ဓမ္မံ၊ သမ္မာ သော လောကေ ပရိဗ္ဗဇေယျ.

၃၇၁. ‘‘ယဿာနုသယာ န သန္တိ ကေစိ၊ မူလာ စ [မူလာ (သီ. သျာ.)] အကုသလာ သမူဟတာသေ၊

သော နိရာသော [နိရာသယော (သီ.)၊ နိရာသသော (သျာ.)] အနာသိသာနော [အနာသယာနော (သီ. ပီ.)၊ အနာသသာနော (သျာ.)]၊ သမ္မာ သော လောကေ ပရိဗ္ဗဇေယျ.

၃၇၂. ‘‘အာသဝခီဏော ပဟီနမာနော၊ သဗ္ဗံ ရာဂပထံ ဥပါတိဝတ္တော၊

ဒန္တော ပရိနိဗ္ဗုတော ဌိတတ္တော၊ သမ္မာ သော လောကေ ပရိဗ္ဗဇေယျ.

၃၇၃. ‘‘သဒ္ဓေါ သုတဝါ နိယာမဒဿီ၊ ဝဂ္ဂဂတေသု န ဝဂ္ဂသာရိ ဓီရော၊

လောဘံ ဒေါသံ ဝိနေယျ ပဋိဃံ၊ သမ္မာ သော လောကေ ပရိဗ္ဗဇေယျ.

၃၇၄. ‘‘သံသုဒ္ဓဇိနော ဝိဝဋ္ဋစ္ဆဒေါ၊ ဓမ္မေသု ဝသီ ပါရဂူ အနေဇော၊

သင်္ခါရနိရောဓဉာဏကုသလော၊ သမ္မာ သော လောကေ ပရိဗ္ဗဇေယျ.

၃၇၅. ‘‘အတီတေသု အနာဂတေသု စာပိ၊ ကပ္ပါတီတော အတိစ္စသုဒ္ဓိပညော၊

သဗ္ဗာယတနေဟိ ဝိပ္ပမုတ္တော၊ သမ္မာ သော လောကေ ပရိဗ္ဗဇေယျ.

၃၇၆. ‘‘အညာယ ပဒံ သမေစ္စ ဓမ္မံ၊ ဝိဝဋံ ဒိသွာန ပဟာနမာသဝါနံ၊

သဗ္ဗုပဓီနံ ပရိက္ခယာနော [ပရိက္ခယာ (ပီ.)]၊ သမ္မာ သော လောကေ ပရိဗ္ဗဇေယျ’’.

၃၇၇. ‘‘အဒ္ဓါ ဟိ ဘဂဝါ တထေဝ ဧတံ၊ ယော သော ဧဝံဝိဟာရီ ဒန္တော ဘိက္ခု၊

သဗ္ဗသံယောဇနယောဂဝီတိဝတ္တော [သဗ္ဗသံယောဇနိယေ စ ဝီတိဝတ္တော (သီ. သျာ. ပီ.)]၊ သမ္မာ သော လောကေ ပရိဗ္ဗဇေယျာ’’တိ.

သမ္မာပရိဗ္ဗာဇနီယသုတ္တံ တေရသမံ နိဋ္ဌိတံ.