၁၄. ဓမ္မိကသုတ္တံ

ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ ဓမ္မိကော ဥပါသကော ပဉ္စဟိ ဥပါသကသတေဟိ သဒ္ဓိံ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ဓမ္မိကော ဥပါသကော ဘဂဝန္တံ ဂါထာဟိ အဇ္ဈဘာသိ –

၃၇၈. ‘‘ပုစ္ဆာမိ တံ ဂေါတမ ဘူရိပည၊ ကထံကရော သာဝကော သာဓု ဟောတိ၊

ယော ဝါ အဂါရာ အနဂါရမေတိ၊ အဂါရိနော ဝါ ပနုပါသကာသေ.

၃၇၉. ‘‘တုဝဉှိ လောကဿ သဒေဝကဿ၊ ဂတိံ ပဇာနာသိ ပရာယဏဉ္စ၊

န စတ္ထိ တုလျော နိပုဏတ္ထဒဿီ၊ တုဝဉှိ ဗုဒ္ဓံ ပဝရံ ဝဒန္တိ.

၃၈၀. ‘‘သဗ္ဗံ တုဝံ ဉာဏမဝေစ္စ ဓမ္မံ၊ ပကာသေသိ သတ္တေ အနုကမ္ပမာနော၊

ဝိဝဋ္ဋစ္ဆဒေါသိ သမန္တစက္ခု၊ ဝိရောစသိ ဝိမလော သဗ္ဗလောကေ.

၃၈၁. ‘‘အာဂဉ္ဆိ တေ သန္တိကေ နာဂရာဇာ၊ ဧရာဝဏော နာမ ဇိနောတိ သုတွာ၊

သောပိ တယာ မန္တယိတွာဇ္ဈဂမာ၊ သာဓူတိ သုတွာန ပတီတရူပေါ.

၃၈၂. ‘‘ရာဇာပိ တံ ဝေဿဝဏော ကုဝေရော၊ ဥပေတိ ဓမ္မံ ပရိပုစ္ဆမာနော၊

တဿာပိ တွံ ပုစ္ဆိတော ဗြူသိ ဓီရ၊ သော စာပိ သုတွာန ပတီတရူပေါ.

၃၈၃. ‘‘ယေ ကေစိမေ တိတ္ထိယာ ဝါဒသီလာ၊ အာဇီဝကာ ဝါ ယဒိ ဝါ နိဂဏ္ဌာ၊

ပညာယ တံ နာတိတရန္တိ သဗ္ဗေ၊ ဌိတော ဝဇန္တံ ဝိယ သီဃဂါမိံ.

၃၈၄. ‘‘ယေ ကေစိမေ ဗြာဟ္မဏာ ဝါဒသီလာ၊ ဝုဒ္ဓါ စာပိ ဗြာဟ္မဏာ သန္တိ ကေစိ၊

သဗ္ဗေ တယိ အတ္ထဗဒ္ဓါ ဘဝန္တိ၊ ယေ စာပိ အညေ ဝါဒိနော မညမာနာ.

၃၈၅. ‘‘အယဉှိ ဓမ္မော နိပုဏော သုခေါ စ၊ ယောယံ တယာ ဘဂဝါ သုပ္ပဝုတ္တော၊

တမေဝ သဗ္ဗေပိ [သဗ္ဗေ မယံ (သျာ.)] သုဿူသမာနာ၊ တံ နော ဝဒ ပုစ္ဆိတော ဗုဒ္ဓသေဋ္ဌ.

၃၈၆. ‘‘သဗ္ဗေပိ မေ ဘိက္ခဝေါ သန္နိသိန္နာ၊ ဥပါသကာ စာပိ တထေဝ သောတုံ၊

သုဏန္တု ဓမ္မံ ဝိမလေနာနုဗုဒ္ဓံ၊ သုဘာသိတံ ဝါသဝဿေဝ ဒေဝါ’’.

၃၈၇. ‘‘သုဏာထ မေ ဘိက္ခဝေါ သာဝယာမိ ဝေါ၊ ဓမ္မံ ဓုတံ တဉ္စ စရာထ သဗ္ဗေ၊

ဣရိယာပထံ ပဗ္ဗဇိတာနုလောမိကံ၊ သေဝေထ နံ အတ္ထဒသော မုတီမာ.

၃၈၈. ‘‘နော ဝေ ဝိကာလေ ဝိစရေယျ ဘိက္ခု၊ ဂါမေ စ ပိဏ္ဍာယ စရေယျ ကာလေ၊

အကာလစာရိဉှိ သဇန္တိ သင်္ဂါ၊ တသ္မာ ဝိကာလေ န စရန္တိ ဗုဒ္ဓါ.

၃၈၉. ‘‘ရူပါ စ သဒ္ဒါ စ ရသာ စ ဂန္ဓာ၊ ဖဿာ စ ယေ သမ္မဒယန္တိ သတ္တေ၊

ဧတေသု ဓမ္မေသု ဝိနေယျ ဆန္ဒံ၊ ကာလေန သော ပဝိသေ ပါတရာသံ.

၃၉၀. ‘‘ပိဏ္ဍဉ္စ ဘိက္ခု သမယေန လဒ္ဓါ၊ ဧကော ပဋိက္ကမ္မ ရဟော နိသီဒေ၊

အဇ္ဈတ္တစိန္တီ န မနော ဗဟိဒ္ဓါ၊ နိစ္ဆာရယေ သင်္ဂဟိတတ္တဘာဝေါ.

၃၉၁. ‘‘သစေပိ သော သလ္လပေ သာဝကေန၊ အညေန ဝါ ကေနစိ ဘိက္ခုနာ ဝါ၊

ဓမ္မံ ပဏီတံ တမုဒါဟရေယျ၊ န ပေသုဏံ နောပိ ပရူပဝါဒံ.

၃၉၂. ‘‘ဝါဒဉှိ ဧကေ ပဋိသေနိယန္တိ၊ န တေ ပသံသာမ ပရိတ္တပညေ၊

တတော တတော နေ ပသဇန္တိ သင်္ဂါ၊ စိတ္တဉှိ တေ တတ္ထ ဂမေန္တိ ဒူရေ.

၃၉၃. ‘‘ပိဏ္ဍံ ဝိဟာရံ သယနာသနဉ္စ၊ အာပဉ္စ သင်္ဃာဋိရဇူပဝါဟနံ၊

သုတွာန ဓမ္မံ သုဂတေန ဒေသိတံ၊ သင်္ခါယ သေဝေ ဝရပညသာဝကော.

၃၉၄. ‘‘တသ္မာ ဟိ ပိဏ္ဍေ သယနာသနေ စ၊ အာပေ စ သင်္ဃာဋိရဇူပဝါဟနေ၊

ဧတေသု ဓမ္မေသု အနူပလိတ္တော၊ ဘိက္ခု ယထာ ပေါက္ခရေ ဝါရိဗိန္ဒု.

၃၉၅. ‘‘ဂဟဋ္ဌဝတ္တံ ပန ဝေါ ဝဒါမိ၊ ယထာကရော သာဝကော သာဓု ဟောတိ၊

န ဟေသ [န ဟေသော (သီ.)] လဗ္ဘာ သပရိဂ္ဂဟေန၊ ဖဿေတုံ ယော ကေဝလော ဘိက္ခုဓမ္မော.

၃၉၆. ‘‘ပါဏံ န ဟနေ [န ဟာနေ (သီ.)] န စ ဃာတယေယျ၊ န စာနုဇညာ ဟနတံ ပရေသံ၊

သဗ္ဗေသု ဘူတေသု နိဓာယ ဒဏ္ဍံ၊ ယေ ထာဝရာ ယေ စ တသာ သန္တိ [တသန္တိ (သီ. ပီ.)] လောကေ.

၃၉၇. ‘‘တတော အဒိန္နံ ပရိဝဇ္ဇယေယျ၊ ကိဉ္စိ ကွစိ သာဝကော ဗုဇ္ဈမာနော၊

န ဟာရယေ ဟရတံ နာနုဇညာ၊ သဗ္ဗံ အဒိန္နံ ပရိဝဇ္ဇယေယျ.

၃၉၈. ‘‘အဗြဟ္မစရိယံ ပရိဝဇ္ဇယေယျ၊ အင်္ဂါရကာသုံ ဇလိတံဝ ဝိညူ၊

အသမ္ဘုဏန္တော ပန ဗြဟ္မစရိယံ၊ ပရဿ ဒါရံ န အတိက္ကမေယျ.

၃၉၉. ‘‘သဘဂ္ဂတော ဝါ ပရိသဂ္ဂတော ဝါ၊ ဧကဿ ဝေကော [စေတော (သီ. သျာ.)] န မုသာ ဘဏေယျ၊

န ဘာဏယေ ဘဏတံ နာနုဇညာ၊ သဗ္ဗံ အဘူတံ ပရိဝဇ္ဇယေယျ.

၄၀၀. ‘‘မဇ္ဇဉ္စ ပါနံ န သမာစရေယျ၊ ဓမ္မံ ဣမံ ရောစယေ ယော ဂဟဋ္ဌော၊

န ပါယယေ ပိဝတံ နာနုဇညာ၊ ဥမ္မာဒနန္တံ ဣတိ နံ ဝိဒိတွာ.

၄၀၁. ‘‘မဒါ ဟိ ပါပါနိ ကရောန္တိ ဗာလာ၊ ကာရေန္တိ စညေပိ ဇနေ ပမတ္တေ၊

ဧတံ အပုညာယတနံ ဝိဝဇ္ဇယေ၊ ဥမ္မာဒနံ မောဟနံ ဗာလကန္တံ.

၄၀၂. ‘‘ပါဏံ န ဟနေ န စာဒိန္နမာဒိယေ၊ မုသာ န ဘာသေ န စ မဇ္ဇပေါ သိယာ၊

အဗြဟ္မစရိယာ ဝိရမေယျ မေထုနာ၊ ရတ္တိံ န ဘုဉ္ဇေယျ ဝိကာလဘောဇနံ.

၄၀၃. ‘‘မာလံ န ဓာရေ န စ ဂန္ဓမာစရေ၊ မဉ္စေ ဆမာယံ ဝ သယေထ သန္ထတေ၊

ဧတဉှိ အဋ္ဌင်္ဂိကမာဟုပေါသထံ၊ ဗုဒ္ဓေန ဒုက္ခန္တဂုနာ ပကာသိတံ.

၄၀၄. ‘‘တတော စ ပက္ခဿုပဝဿုပေါသထံ၊ စာတုဒ္ဒသိံ ပဉ္စဒသိဉ္စ အဋ္ဌမိံ၊

ပါဋိဟာရိယပက္ခဉ္စ ပသန္နမာနသော၊ အဋ္ဌင်္ဂုပေတံ သုသမတ္တရူပံ.

၄၀၅. ‘‘တတော စ ပါတော ဥပဝုတ္ထုပေါသထော၊ အန္နေန ပါနေန စ ဘိက္ခုသံဃံ၊

ပသန္နစိတ္တော အနုမောဒမာနော၊ ယထာရဟံ သံဝိဘဇေထ ဝိညူ.

၄၀၆. ‘‘ဓမ္မေန မာတာပိတရော ဘရေယျ၊ ပယောဇယေ ဓမ္မိကံ သော ဝဏိဇ္ဇံ၊

ဧတံ ဂိဟီ ဝတ္တယမပ္ပမတ္တော၊ သယမ္ပဘေ နာမ ဥပေတိ ဒေဝေ’’တိ.

ဓမ္မိကသုတ္တံ စုဒ္ဒသမံ နိဋ္ဌိတံ.

စူဠဝဂ္ဂေါ ဒုတိယော နိဋ္ဌိတော.