၉. ဂူထခါဒကပေတိဝတ္ထု

၇၇၄. ‘‘ဂူထကူပတော ဥဂ္ဂန္တွာ၊ ကာ နု ဒီနာ ပတိဋ္ဌသိ၊

နိဿံသယံ ပါပကမ္မန္တာ၊ ကိံ နု သဒ္ဒဟသေ တုဝ’’န္တိ.

၇၇၅. ‘‘အဟံ ဘဒန္တေ ပေတီမှိ၊ ဒုဂ္ဂတာ ယမလောကိကာ၊

ပါပကမ္မံ ကရိတွာန၊ ပေတလောကံ ဣတော ဂတာ’’တိ.

၇၇၆. ‘‘ကိံ နု ကာယေန ဝါစာယ၊ မနသာ ဒုက္ကဋံ ကတံ၊

ကိဿ ကမ္မဝိပါကေန၊ ဣဒံ ဒုက္ခံ နိဂစ္ဆသီ’’တိ.

၇၇၇. ‘‘အဟု အာဝါသိကော မယှံ၊ ဣဿုကီ ကုလမစ္ဆရီ၊

အဇ္ဈောသိတော မယှံ ဃရေ၊ ကဒရိယော ပရိဘာသကော.

၇၇၈. ‘‘တဿာဟံ ဝစနံ သုတွာ၊ ဘိက္ခဝေါ ပရိဘာသိသံ၊

တဿ ကမ္မဝိပါကေန၊ ပေတလောကံ ဣတော ဂတာ’’တိ.

၇၇၉. ‘‘အမိတ္တော မိတ္တဝဏ္ဏေန၊ ယော တေ အာသိ ကုလူပကော၊

ကာယဿ ဘေဒါ ဒုပ္ပညော၊ ကိံ နု ပေစ္စ ဂတိံ ဂတော’’တိ.

၇၈၀. ‘‘တဿေဝါဟံ ပါပကမ္မဿ၊ သီသေ တိဋ္ဌာမိ မတ္ထကေ၊

သော စ ပရဝိသယံ ပတ္တော၊ မမေဝ ပရိစာရကော.

၇၈၁. ‘‘ယံ ဘဒန္တေ ဟဒန္တညေ၊ ဧတံ မေ ဟောတိ ဘောဇနံ၊

အဟဉ္စ ခေါ ယံ ဟဒါမိ၊ ဧတံ သော ဥပဇီဝတီ’’တိ.

ဂူထခါဒကပေတိဝတ္ထု နဝမံ.