၁၀. ဂဏပေတဝတ္ထု

၇၈၂. ‘‘နဂ္ဂါ ဒုဗ္ဗဏ္ဏရူပါတ္ထ၊ ကိသာ ဓမနိသန္ထတာ၊

ဥပ္ဖါသုလိကာ [ဥပ္ပါသုဠိကာ (က.)] ကိသိကာ၊ ကေ နု တုမှေတ္ထ မာရိသာ’’တိ.

၇၈၃. ‘‘မယံ ဘဒန္တေ ပေတာမှာ၊ ဒုဂ္ဂတာ ယမလောကိကာ၊

ပါပကမ္မံ ကရိတွာန၊ ပေတလောကံ ဣတော ဂတာ’’တိ.

၇၈၄. ‘‘ကိံ နု ကာယေန ဝါစာယ၊ မနသာ ဒုက္ကဋံ ကတံ၊

ကိဿ ကမ္မဝိပါကေန၊ ပေတလောကံ ဣတော ဂတာ’’တိ.

၇၈၅. ‘‘အနာဝဋေသု တိတ္ထေသု၊ ဝိစိနိမှဒ္ဓမာသကံ၊

သန္တေသု ဒေယျဓမ္မေသု၊ ဒီပံ နာကမှ အတ္တနော.

၇၈၆. ‘‘နဒိံ ဥပေမ တသိတာ၊ ရိတ္တကာ ပရိဝတ္တတိ၊

ဆာယံ ဥပေမ ဥဏှေသု၊ အာတပေါ ပရိဝတ္တတိ.

၇၈၇. ‘‘အဂ္ဂိဝဏ္ဏော စ နော ဝါတော၊ ဍဟန္တော ဥပဝါယတိ၊

ဧတဉ္စ ဘန္တေ အရဟာမ၊ အညဉ္စ ပါပကံ တတော.

၇၈၈. ‘‘အပိ ယောဇနာနိ [အဓိယောဇနာနိ (သီ. က.)] ဂစ္ဆာမ၊ ဆာတာ အာဟာရဂေဓိနော၊

အလဒ္ဓါဝ နိဝတ္တာမ၊ အဟော နော အပ္ပပုညတာ.

၇၈၉. ‘‘ဆာတာ ပမုစ္ဆိတာ ဘန္တာ၊ ဘူမိယံ ပဋိသုမ္ဘိတာ၊

ဥတ္တာနာ ပဋိကိရာမ၊ အဝကုဇ္ဇာ ပတာမသေ.

၇၉၀. ‘‘တေ စ တတ္ထေဝ ပတိတာ [တတ္ထ ပပဟိတာ (က.)]၊ ဘူမိယံ ပဋိသုမ္ဘိတာ၊

ဥရံ သီသဉ္စ ဃဋ္ဋေမ၊ အဟော နော အပ္ပပုညတာ.

၇၉၁. ‘‘ဧတဉ္စ ဘန္တေ အရဟာမ၊ အညဉ္စ ပါပကံ တတော၊

သန္တေသု ဒေယျဓမ္မေသု၊ ဒီပံ နာကမှ အတ္တနော.

၇၉၂. ‘‘တေ ဟိ နူန ဣတော ဂန္တွာ၊ ယောနိံ လဒ္ဓါန မာနုသိံ၊

ဝဒညူ သီလသမ္ပန္နာ၊ ကာဟာမ ကုသလံ ဗဟု’’န္တိ.

ဂဏပေတဝတ္ထု ဒသမံ.