၃. ဗောဇ္ဈင်္ဂကထာ

၁၇. သာဝတ္ထိနိဒါနံ. ‘‘သတ္တိမေ၊ ဘိက္ခဝေ [သံ. နိ. ၅.၂၀၀]၊ ဗောဇ္ဈင်္ဂါ. ကတမေ သတ္တ? သတိသမ္ဗောဇ္ဈင်္ဂေါ၊ ဓမ္မဝိစယသမ္ဗောဇ္ဈင်္ဂေါ၊ ဝီရိယသမ္ဗောဇ္ဈင်္ဂေါ၊ ပီတိသမ္ဗောဇ္ဈင်္ဂေါ၊ ပဿဒ္ဓိသမ္ဗောဇ္ဈင်္ဂေါ၊ သမာဓိသမ္ဗောဇ္ဈင်္ဂေါ၊ ဥပေက္ခာသမ္ဗောဇ္ဈင်္ဂေါ – ဣမေ ခေါ၊ ဘိက္ခဝေ၊ သတ္တ ဗောဇ္ဈင်္ဂါ’’.

ဗောဇ္ဈင်္ဂါတိ ကေနဋ္ဌေန ဗောဇ္ဈင်္ဂါ? ဗောဓာယ သံဝတ္တန္တီတိ – ဗောဇ္ဈင်္ဂါ. ဗုဇ္ဈန္တီတိ – ဗောဇ္ဈင်္ဂါ. အနုဗုဇ္ဈန္တီတိ – ဗောဇ္ဈင်္ဂါ. ပဋိဗုဇ္ဈန္တီတိ – ဗောဇ္ဈင်္ဂါ. သမ္ဗုဇ္ဈန္တီတိ – ဗောဇ္ဈင်္ဂါ.

ဗုဇ္ဈနဋ္ဌေန ဗောဇ္ဈင်္ဂါ၊ အနုဗုဇ္ဈနဋ္ဌေန ဗောဇ္ဈင်္ဂါ၊ ပဋိဗုဇ္ဈနဋ္ဌေန ဗောဇ္ဈင်္ဂါ၊ သမ္ဗုဇ္ဈနဋ္ဌေန ဗောဇ္ဈင်္ဂါ.

ဗောဓေန္တီတိ – ဗောဇ္ဈင်္ဂါ. အနုဗောဓေန္တီတိ – ဗောဇ္ဈင်္ဂါ. ပဋိဗောဓေန္တီတိ – ဗောဇ္ဈင်္ဂါ. သမ္ဗောဓေန္တီတိ – ဗောဇ္ဈင်္ဂါ.

ဗောဓနဋ္ဌေန ဗောဇ္ဈင်္ဂါ၊ အနုဗောဓနဋ္ဌေန ဗောဇ္ဈင်္ဂါ၊ ပဋိဗောဓနဋ္ဌေန ဗောဇ္ဈင်္ဂါ၊ သမ္ဗောဓနဋ္ဌေန ဗောဇ္ဈင်္ဂါ.

ဗောဓိပက္ခိယဋ္ဌေန ဗောဇ္ဈင်္ဂါ၊ အနုဗောဓိပက္ခိယဋ္ဌေန ဗောဇ္ဈင်္ဂါ၊ ပဋိဗောဓိပက္ခိယဋ္ဌေန ဗောဇ္ဈင်္ဂါ၊ သမ္ဗောဓိပက္ခိယဋ္ဌေန ဗောဇ္ဈင်္ဂါ.

ဗုဒ္ဓိလဘနဋ္ဌေန ဗောဇ္ဈင်္ဂါ၊ ဗုဒ္ဓိပဋိလဘနဋ္ဌေန ဗောဇ္ဈင်္ဂါ၊ ဗုဒ္ဓိရောပနဋ္ဌေန ဗောဇ္ဈင်္ဂါ၊ ဗုဒ္ဓိအဘိရောပနဋ္ဌေန ဗောဇ္ဈင်္ဂါ၊ ဗုဒ္ဓိပါပနဋ္ဌေန ဗောဇ္ဈင်္ဂါ၊ ဗုဒ္ဓိသမ္ပာပနဋ္ဌေန ဗောဇ္ဈင်္ဂါ.

မူလမူလကာဒိဒသကံ

၁၈. မူလဋ္ဌေန ဗောဇ္ဈင်္ဂါ၊ မူလစရိယဋ္ဌေန ဗောဇ္ဈင်္ဂါ၊ မူလပရိဂ္ဂဟဋ္ဌေန ဗောဇ္ဈင်္ဂါ၊ မူလပရိဝါရဋ္ဌေန ဗောဇ္ဈင်္ဂါ၊ မူလပရိပူရဏဋ္ဌေန [မူလပရိပူရဋ္ဌေန (သျာ. က.) ဧဝမုပရိပိ] ဗောဇ္ဈင်္ဂါ၊ မူလပရိပါကဋ္ဌေန ဗောဇ္ဈင်္ဂါ၊ မူလပဋိသမ္ဘိဒဋ္ဌေန ဗောဇ္ဈင်္ဂါ၊ မူလပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ မူလပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ မူလပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

ဟေတုဋ္ဌေန ဗောဇ္ဈင်္ဂါ၊ ဟေတုစရိယဋ္ဌေန ဗောဇ္ဈင်္ဂါ၊ ဟေတုပရိဂ္ဂဟဋ္ဌေန ဗောဇ္ဈင်္ဂါ၊ ဟေတုပရိဝါရဋ္ဌေန ဗောဇ္ဈင်္ဂါ၊ ဟေတုပရိပူရဏဋ္ဌေန ဗောဇ္ဈင်္ဂါ၊ ဟေတုပရိပါကဋ္ဌေန ဗောဇ္ဈင်္ဂါ၊ ဟေတုပဋိသမ္ဘိဒဋ္ဌေန ဗောဇ္ဈင်္ဂါ၊ ဟေတုပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ ဟေတုပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ ဟေတုပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

ပစ္စယဋ္ဌေန ဗောဇ္ဈင်္ဂါ၊ ပစ္စယစရိယဋ္ဌေန ဗောဇ္ဈင်္ဂါ၊ ပစ္စယပရိဂ္ဂဟဋ္ဌေန ဗောဇ္ဈင်္ဂါ၊ ပစ္စယပရိဝါရဋ္ဌေန ဗောဇ္ဈင်္ဂါ၊ ပစ္စယပရိပူရဏဋ္ဌေန ဗောဇ္ဈင်္ဂါ၊ ပစ္စယပရိပါကဋ္ဌေန ဗောဇ္ဈင်္ဂါ၊ ပစ္စယပဋိသမ္ဘိဒဋ္ဌေန ဗောဇ္ဈင်္ဂါ၊ ပစ္စယပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ ပစ္စယပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ ပစ္စယပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

ဝိသုဒ္ဓဋ္ဌေန ဗောဇ္ဈင်္ဂါ၊ ဝိသုဒ္ဓိစရိယဋ္ဌေန ဗောဇ္ဈင်္ဂါ၊ ဝိသုဒ္ဓိပရိဂ္ဂဟဋ္ဌေန ဗောဇ္ဈင်္ဂါ၊ ဝိသုဒ္ဓိပရိဝါရဋ္ဌေန ဗောဇ္ဈင်္ဂါ၊ ဝိသုဒ္ဓိပရိပူရဏဋ္ဌေန ဗောဇ္ဈင်္ဂါ၊ ဝိသုဒ္ဓိပရိပါကဋ္ဌေန ဗောဇ္ဈင်္ဂါ၊ ဝိသုဒ္ဓိပဋိသမ္ဘိဒဋ္ဌေန ဗောဇ္ဈင်္ဂါ၊ ဝိသုဒ္ဓိပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ ဝိသုဒ္ဓိပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ ဝိသုဒ္ဓိပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

အနဝဇ္ဇဋ္ဌေန ဗောဇ္ဈင်္ဂါ၊ အနဝဇ္ဇစရိယဋ္ဌေန ဗောဇ္ဈင်္ဂါ၊ အနဝဇ္ဇပရိဂ္ဂဟဋ္ဌေန ဗောဇ္ဈင်္ဂါ၊ အနဝဇ္ဇပရိဝါရဋ္ဌေန ဗောဇ္ဈင်္ဂါ၊ အနဝဇ္ဇပရိပူရဏဋ္ဌေန ဗောဇ္ဈင်္ဂါ၊ အနဝဇ္ဇပရိပါကဋ္ဌေန ဗောဇ္ဈင်္ဂါ၊ အနဝဇ္ဇပဋိသမ္ဘိဒဋ္ဌေန ဗောဇ္ဈင်္ဂါ၊ အနဝဇ္ဇပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ အနဝဇ္ဇပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ အနဝဇ္ဇပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

နေက္ခမ္မဋ္ဌေန ဗောဇ္ဈင်္ဂါ၊ နေက္ခမ္မစရိယဋ္ဌေန ဗောဇ္ဈင်္ဂါ၊ နေက္ခမ္မပရိဂ္ဂဟဋ္ဌေန ဗောဇ္ဈင်္ဂါ၊ နေက္ခမ္မပရိဝါရဋ္ဌေန ဗောဇ္ဈင်္ဂါ၊ နေက္ခမ္မပရိပူရဏဋ္ဌေန ဗောဇ္ဈင်္ဂါ၊ နေက္ခမ္မပရိပါကဋ္ဌေန ဗောဇ္ဈင်္ဂါ၊ နေက္ခမ္မပဋိသမ္ဘိဒဋ္ဌေန ဗောဇ္ဈင်္ဂါ၊ နေက္ခမ္မပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ နေက္ခမ္မပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ နေက္ခမ္မပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

ဝိမုတ္တဋ္ဌေန ဗောဇ္ဈင်္ဂါ၊ ဝိမုတ္တိစရိယဋ္ဌေန ဗောဇ္ဈင်္ဂါ၊ ဝိမုတ္တိပရိဂ္ဂဟဋ္ဌေန ဗောဇ္ဈင်္ဂါ၊ ဝိမုတ္တိပရိဝါရဋ္ဌေန ဗောဇ္ဈင်္ဂါ၊ ဝိမုတ္တိပရိပူရဏဋ္ဌေန ဗောဇ္ဈင်္ဂါ၊ ဝိမုတ္တိပရိပါကဋ္ဌေန ဗောဇ္ဈင်္ဂါ၊ ဝိမုတ္တိပဋိသမ္ဘိဒဋ္ဌေန ဗောဇ္ဈင်္ဂါ၊ ဝိမုတ္တိပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ ဝိမုတ္တိပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ ဝိမုတ္တိပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

အနာသဝဋ္ဌေန ဗောဇ္ဈင်္ဂါ၊ အနာသဝစရိယဋ္ဌေန ဗောဇ္ဈင်္ဂါ၊ အနာသဝပရိဂ္ဂဟဋ္ဌေန ဗောဇ္ဈင်္ဂါ၊ အနာသဝပရိဝါရဋ္ဌေန ဗောဇ္ဈင်္ဂါ၊ အနာသဝပရိပူရဏဋ္ဌေန ဗောဇ္ဈင်္ဂါ၊ အနာသဝပရိပါကဋ္ဌေန ဗောဇ္ဈင်္ဂါ၊ အနာသဝပဋိသမ္ဘိဒဋ္ဌေန ဗောဇ္ဈင်္ဂါ၊ အနာသဝပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ အနာသဝပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ အနာသဝပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

ဝိဝေကဋ္ဌေန ဗောဇ္ဈင်္ဂါ၊ ဝိဝေကစရိယဋ္ဌေန ဗောဇ္ဈင်္ဂါ၊ ဝိဝေကပရိဂ္ဂဟဋ္ဌေန ဗောဇ္ဈင်္ဂါ၊ ဝိဝေကပရိဝါရဋ္ဌေန ဗောဇ္ဈင်္ဂါ၊ ဝိဝေကပရိပူရဏဋ္ဌေန ဗောဇ္ဈင်္ဂါ၊ ဝိဝေကပရိပါကဋ္ဌေန ဗောဇ္ဈင်္ဂါ၊ ဝိဝေကပဋိသမ္ဘိဒဋ္ဌေန ဗောဇ္ဈင်္ဂါ၊ ဝိဝေကပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ ဝိဝေကပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ ဝိဝေကပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

ဝေါသဂ္ဂဋ္ဌေန ဗောဇ္ဈင်္ဂါ၊ ဝေါသဂ္ဂစရိယဋ္ဌေန ဗောဇ္ဈင်္ဂါ၊ ဝေါသဂ္ဂပရိဂ္ဂဟဋ္ဌေန ဗောဇ္ဈင်္ဂါ၊ ဝေါသဂ္ဂပရိဝါရဋ္ဌေန ဗောဇ္ဈင်္ဂါ၊ ဝေါသဂ္ဂပရိပူရဏဋ္ဌေန ဗောဇ္ဈင်္ဂါ၊ ဝေါသဂ္ဂပရိပါကဋ္ဌေန ဗောဇ္ဈင်္ဂါ၊ ဝေါသဂ္ဂပဋိသမ္ဘိဒဋ္ဌေန ဗောဇ္ဈင်္ဂါ၊ ဝေါသဂ္ဂပဋိသမ္ဘိဒါပါပနဋ္ဌေန ဗောဇ္ဈင်္ဂါ၊ ဝေါသဂ္ဂပဋိသမ္ဘိဒါယ ဝသီဘာဝဋ္ဌေန ဗောဇ္ဈင်္ဂါ၊ ဝေါသဂ္ဂပဋိသမ္ဘိဒါယ ဝသီဘာဝပ္ပတ္တာနမ္ပိ ဗောဇ္ဈင်္ဂါ.

၁၉. မူလဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဟေတုဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပစ္စယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိသုဒ္ဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနဝဇ္ဇဋ္ဌံ ဗုဇ္ဈန္တီတိ – ဗောဇ္ဈင်္ဂါ. နေက္ခမ္မဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိမုတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနာသဝဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိဝေကဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝေါသဂ္ဂဋ္ဌံ ဗုဇ္ဈန္တီတိ – ဗောဇ္ဈင်္ဂါ.

မူလစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဟေတုစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပစ္စယစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိသုဒ္ဓိစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနဝဇ္ဇစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. နေက္ခမ္မစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိမုတ္တိစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနာသဝစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိဝေကစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝေါသဂ္ဂစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ.

မူလပရိဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝေါသဂ္ဂပရိဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. မူလပရိဝါရဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝေါသဂ္ဂပရိဝါရဋ္ဌံ ဗုဇ္ဈန္တီတိ – ဗောဇ္ဈင်္ဂါ. မူလပရိပူရဏဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝေါသဂ္ဂပရိပူရဋ္ဌံ ဗုဇ္ဈန္တီတိ – ဗောဇ္ဈင်္ဂါ. မူလပရိပါကဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝေါသဂ္ဂပရိပါကဋ္ဌံ ဗုဇ္ဈန္တီတိ – ဗောဇ္ဈင်္ဂါ. မူလပဋိသမ္ဘိဒဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝေါသဂ္ဂပဋိသမ္ဘိဒဋ္ဌံ ဗုဇ္ဈန္တီတိ – ဗောဇ္ဈင်္ဂါ. မူလပဋိသမ္ဘိဒါပါပနဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝေါသဂ္ဂပဋိသမ္ဘိဒါပါပနဋ္ဌံ ဗုဇ္ဈန္တီတိ – ဗောဇ္ဈင်္ဂါ. မူလပဋိသမ္ဘိဒါယ ဝသီဘာဝဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝေါသဂ္ဂပဋိသမ္ဘိဒါယ ဝသီဘာဝဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။.

ပရိဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပရိဝါရဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပရိပူရဏဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကဂ္ဂဋ္ဌံ ဗုဇ္ဈန္တီတိ – ဗောဇ္ဈင်္ဂါ. အဝိက္ခေပဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. အဝိသာရဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနာဝိလဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနိဉ္ဇနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တုပဋ္ဌာနဝသေန စိတ္တဿ ဌိတဋ္ဌံ ဗုဇ္ဈန္တီတိ – ဗောဇ္ဈင်္ဂါ. အာရမ္မဏဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဂေါစရဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပဟာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပရိစ္စာဂဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝုဋ္ဌာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိဝဋ္ဋနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သန္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပဏီတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိမုတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနာသဝဋ္ဌံ ဗုဇ္ဈန္တီတိ – ဗောဇ္ဈင်္ဂါ. တရဏဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနိမိတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. အပ္ပဏိဟိတဋ္ဌံ ဗုဇ္ဈန္တီတိ – ဗောဇ္ဈင်္ဂါ. သုညတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကရသဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနတိဝတ္တနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ယုဂနဒ္ဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိယျာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဟေတုဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဒဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ. အာဓိပတေယျဋ္ဌံ ဗုဇ္ဈန္တီတိ – ဗောဇ္ဈင်္ဂါ.

သမထဿ အဝိက္ခေပဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိပဿနာယ အနုပဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သမထဝိပဿနာနံ ဧကရသဋ္ဌံ ဗုဇ္ဈန္တီတိ – ဗောဇ္ဈင်္ဂါ. ယုဂနဒ္ဓဿ အနတိဝတ္တနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သိက္ခာယ သမာဒါနဋ္ဌံ ဗုဇ္ဈန္တီတိ – ဗောဇ္ဈင်္ဂါ. အာရမ္မဏဿ ဂေါစရဋ္ဌံ ဗုဇ္ဈန္တီတိ – ဗောဇ္ဈင်္ဂါ. လီနဿ စိတ္တဿ ပဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဥဒ္ဓတဿ စိတ္တဿ နိဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဥဘောဝိသုဒ္ဓါနံ အဇ္ဈုပေက္ခနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိသေသာဓိဂမဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဥတ္တရိ ပဋိဝေဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. သစ္စာဘိသမယဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိရောဓေ ပတိဋ္ဌာပကဋ္ဌံ ဗုဇ္ဈန္တီတိ – ဗောဇ္ဈင်္ဂါ.

သဒ္ဓိန္ဒြိယဿ အဓိမောက္ခဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ပညိန္ဒြိယဿ ဒဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သဒ္ဓါဗလဿ အဿဒ္ဓိယေ အကမ္ပိယဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ပညာဗလဿ အဝိဇ္ဇာယ အကမ္ပိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. သတိသမ္ဗောဇ္ဈင်္ဂဿ ဥပဋ္ဌာနဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဥပေက္ခာသမ္ဗောဇ္ဈင်္ဂဿ ပဋိသင်္ခါနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သမ္မာဒိဋ္ဌိယာ ဒဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ သမ္မာသမာဓိဿ အဝိက္ခေပဋ္ဌံ ဗုဇ္ဈန္တီတိ – ဗောဇ္ဈင်္ဂါ.

ဣန္ဒြိယာနံ အာဓိပတေယျဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဗလာနံ အကမ္ပိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိယျာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. မဂ္ဂဿ ဟေတုဋ္ဌံ ဗုဇ္ဈန္တီတိ – ဗောဇ္ဈင်္ဂါ. သတိပဋ္ဌာနာနံ ဥပဋ္ဌာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သမ္မပ္ပဓာနာနံ ပဒဟနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဣဒ္ဓိပါဒါနံ ဣဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သစ္စာနံ တထဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပယောဂါနံ ပဋိပ္ပဿဒ္ဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဖလာနံ သစ္ဆိကိရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ.

ဝိတက္ကဿ အဘိနိရောပနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိစာရဿ ဥပဝိစာရဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပီတိယာ ဖရဏဋ္ဌံ ဗုဇ္ဈန္တီတိ – ဗောဇ္ဈင်္ဂါ. သုခဿ အဘိသန္ဒနဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဧကဂ္ဂဋ္ဌံ ဗုဇ္ဈန္တီတိ – ဗောဇ္ဈင်္ဂါ.

အာဝဇ္ဇနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သဉ္ဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကောဒဋ္ဌံ ဗုဇ္ဈန္တီတိ – ဗောဇ္ဈင်္ဂါ. အဘိညာယ ဉာတဋ္ဌံ [အဘိညေယျတ္ထံ (သျာ.)] ဗုဇ္ဈန္တီတိ – ဗောဇ္ဈင်္ဂါ. ပရိညာယ တီရဏဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပဟာနဿ ပရိစ္စာဂဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဘာဝနာယ ဧကရသဋ္ဌံ ဗုဇ္ဈန္တီတိ – ဗောဇ္ဈင်္ဂါ. သစ္ဆိကိရိယာယ ဖဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ခန္ဓာနံ ခန္ဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဓာတူနံ ဓာတုဋ္ဌံ ဗုဇ္ဈန္တီတိ – ဗောဇ္ဈင်္ဂါ. အာယတနာနံ အာယတနဋ္ဌံ ဗုဇ္ဈန္တီတိ – ဗောဇ္ဈင်္ဂါ. သင်္ခတာနံ သင်္ခတဋ္ဌံ ဗုဇ္ဈန္တီတိ – ဗောဇ္ဈင်္ဂါ. အသင်္ခတဿ အသင်္ခတဋ္ဌံ ဗုဇ္ဈန္တီတိ – ဗောဇ္ဈင်္ဂါ.

စိတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တာနန္တရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဝုဋ္ဌာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဝိဝဋ္ဋနဋ္ဌံ [ဝိဝဇ္ဇနဋ္ဌံ (သျာ.)] ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဟေတုဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ပစ္စယဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဝတ္ထုဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဘူမဋ္ဌံ [ဘုမ္မဋ္ဌံ (သျာ.) ပဋိ. မ. ၁.၁၄ ပဿိတဗ္ဗာ] ဗုဇ္ဈန္တီတိ – ဗောဇ္ဈင်္ဂါ. စိတ္တဿ အာရမ္မဏဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဂေါစရဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ စရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ ဂတဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ အဘိနီဟာရဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ နိယျာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. စိတ္တဿ နိဿရဏဋ္ဌံ ဗုဇ္ဈန္တီတိ – ဗောဇ္ဈင်္ဂါ.

ဧကတ္တေ အာဝဇ္ဇနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဝိဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သဉ္ဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဧကောဒဋ္ဌံ ဗုဇ္ဈန္တီတိ – ဗောဇ္ဈင်္ဂါ. ( ) [(ဧကတ္တေ ဥပနိဗန္ဓနဋ္ဌံ ဗုဇ္ဈန္တီတိ – ဗောဇ္ဈင်္ဂါ) (သဗ္ဗတ္ထ)]. ဧကတ္တေ ပက္ခန္ဒနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပသီဒနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သန္တိဋ္ဌနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဝိမုစ္စနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဧတံ သန္တန္တိ ပဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ယာနီကတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဝတ္ထုကတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ အနုဋ္ဌိတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပရိစိတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သုသမာရဒ္ဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပရိဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပရိဝါရဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပရိပူရဏဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သမောဓာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ အဓိဋ္ဌာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ အာသေဝနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဘာဝနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဗဟုလီကမ္မဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သုသမုဂ္ဂတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သုဝိမုတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဗုဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ အနုဗုဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပဋိဗုဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သမ္ဗုဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဗောဓနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ အနုဗောဓနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပဋိဗောဓနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သမ္ဗုဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဗောဓိပက္ခိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ အနုဗောဓိပက္ခိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပဋိဗောဓိပက္ခိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သမ္ဗောဓိပက္ခိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဇောတနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ဥဇ္ဇောတနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ အနုဇောတနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ ပဋိဇောတနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဧကတ္တေ သဉ္ဇောတနဋ္ဌံ ဗုဇ္ဈန္တီတိ – ဗောဇ္ဈင်္ဂါ.

ပတာပနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိရောစနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ကိလေသာနံ သန္တာပနဋ္ဌံ ဗုဇ္ဈန္တီတိ – ဗောဇ္ဈင်္ဂါ. အမလဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိမလဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိမ္မလဋ္ဌံ ဗုဇ္ဈန္တီတိ – ဗောဇ္ဈင်္ဂါ. သမဋ္ဌံ ဗုဇ္ဈန္တီတိ – ဗောဇ္ဈင်္ဂါ. သမယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိဝေကဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိဝေကစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိရာဂဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိရာဂစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိရောဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိရောဓစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝေါသဂ္ဂဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝေါသဂ္ဂစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိမုတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝိမုတ္တိစရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ.

ဆန္ဒဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ မူလဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ ပါဒဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ ပဓာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ ဣဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ အဓိမောက္ခဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ ပဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ ဥပဋ္ဌာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ အဝိက္ခေပဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဆန္ဒဿ ဒဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ.

ဝီရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ စိတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ။ပေ။ ဝီမံသဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ မူလဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ ပါဒဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ ပဓာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ ဣဇ္ဈနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ အဓိမောက္ခဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ ပဂ္ဂဟဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ ဥပဋ္ဌာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ အဝိက္ခေပဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဝီမံသာယ ဒဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ.

ဒုက္ခဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဒုက္ခဿ ပီဠနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဒုက္ခဿ သင်္ခတဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဒုက္ခဿ သန္တာပဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဒုက္ခဿ ဝိပရိဏာမဋ္ဌံ ဗုဇ္ဈန္တီတိ – ဗောဇ္ဈင်္ဂါ. သမုဒယဋ္ဌံ ဗုဇ္ဈန္တီတိ – ဗောဇ္ဈင်္ဂါ. သမုဒယဿ အာယူဟနဋ္ဌံ နိဒါနဋ္ဌံ သညောဂဋ္ဌံ ပလိဗောဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိရောဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. နိရောဓဿ နိဿရဏဋ္ဌံ ဝိဝေကဋ္ဌံ အသင်္ခတဋ္ဌံ အမတဋ္ဌံ ဗုဇ္ဈန္တီတိ – ဗောဇ္ဈင်္ဂါ. မဂ္ဂဋ္ဌံ ဗုဇ္ဈန္တီတိ – ဗောဇ္ဈင်္ဂါ. မဂ္ဂဿ နိယျာနဋ္ဌံ ဟေတုဋ္ဌံ ဒဿနဋ္ဌံ အာဓိပတေယျဋ္ဌံ ဗုဇ္ဈန္တီတိ – ဗောဇ္ဈင်္ဂါ.

တထဋ္ဌံ ဗုဇ္ဈန္တီတိ – ဗောဇ္ဈင်္ဂါ. အနတ္တဋ္ဌံ ဗုဇ္ဈန္တီတိ – ဗောဇ္ဈင်္ဂါ. သစ္စဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပဋိဝေဓဋ္ဌံ ဗုဇ္ဈန္တီတိ – ဗောဇ္ဈင်္ဂါ. အဘိဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ပရိဇာနနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဓမ္မဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဓာတုဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဉာတဋ္ဌံ ဗုဇ္ဈန္တီတိ – ဗောဇ္ဈင်္ဂါ. သစ္ဆိကိရိယဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဖဿနဋ္ဌံ ဗုဇ္ဈန္တီတိ – ဗောဇ္ဈင်္ဂါ. အဘိသမယဋ္ဌံ ဗုဇ္ဈန္တီတိ – ဗောဇ္ဈင်္ဂါ.

နေက္ခမ္မံ ဗုဇ္ဈန္တီတိ – ဗောဇ္ဈင်္ဂါ. အဗျာပါဒံ ဗုဇ္ဈန္တီတိ – ဗောဇ္ဈင်္ဂါ. အာလောကသညံ ဗုဇ္ဈန္တီတိ – ဗောဇ္ဈင်္ဂါ. အဝိက္ခေပံ ဗုဇ္ဈန္တီတိ – ဗောဇ္ဈင်္ဂါ. ဓမ္မဝဝတ္ထာနံ ဗုဇ္ဈန္တီတိ – ဗောဇ္ဈင်္ဂါ. ဉာဏံ ဗုဇ္ဈန္တီတိ – ဗောဇ္ဈင်္ဂါ. ပါမောဇ္ဇံ ဗုဇ္ဈန္တီတိ – ဗောဇ္ဈင်္ဂါ. ပဌမံ ဈာနံ ဗုဇ္ဈန္တီတိ – ဗောဇ္ဈင်္ဂါ။ပေ။ အရဟတ္တမဂ္ဂံ ဗုဇ္ဈန္တီတိ – ဗောဇ္ဈင်္ဂါ. အရဟတ္တဖလသမာပတ္တိံ ဗုဇ္ဈန္တီတိ – ဗောဇ္ဈင်္ဂါ.

အဓိမောက္ခဋ္ဌေန သဒ္ဓိန္ဒြိယံ ဗုဇ္ဈန္တီတိ – ဗောဇ္ဈင်္ဂါ။ပေ။ ဒဿနဋ္ဌေန ပညိန္ဒြိယံ ဗုဇ္ဈန္တီတိ – ဗောဇ္ဈင်္ဂါ. အဿဒ္ဓိယေ အကမ္ပိယဋ္ဌေန သဒ္ဓါဗလံ ဗုဇ္ဈန္တီတိ – ဗောဇ္ဈင်္ဂါ။ပေ။ အဝိဇ္ဇာယ အကမ္ပိယဋ္ဌေန ပညာဗလံ ဗုဇ္ဈန္တီတိ – ဗောဇ္ဈင်္ဂါ. ဥပဋ္ဌာနဋ္ဌေန သတိသမ္ဗောဇ္ဈင်္ဂံ ဗုဇ္ဈန္တီတိ – ဗောဇ္ဈင်္ဂါ။ပေ။ ပဋိသင်္ခါနဋ္ဌေန ဥပေက္ခာသမ္ဗောဇ္ဈင်္ဂံ ဗုဇ္ဈန္တီတိ – ဗောဇ္ဈင်္ဂါ.

ဒဿနဋ္ဌေန သမ္မာဒိဋ္ဌိံ ဗုဇ္ဈန္တီတိ – ဗောဇ္ဈင်္ဂါ။ပေ။ အဝိက္ခေပဋ္ဌေန သမ္မာသမာဓိံ ဗုဇ္ဈန္တီတိ – ဗောဇ္ဈင်္ဂါ. အာဓိပတေယျဋ္ဌေန ဣန္ဒြိယံ ဗုဇ္ဈန္တီတိ – ဗောဇ္ဈင်္ဂါ. အကမ္ပိယဋ္ဌေန ဗလံ ဗုဇ္ဈန္တီတိ – ဗောဇ္ဈင်္ဂါ. နိယျာနဋ္ဌံ ဗုဇ္ဈန္တီတိ – ဗောဇ္ဈင်္ဂါ. ဟေတုဋ္ဌေန မဂ္ဂံ ဗုဇ္ဈန္တီတိ – ဗောဇ္ဈင်္ဂါ. ဥပဋ္ဌာနဋ္ဌေန သတိပဋ္ဌာနံ ဗုဇ္ဈန္တီတိ – ဗောဇ္ဈင်္ဂါ. ပဒဟနဋ္ဌေန သမ္မပ္ပဓာနံ ဗုဇ္ဈန္တီတိ – ဗောဇ္ဈင်္ဂါ. ဣဇ္ဈနဋ္ဌေန ဣဒ္ဓိပါဒံ ဗုဇ္ဈန္တီတိ – ဗောဇ္ဈင်္ဂါ. တထဋ္ဌေန သစ္စံ ဗုဇ္ဈန္တီတိ – ဗောဇ္ဈင်္ဂါ. အဝိက္ခေပဋ္ဌေန သမထံ ဗုဇ္ဈန္တီတိ – ဗောဇ္ဈင်္ဂါ. အနုပဿနဋ္ဌေ ဝိပဿနံ ။ပေ။ ဧကရသဋ္ဌေန သမထဝိပဿနံ ဗုဇ္ဈန္တီတိ – ဗောဇ္ဈင်္ဂါ. အနတိဝတ္တနဋ္ဌေန ယုဂနဒ္ဓံ ဗုဇ္ဈန္တီတိ – ဗောဇ္ဈင်္ဂါ. သံဝရဋ္ဌေန သီလဝိသုဒ္ဓိံ ဗုဇ္ဈန္တီတိ – ဗောဇ္ဈင်္ဂါ. အဝိက္ခေပဋ္ဌေန စိတ္တဝိသုဒ္ဓိံ ဗုဇ္ဈန္တီတိ – ဗောဇ္ဈင်္ဂါ. ဒဿနဋ္ဌေန ဒိဋ္ဌိဝိသုဒ္ဓိံ ဗုဇ္ဈန္တီတိ – ဗောဇ္ဈင်္ဂါ. မုတ္တဋ္ဌေန ဝိမောက္ခံ ဗုဇ္ဈန္တီတိ – ဗောဇ္ဈင်္ဂါ. ပဋိဝေဓဋ္ဌေန ဝိဇ္ဇံ ဗုဇ္ဈန္တီတိ – ဗောဇ္ဈင်္ဂါ. ပရိစ္စာဂဋ္ဌေန ဝိမုတ္တိံ ဗုဇ္ဈန္တီတိ – ဗောဇ္ဈင်္ဂါ. သမုစ္ဆေဒဋ္ဌေန ခယေ ဉာဏံ ဗုဇ္ဈန္တီတိ – ဗောဇ္ဈင်္ဂါ. ပဋိပ္ပဿဒ္ဓဋ္ဌေန အနုပ္ပါဒေ ဉာဏံ ဗုဇ္ဈန္တီတိ – ဗောဇ္ဈင်္ဂါ.

ဆန္ဒံ မူလဋ္ဌေန ဗုဇ္ဈန္တီတိ – ဗောဇ္ဈင်္ဂါ. မနသိကာရံ သမုဋ္ဌာနဋ္ဌေန ဗုဇ္ဈန္တီတိ – ဗောဇ္ဈင်္ဂါ. ဖဿံ သမောဓာနဋ္ဌေန ဗုဇ္ဈန္တီတိ – ဗောဇ္ဈင်္ဂါ. ဝေဒနံ သမောသရဏဋ္ဌေန ဗုဇ္ဈန္တီတိ – ဗောဇ္ဈင်္ဂါ. သမာဓိံ ပမုခဋ္ဌေန ဗုဇ္ဈန္တီတိ – ဗောဇ္ဈင်္ဂါ. သတိံ အာဓိပတေယျဋ္ဌေန ဗုဇ္ဈန္တီတိ – ဗောဇ္ဈင်္ဂါ. ပညံ တတုတ္တရဋ္ဌေန ဗုဇ္ဈန္တီတိ – ဗောဇ္ဈင်္ဂါ. ဝိမုတ္တိံ သာရဋ္ဌေန ဗုဇ္ဈန္တီတိ – ဗောဇ္ဈင်္ဂါ. အမတောဂဓံ နိဗ္ဗာနံ ပရိယောသာနဋ္ဌေန ဗုဇ္ဈန္တီတိ – ဗောဇ္ဈင်္ဂါ.

၂၀. သာဝတ္ထိနိဒါနံ. တတြ ခေါ အာယသ္မာ သာရိပုတ္တော ဘိက္ခူ အာမန္တေသိ – ‘‘အာဝုသော ဘိက္ခဝေါ’’တိ [အာဝုသောတိ (သျာ.) သံ. နိ. ၅.၁၈၅ ပဿိတဗ္ဗာ]. ‘‘အာဝုသော’’တိ ခေါ တေ ဘိက္ခူ အာယသ္မတော သာရိပုတ္တဿ ပစ္စဿောသုံ. အာယသ္မာ သာရိပုတ္တော ဧတဒဝေါစ –

‘‘သတ္တိမေ၊ အာဝုသော၊ ဗောဇ္ဈင်္ဂါ. ကတမေ သတ္တ? သတိသမ္ဗောဇ္ဈင်္ဂေါ၊ ဓမ္မဝိစယသမ္ဗောဇ္ဈင်္ဂေါ။ပေ။ ဥပေက္ခာသမ္ဗောဇ္ဈင်္ဂေါ – ဣမေ ခေါ၊ အာဝုသော၊ သတ္တ ဗောဇ္ဈင်္ဂါ. ဣမေသံ ခွာဟံ၊ အာဝုသော၊ သတ္တန္နံ ဗောဇ္ဈင်္ဂါနံ ယေန ယေန ဗောဇ္ဈင်္ဂေန အာကင်္ခါမိ ပုဗ္ဗဏှသမယံ ဝိဟရိတုံ၊ တေန တေန ဗောဇ္ဈင်္ဂေန ပုဗ္ဗဏှသမယံ ဝိဟရာမိ. ယေန ယေန ဗောဇ္ဈင်္ဂေန အာကင်္ခါမိ မဇ္ဈနှိကသမယံ။ပေ။ သာယနှသမယံ ဝိဟရိတုံ၊ တေန တေန ဗောဇ္ဈင်္ဂေန သာယနှသမယံ ဝိဟရာမိ. သတိသမ္ဗောဇ္ဈင်္ဂေါ ဣတိ စေ မေ၊ ‘အာဝုသော၊ ဟောတိ၊ အပ္ပမာဏော’တိ မေ ဟောတိ၊ ‘သုသမာရဒ္ဓေါ’တိ မေ ဟောတိ. တိဋ္ဌန္တဉ္စ နံ [တိဋ္ဌန္တံ စရံ (သျာ.) သံ. နိ. ၅.၁၈၅ ပဿိတဗ္ဗာ] ‘တိဋ္ဌတီ’တိ ပဇာနာမိ. သစေပိ မေ စဝတိ၊ ‘ဣဒပ္ပစ္စယာ မေ စဝတီ’တိ ပဇာနာမိ. ဓမ္မဝိစယသမ္ဗောဇ္ဈင်္ဂေါ။ပေ။ ဥပေက္ခာသမ္ဗောဇ္ဈင်္ဂေါ ဣတိ စေ မေ၊ အာဝုသော၊ ဟောတိ၊ ‘အပ္ပမာဏော’တိ မေ ဟောတိ၊ ‘သုသမာရဒ္ဓေါ’တိ မေ ဟောတိ. တိဋ္ဌန္တဉ္စ နံ ‘တိဋ္ဌတီ’တိ ပဇာနာမိ. သစေပိ မေ စဝတိ၊ ‘ဣဒပ္ပစ္စယာ မေ စဝတီ’တိ ပဇာနာမိ.

‘‘သေယျထာပိ၊ အာဝုသော၊ ရညော ဝါ ရာဇမဟာမတ္တဿ ဝါ နာနာရတ္တာနံ ဒုဿာနံ ဒုဿကရဏ္ဍကော ပူရော အဿ. သော ယညဒေဝ ဒုဿယုဂံ အာကင်္ခေယျ ပုဗ္ဗဏှသမယံ ပါရုပိတုံ၊ တံ တဒေဝ ဒုဿယုဂံ ပုဗ္ဗဏှသမယံ ပါရုပေယျ. ယညဒေဝ ဒုဿယုဂံ အာကင်္ခေယျ မဇ္ဈနှိကသမယံ။ပေ။ သာယနှသမယံ ပါရုပိတုံ၊ တံ တဒေဝ ဒုဿယုဂံ သာယနှသမယံ ပါရုပေယျ. ဧဝမေဝ ခွာဟံ၊ အာဝုသော၊ ဣမေသံ သတ္တန္နံ ဗောဇ္ဈင်္ဂါနံ ယေန ယေန ဗောဇ္ဈင်္ဂေန အာကင်္ခါမိ ပုဗ္ဗဏှသမယံ ဝိဟရိတုံ၊ တေန တေန ဗောဇ္ဈင်္ဂေန ပုဗ္ဗဏှသမယံ ဝိဟရာမိ. ယေန ယေန ဗောဇ္ဈင်္ဂေန အာကင်္ခါမိ မဇ္ဈနှိကသမယံ။ပေ။ သာယနှသမယံ ဝိဟရိတုံ၊ တေန တေန ဗောဇ္ဈင်္ဂေန သာယနှသမယံ ဝိဟရာမိ. သတိသမ္ဗောဇ္ဈင်္ဂေါ ဣတိ စေ မေ၊ အာဝုသော၊ ဟောတိ၊ ‘အပ္ပမာဏော’တိ မေ ဟောတိ၊ ‘သုသမာရဒ္ဓေါ’တိ မေ ဟောတိ. တိဋ္ဌန္တဉ္စ နံ ‘တိဋ္ဌတီ’တိ ပဇာနာမိ. သစေပိ မေ စဝတိ၊ ‘ဣဒပ္ပစ္စယာ မေ စဝတီ’တိ ပဇာနာမိ။ပေ။ ဥပေက္ခာသမ္ဗောဇ္ဈင်္ဂေါ ဣတိ စေ မေ၊ အာဝုသော၊ ဟောတိ၊ ‘အပ္ပမာဏော’တိ မေ ဟောတိ၊ ‘သုသမာရဒ္ဓေါ’တိ မေ ဟောတိ. တိဋ္ဌန္တဉ္စ နံ ‘တိဋ္ဌတီ’တိ ပဇာနာမိ. သစေပိ မေ စဝတိ၊ ‘ဣဒပ္ပစ္စယာ မေ စဝတီ’တိ ပဇာနာမိ’’.

သုတ္တန္တနိဒ္ဒေသော

၂၁. ကထံ သတိသမ္ဗောဇ္ဈင်္ဂေါ ဣတိ စေ မေ ဟောတီတိ ဗောဇ္ဈင်္ဂေါ? ယာဝတာ နိရောဓူပဋ္ဌာတိ တာဝတာ သတိသမ္ဗောဇ္ဈင်္ဂေါ. ဣတိ စေ မေ ဟောတီတိ ဗောဇ္ဈင်္ဂေါ. သေယျထာပိ တေလပ္ပဒီပဿ ဈာယတော ယာဝတာ အစ္စိ တာဝတာ ဝဏ္ဏော၊ ယာဝတာ ဝဏ္ဏော တာဝတာ အစ္စိ. ဧဝမေဝ ယာဝတာ နိရောဓူပဋ္ဌာတိ တာဝတာ သတိသမ္ဗောဇ္ဈင်္ဂေါ. ဣတိ စေ မေ ဟောတီတိ ဗောဇ္ဈင်္ဂေါ.

ကထံ အပ္ပမာဏော ဣတိ စေ မေ ဟောတီတိ ဗောဇ္ဈင်္ဂေါ? ပမာဏဗဒ္ဓါ [ပမာဏဝန္တာ (သျာ.)၊ အဋ္ဌကထာ ဩလောကေတဗ္ဗာ] ကိလေသာ၊ သဗ္ဗေ စ ပရိယုဋ္ဌာနာ၊ ယေ စ သင်္ခါရာ ပေါနောဘဝိကာ အပ္ပမာဏော နိရောဓော အစလဋ္ဌေန အသင်္ခတဋ္ဌေန. ယာဝတာ နိရောဓူပဋ္ဌာတိ တာဝတာ အပ္ပမာဏော. ဣတိ စေ မေ ဟောတီတိ ဗောဇ္ဈင်္ဂေါ.

ကထံ သုသမာရဒ္ဓေါ ဣတိ စေ မေ ဟောတီတိ – ဗောဇ္ဈင်္ဂေါ? ဝိသမာ ကိလေသာ၊ သဗ္ဗေ စ ပရိယုဋ္ဌာနာ၊ ယေ စ သင်္ခါရာ ပေါနောဘဝိကာ၊ သမဓမ္မော နိရောဓော သန္တဋ္ဌေန ပဏီတဋ္ဌေန. ယာဝတာ နိရောဓူပဋ္ဌာတိ တာဝတာ သုသမာရဒ္ဓေါ ဣတိ စေ မေ ဟောတီတိ ဗောဇ္ဈင်္ဂေါ.

ကထံ ‘‘တိဋ္ဌန္တဉ္စ နံ တိဋ္ဌတီ’’တိ ပဇာနာမိ၊ သစေပိ စဝတိ ‘‘ဣဒပ္ပစ္စယာ စဝတီ’’တိ ပဇာနာမိ? ကတိဟာကာရေဟိ သတိသမ္ဗောဇ္ဈင်္ဂေါ တိဋ္ဌတိ? ကတိဟာကာရေဟိ သတိသမ္ဗောဇ္ဈင်္ဂေါ စဝတိ? အဋ္ဌဟာကာရေဟိ သတိသမ္ဗောဇ္ဈင်္ဂေါ တိဋ္ဌတိ. အဋ္ဌဟာကာရေဟိ သတိသမ္ဗောဇ္ဈင်္ဂေါ စဝတိ.

ကတမေဟိ အဋ္ဌဟာကာရေဟိ သတိသမ္ဗောဇ္ဈင်္ဂေါ တိဋ္ဌတိ? အနုပ္ပါဒံ အာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ၊ ဥပ္ပါဒံ အနာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ၊ အပ္ပဝတ္တံ အာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ၊ ပဝတ္တံ အနာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ၊ အနိမိတ္တံ အာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ၊ နိမိတ္တံ အနာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ၊ နိရောဓံ အာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ၊ သင်္ခါရေ အနာဝဇ္ဇိတတ္တာ သတိသမ္ဗောဇ္ဈင်္ဂေါ တိဋ္ဌတိ – ဣမေဟိ အဋ္ဌဟာကာရေဟိ သတိသမ္ဗောဇ္ဈင်္ဂေါ တိဋ္ဌတိ.

ကတမေဟိ အဋ္ဌဟာကာရေဟိ သတိသမ္ဗောဇ္ဈင်္ဂေါ စဝတိ? ဥပ္ပါဒံ အာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ၊ အနုပ္ပါဒံ အနာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ၊ ပဝတ္တံ အာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ၊ အပ္ပဝတ္တံ အနာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ၊ နိမိတ္တံ အာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ၊ အနိမိတ္တံ အနာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ၊ သင်္ခါရေ အာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ၊ နိရောဓံ အနာဝဇ္ဇိတတ္တာ သတိသမ္ဗောဇ္ဈင်္ဂေါ စဝတိ – ဣမေဟိ အဋ္ဌဟာကာရေဟိ သတိသမ္ဗောဇ္ဈင်္ဂေါ စဝတိ. ဧဝံ ‘‘တိဋ္ဌန္တဉ္စ နံ တိဋ္ဌတီ’’တိ ပဇာနာမိ. သစေပိ စဝတိ၊ ‘‘ဣဒပ္ပစ္စယာ မေ စဝတီ’’တိ ပဇာနာမိ။ပေ။.

ကထံ ဥပေက္ခာသမ္ဗောဇ္ဈင်္ဂေါ ဣတိ စေ မေ ဟောတီတိ ဗောဇ္ဈင်္ဂေါ? ယာဝတာ နိရောဓူပဋ္ဌာတိ တာဝတာ ဥပေက္ခာသမ္ဗောဇ္ဈင်္ဂေါ ဣတိ စေ မေ ဟောတီတိ ဗောဇ္ဈင်္ဂေါ. သေယျထာပိ တေလပ္ပဒီပဿ ဈာယတော ယာဝတာ အစ္စိ တာဝတာ ဝဏ္ဏော၊ ယာဝတာ ဝဏ္ဏော တာဝတာ အစ္စိ. ဧဝမေဝ ယာဝတာ နိရောဓူပဋ္ဌာတိ တာဝတာ ဥပေက္ခာသမ္ဗောဇ္ဈင်္ဂေါ ဣတိ စေ ဟောတီတိ ဗောဇ္ဈင်္ဂေါ.

ကထံ အပ္ပမာဏော ဣတိ စေ ဟောတီတိ ဗောဇ္ဈင်္ဂေါ? ပမာဏဗဒ္ဓါ ကိလေသာ၊ သဗ္ဗေ စ ပရိယုဋ္ဌာနာ၊ ယေ စ သင်္ခါရာ ပေါနောဘဝိကာ အပ္ပမာဏော နိရောဓော အစလဋ္ဌေန အသင်္ခတဋ္ဌေန. ယာဝတာ နိရောဓူပဋ္ဌာတိ တာဝတာ အပ္ပမာဏော ဣတိ စေ ဟောတီတိ ဗောဇ္ဈင်္ဂေါ.

ကထံ သုသမာရဒ္ဓေါ ဣတိ စေ ဟောတီတိ ဗောဇ္ဈင်္ဂေါ? ဝိသမာ ကိလေသာ၊ သဗ္ဗေ စ ပရိယုဋ္ဌာနာ၊ ယေ စ သင်္ခါရာ ပေါနောဘဝိကာ သမဓမ္မော နိရောဓော သန္တဋ္ဌေန ပဏီတဋ္ဌေန. ယာဝတာ နိရောဓူပဋ္ဌာတိ တာဝတာ သုသမာရဒ္ဓေါ ဣတိ စေ ဟောတီတိ ဗောဇ္ဈင်္ဂေါ.

ကထံ ‘‘တိဋ္ဌန္တဉ္စ နံ တိဋ္ဌတီ’’တိ ပဇာနာမိ၊ သစေပိ စဝတိ ‘‘ဣဒပ္ပစ္စယာ မေ စဝတီ’’တိ ပဇာနာမိ? ကတိဟာကာရေဟိ ဥပေက္ခာသမ္ဗောဇ္ဈင်္ဂေါ တိဋ္ဌတိ? ကတိဟာကာရေဟိ ဥပေက္ခာသမ္ဗောဇ္ဈင်္ဂေါ စဝတိ? အဋ္ဌဟာကာရေဟိ ဥပေက္ခာသမ္ဗောဇ္ဈင်္ဂေါ တိဋ္ဌတိ. အဋ္ဌဟာကာရေဟိ ဥပေက္ခာသမ္ဗောဇ္ဈင်္ဂေါ စဝတိ.

ကတမေဟိ အဋ္ဌဟာကာရေဟိ ဥပေက္ခာသမ္ဗောဇ္ဈင်္ဂေါ တိဋ္ဌတိ? အနုပ္ပါဒံ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ၊ ဥပ္ပါဒံ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ၊ အပ္ပဝတ္တံ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ၊ ပဝတ္တံ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ၊ အနိမိတ္တံ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ၊ နိမိတ္တံ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ၊ နိရောဓံ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ၊ သင်္ခါရေ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ တိဋ္ဌတိ – ဣမေဟိ အဋ္ဌဟာကာရေဟိ ဥပေက္ခာသမ္ဗောဇ္ဈင်္ဂေါ တိဋ္ဌတိ.

ကတမေဟိ အဋ္ဌဟာကာရေဟိ ဥပေက္ခာသမ္ဗောဇ္ဈင်္ဂေါ စဝတိ? ဥပ္ပါဒံ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ၊ အနုပ္ပါဒံ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ၊ ပဝတ္တံ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ၊ အပ္ပဝတ္တံ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ၊ နိမိတ္တံ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ၊ အနိမိတ္တံ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ၊ သင်္ခါရေ အာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ၊ နိရောဓံ အနာဝဇ္ဇိတတ္တာ ဥပေက္ခာသမ္ဗောဇ္ဈင်္ဂေါ စဝတိ – ဣမေဟိ အဋ္ဌဟာကာရေဟိ ဥပေက္ခာသမ္ဗောဇ္ဈင်္ဂေါ စဝတိ. ဧဝံ ‘‘တိဋ္ဌန္တဉ္စ နံ တိဋ္ဌတီ’’တိ ပဇာနာမိ၊ သစေပိ စဝတိ၊ ‘‘ဣဒပ္ပစ္စယာ မေ စဝတီ’’တိ ပဇာနာမိ.

ဗောဇ္ဈင်္ဂကထာ နိဋ္ဌိတာ.