၄. မေတ္တာကထာ

၂၂. သာဝတ္ထိနိဒါနံ. ‘‘မေတ္တာယ၊ ဘိက္ခဝေ၊ စေတောဝိမုတ္တိယာ အာသေဝိတာယ ဘာဝိတာယ ဗဟုလီကတာယ ယာနီကတာယ ဝတ္ထုကတာယ အနုဋ္ဌိတာယ ပရိစိတာယ သုသမာရဒ္ဓါယ ဧကာဒသာနိသံသာ ပါဋိကင်္ခါ. ကတမေ ဧကာဒသ? သုခံ သုပတိ၊ သုခံ ပဋိဗုဇ္ဈတိ၊ န ပါပကံ သုပိနံ ပဿတိ၊ မနုဿာနံ ပိယော ဟောတိ၊ အမနုဿာနံ ပိယော ဟောတိ၊ ဒေဝတာ ရက္ခန္တိ၊ နာဿ အဂ္ဂိ ဝါ ဝိသံ ဝါ သတ္ထံ ဝါ ကမတိ၊ တုဝဋံ စိတ္တံ သမာဓိယတိ၊ မုခဝဏ္ဏော ဝိပ္ပသီဒတိ၊ အသမ္မူဠှော ကာလင်္ကရောတိ၊ ဥတ္တရိ [ဥတ္တရိံ (သျာ. ပီ.) အ. နိ. ၁၁.၁၅ ပဿိတဗ္ဗာ] အပ္ပဋိဝိဇ္ဈန္တော ဗြဟ္မလောကူပဂေါ ဟောတိ. မေတ္တာယ၊ ဘိက္ခဝေ၊ စေတောဝိမုတ္တိယာ အာသေဝိတာယ ဘာဝိတာယ ဗဟုလီကတာယ ယာနီကတာယ ဝတ္ထုကတာယ အနုဋ္ဌိတာယ ပရိစိတာယ သုသမာရဒ္ဓါယ – ဣမေ ဧကာဒသာနိသံသာ ပါဋိကင်္ခါ’’.

အတ္ထိ အနောဓိသော ဖရဏာ မေတ္တာစေတောဝိမုတ္တိ၊ အတ္ထိ ဩဓိသော ဖရဏာ မေတ္တာစေတောဝိမုတ္တိ၊ အတ္ထိ ဒိသာဖရဏာ မေတ္တာစေတောဝိမုတ္တိ. ကတိဟာကာရေဟိ အနောဓိသော ဖရဏာ မေတ္တာစေတောဝိမုတ္တိ၊ ကတိဟာကာရေဟိ ဩဓိသော ဖရဏာ မေတ္တာစေတောဝိမုတ္တိ၊ ကတိဟာကာရေဟိ ဒိသာဖရဏာ မေတ္တာစေတောဝိမုတ္တိ? ပဉ္စဟာကာရေဟိ အနောဓိသော ဖရဏာ မေတ္တာစေတောဝိမုတ္တိ၊ သတ္တဟာကာရေဟိ ဩဓိသော ဖရဏာ မေတ္တာစေတောဝိမုတ္တိ၊ ဒသဟာကာရေဟိ ဒိသာဖရဏာ မေတ္တာစေတောဝိမုတ္တိ.

ကတမေဟိ ပဉ္စဟာကာရေဟိ အနောဓိသော ဖရဏာ မေတ္တာစေတောဝိမုတ္တိ? သဗ္ဗေ သတ္တာ အဝေရာ အဗျာပဇ္ဇာ [အဗျာပဇ္ဈာ (သျာ.)] အနီဃာ သုခီ အတ္တာနံ ပရိဟရန္တု. သဗ္ဗေ ပါဏာ။ပေ။ သဗ္ဗေ ဘူတာ။ပေ။ သဗ္ဗေ ပုဂ္ဂလာ။ပေ။ သဗ္ဗေ အတ္တဘာဝပရိယာပန္နာ အဝေရာ အဗျာပဇ္ဇာ အနီဃာ သုခီ အတ္တာနံ ပရိဟရန္တူတိ. ဣမေဟိ ပဉ္စဟာကာရေဟိ အနောဓိသော ဖရဏာ မေတ္တာစေတောဝိမုတ္တိ.

ကတမေဟိ သတ္တဟာကာရေဟိ ဩဓိသော ဖရဏာ မေတ္တာစေတောဝိမုတ္တိ? သဗ္ဗာ ဣတ္ထိယော အဝေရာ အဗျာပဇ္ဇာ အနီဃာ သုခီ အတ္တာနံ ပရိဟရန္တု. သဗ္ဗေ ပုရိသာ။ပေ။ သဗ္ဗေ အရိယာ။ပေ။ သဗ္ဗေ အနရိယာ။ပေ။ သဗ္ဗေ ဒေဝါ။ပေ။ သဗ္ဗေ မနုဿာ။ပေ။ သဗ္ဗေ ဝိနိပါတိကာ အဝေရာ အဗျာပဇ္ဇာ အနီဃာ သုခီ အတ္တာနံ ပရိဟရန္တူတိ. ဣမေဟိ သတ္တဟာကာရေဟိ ဩဓိသော ဖရဏာ မေတ္တာစေတောဝိမုတ္တိ.

ကတမေဟိ ဒသဟာကာရေဟိ ဒိသာဖရဏာ မေတ္တာစေတောဝိမုတ္တိ? သဗ္ဗေ ပုရတ္ထိမာယ ဒိသာယ သတ္တာ အဝေရာ အဗျာပဇ္ဇာ အနီဃာ သုခီ အတ္တာနံ ပရိဟရန္တု. သဗ္ဗေ ပစ္ဆိမာယ ဒိသာယ သတ္တာ။ပေ။ သဗ္ဗေ ဥတ္တရာယ ဒိသာယ သတ္တာ။ပေ။ သဗ္ဗေ ဒက္ခိဏာယ ဒိသာယ သတ္တာ။ပေ။ သဗ္ဗေ ပုရတ္ထိမာယ အနုဒိသာယ သတ္တာ။ပေ။ သဗ္ဗေ ပစ္ဆိမာယ အနုဒိသာယ သတ္တာ။ပေ။ သဗ္ဗေ ဥတ္တရာယ အနုဒိသာယ သတ္တာ။ပေ။ သဗ္ဗေ ဒက္ခိဏာယ အနုဒိသာယ သတ္တာ။ပေ။ သဗ္ဗေ ဟေဋ္ဌိမာယ ဒိသာယ သတ္တာ။ပေ။ သဗ္ဗေ ဥပရိမာယ ဒိသာယ သတ္တာ အဝေရာ အဗျာပဇ္ဇာ အနီဃာ သုခီ အတ္တာနံ ပရိဟရန္တု. သဗ္ဗေ ပုရတ္ထိမာယ ဒိသာယ ပါဏာ။ပေ။ ဘူတာ။ ပုဂ္ဂလာ။ အတ္တဘာဝပရိယာပန္နာ။ သဗ္ဗာ ဣတ္ထိယော။ သဗ္ဗေ ပုရိသာ။ သဗ္ဗေ အရိယာ။ သဗ္ဗေ အနရိယာ။ သဗ္ဗေ ဒေဝါ။ သဗ္ဗေ မနုဿာ။ သဗ္ဗေ ဝိနိပါတိကာ အဝေရာ အဗျာပဇ္ဇာ အနီဃာ သုခီ အတ္တာနံ ပရိဟရန္တု. သဗ္ဗေ ပစ္ဆိမာယ ဒိသာယ ဝိနိပါတိကာ။ပေ။ သဗ္ဗေ ဥတ္တရာယ ဒိသာယ ဝိနိပါတိကာ။ သဗ္ဗေ ဒက္ခိဏာယ ဒိသာယ ဝိနိပါတိကာ။ သဗ္ဗေ ပုရတ္ထိမာယ အနုဒိသာယ ဝိနိပါတိကာ။ သဗ္ဗေ ပစ္ဆိမာယ အနုဒိသာယ ဝိနိပါတိကာ။ သဗ္ဗေ ဥတ္တရာယ အနုဒိသာယ ဝိနိပါတိကာ။ သဗ္ဗေ ဒက္ခိဏာယ အနုဒိသာယ ဝိနိပါတိကာ။ သဗ္ဗေ ဟေဋ္ဌိမာယ ဒိသာယ ဝိနိပါတိကာ။ သဗ္ဗေ ဥပရိမာယ ဒိသာယ ဝိနိပါတိကာ အဝေရာ အဗျာပဇ္ဇာ အနီဃာ သုခီ အတ္တာနံ ပရိဟရန္တူတိ. ဣမေဟိ ဒသဟာကာရေဟိ ဒိသာဖရဏာ မေတ္တာစေတောဝိမုတ္တိ.

၁. ဣန္ဒြိယဝါရော

၂၃. သဗ္ဗေသံ သတ္တာနံ ပီဠနံ ဝဇ္ဇေတွာ အပီဠနာယ၊ ဥပဃာတံ ဝဇ္ဇေတွာ အနုပဃာတေန၊ သန္တာပံ ဝဇ္ဇေတွာ အသန္တာပေန၊ ပရိယာဒါနံ ဝဇ္ဇေတွာ အပရိယာဒါနေန၊ ဝိဟေသံ ဝဇ္ဇေတွာ အဝိဟေသာယ၊ သဗ္ဗေ သတ္တာ အဝေရိနော ဟောန္တု မာ ဝေရိနော၊ သုခိနော ဟောန္တု မာ ဒုက္ခိနော၊ သုခိတတ္တာ ဟောန္တု မာ ဒုက္ခိတတ္တာတိ – ဣမေဟိ အဋ္ဌဟာကာရေဟိ သဗ္ဗေ သတ္တေ မေတ္တာယတီတိ – မေတ္တာ. တံ ဓမ္မံ စေတယတီတိ – စေတော. သဗ္ဗဗျာပါဒပရိယုဋ္ဌာနေဟိ ဝိမုစ္စတီတိ – ဝိမုတ္တိ. မေတ္တာ စ စေတော စ ဝိမုတ္တိ စာတိ – မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သဒ္ဓါယ အဓိမုစ္စတိ. သဒ္ဓိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ဝီရိယံ ပဂ္ဂဏှာတိ. ဝီရိယိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သတိံ ဥပဋ္ဌာပေတိ. သတိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – စိတ္တံ သမာဒဟတိ. သမာဓိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ပညာယ ပဇာနာတိ. ပညိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ ပဉ္စဟိ ဣန္ဒြိယေဟိ မေတ္တာစေတောဝိမုတ္တိ အာသေဝီယတိ. ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ ဘာဝနာ ဟောန္တိ. ဣမေဟိ ပဉ္စဟိ ဣန္ဒြိယေဟိ မေတ္တာစေတောဝိမုတ္တိ ဘာဝီယတိ. ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ ဗဟုလီကတာ ဟောန္တိ. ဣမေဟိ ပဉ္စဟိ ဣန္ဒြိယေဟိ မေတ္တာစေတောဝိမုတ္တိ ဗဟုလီကရီယတိ. ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ အလင်္ကာရာ ဟောန္တိ. ဣမေဟိ ပဉ္စဟိ ဣန္ဒြိယေဟိ မေတ္တာစေတောဝိမုတ္တိ သွာလင်္ကတာ ဟောတိ. ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ ပရိက္ခာရာ ဟောန္တိ. ဣမေဟိ ပဉ္စဟိ ဣန္ဒြိယေဟိ မေတ္တာစေတောဝိမုတ္တိ သုပရိက္ခတာ ဟောတိ. ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ ပရိဝါရာ ဟောန္တိ. ဣမေဟိ ပဉ္စဟိ ဣန္ဒြိယေဟိ မေတ္တာစေတောဝိမုတ္တိ သုပရိဝုတာ ဟောတိ. ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ အာသေဝနာ ဟောန္တိ၊ ဘာဝနာ ဟောန္တိ၊ ဗဟုလီကတာ ဟောန္တိ၊ အလင်္ကာရာ ဟောန္တိ၊ ပရိက္ခာရာ ဟောန္တိ၊ ပရိဝါရာ ဟောန္တိ၊ ပါရိပူရီ ဟောန္တိ၊ သဟဂတာ ဟောန္တိ၊ သဟဇာတာ ဟောန္တိ၊ သံသဋ္ဌာ ဟောန္တိ၊ သမ္ပယုတ္တာ ဟောန္တိ၊ ပက္ခန္ဒနာ ဟောန္တိ၊ ပသီဒနာ [သံသီဒနာ (က. သီ. အဋ္ဌ.)] ဟောန္တိ၊ သန္တိဋ္ဌနာ ဟောန္တိ၊ ဝိမုစ္စနာ ဟောန္တိ၊ ‘‘ဧတံ သန္တ’’န္တိ ဖဿနာ ဟောန္တိ၊ ယာနီကတာ ဟောန္တိ၊ ဝတ္ထုကတာ ဟောန္တိ၊ အနုဋ္ဌိတာ ဟောန္တိ၊ ပရိစိတာ ဟောန္တိ၊ သုသမာရဒ္ဓါ ဟောန္တိ၊ သုဘာဝိတာ ဟောန္တိ၊ သွာဓိဋ္ဌိတာ ဟောန္တိ၊ သုသမုဂ္ဂတာ ဟောန္တိ၊ သုဝိမုတ္တာ ဟောန္တိ၊ နိဗ္ဗတ္တေန္တိ ဇောတေန္တိ ပတာပေန္တိ.

၂. ဗလဝါရော

၂၄. သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – အဿဒ္ဓိယေ န ကမ္ပတိ. သဒ္ဓါဗလပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ကောသဇ္ဇေ န ကမ္ပတိ. ဝီရိယဗလပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ပမာဒေ န ကမ္ပတိ. သတိဗလပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ဥဒ္ဓစ္စေ န ကမ္ပတိ. သမာဓိဗလပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – အဝိဇ္ဇာယ န ကမ္ပတိ. ပညာဗလပရိဘာဝိတာ ဟောတိ မေတ္တာစေတောဝိမုတ္တိ.

ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ အာသေဝီယတိ. ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ဘာဝနာ ဟောန္တိ. ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ ဘာဝီယတိ. ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ဗဟုလီကတာ ဟောန္တိ. ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ ဗဟုလီကရီယတိ. ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ အလင်္ကာရာ ဟောန္တိ. ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ သွာလင်္ကတာ ဟောတိ. ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ပရိက္ခာရာ ဟောန္တိ. ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ သုပရိက္ခတာ ဟောတိ. ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ ပရိဝါရာ ဟောန္တိ. ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ သုပရိဝုတာ ဟောတိ. ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ အာသေဝနာ ဟောန္တိ၊ ဘာဝနာ ဟောန္တိ၊ ဗဟုလီကတာ ဟောန္တိ၊ အလင်္ကာရာ ဟောန္တိ၊ ပရိက္ခာရာ ဟောန္တိ၊ ပရိဝါရာ ဟောန္တိ၊ ပါရိပူရီ ဟောန္တိ၊ သဟဂတာ ဟောန္တိ၊ သဟဇာတာ ဟောန္တိ၊ သံသဋ္ဌာ ဟောန္တိ၊ သမ္ပယုတ္တာ ဟောန္တိ၊ ပက္ခန္ဒနာ ဟောန္တိ၊ ပသီဒနာ ဟောန္တိ၊ သန္တိဋ္ဌနာ ဟောန္တိ၊ ဝိမုစ္စနာ ဟောန္တိ၊ ‘‘ဧတံ သန္တ’’န္တိ ဖဿနာ ဟောန္တိ၊ ယာနီကတာ ဟောန္တိ၊ ဝတ္ထုကတာ ဟောန္တိ၊ အနုဋ္ဌိတာ ဟောန္တိ၊ ပရိစိတာ ဟောန္တိ၊ သုသမာရဒ္ဓါ ဟောန္တိ၊ သုဘာဝိတာ ဟောန္တိ၊ သွာဓိဋ္ဌိတာ ဟောန္တိ၊ သုသမုဂ္ဂတာ ဟောန္တိ၊ သုဝိမုတ္တာ ဟောန္တိ နိဗ္ဗတ္တေန္တိ ဇောတေန္တိ ပတာပေန္တိ.

၃. ဗောဇ္ဈင်္ဂဝါရော

၂၅. သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သတိံ ဥပဋ္ဌာပေတိ. သတိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ပညာယ ပဝိစိနာတိ. ဓမ္မဝိစယသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ဝီရိယံ ပဂ္ဂဏှာတိ. ဝီရိယသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ပရိဠာဟံ ပဋိပ္ပဿမ္ဘေတိ. ပီတိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ဒုဋ္ဌုလ္လံ ပဋိပ္ပဿမ္ဘေတိ. ပဿဒ္ဓိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – စိတ္တံ သမာဒဟတိ. သမာဓိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ဉာဏေန ကိလေသေ ပဋိသင်္ခါတိ. ဥပေက္ခာသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ သတ္တဟိ ဗောဇ္ဈင်္ဂေဟိ မေတ္တာစေတောဝိမုတ္တိ အာသေဝီယတိ. ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ ဘာဝနာ ဟောန္တိ. ဣမေဟိ သတ္တဟိ ဗောဇ္ဈင်္ဂေဟိ မေတ္တာစေတောဝိမုတ္တိ ဘာဝီယတိ. ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ ဗဟုလီကတာ ဟောန္တိ. ဣမေဟိ သတ္တဟိ ဗောဇ္ဈင်္ဂေဟိ မေတ္တာစေတောဝိမုတ္တိ ဗဟုလီကရီယတိ. ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ အလင်္ကာရာ ဟောန္တိ. ဣမေဟိ သတ္တဟိ ဗောဇ္ဈင်္ဂေဟိ မေတ္တာစေတောဝိမုတ္တိ သွာလင်္ကတာ ဟောတိ. ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ ပရိက္ခာရာ ဟောန္တိ. ဣမေဟိ သတ္တဟိ ဗောဇ္ဈင်္ဂေဟိ မေတ္တာစေတောဝိမုတ္တိ သုပရိက္ခတာ ဟောတိ. ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ ပရိဝါရာ ဟောန္တိ. ဣမေဟိ သတ္တဟိ ဗောဇ္ဈင်္ဂေဟိ မေတ္တာစေတောဝိမုတ္တိ သုပရိဝုတာ ဟောတိ. ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ အာသေဝနာ ဟောန္တိ၊ ဘာဝနာ ဟောန္တိ၊ ဗဟုလီကတာ ဟောန္တိ၊ အလင်္ကာရာ ဟောန္တိ၊ ပရိက္ခာရာ ဟောန္တိ၊ ပရိဝါရာ ဟောန္တိ၊ ပါရိပူရီ ဟောန္တိ၊ သဟဂတာ ဟောန္တိ၊ သဟဇာတာ ဟောန္တိ၊ သံသဋ္ဌာ ဟောန္တိ၊ သမ္ပယုတ္တာ ဟောန္တိ၊ ပက္ခန္ဒနာ ဟောန္တိ၊ ပသီဒနာ ဟောန္တိ၊ သန္တိဋ္ဌနာ ဟောန္တိ၊ ဝိမုစ္စနာ ဟောန္တိ၊ ‘‘ဧတံ သန္တ’’န္တိ ဖဿနာ ဟောန္တိ၊ ယာနီကတာ ဟောန္တိ၊ ဝတ္ထုကတာ ဟောန္တိ၊ အနုဋ္ဌိတာ ဟောန္တိ၊ ပရိစိတာ ဟောန္တိ၊ သုသမာရဒ္ဓါ ဟောန္တိ၊ သုဘာဝိတာ ဟောန္တိ၊ သွာဓိဋ္ဌိတာ ဟောန္တိ၊ သုသမုဂ္ဂတာ ဟောန္တိ၊ သုဝိမုတ္တာ ဟောန္တိ၊ နိဗ္ဗတ္တေန္တိ ဇောတေန္တိ ပတာပေန္တိ.

၄. မဂ္ဂင်္ဂဝါရော

၂၆. သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ ပဿတိ. သမ္မာဒိဋ္ဌိပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ အဘိနိရောပေတိ. သမ္မာသင်္ကပ္ပပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ ပရိဂ္ဂဏှာတိ. သမ္မာဝါစာပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ သမုဋ္ဌာပေတိ. သမ္မာကမ္မန္တပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ ဝေါဒါပေတိ. သမ္မာအာဇီဝပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ ပဂ္ဂဏှာတိ. သမ္မာဝါယာမပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ ဥပဋ္ဌာပေတိ. သမ္မာသတိပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ သမာဒဟတိ. သမ္မာသမာဓိပရိဘာဝိတာ ဟောတိ မေတ္တာစေတောဝိမုတ္တိ.

ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ အာသေဝီယတိ. ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ ဘာဝနာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ ဘာဝီယတိ. ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ ဗဟုလီကတာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ ဗဟုလီကရီယတိ. ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ အလင်္ကာရာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ သွာလင်္ကတာ ဟောန္တိ. ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ ပရိက္ခာရာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ သုပရိက္ခတာ ဟောတိ. ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ ပရိဝါရာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ သုပရိဝုတာ ဟောတိ. ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ အာသေဝနာ ဟောန္တိ၊ ဘာဝနာ ဟောန္တိ၊ ဗဟုလီကတာ ဟောန္တိ၊ အလင်္ကာရာ ဟောန္တိ၊ ပရိက္ခာရာ ဟောန္တိ၊ ပရိဝါရာ ဟောန္တိ၊ ပါရိပူရီ ဟောန္တိ၊ သဟဂတာ ဟောန္တိ၊ သဟဇာတာ ဟောန္တိ၊ သံသဋ္ဌာ ဟောန္တိ၊ သမ္ပယုတ္တာ ဟောန္တိ၊ ပက္ခန္ဒနာ ဟောန္တိ၊ ပသီဒနာ ဟောန္တိ၊ သန္တိဋ္ဌနာ ဟောန္တိ၊ ဝိမုစ္စနာ ဟောန္တိ၊ ‘‘ဧတံ သန္တ’’န္တိ ဖဿနာ ဟောန္တိ၊ ယာနီကတာ ဟောန္တိ၊ ဝတ္ထုကတာ ဟောန္တိ၊ အနုဋ္ဌိတာ ဟောန္တိ၊ ပရိစိတာ ဟောန္တိ၊ သုသမာရဒ္ဓါ ဟောန္တိ၊ သုဘာဝိတာ ဟောန္တိ၊ သွာဓိဋ္ဌိတာ ဟောန္တိ၊ သုသမုဂ္ဂတာ ဟောန္တိ၊ သုဝိမုတ္တာ ဟောန္တိ နိဗ္ဗတ္တေန္တိ ဇောတေန္တိ ပတာပေန္တိ.

၂၇. သဗ္ဗေသံ ပါဏာနံ။ပေ။ သဗ္ဗေသံ ဘူတာနံ။ သဗ္ဗေသံ ပုဂ္ဂလာနံ။ သဗ္ဗေသံ အတ္တဘာဝပရိယာပန္နာနံ။ သဗ္ဗာသံ ဣတ္ထီနံ။ သဗ္ဗေသံ ပုရိသာနံ။ သဗ္ဗေသံ အရိယာနံ။ သဗ္ဗေသံ အနရိယာနံ။ သဗ္ဗေသံ ဒေဝါနံ။ သဗ္ဗေသံ မနုဿာနံ။ သဗ္ဗေသံ ဝိနိပါတိကာနံ ပီဠနံ ဝဇ္ဇေတွာ အပီဠနာယ၊ ဥပဃာတံ ဝဇ္ဇေတွာ အနုပဃာတေန၊ သန္တာပံ ဝဇ္ဇေတွာ အသန္တာပေန၊ ပရိယာဒါနံ ဝဇ္ဇေတွာ အပရိယာဒါနေန၊ ဝိဟေသံ ဝဇ္ဇေတွာ အဝိဟေသာယ၊ သဗ္ဗေ ဝိနိပါတိကာ အဝေရိနော ဟောန္တု မာ ဝေရိနော၊ သုခိနော ဟောန္တု မာ ဒုက္ခိနော၊ သုခိတတ္တာ ဟောန္တု မာ ဒုက္ခိတတ္တာတိ – ဣမေဟိ အဋ္ဌဟာကာရေဟိ သဗ္ဗေ ဝိနိပါတိကေ မေတ္တာယတီတိ – မေတ္တာ. တံ ဓမ္မံ စေတယတီတိ – စေတော. သဗ္ဗဗျာပါဒပရိယုဋ္ဌာနေဟိ ဝိမုစ္စတီတိ – ဝိမုတ္တိ. မေတ္တာ စ စေတော စ ဝိမုတ္တိ စာတိ – မေတ္တာစေတောဝိမုတ္တိ.

သဗ္ဗေ ဝိနိပါတိကာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သဒ္ဓါယ အဓိမုစ္စတိ. သဒ္ဓိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ။ပေ။ နိဗ္ဗတ္တေန္တိ ဇောတေန္တိ ပတာပေန္တိ.

သဗ္ဗေသံ ပုရတ္ထိမာယ ဒိသာယ သတ္တာနံ။ပေ။ သဗ္ဗေသံ ပစ္ဆိမာယ ဒိသာယ သတ္တာနံ။ သဗ္ဗေသံ ဥတ္တရာယ ဒိသာယ သတ္တာနံ။ သဗ္ဗေသံ ဒက္ခိဏာယ ဒိသာယ သတ္တာနံ။ သဗ္ဗေသံ ပုရတ္ထိမာယ အနုဒိသာယ သတ္တာနံ။ သဗ္ဗေသံ ပစ္ဆိမာယ အနုဒိသာယ သတ္တာနံ။ သဗ္ဗေသံ ဥတ္တရာယ အနုဒိသာယ သတ္တာနံ။ သဗ္ဗေသံ ဒက္ခိဏာယ အနုဒိသာယ သတ္တာနံ။ သဗ္ဗေသံ ဟေဋ္ဌိမာယ ဒိသာယ သတ္တာနံ။ သဗ္ဗေသံ ဥပရိမာယ ဒိသာယ သတ္တာနံ ပီဠနံ ဝဇ္ဇေတွာ အပီဠနာယ၊ ဥပဃာတံ ဝဇ္ဇေတွာ အနုပဃာတေန၊ သန္တာပံ ဝဇ္ဇေတွာ အသန္တာပေန၊ ပရိယာဒါနံ ဝဇ္ဇေတွာ အပရိယာဒါနေန၊ ဝိဟေသံ ဝဇ္ဇေတွာ အဝိဟေသာယ၊ သဗ္ဗေ ဥပရိမာယ ဒိသာယ သတ္တာ အဝေရိနော ဟောန္တု မာ ဝေရိနော၊ သုခိနော ဟောန္တု မာ ဒုက္ခိနော၊ သုခိတတ္တာ ဟောန္တု မာ ဒုက္ခိတတ္တာတိ – ဣမေဟိ အဋ္ဌဟာကာရေဟိ သဗ္ဗေ ဥပရိမာယ ဒိသာယ သတ္တေ မေတ္တာယတီတိ – မေတ္တာ. တံ ဓမ္မံ စေတယတီတိ – စေတော. သဗ္ဗဗျာပါဒပရိယုဋ္ဌာနေဟိ ဝိမုစ္စတီတိ – ဝိမုတ္တိ. မေတ္တာ စ စေတော စ ဝိမုတ္တိ စာတိ – မေတ္တာစေတောဝိမုတ္တိ.

သဗ္ဗေ ဥပရိမာယ ဒိသာယ သတ္တာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သဒ္ဓါယ အဓိမုစ္စတိ. သဒ္ဓိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ။ပေ။ နိဗ္ဗတ္တေန္တိ ဇောတေန္တိ ပတာပေန္တိ.

သဗ္ဗေသံ ပုရတ္ထိမာယ ဒိသာယ ပါဏာနံ။ပေ။ ဘူတာနံ။ ပုဂ္ဂလာနံ အတ္တဘာဝပရိယာပန္နာနံ။ သဗ္ဗာသံ ဣတ္ထီနံ။ သဗ္ဗေသံ ပုရိသာနံ။ သဗ္ဗေသံ အရိယာနံ။ သဗ္ဗေသံ အနရိယာနံ။ သဗ္ဗေသံ ဒေဝါနံ။ သဗ္ဗေသံ မနုဿာနံ။ သဗ္ဗေသံ ဝိနိပါတိကာနံ။ သဗ္ဗေသံ ပစ္ဆိမာယ ဒိသာယ ဝိနိပါတိကာနံ။ သဗ္ဗေသံ ဥတ္တရာယ ဒိသာယ ဝိနိပါတိကာနံ။ သဗ္ဗေသံ ဒက္ခိဏာယ ဒိသာယ ဝိနိပါတိကာနံ။ သဗ္ဗေသံ ပုရတ္ထိမာယ အနုဒိသာယ ဝိနိပါတိကာနံ။ သဗ္ဗေသံ ပစ္ဆိမာယ အနုဒိသာယ ဝိနိပါတိကာနံ။ သဗ္ဗေသံ ဥတ္တရာယ အနုဒိသာယ ဝိနိပါတိကာနံ။ သဗ္ဗေသံ ဒက္ခိဏာယ အနုဒိသာယ ဝိနိပါတိကာနံ။ သဗ္ဗေသံ ဟေဋ္ဌိမာယ ဒိသာယ ဝိနိပါတိကာနံ။ သဗ္ဗေသံ ဥပရိမာယ ဒိသာယ ဝိနိပါတိကာနံ ပီဠနံ ဝဇ္ဇေတွာ အပီဠနာယ၊ ဥပဃာတံ ဝဇ္ဇေတွာ အနုပဃာတေန၊ သန္တာပံ ဝဇ္ဇေတွာ အသန္တာပေန၊ ပရိယာဒါနံ ဝဇ္ဇေတွာ အပရိယာဒါနေန၊ ဝိဟေသံ ဝဇ္ဇေတွာ အဝိဟေသာယ၊ သဗ္ဗေ ဥပရိမာယ ဒိသာယ ဝိနိပါတိကာ အဝေရိနော ဟောန္တု မာ ဝေရိနော၊ သုခိနော ဟောန္တု မာ ဒုက္ခိနော၊ သုခိတတ္တာ ဟောန္တု မာ ဒုက္ခိတတ္တာတိ – ဣမေဟိ အဋ္ဌဟာကာရေဟိ သဗ္ဗေ ဥပရိမာယ ဒိသာယ ဝိနိပါတိကေ မေတ္တာယတီတိ – မေတ္တာ. တံ ဓမ္မံ စေတယတီတိ – စေတော. သဗ္ဗဗျာပါဒပရိယုဋ္ဌာနေဟိ ဝိမုစ္စတီတိ – ဝိမုတ္တိ. မေတ္တာ စ စေတော စ ဝိမုတ္တိ စာတိ – မေတ္တာစေတောဝိမုတ္တိ.

သဗ္ဗေ ဥပရိမာယ ဒိသာယ ဝိနိပါတိကာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သဒ္ဓါယ အဓိမုစ္စတိ. သဒ္ဓိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

သဗ္ဗေ ဥပရိမာယ ဒိသာယ ဝိနိပါတိကာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – ဝီရိယံ ပဂ္ဂဏှာတိ. ဝီရိယိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

သတိံ ဥပဋ္ဌာပေတိ. သတိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ. စိတ္တံ သမာဒဟတိ. သမာဓိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ. ပညာယ ပဇာနာတိ. ပညိန္ဒြိယပရိဘာဝိတာ ဟောတိ မေတ္တာစေတောဝိမုတ္တိ.

ဣမာနိ ပဉ္စိန္ဒြိယာနိ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ ပဉ္စဟိ ဣန္ဒြိယေဟိ မေတ္တာစေတောဝိမုတ္တိ အာသေဝီယတိ။ပေ။ နိဗ္ဗတ္တေန္တိ ဇောတေန္တိ ပတာပေန္တိ.

သဗ္ဗေ ဥပရိမာယ ဒိသာယ ဝိနိပါတိကာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – အဿဒ္ဓိယေ န ကမ္ပတိ. သဒ္ဓါဗလပရိဘာဝိတာ ဟောတိ မေတ္တာစေတောဝိမုတ္တိ. ကောသဇ္ဇေ န ကမ္ပတိ. ဝီရိယဗလပရိဘာဝိတာ ဟောတိ မေတ္တာစေတောဝိမုတ္တိ. ပမာဒေ န ကမ္ပတိ. သတိဗလပရိဘာဝိတာ ဟောတိ မေတ္တာစေတောဝိမုတ္တိ. ဥဒ္ဓစ္စေ န ကမ္ပတိ. သမာဓိဗလပရိဘာဝိတာ ဟောတိ မေတ္တာစေတောဝိမုတ္တိ. အဝိဇ္ဇာယ န ကမ္ပတိ. ပညာဗလပရိဘာဝိတာ ဟောတိ မေတ္တာစေတောဝိမုတ္တိ.

ဣမာနိ ပဉ္စ ဗလာနိ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ ပဉ္စဟိ ဗလေဟိ မေတ္တာစေတောဝိမုတ္တိ အာသေဝီယတိ။ပေ။ နိဗ္ဗတ္တေန္တိ ဇောတေန္တိ ပတာပေန္တိ.

သဗ္ဗေ ဥပရိမာယ ဒိသာယ ဝိနိပါတိကာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သတိံ ဥပဋ္ဌာပေတိ. သတိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

ပညာယ ပဝိစိနာတိ. ဓမ္မဝိစယသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ. ဝီရိယံ ပဂ္ဂဏှာတိ. ဝီရိယသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ. ပရိဠာဟံ ပဋိပ္ပဿမ္ဘေတိ. ပီတိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ. ဒုဋ္ဌုလ္လံ ပဋိပ္ပဿမ္ဘေတိ. ပဿဒ္ဓိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ. စိတ္တံ သမာဒဟတိ. သမာဓိသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ. ဉာဏေန ကိလေသေ ပဋိသင်္ခါတိ. ဥပေက္ခာသမ္ဗောဇ္ဈင်္ဂပရိဘာဝိတာ ဟောတိ မေတ္တာစေတောဝိမုတ္တိ.

ဣမေ သတ္တ ဗောဇ္ဈင်္ဂါ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ သတ္တဟိ ဗောဇ္ဈင်္ဂေဟိ မေတ္တာစေတောဝိမုတ္တိ အာသေဝီယတိ။ပေ။ နိဗ္ဗတ္တေန္တိ ဇောတေန္တိ ပတာပေန္တိ.

သဗ္ဗေ ဥပရိမာယ ဒိသာယ ဝိနိပါတိကာ အဝေရိနော ဟောန္တု၊ ခေမိနော ဟောန္တု၊ သုခိနော ဟောန္တူတိ – သမ္မာ ပဿတိ. သမ္မာဒိဋ္ဌိ ပရိဘာဝိတာ ဟောတိ မေတ္တာစေတောဝိမုတ္တိ. သမ္မာ အဘိနိရောပေတိ. သမ္မာသင်္ကပ္ပပရိဘာဝိတာ ဟောတိ မေတ္တာစေတောဝိမုတ္တိ. သမ္မာ ပရိဂ္ဂဏှာတိ. သမ္မာဝါစာပရိဘာဝိတာ ဟောတိ မေတ္တာစေတောဝိမုတ္တိ. သမ္မာ သမုဋ္ဌာပေတိ. သမ္မာကမ္မန္တပရိဘာဝိတာ ဟောတိ မေတ္တာစေတောဝိမုတ္တိ. သမ္မာ ဝေါဒါပေတိ. သမ္မာ အာဇီဝပရိဘာဝိတာ ဟောတိ မေတ္တာစေတောဝိမုတ္တိ. သမ္မာ ပဂ္ဂဏှာတိ. သမ္မာဝါယာမပရိဘာဝိတာ ဟောတိ မေတ္တာစေတောဝိမုတ္တိ. သမ္မာ ဥပဋ္ဌာတိ. သမ္မာသတိပရိဘာဝိတာ ဟောတိ မေတ္တာစေတောဝိမုတ္တိ. သမ္မာ သမာဒဟတိ. သမ္မာသမာဓိပရိဘာဝိတာ ဟောတိ မေတ္တာစေတောဝိမုတ္တိ.

ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ အာသေဝနာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ အာသေဝီယတိ။ပေ။ ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ ပရိဘာဝိတာ ဟောန္တိ. ဣမေဟိ အဋ္ဌဟိ မဂ္ဂင်္ဂေဟိ မေတ္တာစေတောဝိမုတ္တိ သုပရိဝုတာ ဟောတိ. ဣမေ အဋ္ဌ မဂ္ဂင်္ဂါ မေတ္တာယ စေတောဝိမုတ္တိယာ အာသေဝနာ ဟောန္တိ၊ ဘာဝနာ ဟောန္တိ၊ ဗဟုလီကတာ ဟောန္တိ၊ အလင်္ကာရာ ဟောန္တိ၊ ပရိက္ခာရာ ဟောန္တိ၊ ပရိဝါရာ ဟောန္တိ၊ ပါရိပူရီ ဟောန္တိ၊ သဟဂတာ ဟောန္တိ၊ သဟဇာတာ ဟောန္တိ၊ သံသဋ္ဌာ ဟောန္တိ၊ သမ္ပယုတ္တာ ဟောန္တိ၊ ပက္ခန္ဒနာ ဟောန္တိ၊ ပသီဒနာ ဟောန္တိ၊ သန္တိဋ္ဌနာ ဟောန္တိ၊ ဝိမုစ္စနာ ဟောန္တိ၊ ‘‘ဧတံ သန္တ’’န္တိ ဖဿနာ ဟောန္တိ၊ ယာနီကတာ ဟောန္တိ၊ ဝတ္ထုကတာ ဟောန္တိ၊ အနုဋ္ဌိတာ ဟောန္တိ၊ ပရိစိတာ ဟောန္တိ၊ သုသမာရဒ္ဓါ ဟောန္တိ၊ သုဘာဝိတာ ဟောန္တိ၊ သွာဓိဋ္ဌိတာ ဟောန္တိ၊ သုသမုဂ္ဂတာ ဟောန္တိ၊ သုဝိမုတ္တာ ဟောန္တိ နိဗ္ဗတ္တေန္တိ ဇောတေန္တိ ပတာပေန္တီတိ.

မေတ္တာကထာ နိဋ္ဌိတာ.