၂. ဓမ္မုဒ္ဓစ္စဝါရနိဒ္ဒေသော

၆. ကထံ ဓမ္မုဒ္ဓစ္စဝိဂ္ဂဟိတံ မာနသံ ဟောတိ? အနိစ္စတော မနသိကရောတော ဩဘာသော ဥပ္ပဇ္ဇတိ၊ ဩဘာသော ဓမ္မောတိ ဩဘာသံ အာဝဇ္ဇတိ၊ တတော ဝိက္ခေပေါ ဥဒ္ဓစ္စံ. တေန ဥဒ္ဓစ္စေန ဝိဂ္ဂဟိတမာနသော အနိစ္စတော ဥပဋ္ဌာနံ ယထာဘူတံ နပ္ပဇာနာတိ၊ ဒုက္ခတော ဥပဋ္ဌာနံ ယထာဘူတံ နပ္ပဇာနာတိ၊ အနတ္တတော ဥပဋ္ဌာနံ ယထာဘူတံ နပ္ပဇာနာတိ. တေန ဝုစ္စတိ – ‘‘ဓမ္မုဒ္ဓစ္စဝိဂ္ဂဟိတမာနသော ဟောတိ သော သမယော၊ ယံ တံ စိတ္တံ အဇ္ဈတ္တမေဝ သန္တိဋ္ဌတိ သန္နိသီဒတိ ဧကောဒိ ဟောတိ သမာဓိယတိ. တဿ မဂ္ဂေါ သဉ္ဇာယတီ’’တိ ကထံ မဂ္ဂေါ သဉ္ဇာယတိ။ပေ။ ဧဝံ မဂ္ဂေါ သဉ္ဇာယတိ၊ ဧဝံ သညောဇနာနိ ပဟီယန္တိ၊ အနုသယာ ဗျန္တီဟောန္တိ.

အနိစ္စတော မနသိကရောတော ဉာဏံ ဥပ္ပဇ္ဇတိ၊ ပီတိ ဥပ္ပဇ္ဇတိ၊ ပဿဒ္ဓိ ဥပ္ပဇ္ဇတိ၊ သုခံ ဥပ္ပဇ္ဇတိ၊ အဓိမောက္ခော ဥပ္ပဇ္ဇတိ၊ ပဂ္ဂဟော ဥပ္ပဇ္ဇတိ၊ ဥပဋ္ဌာနံ ဥပ္ပဇ္ဇတိ၊ ဥပေက္ခာ ဥပ္ပဇ္ဇတိ၊ နိကန္တိ ဥပ္ပဇ္ဇတိ၊ ‘နိကန္တိ ဓမ္မော’တိ နိကန္တိံ အာဝဇ္ဇတိ. တတော ဝိက္ခေပေါ ဥဒ္ဓစ္စံ. တေန ဥဒ္ဓစ္စေန ဝိဂ္ဂဟိတမာနသော အနိစ္စတော ဥပဋ္ဌာနံ ယထာဘူတံ နပ္ပဇာနာတိ၊ ဒုက္ခတော ဥပဋ္ဌာနံ ယထာဘူတံ နပ္ပဇာနာတိ၊ အနတ္တတော ဥပဋ္ဌာနံ ယထာဘူတံ နပ္ပဇာနာတိ. တေန ဝုစ္စတိ – ‘‘ဓမ္မုဒ္ဓစ္စဝိဂ္ဂဟိတမာနသော ဟောတိ သော သမယော၊ ယံ တံ စိတ္တံ အဇ္ဈတ္တမေဝ သန္တိဋ္ဌတိ သန္နိသီဒတိ ဧကောဒိ ဟောတိ သမာဓိယတိ. တဿ မဂ္ဂေါ သဉ္ဇာယတီ’’တိ. ကထံ မဂ္ဂေါ သဉ္ဇာယတိ။ပေ။ ဧဝံ မဂ္ဂေါ သဉ္ဇာယတိ၊ ဧဝံ သညောဇနာနိ ပဟီယန္တိ၊ အနုသယာ ဗျန္တီဟောန္တိ.

ဒုက္ခတော မနသိကရောတော။ပေ။ အနတ္တတော မနသိကရောတော ဩဘာသော ဥပ္ပဇ္ဇတိ။ပေ။ ဉာဏံ ဥပ္ပဇ္ဇတိ၊ ပီတိ ဥပ္ပဇ္ဇတိ၊ ပဿဒ္ဓိ ဥပ္ပဇ္ဇတိ၊ သုခံ ဥပ္ပဇ္ဇတိ၊ အဓိမောက္ခော ဥပ္ပဇ္ဇတိ၊ ပဂ္ဂဟော ဥပ္ပဇ္ဇတိ၊ ဥပဋ္ဌာနံ ဥပ္ပဇ္ဇတိ၊ ဥပေက္ခာ ဥပ္ပဇ္ဇတိ၊ နိကန္တိ ဥပ္ပဇ္ဇတိ၊ ‘နိကန္တိ ဓမ္မော’တိ နိကန္တိံ အာဝဇ္ဇတိ. တတော ဝိက္ခေပေါ ဥဒ္ဓစ္စံ. တေန ဥဒ္ဓစ္စေန ဝိဂ္ဂဟိတမာနသော အနတ္တတော ဥပဋ္ဌာနံ၊ အနိစ္စတော ဥပဋ္ဌာနံ၊ ဒုက္ခတော ဥပဋ္ဌာနံ ယထာဘူတံ နပ္ပဇာနာတိ. တေန ဝုစ္စတိ – ‘‘ဓမ္မုဒ္ဓစ္စဝိဂ္ဂဟိတမာနသော။ပေ။ ဧဝံ သညောဇနာနိ ပဟီယန္တိ၊ အနုသယာ ဗျန္တီဟောန္တိ’’.

ရူပံ အနိစ္စတော မနသိကရောတော။ပေ။ ရူပံ ဒုက္ခတော မနသိကရောတော။ ရူပံ အနတ္တတော မနသိကရောတော။ ဝေဒနံ။ပေ။ သညံ။ သင်္ခါရေ။ ဝိညာဏံ။ စက္ခုံ။ပေ။ ဇရာမရဏံ အနိစ္စတော မနသိကရောတော။ပေ။ ဇရာမရဏံ ဒုက္ခတော မနသိကရောတော၊ ဇရာမရဏံ အနတ္တတော မနသိကရောတော ဩဘာသော ဥပ္ပဇ္ဇတိ။ပေ။ ဉာဏံ ဥပ္ပဇ္ဇတိ၊ ပီတိ ဥပ္ပဇ္ဇတိ၊ ပဿဒ္ဓိ ဥပ္ပဇ္ဇတိ၊ သုခံ ဥပ္ပဇ္ဇတိ၊ အဓိမောက္ခော ဥပ္ပဇ္ဇတိ၊ ပဂ္ဂဟော ဥပ္ပဇ္ဇတိ၊ ဥပဋ္ဌာနံ ဥပ္ပဇ္ဇတိ၊ ဥပေက္ခာ ဥပ္ပဇ္ဇတိ၊ နိကန္တိ ဥပ္ပဇ္ဇတိ၊ ‘နိကန္တိ ဓမ္မော’တိ နိကန္တိံ အာဝဇ္ဇတိ. တတော ဝိက္ခေပေါ ဥဒ္ဓစ္စံ. တေန ဥဒ္ဓစ္စေန ဝိဂ္ဂဟိတမာနသော. ဇရာမရဏံ အနတ္တတော ဥပဋ္ဌာနံ ယထာဘူတံ နပ္ပဇာနာတိ. ဇရာမရဏံ အနိစ္စတော ဥပဋ္ဌာနံ ယထာဘူတံ နပ္ပဇာနာတိ၊ ဇရာမရဏံ ဒုက္ခတော ဥပဋ္ဌာနံ ယထာဘူတံ နပ္ပဇာနာတိ. တေန ဝုစ္စတိ – ‘‘ဓမ္မုဒ္ဓစ္စဝိဂ္ဂဟိတမာနသော ဟောတိ. သော သမယော၊ ယံ တံ စိတ္တံ အဇ္ဈတ္တမေဝ သန္တိဋ္ဌတိ သန္နိသီဒတိ ဧကောဒိ ဟောတိ သမာဓိယတိ. တဿ မဂ္ဂေါ သဉ္ဇာယတီ’’တိ. ကထံ မဂ္ဂေါ သဉ္ဇာယတိ။ပေ။ ဧဝံ မဂ္ဂေါ သဉ္ဇာယတိ. ဧဝံ သညောဇနာနိ ပဟီယန္တိ၊ အနုသယာ ဗျန္တီဟောန္တိ. ဧဝံ ဓမ္မုဒ္ဓစ္စဝိဂ္ဂဟိတံ မာနသံ ဟောတိ.

၇. ဩဘာသေ စေဝ ဉာဏေ စ၊ ပီတိယာ စ ဝိကမ္ပတိ၊

ပဿဒ္ဓိယာ သုခေ စေဝ၊ ယေဟိ စိတ္တံ ပဝေဓတိ.

အဓိမောက္ခေ စ ပဂ္ဂါဟေ၊ ဥပဋ္ဌာနေ စ ကမ္ပတိ၊

ဥပေက္ခာဝဇ္ဇနာယ စေဝ၊ ဥပေက္ခာယ စ နိကန္တိယာ.

ဣမာနိ ဒသ ဌာနာနိ၊ ပညာ ယဿ ပရိစ္စိတာ၊

ဓမ္မုဒ္ဓစ္စကုသလော ဟောတိ၊ န စ သမ္မောဟ ဂစ္ဆတိ.

ဝိက္ခိပတိ စေဝ ကိလိဿတိ စ၊ စဝတိ စိတ္တဘာဝနာ၊

ဝိက္ခိပတိ န ကိလိဿတိ၊ ဘာဝနာ ပရိဟာယတိ.

ဝိက္ခိပတိ န ကိလိဿတိ၊ ဘာဝနာ န ပရိဟာယတိ၊

န စ ဝိက္ခိပတေ စိတ္တံ န ကိလိဿတိ၊ န စဝတိ စိတ္တဘာဝနာ.

ဣမေဟိ စတူဟိ ဌာနေဟိ စိတ္တဿ သင်္ခေပဝိက္ခေပဝိဂ္ဂဟိတံ [သင်္ခေပံ ဝိက္ခေပံ ဝိဂ္ဂဟိတံ (သျာ.)] ဒသ ဌာနေ သမ္ပဇာနာတီတိ.

ယုဂနဒ္ဓကထာ နိဋ္ဌိတာ.