၇၁. မဟာကရုဏာဉာဏနိဒ္ဒေသော

၁၁၇. ကတမံ တထာဂတဿ မဟာကရုဏာသမာပတ္တိယာ ဉာဏံ? ဗဟုကေဟိ အာကာရေဟိ ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. အာဒိတ္တော လောကသန္နိဝါသောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. ဥယျုတ္တော လောကသန္နိဝါသောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. ပယာတော လောကသန္နိဝါသောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. ကုမ္မဂ္ဂပ္ပဋိပန္နော [ကုမ္မဂ္ဂံ ပဋိပန္နော (သျာ.)] လောကသန္နိဝါသောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. ဥပနီယတိ လောကော အဒ္ဓုဝေါတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. အတာဏော [အတ္တာဏော (သျာ.)] လောကော အနဘိဿရောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. အဿကော လောကော၊ သဗ္ဗံ ပဟာယ ဂမနီယန္တိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. ဦနော လောကော အတီတော တဏှာဒါသောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. အတာယနော လောကသန္နိဝါသောတိ – ပဿန္တာနံ။ပေ။ အလေဏော လောကသန္နိဝါသောတိ – ပဿန္တာနံ ။ပေ။ အသရဏော လောကသန္နိဝါသောတိ – ပဿန္တာနံ။ပေ။ အသရဏီဘူတော လောကသန္နိဝါသောတိ – ပဿန္တာနံ။ပေ။.

ဥဒ္ဓတော လောကော အဝူပသန္တောတိ – ပဿန္တာနံ။ပေ။ သသလ္လော လောကသန္နိဝါသော၊ ဝိဒ္ဓေါ ပုထုသလ္လေဟိ၊ တဿ နတ္ထညော ကောစိ သလ္လာနံ ဥဒ္ဓတာ၊ အညတြ မယာတိ – ပဿန္တာနံ။ပေ။ အဝိဇ္ဇန္ဓကာရာဝရဏော လောကသန္နိဝါသော အဏ္ဍဘူတော ကိလေသပဉ္ဇရပက္ခိတ္တော၊ တဿ နတ္ထညော ကောစိ အာလောကံ ဒဿေတာ၊ အညတြ မယာတိ – ပဿန္တာနံ။ပေ။ အဝိဇ္ဇာဂတော လောကသန္နိဝါသော အဏ္ဍဘူတော ပရိယောနဒ္ဓေါ တန္တာကုလကဇာတော [တန္တာကုလဇာတော (သျာ.)] ကုလာဂဏ္ဍိကဇာတော [ဂုဠာဂုဏ္ဌိကဇာတော (သျာ.)၊ ဂုလာဂုဏ္ဍိကဇာတော (က. သီ. အဋ္ဌ.) ဒီ. နိ. ၂.၉၅ ပဿိတဗ္ဗာ] မုဉ္ဇပဗ္ဗဇဘူတော အပါယံ ဒုဂ္ဂတိံ ဝိနိပါတံ သံသာရံ နာတိဝတ္တတီတိ – ပဿန္တာနံ။ပေ။ အဝိဇ္ဇာဝိသဒေါသသံလိတ္တော လောကသန္နိဝါသော ကိလေသကလလီဘူတောတိ – ပဿန္တာနံ။ပေ။ ရာဂဒေါသမောဟဇဋာဇဋိတော လောကသန္နိဝါသော၊ တဿ နတ္ထညော ကောစိ ဇဋံ ဝိဇဋေတာ၊ အညတြ မယာတိ – ပဿန္တာနံ။ပေ။.

တဏှာသင်္ဃာဋပဋိမုက္ကော လောကသန္နိဝါသောတိ – ပဿန္တာနံ။ပေ။ တဏှာဇာလေန ဩတ္ထဋော [ဩတ္ထတော (က.)] လောကသန္နိဝါသောတိ – ပဿန္တာနံ။ပေ။ တဏှာသောတေန ဝုယှတိ လောကသန္နိဝါသောတိ – ပဿန္တာနံ။ပေ။ တဏှာသညောဇနေန သညုတ္တော လောကသန္နိဝါသောတိ – ပဿန္တာနံ။ပေ။ တဏှာနုသယေန အနုသဋော လောကသန္နိဝါသောတိ – ပဿန္တာနံ။ပေ။ တဏှာသန္တာပေန သန္တပ္ပတိ လောကသန္နိဝါသောတိ – ပဿန္တာနံ။ပေ။ တဏှာပရိဠာဟေန ပရိဍယှတိ လောကသန္နိဝါသောတိ – ပဿန္တာနံ။ပေ။.

ဒိဋ္ဌိသင်္ဃာဋပဋိမုက္ကော လောကသန္နိဝါသောတိ – ပဿန္တာနံ။ပေ။ ဒိဋ္ဌိဇာလေန ဩတ္ထဋော လောကသန္နိဝါသောတိ – ပဿန္တာနံ။ပေ။ ဒိဋ္ဌိသောတေန ဝုယှတိ လောကသန္နိဝါသောတိ – ပဿန္တာနံ။ပေ။ ဒိဋ္ဌိသညောဇနေန သညုတ္တော လောကသန္နိဝါသောတိ – ပဿန္တာနံ။ပေ။ ဒိဋ္ဌာနုသယေန အနုသဋော လောကသန္နိဝါသောတိ – ပဿန္တာနံ။ပေ။ ဒိဋ္ဌိသန္တာပေန သန္တပ္ပတိ လောကသန္နိဝါသောတိ – ပဿန္တာနံ။ပေ။ ဒိဋ္ဌိပရိဠာဟေန ပရိဍယှတိ လောကသန္နိဝါသောတိ – ပဿန္တာနံ။ပေ။.

ဇာတိယာ အနုဂတော လောကသန္နိဝါသောတိ – ပဿန္တာနံ။ပေ။ ဇရာယ အနုသဋော လောကသန္နိဝါသောတိ – ပဿန္တာနံ။ပေ။ ဗျာဓိနာ အဘိဘူတော လောကသန္နိဝါသောတိ – ပဿန္တာနံ ။ပေ။ မရဏေန အဗ္ဘာဟတော လောကသန္နိဝါသောတိ – ပဿန္တာနံ။ပေ။ ဒုက္ခေ ပတိဋ္ဌိတော လောကသန္နိဝါသောတိ – ပဿန္တာနံ။ပေ။.

တဏှာယ ဥဍ္ဍိတော လောကသန္နိဝါသောတိ – ပဿန္တာနံ။ပေ။ ဇရာပါကာရပရိက္ခိတ္တော လောကသန္နိဝါသောတိ – ပဿန္တာနံ။ပေ။ မစ္စုပါသေန ပရိက္ခိတ္တော လောကသန္နိဝါသောတိ – ပဿန္တာနံ။ပေ။ မဟာဗန္ဓနဗန္ဓော လောကသန္နိဝါသော – ရာဂဗန္ဓနေန ဒေါသဗန္ဓနေန မောဟဗန္ဓနေန မာနဗန္ဓနေန ဒိဋ္ဌိဗန္ဓနေန ကိလေသဗန္ဓနေန ဒုစ္စရိတဗန္ဓနေန၊ တဿ နတ္ထညော ကောစိ ဗန္ဓနံ မောစေတာ၊ အညတြ မယာတိ – ပဿန္တာနံ။ပေ။ မဟာသမ္ဗာဓပ္ပဋိပန္နော လောကသန္နိဝါသော၊ တဿ နတ္ထညော ကောစိ ဩကာသံ ဒဿေတာ၊ အညတြ မယာတိ – ပဿန္တာနံ။ မဟာပလိဗောဓေန ပလိဗုဒ္ဓေါ လောကသန္နိဝါသော၊ တဿ နတ္ထညော ကောစိ ပလိဗောဓံ ဆေတာ၊ အညတြ မယာတိ – ပဿန္တာနံ။ပေ။ မဟာပပါတေ ပတိတော လောကသန္နိဝါသော၊ တဿ နတ္ထညော ကောစိ ပပါတာ ဥဒ္ဓတာ၊ အညတြ မယာတိ – ပဿန္တာနံ။ပေ။ မဟာကန္တာရပ္ပဋိပန္နော လောကသန္နိဝါသော၊ တဿ နတ္ထညော ကောစိ ကန္တာရံ တာရေတာ၊ အညတြ မယာတိ – ပဿန္တာနံ။ပေ။ မဟာသံသာရပ္ပဋိပန္နော လောကသန္နိဝါသော၊ တဿ နတ္ထညော ကောစိ သံသာရာ မောစေတာ၊ အညတြ မယာတိ – ပဿန္တာနံ။ပေ။ မဟာဝိဒုဂ္ဂေ သမ္ပရိဝတ္တတိ လောကသန္နိဝါသော၊ တဿ နတ္ထညော ကောစိ ဝိဒုဂ္ဂါ ဥဒ္ဓတာ၊ အညတြ မယာတိ – ပဿန္တာနံ။ပေ။ မဟာပလိပေ [မဟာပလ္လေပေ (သျာ.)] ပလိပန္နော လောကသန္နိဝါသော၊ တဿ နတ္ထညော ကောစိ ပလိပါ ဥဒ္ဓတာ၊ အညတြ မယာတိ – ပဿန္တာနံ။ပေ။.

အဗ္ဘာဟတော လောကသန္နိဝါသောတိ – ပဿန္တာနံ။ပေ။ အာဒိတ္တော လောကသန္နိဝါသော – ရာဂဂ္ဂိနာ ဒေါသဂ္ဂိနာ မောဟဂ္ဂိနာ ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒေါမနဿေဟိ ဥပါယာသေဟိ၊ တဿ နတ္ထညော ကောစိ နိဗ္ဗာပေတာ၊ အညတြ မယာတိ – ပဿန္တာနံ။ပေ။ ဥန္နီတကော လောကသန္နိဝါသော ဟညတိ နိစ္စမတာဏော ပတ္တဒဏ္ဍော တက္ကရောတိ – ပဿန္တာနံ။ပေ။ ဝဇ္ဇဗန္ဓနဗဒ္ဓေါ လောကသန္နိဝါသော အာဃာတနပစ္စုပဋ္ဌိတော၊ တဿ နတ္ထညော ကောစိ ဗန္ဓနံ မောစေတာ၊ အညတြ မယာတိ – ပဿန္တာနံ။ပေ။ အနာထော လောကသန္နိဝါသော ပရမကာရုညပ္ပတ္တော၊ တဿ နတ္ထညော ကောစိ တာယေတာ၊ အညတြ မယာတိ – ပဿန္တာနံ။ပေ။ ဒုက္ခာဘိတုန္နော [ဒုက္ခာဘိတုဏ္ဏော (က.)] လောကသန္နိဝါသော စိရရတ္တံ ပီဠိတောတိ – ပဿန္တာနံ။ပေ။ ဂဓိတော လောကသန္နိဝါသော နိစ္စံ ပိပါသိတောတိ – ပဿန္တာနံ။ပေ။.

အန္ဓော လောကသန္နိဝါသော အစက္ခုကောတိ – ပဿန္တာနံ။ပေ။ ဟတနေတ္တော လောကသန္နိဝါသော အပရိဏာယကောတိ – ပဿန္တာနံ။ပေ။ ဝိပထပက္ခန္ဒော [ဝိပထံ ပက္ခန္တော (သျာ.)] လောကသန္နိဝါသော အဉ္ဇသာပရဒ္ဓေါ၊ တဿ နတ္ထညော ကောစိ အရိယပထံ အာနေတာ၊ အညတြ မယာတိ – ပဿန္တာနံ။ပေ။ မဟောဃပက္ခန္ဒော လောကသန္နိဝါသော၊ တဿ နတ္ထညော ကောစိ ဩဃာ ဥဒ္ဓတာ၊ အညတြ မယာတိ – ပဿန္တာနံ။ပေ။.

၁၁၈. ဒွီဟိ ဒိဋ္ဌိဂတေဟိ ပရိယုဋ္ဌိတော လောကသန္နိဝါသောတိ – ပဿန္တာနံ။ပေ။ တီဟိ ဒုစ္စရိတေဟိ ဝိပ္ပဋိပန္နော လောကသန္နိဝါသောတိ – ပဿန္တာနံ။ပေ။ စတူဟိ ယောဂေဟိ ယုတ္တော လောကသန္နိဝါသော စတုယောဂယောဇိတောတိ – ပဿန္တာနံ။ပေ။ စတူဟိ ဂန္ထေဟိ [ဂဏ္ဌေဟိ (သျာ.)] ဂန္ထိတော လောကသန္နိဝါသောတိ – ပဿန္တာနံ။ပေ။ စတူဟိ ဥပါဒါနေဟိ ဥပါဒိယတိ လောကသန္နိဝါသောတိ – ပဿန္တာနံ။ပေ။ ပဉ္စဂတိသမာရုဠှော လောကသန္နိဝါသောတိ – ပဿန္တာနံ။ပေ။ ပဉ္စဟိ ကာမဂုဏေဟိ ရဇ္ဇတိ လောကသန္နိဝါသောတိ – ပဿန္တာနံ။ပေ။ ပဉ္စဟိ နီဝရဏေဟိ ဩတ္ထဋော လောကသန္နိဝါသောတိ – ပဿန္တာနံ။ပေ။ ဆဟိ ဝိဝါဒမူလေဟိ ဝိဝဒတိ လောကသန္နိဝါသောတိ – ပဿန္တာနံ။ပေ။ ဆဟိ တဏှာကာယေဟိ ရဇ္ဇတိ လောကသန္နိဝါသောတိ – ပဿန္တာနံ။ပေ။ ဆဟိ ဒိဋ္ဌိဂတေဟိ ပရိယုဋ္ဌိတော လောကသန္နိဝါသောတိ – ပဿန္တာနံ ။ပေ။ သတ္တဟိ အနုသယေဟိ အနုသဋော လောကသန္နိဝါသောတိ – ပဿန္တာနံ။ပေ။ သတ္တဟိ သညောဇနေဟိ သညုတ္တော လောကသန္နိဝါသောတိ – ပဿန္တာနံ။ပေ။ သတ္တဟိ မာနေဟိ ဥန္နတော [ဥဏ္ဏတော (သျာ. က.)] လောကသန္နိဝါသောတိ – ပဿန္တာနံ။ပေ။ အဋ္ဌဟိ လောကဓမ္မေဟိ သမ္ပရိဝတ္တတိ လောကသန္နိဝါသောတိ – ပဿန္တာနံ။ပေ။ အဋ္ဌဟိ မိစ္ဆတ္တေဟိ နိယျာတော လောကသန္နိဝါသောတိ – ပဿန္တာနံ။ပေ။ အဋ္ဌဟိ ပုရိသဒေါသေဟိ ဒုဿတိ လောကသန္နိဝါသောတိ – ပဿန္တာနံ။ပေ။ နဝဟိ အာဃာတဝတ္ထူဟိ အာဃာတိတော လောကသန္နိဝါသောတိ – ပဿန္တာနံ ။ပေ။ နဝဝိဓမာနေဟိ ဥန္နတော လောကသန္နိဝါသောတိ – ပဿန္တာနံ။ပေ။ နဝဟိ တဏှာမူလကေဟိ ဓမ္မေဟိ ရဇ္ဇတိ လောကသန္နိဝါသောတိ – ပဿန္တာနံ။ပေ။ ဒသဟိ ကိလေသဝတ္ထူဟိ ကိလိဿတိ လောကသန္နိဝါသောတိ – ပဿန္တာနံ။ပေ။ ဒသဟိ အာဃာတဝတ္ထူဟိ အာဃာတိတော လောကသန္နိဝါသောတိ – ပဿန္တာနံ။ပေ။ ဒသဟိ အကုသလကမ္မပထေဟိ သမန္နာဂတော လောကသန္နိဝါသောတိ – ပဿန္တာနံ။ပေ။ ဒသဟိ သညောဇနေဟိ သညုတ္တော လောကသန္နိဝါသောတိ – ပဿန္တာနံ။ပေ။ ဒသဟိ မိစ္ဆတ္တေဟိ နိယျာတော လောကသန္နိဝါသောတိ – ပဿန္တာနံ။ပေ။ ဒသဝတ္ထုကာယ မိစ္ဆာဒိဋ္ဌိယာ သမန္နာဂတော လောကသန္နိဝါသောတိ – ပဿန္တာနံ။ပေ။ ဒသဝတ္ထုကာယ အန္တဂ္ဂါဟိကာယ ဒိဋ္ဌိယာ သမန္နာဂတော လောကသန္နိဝါသောတိ – ပဿန္တာနံ။ပေ။ အဋ္ဌသတတဏှာပပဉ္စသတေဟိ ပပဉ္စိတော လောကသန္နိဝါသောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. ဒွါသဋ္ဌိယာ ဒိဋ္ဌိဂတေဟိ ပရိယုဋ္ဌိတော လောကသန္နိဝါသောတိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ.

အဟဉ္စမှိ တိဏ္ဏော၊ လောကော စ အတိဏ္ဏော အဟံ စမှိ မုတ္တော၊ လောကော စ အမုတ္တော၊ အဟဉ္စမှိ ဒန္တော၊ လောကော စ အဒန္တော၊ အဟံ စမှိ သန္တော၊ လောကော စ အသန္တော၊ အဟံ စမှိ အဿတ္ထော၊ လောကော စ အနဿတ္ထော၊ အဟံ စမှိ ပရိနိဗ္ဗုတော၊ လောကော စ အပရိနိဗ္ဗုတော၊ ပဟောမိ ခွာဟံ တိဏ္ဏော တာရေတုံ၊ မုတ္တော မောစေတုံ၊ ဒန္တော ဒမေတုံ၊ သန္တော သမေတုံ၊ အဿတ္ထော အဿာသေတုံ၊ ပရိနိဗ္ဗုတော ပရေ စ ပရိနိဗ္ဗာပေတုန္တိ – ပဿန္တာနံ ဗုဒ္ဓါနံ ဘဂဝန္တာနံ သတ္တေသု မဟာကရုဏာ ဩက္ကမတိ. ဣဒံ တထာဂတဿ မဟာကရုဏာသမာပတ္တိယာ ဉာဏံ.

မဟာကရုဏာဉာဏနိဒ္ဒေသော ဧကသတ္တတိမော.