၇၂-၇၃. သဗ္ဗညုတဉာဏနိဒ္ဒေသော

၁၁၉. ကတမံ တထာဂတဿ သဗ္ဗညုတညာဏံ? သဗ္ဗံ သင်္ခတမသင်္ခတံ အနဝသေသံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ [အနာဝရဏံ ဉာဏံ (သျာ.) ဧဝမုပရိပိ].

၁၂၀. အတီတံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. အနာဂတံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ပစ္စုပ္ပန္နံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

စက္ခု စေဝ ရူပါ စ၊ ဧဝံ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. သောတဉ္စေဝ သဒ္ဒါ စ။ပေ။ ဃာနဉ္စေဝ ဂန္ဓာ စ။ ဇိဝှါ စေဝ ရသာ စ။ ကာယော စေဝ ဖောဋ္ဌဗ္ဗာ စ။ မနော စေဝ ဓမ္မာ စ၊ ဧဝံ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ အနိစ္စဋ္ဌံ ဒုက္ခဋ္ဌံ အနတ္တဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ ရူပဿ အနိစ္စဋ္ဌံ ဒုက္ခဋ္ဌံ အနတ္တဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ ဝေဒနာယ။ပေ။ ယာဝတာ သညာယ။ပေ။ ယာဝတာ သင်္ခါရာနံ။ပေ။ ယာဝတာ ဝိညာဏဿ ။ပေ။ ယာဝတာ စက္ခုဿ။ပေ။ ဇရာမရဏဿ အနိစ္စဋ္ဌံ ဒုက္ခဋ္ဌံ အနတ္တဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ အဘိညာယ အဘိညဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ ပရိညာယ ပရိညဋ္ဌံ။ပေ။ ယာဝတာ ပဟာနဿ [ပဟာနာယ (သျာ.)] ပဟာနဋ္ဌံ။ပေ။ ယာဝတာ ဘာဝနာယ ဘာဝနဋ္ဌံ။ပေ။ ယာဝတာ သစ္ဆိကိရိယာယ သစ္ဆိကိရိယဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ ခန္ဓာနံ ခန္ဓဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ ဓာတူနံ ဓာတုဋ္ဌံ။ပေ။ ယာဝတာ အာယတနာနံ အာယတနဋ္ဌံ။ပေ။ ယာဝတာ သင်္ခတာနံ သင်္ခတဋ္ဌံ။ပေ။ ယာဝတာ အသင်္ခတဿ အသင်္ခတဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ ကုသလေ ဓမ္မေ၊ သဗ္ဗံ [သဗ္ဗေ (အဋ္ဌကထာ)] ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ အကုသလေ ဓမ္မေ။ပေ။ ယာဝတာ အဗျာကတေ ဓမ္မေ။ ယာဝတာ ကာမာဝစရေ ဓမ္မေ။ ယာဝတာ ရူပါဝစရေ ဓမ္မေ။ ယာဝတာ အရူပါဝစရေ ဓမ္မေ။ ယာဝတာ အပရိယာပန္နေ ဓမ္မေ၊ သဗ္ဗံ [သဗ္ဗေ (အဋ္ဌကထာ)] ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ ဒုက္ခဿ ဒုက္ခဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ သမုဒယဿ သမုဒယဋ္ဌံ။ပေ။ ယာဝတာ နိရောဓဿ နိရောဓဋ္ဌံ။ပေ။ ယာဝတာ မဂ္ဂဿ မဂ္ဂဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ အတ္ထပဋိသမ္ဘိဒါယ အတ္ထပဋိသမ္ဘိဒဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ ဓမ္မပဋိသမ္ဘိဒါယ ဓမ္မပဋိသမ္ဘိဒဋ္ဌံ။ပေ။ ယာဝတာ နိရုတ္တိပဋိသမ္ဘိဒါယ နိရုတ္တိပဋိသမ္ဘိဒဋ္ဌံ။ပေ။ ယာဝတာ ပဋိဘာနပဋိသမ္ဘိဒါယ ပဋိဘာနပဋိသမ္ဘိဒဋ္ဌံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ ဣန္ဒြိယပရောပရိယတ္တဉာဏံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ သတ္တာနံ အာသယာနုသယေ ဉာဏံ။ပေ။ ယာဝတာ ယမကပါဋိဟီရေ ဉာဏံ။ပေ။ ယာဝတာ မဟာကရုဏာသမာပတ္တိယာ ဉာဏံ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ သဒေဝကဿ လောကဿ သမာရကဿ သဗြဟ္မကဿ သဿမဏဗြာဟ္မဏိယာ ပဇာယ သဒေဝမနုဿာယ ဒိဋ္ဌံ သုတံ မုတံ ဝိညာတံ ပတ္တံ ပရိယေသိတံ အနုဝိစရိတံ မနသာ၊ တံ သဗ္ဗံ ဇာနာတီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

၁၂၁. န တဿ အဒ္ဒိဋ္ဌမိဓတ္ထိ ကိဉ္စိ၊ အထော အဝိညာတမဇာနိတဗ္ဗံ.

သဗ္ဗံ အဘိညာသိ ယဒတ္ထိ နေယျံ၊ တထာဂတော တေန သမန္တစက္ခူတိ [မဟာနိ. ၁၅၆၊ စူဠနိ. မောဃရာဇမာဏဝပုစ္ဆာနိဒ္ဒေသ ၈၅].

သမန္တစက္ခူတိ ကေနဋ္ဌေန သမန္တစက္ခု? စုဒ္ဒသ ဗုဒ္ဓဉာဏာနိ. ဒုက္ခေ ဉာဏံ ဗုဒ္ဓဉာဏံ၊ ဒုက္ခသမုဒယေ ဉာဏံ ဗုဒ္ဓဉာဏံ၊ ဒုက္ခနိရောဓေ ဉာဏံ ဗုဒ္ဓဉာဏံ၊ ဒုက္ခနိရောဓဂါမိနိယာ ပဋိပဒါယ ဉာဏံ ဗုဒ္ဓဉာဏံ၊ အတ္ထပဋိသမ္ဘိဒေ ဉာဏံ ဗုဒ္ဓဉာဏံ၊ ဓမ္မပဋိသမ္ဘိဒေ ဉာဏံ ဗုဒ္ဓဉာဏံ၊ နိရုတ္တိပဋိသမ္ဘိဒေ ဉာဏံ ဗုဒ္ဓဉာဏံ၊ ပဋိဘာနပဋိသမ္ဘိဒေ ဉာဏံ ဗုဒ္ဓဉာဏံ၊ ဣန္ဒြိယပရောပရိယတ္တေ ဉာဏံ ဗုဒ္ဓဉာဏံ၊ သတ္တာနံ အာသယာနုသယေ ဉာဏံ ဗုဒ္ဓဉာဏံ၊ ယမကပါဋိဟီရေ ဉာဏံ ဗုဒ္ဓဉာဏံ၊ မဟာကရုဏာသမာပတ္တိယာ ဉာဏံ ဗုဒ္ဓဉာဏံ၊ သဗ္ဗညုတညာဏံ ဗုဒ္ဓဉာဏံ၊ အနာဝရဏဉာဏံ ဗုဒ္ဓဉာဏံ – ဣမာနိ စုဒ္ဒသ ဗုဒ္ဓဉာဏာနိ. ဣမေသံ စုဒ္ဒသန္နံ ဗုဒ္ဓဉာဏာနံ အဋ္ဌ ဉာဏာနိ သာဝကသာဓာရဏာနိ၊ ဆ ဉာဏာနိ အသာဓာရဏာနိ သာဝကေဟိ.

ယာဝတာ ဒုက္ခဿ ဒုက္ခဋ္ဌော၊ သဗ္ဗော ဉာတော၊ အညာတော ဒုက္ခဋ္ဌော နတ္ထီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ ဒုက္ခဿ ဒုက္ခဋ္ဌော၊ သဗ္ဗော ဉာတော၊ သဗ္ဗော ဒိဋ္ဌော၊ သဗ္ဗော ဝိဒိတော၊ သဗ္ဗော သစ္ဆိကတော၊ သဗ္ဗော ဖဿိတော ပညာယ၊ အဖဿိတော ပညာယ ဒုက္ခဋ္ဌော နတ္ထီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ. ယာဝတာ သမုဒယဿ သမုဒယဋ္ဌော။ပေ။ ယာဝတာ နိရောဓဿ နိရောဓဋ္ဌော။ ယာဝတာ မဂ္ဂဿ မဂ္ဂဋ္ဌော။ပေ။ ယာဝတာ အတ္ထပဋိသမ္ဘိဒါယ အတ္ထပဋိသမ္ဘိဒဋ္ဌော။ ယာဝတာ ဓမ္မပဋိသမ္ဘိဒါယ ဓမ္မပဋိသမ္ဘိဒဋ္ဌော။ ယာဝတာ နိရုတ္တိပဋိသမ္ဘိဒါယ နိရုတ္တိပဋိသမ္ဘိဒဋ္ဌော။ ယာဝတာ ပဋိဘာနပဋိသမ္ဘိဒါယ ပဋိဘာနပဋိသမ္ဘိဒဋ္ဌော၊ သဗ္ဗော ဉာတော၊ သဗ္ဗော ဒိဋ္ဌော၊ သဗ္ဗော ဝိဒိတော၊ သဗ္ဗော သစ္ဆိကတော၊ သဗ္ဗော ဖဿိတော ပညာယ၊ အဖဿိတော ပညာယ ပဋိဘာနပဋိသမ္ဘိဒဋ္ဌော နတ္ထီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ ဣန္ဒြိယပရောပရိယတ္တဉာဏံ။ပေ။ ယာဝတာ သတ္တာနံ အာသယာနုသယေ ဉာဏံ။ ယာဝတာ ယမကပါဋိဟီရေ ဉာဏံ။ ယာဝတာ မဟာကရုဏာသမာပတ္တိယာ ဉာဏံ၊ သဗ္ဗ ဉာတံ၊ သဗ္ဗံ ဒိဋ္ဌံ၊ သဗ္ဗံ ဝိဒိတံ၊ သဗ္ဗံ သစ္ဆိကတံ၊ သဗ္ဗံ ဖဿိတံ ပညာယ၊ အဖဿိတံ ပညာယ မဟာကရုဏာသမာပတ္တိယာ ဉာဏံ နတ္ထီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

ယာဝတာ သဒေဝကဿ လောကဿ သမာရကဿ သဗြဟ္မကဿ သဿမဏဗြာဟ္မဏိယာ ပဇာယ သဒေဝမနုဿာယ ဒိဋ္ဌံ သုတံ မုတံ ဝိညာတံ ပတ္တံ ပရိယေသိတံ အနုဝိစရိတံ မနသာ၊ သဗ္ဗံ ဉာတံ၊ သဗ္ဗံ ဒိဋ္ဌံ၊ သဗ္ဗံ ဝိဒိတံ၊ သဗ္ဗံ သစ္ဆိကတံ၊ သဗ္ဗံ ဖဿိတံ ပညာယ၊ အဖဿိတံ ပညာယ နတ္ထီတိ – သဗ္ဗညုတညာဏံ. တတ္ထ အာဝရဏံ နတ္ထီတိ – အနာဝရဏဉာဏံ.

န တဿ အဒ္ဒိဋ္ဌမိဓတ္ထိ ကိဉ္စိ၊ အထော အဝိညာတမဇာနိတဗ္ဗံ၊

သဗ္ဗံ အဘိညာသိ ယဒတ္ထိ နေယျံ၊ တထာဂတော တေန သမန္တစက္ခူတိ.

သဗ္ဗညုတဉာဏနိဒ္ဒေသော တေသတ္တတိမော.

ဉာဏကထာ နိဋ္ဌိတာ.