၅၆-၆၃. သစ္စဉာဏစတုက္ကဒွယနိဒ္ဒေသော

၁၀၈. ကထံ ပရိညဋ္ဌေ ပညာ ဒုက္ခေ ဉာဏံ၊ ပဟာနဋ္ဌေ ပညာ သမုဒယေ ဉာဏံ၊ သစ္ဆိကိရိယဋ္ဌေ ပညာ နိရောဓေ ဉာဏံ၊ ဘာဝနဋ္ဌေ ပညာ မဂ္ဂေ ဉာဏံ? ဒုက္ခဿ ပီဠနဋ္ဌော သင်္ခတဋ္ဌော သန္တာပဋ္ဌော ဝိပရိဏာမဋ္ဌော ပရိညာတဋ္ဌော၊ သမုဒယဿ အာယူဟနဋ္ဌော နိဒါနဋ္ဌော သညောဂဋ္ဌော ပလိဗောဓဋ္ဌော ပဟာနဋ္ဌော၊ နိရောဓဿ နိဿရဏဋ္ဌော ဝိဝေကဋ္ဌော အသင်္ခတဋ္ဌော အမတဋ္ဌော သစ္ဆိကိရိယဋ္ဌော၊ မဂ္ဂဿ နိယျာနဋ္ဌော ဟေတုဋ္ဌော ဒဿနဋ္ဌော အာဓိပတေယျဋ္ဌော ဘာဝနဋ္ဌော. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘ပရိညဋ္ဌေ ပညာ ဒုက္ခေ ဉာဏံ၊ ပဟာနဋ္ဌေ ပညာ သမုဒယေ ဉာဏံ၊ သစ္ဆိကိရိယဋ္ဌေ ပညာ နိရောဓေ ဉာဏံ၊ ဘာဝနဋ္ဌေ ပညာ မဂ္ဂေ ဉာဏံ’’.

၁၀၉. ကထံ ဒုက္ခေ ဉာဏံ၊ ဒုက္ခသမုဒယေ ဉာဏံ၊ ဒုက္ခနိရောဓေ ဉာဏံ၊ ဒုက္ခနိရောဓဂါမိနိယာ ပဋိပဒါယ ဉာဏံ? မဂ္ဂသမင်္ဂိဿ ဉာဏံ ဒုက္ခေ ပေတံ ဉာဏံ၊ ဒုက္ခသမုဒယေ ပေတံ ဉာဏံ၊ ဒုက္ခနိရောဓေ ပေတံ ဉာဏံ၊ ဒုက္ခနိရောဓဂါမိနိယာ ပဋိပဒါယ ပေတံ ဉာဏံ.

တတ္ထ ကတမံ ဒုက္ခေ ဉာဏံ? ဒုက္ခံ အာရဗ္ဘ ယာ ဥပ္ပဇ္ဇတိ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရိ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ဒုက္ခေ ဉာဏံ. ဒုက္ခသမုဒယံ အာရဗ္ဘ။ပေ။ ဒုက္ခနိရောဓံ အာရဗ္ဘ။ပေ။ ဒုက္ခနိရောဓဂါမိနိံ ပဋိပဒံ အာရဗ္ဘ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ဒုက္ခနိရောဓဂါမိနိယာ ပဋိပဒါယ ဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘ဒုက္ခေ ဉာဏံ၊ ဒုက္ခသမုဒယေ ဉာဏံ၊ ဒုက္ခနိရောဓေ ဉာဏံ၊ ဒုက္ခနိရောဓဂါမိနိယာ ပဋိပဒါယ ဉာဏံ’’.

သစ္စဉာဏစတုက္ကဒွယနိဒ္ဒေသော တေသဋ္ဌိမော.