၆၄-၆၇. သုဒ္ဓိကပဋိသမ္ဘိဒါဉာဏနိဒ္ဒေသော

၁၁၀. ကထံ အတ္ထပဋိသမ္ဘိဒေ ဉာဏံ၊ ဓမ္မပဋိသမ္ဘိဒေ ဉာဏံ၊ နိရုတ္တိပဋိသမ္ဘိဒေ ဉာဏံ၊ ပဋိဘာနပဋိသမ္ဘိဒေ ဉာဏံ? အတ္ထေသု ဉာဏံ အတ္ထပဋိသမ္ဘိဒါ၊ ဓမ္မေသု ဉာဏံ ဓမ္မပဋိသမ္ဘိဒါ၊ နိရုတ္တီသု ဉာဏံ နိရုတ္တိပဋိသမ္ဘိဒါ၊ ပဋိဘာနေသု ဉာဏံ ပဋိဘာနပဋိသမ္ဘိဒါ. အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ၊ ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ၊ အတ္ထဝဝတ္ထာနေ ပညာ အတ္ထပဋိသမ္ဘိဒေ ဉာဏံ၊ ဓမ္မဝဝတ္ထာနေ ပညာ ဓမ္မပဋိသမ္ဘိဒေ ဉာဏံ နိရုတ္တိဝဝတ္ထာနေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနဝဝတ္ထာနေ ပညာ ပဋိဘာနပဋိသမ္ဘိဒေ ဉာဏံ.

အတ္ထသလ္လက္ခဏေ ပညာ အတ္ထပဋိသမ္ဘိဒေ ဉာဏံ၊ ဓမ္မသလ္လက္ခဏေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိသလ္လက္ခဏေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနသလ္လက္ခဏေ ပညာ ပဋိဘာနပဋိသမ္ဘိဒေ ဉာဏံ. အတ္ထူပလက္ခဏေ ပညာ အတ္ထပဋိသမ္ဘိဒေ ဉာဏံ၊ ဓမ္မူပလက္ခဏေ ပညာ ဓမ္မပဋိသမ္ဘိဒေ ဉာဏံ၊ နိရုတ္တူပလက္ခဏေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနူပလက္ခဏေ ပညာ ပဋိဘာနပဋိသမ္ဘိဒေ ဉာဏံ.

အတ္ထပ္ပဘေဒေ ပညာ အတ္ထပဋိသမ္ဘိဒေ ဉာဏံ၊ ဓမ္မပ္ပဘေဒေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိပ္ပဘေဒေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနပ္ပဘေဒေ ပညာ ပဋိဘာနပဋိသမ္ဘိဒေ ဉာဏံ. အတ္ထပ္ပဘာဝနေ ပညာ အတ္ထပဋိသမ္ဘိဒေ ဉာဏံ၊ ဓမ္မပ္ပဘာဝနေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိပ္ပဘာဝနေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနပ္ပဘာဝနေ ပညာ ပဋိဘာနပဋိသမ္ဘိဒေ ဉာဏံ.

အတ္ထဇောတနေ ပညာ အတ္ထပဋိသမ္ဘိဒေ ဉာဏံ၊ ဓမ္မဇောတနေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိဇောတနေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနဇောတနေ ပညာ ပဋိဘာနပဋိသမ္ဘိဒေ ဉာဏံ. အတ္ထဝိရောစနေ ပညာ အတ္ထပဋိသမ္ဘိဒေ ဉာဏံ၊ ဓမ္မဝိရောစနေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိဝိရောစနေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနဝိရောစနေ ပညာ ပဋိဘာနပဋိသမ္ဘိဒေ ဉာဏံ. အတ္ထပ္ပကာသနေ ပညာ အတ္ထပဋိသမ္ဘိဒေ ဉာဏံ၊ ဓမ္မပ္ပကာသနေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိပ္ပကာသနေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနပ္ပကာသနေ ပညာ ပဋိဘာနပဋိသမ္ဘိဒေ ဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘အတ္ထပဋိသမ္ဘိဒေ ဉာဏံ၊ ဓမ္မပဋိသမ္ဘိဒေ ဉာဏံ၊ နိရုတ္တိပဋိသမ္ဘိဒေ ဉာဏံ၊ ပဋိဘာနပဋိသမ္ဘိဒေ ဉာဏံ’’.

သုဒ္ဓိကပဋိသမ္ဘိဒါဉာဏနိဒ္ဒေသော သတ္တသဋ္ဌိမော.