၄၄-၄၉. ဆဝိဝဋ္ဋဉာဏနိဒ္ဒေသော

၉၅. ကထံ အဓိပတတ္တာ ပညာ သညာဝိဝဋ္ဋေ ဉာဏံ? နေက္ခမ္မာဓိပတတ္တာ ပညာ ကာမစ္ဆန္ဒတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. အဗျာပါဒါဓိပတတ္တာ ပညာ ဗျာပါဒတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. အာလောကသညာဓိပတတ္တာ ပညာ ထိနမိဒ္ဓတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. အဝိက္ခေပါဓိပတတ္တာ ပညာ ဥဒ္ဓစ္စတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. ဓမ္မဝဝတ္ထာနာဓိပတတ္တာ ပညာ ဝိစိကိစ္ဆာယ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. ဉာဏာဓိပတတ္တာ ပညာ အဝိဇ္ဇာယ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. ပါမောဇ္ဇာဓိပတတ္တာ ပညာ အရတိယာ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. ပဌမဇ္ဈာနာဓိပတတ္တာ ပညာ နီဝရဏေဟိ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ပေ။ အရဟတ္တမဂ္ဂါဓိပတတ္တာ ပညာ သဗ္ဗကိလေသေဟိ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘အဓိပတတ္တာ ပညာ သညာဝိဝဋ္ဋေ ဉာဏံ’’.

၉၆. ကထံ နာနတ္တေ ပညာ စေတောဝိဝဋ္ဋေ ဉာဏံ? ကာမစ္ဆန္ဒော နာနတ္တံ၊ နေက္ခမ္မံ ဧကတ္တံ. နေက္ခမ္မေကတ္တံ စေတယတော ကာမစ္ဆန္ဒတော စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ. ဗျာပါဒေါ နာနတ္တံ၊ အဗျာပါဒေါ ဧကတ္တံ. အဗျာပါဒေကတ္တံ စေတယတော ဗျာပါဒတော စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ. ထိနမိဒ္ဓံ နာနတ္တံ၊ အာလောကသညာ ဧကတ္တံ. အာလောကသညေကတ္တံ စေတယတော ထိနမိဒ္ဓတော စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ။ပေ။ သဗ္ဗကိလေသာ နာနတ္တံ၊ အရဟတ္တမဂ္ဂေါ ဧကတ္တံ. အရဟတ္တမဂ္ဂေကတ္တံ စေတယတော သဗ္ဗကိလေသေဟိ စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘နာနတ္တေ ပညာ စေတောဝိဝဋ္ဋေ ဉာဏံ’’.

၉၇. ကထံ အဓိဋ္ဌာနေ ပညာ စိတ္တဝိဝဋ္ဋေ ဉာဏံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ. ဗျာပါဒံ ပဇဟန္တော အဗျာပါဒဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ. ထိနမိဒ္ဓံ ပဇဟန္တော အာလောကသညာဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ။ပေ။ သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘အဓိဋ္ဌာနေ ပညာ စိတ္တဝိဝဋ္ဋေ ဉာဏံ’’.

၉၈. ကထံ သုညတေ ပညာ ဉာဏဝိဝဋ္ဋေ ဉာဏံ? ‘‘စက္ခု သုညံ အတ္တေန ဝါ အတ္တနိယေန ဝါ နိစ္စေန ဝါ ဓုဝေန ဝါ သဿတေန ဝါ အဝိပရိဏာမဓမ္မေန ဝါ’’တိ ယထာဘူတံ ဇာနတော [ပဇာနတော (သျာ.)] ပဿတော စက္ခာဘိနိဝေသတော [ကာမာဘိနိဝေသတော (သျာ.) အဋ္ဌကထာ ဩလောကေတဗ္ဗာ] ဉာဏံ ဝိဝဋ္ဋတီတိ – သုညတေ ပညာ ဉာဏဝိဝဋ္ဋေ ဉာဏံ. ‘‘သောတံ သုညံ။ပေ။ ဃာနံ သုညံ။ ဇိဝှါ သုညာ။ ကာယော သုညော။ မနော သုညော အတ္တေန ဝါ အတ္တနိယေန ဝါ နိစ္စေန ဝါ ဓုဝေန ဝါ သဿတေန ဝါ အဝိပရိဏာမဓမ္မေန ဝါ’’တိ ယထာဘူတံ ဇာနတော ပဿတော မနာဘိနိဝေသတော ဉာဏံ ဝိဝဋ္ဋတီတိ – သုညတေ ပညာ ဉာဏဝိဝဋ္ဋေ ဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘သုညတေ ပညာ ဉာဏဝိဝဋ္ဋေ ဉာဏံ’’.

၉၉. ကထံ ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ? နေက္ခမ္မေန ကာမစ္ဆန္ဒံ ဝေါသဇ္ဇတီတိ – ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ. အဗျာပါဒေန ဗျာပါဒံ ဝေါသဇ္ဇတီတိ – ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ. အာလောကသညာယ ထိနမိဒ္ဓံ ဝေါသဇ္ဇတီတိ – ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ. အဝိက္ခေပေန ဥဒ္ဓစ္စံ ဝေါသဇ္ဇတီတိ – ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ. ဓမ္မဝဝတ္ထာနေန ဝိစိကိစ္ဆံ ဝေါသဇ္ဇတီတိ – ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ။ပေ။ အရဟတ္တမဂ္ဂေန သဗ္ဗကိလေသေ ဝေါသဇ္ဇတီတိ – ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘ဝေါသဂ္ဂေ ပညာ ဝိမောက္ခဝိဝဋ္ဋေ ဉာဏံ’’.

၁၀၀. ကထံ တထဋ္ဌေ ပညာ သစ္စဝိဝဋ္ဋေ ဉာဏံ? ဒုက္ခဿ ပီဠနဋ္ဌံ သင်္ခတဋ္ဌံ သန္တာပဋ္ဌံ ဝိပရိဏာမဋ္ဌံ ပရိဇာနန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ. သမုဒယဿ အာယူဟနဋ္ဌံ နိဒါနဋ္ဌံ သညောဂဋ္ဌံ ပလိဗောဓဋ္ဌံ ပဇဟန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ. နိရောဓဿ နိဿရဏဋ္ဌံ ဝိဝေကဋ္ဌံ အသင်္ခတဋ္ဌံ အမတဋ္ဌံ သစ္ဆိကရောန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ. မဂ္ဂဿ နိယျာနဋ္ဌံ ဟေတုဋ္ဌံ ဒဿနဋ္ဌံ အာဓိပတေယျဋ္ဌံ ဘာဝေန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ.

သညာဝိဝဋ္ဋော၊ စေတောဝိဝဋ္ဋော၊ စိတ္တဝိဝဋ္ဋော၊ ဉာဏဝိဝဋ္ဋော၊ ဝိမောက္ခဝိဝဋ္ဋော၊ သစ္စဝိဝဋ္ဋော. သဉ္ဇာနန္တော ဝိဝဋ္ဋတီတိ – သညာဝိဝဋ္ဋော. စေတယန္တော ဝိဝဋ္ဋတီတိ – စေတောဝိဝဋ္ဋော. ဝိဇာနန္တော ဝိဝဋ္ဋတီတိ – စိတ္တဝိဝဋ္ဋော. ဉာဏံ ကရောန္တော ဝိဝဋ္ဋတီတိ – ဉာဏဝိဝဋ္ဋော. ဝေါသဇ္ဇန္တော ဝိဝဋ္ဋတီတိ – ဝိမောက္ခဝိဝဋ္ဋော. တထဋ္ဌေ ဝိဝဋ္ဋတီတိ – သစ္စဝိဝဋ္ဋော.

ယတ္ထ သညာဝိဝဋ္ဋော၊ တတ္ထ စေတောဝိဝဋ္ဋော. ယတ္ထ စေတောဝိဝဋ္ဋော၊ တတ္ထ သညာဝိဝဋ္ဋော. ယတ္ထ သညာဝိဝဋ္ဋော စေတောဝိဝဋ္ဋော တတ္ထ စိတ္တဝိဝဋ္ဋော. ယတ္ထ စိတ္တဝိဝဋ္ဋော၊ တတ္ထ သညာဝိဝဋ္ဋော စေတောဝိဝဋ္ဋော. ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော၊ တတ္ထ ဉာဏဝိဝဋ္ဋော. ယတ္ထ ဉာဏဝိဝဋ္ဋော၊ တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော. ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော၊ တတ္ထ ဝိမောက္ခဝိဝဋ္ဋော. ယတ္ထ ဝိမောက္ခဝိဝဋ္ဋော၊ တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော. ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော ဝိမောက္ခဝိဝဋ္ဋော၊ တတ္ထ သစ္စဝိဝဋ္ဋော. ယတ္ထ သစ္စဝိဝဋ္ဋော၊ တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော ဝိမောက္ခဝိဝဋ္ဋော. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘တထဋ္ဌေ ပညာ သစ္စဝိဝဋ္ဋေ ဉာဏံ’’.

ဆဝိဝဋ္ဋဉာဏနိဒ္ဒေသော နဝစတ္တာလီသမော.