၄၁. ခန္တိဉာဏနိဒ္ဒေသော

၉၂. ကထံ ဝိဒိတတ္တာ ပညာ ခန္တိဉာဏံ? ရူပံ အနိစ္စတော ဝိဒိတံ၊ ရူပံ ဒုက္ခတော ဝိဒိတံ၊ ရူပံ အနတ္တတော ဝိဒိတံ. ယံ ယံ ဝိဒိတံ တံ တံ ခမတီတိ – ဝိဒိတတ္တာ ပညာ ခန္တိဉာဏံ. ဝေဒနာ။ပေ။ သညာ။ သင်္ခါရာ။ ဝိညာဏံ။ စက္ခု။ပေ။ ဇရာမရဏံ အနိစ္စတော ဝိဒိတံ၊ ဇရာမရဏံ ဒုက္ခတော ဝိဒိတံ၊ ဇရာမရဏံ အနတ္တတော ဝိဒိတံ. ယံ ယံ ဝိဒိတံ တံ တံ ခမတီတိ – ဝိဒိတတ္တာ ပညာ ခန္တိဉာဏံ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘ဝိဒိတတ္တာ ပညာ ခန္တိဉာဏံ’’.

ခန္တိဉာဏနိဒ္ဒေသော ဧကစတ္တာလီသမော.