၂၅-၂၈. ပဋိသမ္ဘိဒါဉာဏနိဒ္ဒေသော

၇၆. ကထံ အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ၊ ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ၊ နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ၊ ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ? သဒ္ဓိန္ဒြိယံ ဓမ္မော၊ ဝီရိယိန္ဒြိယံ ဓမ္မော၊ သတိန္ဒြိယံ ဓမ္မော၊ သမာဓိန္ဒြိယံ ဓမ္မော၊ ပညိန္ဒြိယံ ဓမ္မော. အညော သဒ္ဓိန္ဒြိယံ ဓမ္မော၊ အညော ဝီရိယိန္ဒြိယံ ဓမ္မော၊ အညော သတိန္ဒြိယံ ဓမ္မော၊ အညော သမာဓိန္ဒြိယံ ဓမ္မော၊ အညော ပညိန္ဒြိယံ ဓမ္မော. ယေန ဉာဏေန ဣမေ နာနာ ဓမ္မာ ဉာတာ၊ တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ. တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’.

အဓိမောက္ခဋ္ဌော အတ္ထော၊ ပဂ္ဂဟဋ္ဌော အတ္ထော၊ ဥပဋ္ဌာနဋ္ဌော အတ္ထော၊ အဝိက္ခေပဋ္ဌော အတ္ထော၊ ဒဿနဋ္ဌော အတ္ထော. အညော အဓိမောက္ခဋ္ဌော အတ္ထော၊ အညော ပဂ္ဂဟဋ္ဌော အတ္ထော၊ အညော ဥပဋ္ဌာနဋ္ဌော အတ္ထော၊ အညော အဝိက္ခေပဋ္ဌော အတ္ထော၊ အညော ဒဿနဋ္ဌော အတ္ထော. ယေန ဉာဏေန ဣမေ နာနာ အတ္ထာ ဉာတာ၊ တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ. တေန ဝုစ္စတိ ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’.

ပဉ္စ ဓမ္မေ သန္ဒဿေတုံ ဗျဉ္ဇနနိရုတ္တာဘိလာပါ၊ ပဉ္စ အတ္ထေ သန္ဒဿေတုံ ဗျဉ္ဇနနိရုတ္တာဘိလာပါ. အညာ ဓမ္မနိရုတ္တိယော၊ အညာ အတ္ထနိရုတ္တိယော. ယေန ဉာဏေန ဣမာ နာနာ နိရုတ္တိယော ဉာတာ၊ တေနေဝ ဉာဏေန ဣမာ နာနာ နိရုတ္တိယော ပဋိဝိဒိတာတိ. တေန ဝုစ္စတိ – ‘‘နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ’’.

ပဉ္စသု ဓမ္မေသု ဉာဏာနိ၊ ပဉ္စသု အတ္ထေသု ဉာဏာနိ၊ ဒသသု နိရုတ္တီသု ဉာဏာနိ. အညာနိ ဓမ္မေသု ဉာဏာနိ၊ အညာနိ အတ္ထေသု ဉာဏာနိ၊ အညာနိ နိရုတ္တီသု ဉာဏာနိ. ယေန ဉာဏေန ဣမေ နာနာ ဉာဏာ ဉာတာ၊ တေနေဝ ဉာဏေန ဣမေ နာနာ ဉာဏာ ပဋိဝိဒိတာတိ. တေန ဝုစ္စတိ – ‘‘ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’.

၇၇. သဒ္ဓါဗလံ ဓမ္မော၊ ဝီရိယဗလံ ဓမ္မော၊ သတိဗလံ ဓမ္မော၊ သမာဓိဗလံ ဓမ္မော၊ ပညာဗလံ ဓမ္မော. အညော သဒ္ဓါဗလံ ဓမ္မော၊ အညော ဝီရိယဗလံ ဓမ္မော၊ အညော သတိဗလံ ဓမ္မော၊ အညော သမာဓိဗလံ ဓမ္မော၊ အညော ပညာဗလံ ဓမ္မော. ယေန ဉာဏေန ဣမေ နာနာ ဓမ္မာ ဉာတာ၊ တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ. တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’.

အဿဒ္ဓိယေ အကမ္ပိယဋ္ဌော အတ္ထော. ကောသဇ္ဇေ အကမ္ပိယဋ္ဌော အတ္ထော. ပမာဒေ အကမ္ပိယဋ္ဌော အတ္ထော. ဥဒ္ဓစ္စေ အကမ္ပိယဋ္ဌော အတ္ထော. အဝိဇ္ဇာယ အကမ္ပိယဋ္ဌော အတ္ထော. အညော အဿဒ္ဓိယေ အကမ္ပိယဋ္ဌော အတ္ထော၊ အညော ကောသဇ္ဇေ အကမ္ပိယဋ္ဌော အတ္ထော၊ အညော ပမာဒေ အကမ္ပိယဋ္ဌော အတ္ထော၊ အညော ဥဒ္ဓစ္စေ အကမ္ပိယဋ္ဌော အတ္ထော၊ အညော အဝိဇ္ဇာယ အကမ္ပိယဋ္ဌော အတ္ထော. ယေန ဉာဏေန ဣမေ နာနာ အတ္ထာ ဉာတာ၊ တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ. တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’.

ပဉ္စသု [ပဉ္စ (?)] ဓမ္မေသု ဉာဏာနိ၊ ပဉ္စသု [ပဉ္စ (?)] အတ္ထေသု ဉာဏာနိ၊ ဒသသု [ဒသ (?)] နိရုတ္တီသု ဉာဏာနိ. အညာနိ ဓမ္မေသု ဉာဏာနိ၊ အညာနိ အတ္ထေသု ဉာဏာနိ၊ အညာနိ နိရုတ္တီသု ဉာဏာနိ. ယေန ဉာဏေန ဣမေ နာနာ ဉာဏာ ဉာတာ၊ တေနေဝ ဉာဏေန ဣမေ နာနာ ဉာဏာ ပဋိဝိဒိတာတိ. တေန ဝုစ္စတိ – ‘‘ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’.

သတိသမ္ဗောဇ္ဈင်္ဂေါ ဓမ္မော၊ ဓမ္မဝိစယသမ္ဗောဇ္ဈင်္ဂေါ ဓမ္မော၊ ဝီရိယသမ္ဗောဇ္ဈင်္ဂေါ ဓမ္မော၊ ပီတိသမ္ဗောဇ္ဈင်္ဂေါ ဓမ္မော၊ ပဿဒ္ဓိသမ္ဗောဇ္ဈင်္ဂေါ ဓမ္မော၊ သမာဓိသမ္ဗောဇ္ဈင်္ဂေါ ဓမ္မော၊ ဥပေက္ခာသမ္ဗောဇ္ဈင်္ဂေါ ဓမ္မော. အညော သတိသမ္ဗောဇ္ဈင်္ဂေါ ဓမ္မော၊ အညော ဓမ္မဝိစယသမ္ဗောဇ္ဈင်္ဂေါ ဓမ္မော၊ အညော ဝီရိယသမ္ဗောဇ္ဈင်္ဂေါ ဓမ္မော၊ အညော ပီတိသမ္ဗောဇ္ဈင်္ဂေါ ဓမ္မော၊ အညော ပဿဒ္ဓိသမ္ဗောဇ္ဈင်္ဂေါ ဓမ္မော၊ အညော သမာဓိသမ္ဗောဇ္ဈင်္ဂေါ ဓမ္မော၊ အညော ဥပေက္ခာသမ္ဗောဇ္ဈင်္ဂေါ ဓမ္မော. ယေန ဉာဏေန ဣမေ နာနာ ဓမ္မာ ဉာတာ၊ တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ. တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’.

ဥပဋ္ဌာနဋ္ဌော အတ္ထော၊ ပဝိစယဋ္ဌော အတ္ထော၊ ပဂ္ဂဟဋ္ဌော အတ္ထော၊ ဖရဏဋ္ဌော အတ္ထော၊ ဥပသမဋ္ဌော အတ္ထော၊ အဝိက္ခေပဋ္ဌော အတ္ထော၊ ပဋိသင်္ခါနဋ္ဌော အတ္ထော. အညော ဥပဋ္ဌာနဋ္ဌော အတ္ထော၊ အညော ပဝိစယဋ္ဌော အတ္ထော၊ အညော ပဂ္ဂဟဋ္ဌော အတ္ထော၊ အညော ဖရဏဋ္ဌော အတ္ထော၊ အညော ဥပသမဋ္ဌော အတ္ထော၊ အညော အဝိက္ခေပဋ္ဌော အတ္ထော၊ အညော ပဋိသင်္ခါနဋ္ဌော အတ္ထော. ယေန ဉာဏေန ဣမေ နာနာ အတ္ထာ ဉာတာ၊ တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ. တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’.

သတ္တ ဓမ္မေ သန္ဒဿေတုံ ဗျဉ္ဇနနိရုတ္တာဘိလာပါ၊ သတ္တ အတ္ထေ သန္ဒဿေတုံ ဗျဉ္ဇနနိရုတ္တာဘိလာပါ. အညာ ဓမ္မနိရုတ္တိယော၊ အညာ အတ္ထနိရုတ္တိယော. ယေန ဉာဏေန ဣမာ နာနာ နိရုတ္တိယော ဉာတာ၊ တေနေဝ ဉာဏေန ဣမာ နာနာ နိရုတ္တိယော ပဋိဝိဒိတာတိ. တေန ဝုစ္စတိ – ‘‘နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ’’.

သတ္တသု ဓမ္မေသု ဉာဏာနိ၊ သတ္တသု အတ္ထေသု ဉာဏာနိ၊ စုဒ္ဒသသု နိရုတ္တီသု ဉာဏာနိ. အညာနိ ဓမ္မေသု ဉာဏာနိ၊ အညာနိ အတ္ထေသု ဉာဏာနိ၊ အညာနိ နိရုတ္တီသု ဉာဏာနိ. ယေန ဉာဏေန ဣမေ နာနာ ဉာဏာ ဉာတာ၊ တေနေဝ ဉာဏေန ဣမေ နာနာ ဉာဏာ ပဋိဝိဒိတာတိ. တေန ဝုစ္စတိ – ‘‘ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’.

သမ္မာဒိဋ္ဌိ ဓမ္မော၊ သမ္မာသင်္ကပ္ပေါ ဓမ္မော၊ သမ္မာဝါစာ ဓမ္မော၊ သမ္မာကမ္မန္တော ဓမ္မော၊ သမ္မာအာဇီဝေါ ဓမ္မော၊ သမ္မာဝါယာမော ဓမ္မော၊ သမ္မာသတိ ဓမ္မော၊ သမ္မာသမာဓိ ဓမ္မော. အညော သမ္မာဒိဋ္ဌိ ဓမ္မော၊ အညော သမ္မာသင်္ကပ္ပေါ ဓမ္မော၊ အညော သမ္မာဝါစာ ဓမ္မော၊ အညော သမ္မာကမ္မန္တော ဓမ္မော၊ အညော သမ္မာအာဇီဝေါ ဓမ္မော၊ အညော သမ္မာဝါယာမော ဓမ္မော၊ အညော သမ္မာသတိ ဓမ္မော၊ အညော သမ္မာသမာဓိ ဓမ္မော. ယေန ဉာဏေန ဣမေ နာနာ ဓမ္မာ ဉာတာ၊ တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ. တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’.

ဒဿနဋ္ဌော အတ္ထော၊ အဘိနိရောပနဋ္ဌော အတ္ထော၊ ပရိဂ္ဂဟဋ္ဌော အတ္ထော၊ သမုဋ္ဌာနဋ္ဌော အတ္ထော၊ ဝေါဒါနဋ္ဌော အတ္ထော၊ ပဂ္ဂဟဋ္ဌော အတ္ထော၊ ဥပဋ္ဌာနဋ္ဌော အတ္ထော၊ အဝိက္ခေပဋ္ဌော အတ္ထော. အညော ဒဿနဋ္ဌော အတ္ထော၊ အညော အဘိနိရောပနဋ္ဌော အတ္ထော၊ အညော ပရိဂ္ဂဟဋ္ဌော အတ္ထော၊ အညော သမုဋ္ဌာနဋ္ဌော အတ္ထော၊ အညော ဝေါဒါနဋ္ဌော အတ္ထော၊ အညော ပဂ္ဂဟဋ္ဌော အတ္ထော၊ အညော ဥပဋ္ဌာနဋ္ဌော အတ္ထော၊ အညော အဝိက္ခေပဋ္ဌော အတ္ထော. ယေန ဉာဏေန ဣမေ နာနာ အတ္ထာ ဉာတာ တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ. တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’.

အဋ္ဌ ဓမ္မေ သန္ဒဿေတုံ ဗျဉ္ဇနနိရုတ္တာဘိလာပါ၊ အဋ္ဌ အတ္ထေ သန္ဒဿေတုံ ဗျဉ္ဇနနိရုတ္တာဘိလာပါ. အညာ ဓမ္မနိရုတ္တိယော၊ အညာ အတ္ထနိရုတ္တိယော. ယေန ဉာဏေန ဣမာ နာနာ နိရုတ္တိယော ဉာတာ၊ တေနေဝ ဉာဏေန ဣမာ နာနာ နိရုတ္တိယော ပဋိဝိဒိတာတိ. တေန ဝုစ္စတိ – ‘‘နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ’’.

အဋ္ဌသု ဓမ္မေသု ဉာဏာနိ၊ အဋ္ဌသု အတ္ထေသု ဉာဏာနိ သောဠသသု နိရုတ္တီသု ဉာဏာနိ. အညာနိ ဓမ္မေသု ဉာဏာနိ၊ အညာနိ အတ္ထေသု ဉာဏာနိ၊ အညာနိ နိရုတ္တီသု ဉာဏာနိ. ယေန ဉာဏေန ဣမေ နာနာ ဉာဏာ ဉာတာ၊ တေနေဝ ဉာဏေန ဣမေ နာနာ ဉာဏာ ပဋိဝိဒိတာတိ. တေန ဝုစ္စတိ – ‘‘ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ. ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ. နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ. ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’.

ပဋိသမ္ဘိဒါဉာဏနိဒ္ဒေသော အဋ္ဌဝီသတိမော.