၂၉-၃၁. ဉာဏတ္တယနိဒ္ဒေသော

၇၈. ကထံ ဝိဟာရနာနတ္တေ ပညာ ဝိဟာရဋ္ဌေ ဉာဏံ၊ သမာပတ္တိနာနတ္တေ ပညာ သမာပတ္တဋ္ဌေ ဉာဏံ၊ ဝိဟာရသမာပတ္တိနာနတ္တေ ပညာ ဝိဟာရသမာပတ္တဋ္ဌေ ဉာဏံ? နိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ဖုဿ ဖုဿ ဝယံ ပဿတိ – အနိမိတ္တော ဝိဟာရော. ပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ဖုဿ ဖုဿ ဝယံ ပဿတိ – အပ္ပဏိဟိတော ဝိဟာရော. အဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ဖုဿ ဖုဿ ဝယံ ပဿတိ – သုညတော ဝိဟာရော.

နိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အနိမိတ္တံ အာဝဇ္ဇိတွာ သမာပဇ္ဇတိ – အနိမိတ္တာ သမာပတ္တိ. ပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အပ္ပဏိဟိတံ အာဝဇ္ဇိတွာ သမာပဇ္ဇတိ – အပ္ပဏိဟိတာ သမာပတ္တိ. အဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ သုညတံ အာဝဇ္ဇိတွာ သမာပဇ္ဇတိ – သုညတာ သမာပတ္တိ.

နိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အနိမိတ္တံ အာဝဇ္ဇိတွာ သမာပဇ္ဇတိ – အနိမိတ္တဝိဟာရသမာပတ္တိ. ပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အပ္ပဏိဟိတံ အာဝဇ္ဇိတွာ သမာပဇ္ဇတိ – အပ္ပဏိဟိတဝိဟာရသမာပတ္တိ. အဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ သုညတံ အာဝဇ္ဇိတွာ သမာပဇ္ဇတိ – သုညတဝိဟာရသမာပတ္တိ.

၇၉. ရူပနိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ဖုဿ ဖုဿ ဝယံ ပဿတိ – အနိမိတ္တော ဝိဟာရော. ရူပပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ဖုဿ ဖုဿ ဝယံ ပဿတိ – အပ္ပဏိဟိတော ဝိဟာရော. ရူပါဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ဖုဿ ဖုဿ ဝယံ ပဿတိ – သုညတော ဝိဟာရော.

ရူပနိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အနိမိတ္တံ အာဝဇ္ဇိတွာ သမာပဇ္ဇတိ – အနိမိတ္တာ သမာပတ္တိ. ရူပပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အပ္ပဏိဟိတံ အာဝဇ္ဇိတွာ သမာပဇ္ဇတိ – အပ္ပဏိဟိတာ သမာပတ္တိ. ရူပါဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ သုညတံ အာဝဇ္ဇိတွာ သမာပဇ္ဇတိ – သုညတာ သမာပတ္တိ.

ရူပနိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အနိမိတ္တံ အာဝဇ္ဇိတွာ သမာပဇ္ဇတိ – အနိမိတ္တဝိဟာရသမာပတ္တိ. ရူပပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အပ္ပဏိဟိတံ အာဝဇ္ဇိတွာ သမာပဇ္ဇတိ – အပ္ပဏိဟိတဝိဟာရသမာပတ္တိ. ရူပါဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ သုညတံ အာဝဇ္ဇိတွာ သမာပဇ္ဇတိ – သုညတဝိဟာရသမာပတ္တိ.

ဝေဒနာနိမိတ္တံ ။ပေ။ သညာနိမိတ္တံ။ သင်္ခါရနိမိတ္တံ။ ဝိညာဏနိမိတ္တံ။ စက္ခုနိမိတ္တံ။ပေ။ ဇရာမရဏနိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ဖုဿ ဖုဿ ဝယံ ပဿတိ – အနိမိတ္တော ဝိဟာရော. ဇရာမရဏပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ဖုဿ ဖုဿ ဝယံ ပဿတိ – အပ္ပဏိဟိတော ဝိဟာရော. ဇရာမရဏာဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ဖုဿ ဖုဿ ဝယံ ပဿတိ – သုညတော ဝိဟာရော.

ဇရာမရဏနိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အနိမိတ္တံ အာဝဇ္ဇိတွာ သမာပဇ္ဇတိ – အနိမိတ္တာ သမာပတ္တိ. ဇရာမရဏပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အပ္ပဏိဟိတံ အာဝဇ္ဇိတွာ သမာပဇ္ဇတိ – အပ္ပဏိဟိတာ သမာပတ္တိ. ဇရာမရဏာဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ သုညတံ အာဝဇ္ဇိတွာ သမာပဇ္ဇတိ – သုညတာ သမာပတ္တိ.

ဇရာမရဏနိမိတ္တံ ဘယတော သမ္ပဿမာနော အနိမိတ္တေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အနိမိတ္တံ အာဝဇ္ဇိတွာ သမာပဇ္ဇတိ – အနိမိတ္တဝိဟာရသမာပတ္တိ. ဇရာမရဏပဏိဓိံ ဘယတော သမ္ပဿမာနော အပ္ပဏိဟိတေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ အပ္ပဏိဟိတံ အာဝဇ္ဇိတွာ သမာပဇ္ဇတိ – အပ္ပဏိဟိတဝိဟာရသမာပတ္တိ. ဇရာမရဏာဘိနိဝေသံ ဘယတော သမ္ပဿမာနော သုညတေ အဓိမုတ္တတ္တာ ဖုဿ ဖုဿ ဝယံ ပဿတိ၊ ပဝတ္တံ အဇ္ဈုပေက္ခိတွာ နိရောဓံ နိဗ္ဗာနံ သုညတံ အာဝဇ္ဇိတွာ သမာပဇ္ဇတိ – သုညတဝိဟာရသမာပတ္တိ. အညော အနိမိတ္တော ဝိဟာရော၊ အညော အပ္ပဏိဟိတော ဝိဟာရော၊ အညော သုညတော ဝိဟာရော. အညာ အနိမိတ္တသမာပတ္တိ၊ အညာ အပ္ပဏိဟိတသမာပတ္တိ၊ အညာ သုညတသမာပတ္တိ. အညာ အနိမိတ္တာ ဝိဟာရသမာပတ္တိ၊ အညာ အပ္ပဏိဟိတာ ဝိဟာရသမာပတ္တိ၊ အညာ သုညတာ ဝိဟာရသမာပတ္တိ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘ဝိဟာရနာနတ္တေ ပညာ ဝိဟာရဋ္ဌေ ဉာဏံ၊ သမာပတ္တိနာနတ္တေ ပညာ သမာပတ္တဋ္ဌေ ဉာဏံ၊ ဝိဟာရသမာပတ္တိနာနတ္တေ ပညာ ဝိဟာရသမာပတ္တဋ္ဌေ ဉာဏံ’’.

ဉာဏတ္တယနိဒ္ဒေသော ဧကတိံသတိမော.