၂၀-၂၄. ဉာဏပဉ္စကနိဒ္ဒေသော

၇၅. ကထံ အဘိညာပညာ ဉာတဋ္ဌေ ဉာဏံ၊ ပရိညာပညာ တီရဏဋ္ဌေ ဉာဏံ၊ ပဟာနေပညာ ပရိစ္စာဂဋ္ဌေ ဉာဏံ၊ ဘာဝနာ ပညာ ဧကရသဋ္ဌေ ဉာဏံ၊ သစ္ဆိကိရိယာပညာ ဖဿနဋ္ဌေ ဉာဏံ? ယေ ယေ ဓမ္မာ အဘိညာတာ ဟောန္တိ၊ တေ တေ ဓမ္မာ ဉာတာ ဟောန္တိ. ယေ ယေ ဓမ္မာ ပရိညာတာ ဟောန္တိ၊ တေ တေ ဓမ္မာ တီရိတာ ဟောန္တိ. ယေ ယေ ဓမ္မာ ပဟီနာ ဟောန္တိ၊ တေ တေ ဓမ္မာ ပရိစ္စတ္တာ ဟောန္တိ. ယေ ယေ ဓမ္မာ ဘာဝိတာ ဟောန္တိ၊ တေ တေ ဓမ္မာ ဧကရသာ ဟောန္တိ. ယေ ယေ ဓမ္မာ သစ္ဆိကတာ ဟောန္တိ၊ တေ တေ ဓမ္မာ ဖဿိတာ ဟောန္တိ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘အဘိညာ ပညာ ဉာတဋ္ဌေ ဉာဏံ၊ ပရိညာ ပညာ တီရဏဋ္ဌေ ဉာဏံ၊ ပဟာနေ ပညာ ပရိစ္စာဂဋ္ဌေ ဉာဏံ၊ ဘာဝနာ ပညာ ဧကရသဋ္ဌေ ဉာဏံ၊ သစ္ဆိကိရိယာ ပညာ ဖုသနဋ္ဌေ ဉာဏံ’’.

ဉာဏပဉ္စကနိဒ္ဒေသော စတုဝီသတိမော.