၁. သင်္ဂဟဝါရော

ယံ လောကော ပူဇယတေ၊ သလောကပါလော သဒါ နမဿတိ စ၊

တဿေတ သာသနဝရံ၊ ဝိဒူဟိ ဉေယျံ နရဝရဿ.

ဒွါဒသ ပဒါနိ သုတ္တံ၊ တံ သဗ္ဗံ ဗျဉ္ဇနဉ္စ အတ္ထော စ၊

တံ ဝိညေယျံ ဥဘယံ၊ ကော အတ္ထော ဗျဉ္ဇနံ ကတမံ.

သောဠသဟာရာ နေတ္တိ [နေတ္တီ (က.)]၊ ပဉ္စနယာ သာသနဿ ပရိယေဋ္ဌိ၊

အဋ္ဌာရသမူလပဒါ၊ မဟကစ္စာနေန [မဟာကစ္စာနေန (သီ.)] နိဒ္ဒိဋ္ဌာ.

ဟာရာ ဗျဉ္ဇနဝိစယော၊ သုတ္တဿ နယာ တယော စ သုတ္တတ္ထော၊

ဥဘယံ ပရိဂ္ဂဟီတံ၊ ဝုစ္စတိ သုတ္တံ ယထာသုတ္တံ.

ယာ စေဝ ဒေသနာ ယဉ္စ၊ ဒေသိတံ ဥဘယမေဝ ဝိညေယျံ၊

တတြာယမာနုပုဗ္ဗီ၊ နဝဝိဓသုတ္တန္တပရိယေဋ္ဌီတိ.

သင်္ဂဟဝါရော.