၃. ပုဏ္ဏကမာဏဝပုစ္ဆာ

၆၈. ‘‘အနေဇံ မူလဒဿာဝိံ၊ [ဣစ္စာယသ္မာ ပုဏ္ဏကော]

အတ္ထိ ပဉှေန အာဂမံ၊

ကိံ နိဿိတာ ဣသယော မနုဇာ၊ ခတ္တိယာ ဗြာဟ္မဏာ ဒေဝတာနံ၊

ယညမကပ္ပယိံသု ပုထူဓ လောကေ၊ ပုစ္ဆာမိ တံ ဘဂဝါ ဗြူဟိ မေတံ’’.

၆၉. ‘‘ယေ ကေစိမေ ဣသယော မနုဇာ၊ [ပုဏ္ဏကာတိ ဘဂဝါ]

ခတ္တိယာ ဗြာဟ္မဏာ ဒေဝတာနံ၊

ယညမကပ္ပယိံသု ပုထူဓ လောကေ၊ အာသီသမာနာ ပုဏ္ဏက ဣတ္ထတ္တံ၊

ဇရံ သိတာ ယညမကပ္ပယိံသု’’.

၇၀. ‘‘ယေ ကေစိမေ ဣသယော မနုဇာ၊ [ဣစ္စာယသ္မာ ပုဏ္ဏကော]

ခတ္တိယာ ဗြာဟ္မဏာ ဒေဝတာနံ၊

ယညမကပ္ပယိံသု ပုထူဓ လောကေ၊ ကစ္စိသု တေ ဘဂဝါ ယညပထေ အပ္ပမတ္တာ၊

အတာရုံ ဇာတိဉ္စ ဇရဉ္စ မာရိသ၊ ပုစ္ဆာမိ တံ ဘဂဝါ ဗြူဟိ မေတံ’’.

၇၁. ‘‘အာသီသန္တိ ထောမယန္တိ၊ အဘိဇပ္ပန္တိ ဇုဟန္တိ၊ [ပုဏ္ဏကာတိ ဘဂဝါ]

ကာမာဘိဇပ္ပန္တိ ပဋိစ္စ လာဘံ၊ တေ ယာဇယောဂါ ဘဝရာဂရတ္တာ၊

နာတရိံသု ဇာတိဇရန္တိ ဗြူမိ’’.

၇၂. ‘‘တေ စေ နာတရိံသု ယာဇယောဂါ၊ [ဣစ္စာယသ္မာ ပုဏ္ဏကော]

ယညေဟိ ဇာတိဉ္စ ဇရဉ္စ မာရိသ၊

အထ ကော စရဟိ ဒေဝမနုဿလောကေ၊ အတာရိ ဇာတိဉ္စ ဇရဉ္စ မာရိသ၊

ပုစ္ဆာမိ တံ ဘဂဝါ ဗြူဟိ မေတံ’’.

၇၃. ‘‘သင်္ခါယ လောကသ္မိ ပရောပရာနိ၊ [ပုဏ္ဏကာတိ ဘဂဝါ]

ယဿိဉ္ဇိတံ နတ္ထိ ကုဟိဉ္စိ လောကေ၊

သန္တော ဝိဓူမော အနီဃော နိရာသော၊ အတာရိ သော ဇာတိဇရန္တိ ဗြူမီ’’တိ.

ပုဏ္ဏကမာဏဝပုစ္ဆာ တတိယာ.