၅. ဓောတကမာဏဝပုစ္ဆာနိဒ္ဒေသော

၃၀. ပုစ္ဆာမိ တံ ဘဂဝါ ဗြူဟိ မေတံ၊ [ဣစ္စာယသ္မာ ဓောတကော]

ဝါစာဘိကင်္ခါမိ မဟေသိ တုယှံ၊

တဝ သုတွာန နိဂ္ဃေါသံ၊ သိက္ခေ နိဗ္ဗာနမတ္တနော.

ပုစ္ဆာမိ တံ ဘဂဝါ ဗြူဟိ မေတန္တိ. ပုစ္ဆာမီတိ တိဿော ပုစ္ဆာ – အဒိဋ္ဌဇောတနာ ပုစ္ဆာ၊ ဒိဋ္ဌသံသန္ဒနာ ပုစ္ဆာ၊ ဝိမတိစ္ဆေဒနာ ပုစ္ဆာ။ပေ။ ဣမာ တိဿော ပုစ္ဆာ။ပေ။ နိဗ္ဗာနပုစ္ဆာ. ပုစ္ဆာမိ တန္တိ ပုစ္ဆာမိ တံ ယာစာမိ တံ အဇ္ဈေသာမိ တံ ပသာဒေမိ တံ၊ ကထယဿု မေတိ – ပုစ္ဆာမိ တံ. ဘဂဝါတိ ဂါရဝါဓိဝစနမေတံ။ပေ။ သစ္ဆိကာ ပညတ္တိ၊ ယဒိဒံ ဘဂဝါတိ. ဗြူဟိ မေတန္တိ ဗြူဟိ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟီတိ – ပုစ္ဆာမိ တံ ဘဂဝါ ဗြူဟိ မေတံ.

ဣစ္စာယသ္မာ ဓောတကောတိ. ဣစ္စာတိ ပဒသန္ဓိ။ပေ။ အာယသ္မာတိ ပိယဝစနံ ဂရုဝစနံ သဂါရဝသပ္ပတိဿာဓိဝစနမေတံ အာယသ္မာတိ. ဓောတကောတိ တဿ ဗြာဟ္မဏဿ နာမံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါတိ – ဣစ္စာယသ္မာ ဓောတကော.

ဝါစာဘိကင်္ခါမိ မဟေသိ တုယှန္တိ တုယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ ကင်္ခါမိ အဘိကင်္ခါမိ ဣစ္ဆာမိ သာဒိယာမိ ပတ္ထယာမိ ပိဟယာမိ အဘိဇပ္ပါမိ. မဟေသီတိ ကိံ မဟေသိ ဘဂဝါ? မဟန္တံ သီလက္ခန္ဓံ ဧသီ ဂဝေသီ ပရိယေသီတိ မဟေသိ။ပေ။ ကဟံ နရာသဘောတိ မဟေသီတိ – ဝါစာဘိကင်္ခါမိ မဟေသိ တုယှံ.

တဝ သုတွာန နိဂ္ဃေါသန္တိ တုယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ သုတွာ သုဏိတွာ ဥဂ္ဂဟေတွာ ဥပဓာရယိတွာ ဥပလက္ခယိတွာတိ – တဝ သုတွာန နိဂ္ဃေါသံ.

သိက္ခေ နိဗ္ဗာနမတ္တနောတိ. သိက္ခာတိ တိဿော သိက္ခာ – အဓိသီလသိက္ခာ၊ အဓိစိတ္တသိက္ခာ၊ အဓိပညာသိက္ခာ။ပေ။ အယံ အဓိပညာသိက္ခာ. နိဗ္ဗာနမတ္တနောတိ အတ္တနော ရာဂဿ နိဗ္ဗာပနာယ၊ ဒေါသဿ နိဗ္ဗာပနာယ၊ မောဟဿ နိဗ္ဗာပနာယ၊ ကောဓဿ နိဗ္ဗာပနာယ၊ ဥပနာဟဿ နိဗ္ဗာပနာယ။ပေ။ သဗ္ဗာကုသလာဘိသင်္ခါရာနံ သမာယ ဥပသမာယ ဝူပသမာယ နိဗ္ဗာပနာယ ပဋိနိဿဂ္ဂါယ ပဋိပဿဒ္ဓိယာ အဓိသီလမ္ပိ သိက္ခေယျ၊ အဓိစိတ္တမ္ပိ သိက္ခေယျ၊ အဓိပညမ္ပိ သိက္ခေယျ. ဣမာ တိဿော သိက္ခာယော အာဝဇ္ဇန္တော သိက္ခေယျ၊ ဇာနန္တော သိက္ခေယျ၊ ပဿန္တော သိက္ခေယျ၊ ပစ္စဝေက္ခန္တော သိက္ခေယျ၊ စိတ္တံ ပဒဟန္တော သိက္ခေယျ၊ သဒ္ဓါယ အဓိမုစ္စန္တော သိက္ခေယျ၊ ဝီရိယံ ပဂ္ဂဏှန္တော သိက္ခေယျ၊ သတိံ ဥပဋ္ဌပေန္တော သိက္ခေယျ၊ စိတ္တံ သမာဒဟန္တော သိက္ခေယျ၊ ပညာယ ပဇာနန္တော သိက္ခေယျ၊ အဘိညေယျံ အဘိဇာနန္တော သိက္ခေယျ၊ ပရိညေယျံ ပရိဇာနန္တော သိက္ခေယျ၊ ပဟာတဗ္ဗံ ပဇဟန္တော သိက္ခေယျ၊ ဘာဝေတဗ္ဗံ ဘာဝေန္တော သိက္ခေယျ၊ သစ္ဆိကာတဗ္ဗံ သစ္ဆိကရောန္တော သိက္ခေယျ၊ အာစရေယျ သမာစရေယျ သမာဒါယ ဝတ္တေယျာတိ – သိက္ခေ နိဗ္ဗာနမတ္တနော. တေနာဟ သော ဗြာဟ္မဏော –

‘‘ပုစ္ဆာမိ တံ ဘဂဝါ ဗြူဟိ မေတံ၊ [ဣစ္စာယသ္မာ ဓောတကော]

ဝါစာဘိကင်္ခါမိ မဟေသိ တုယှံ၊

တဝ သုတွာန နိဂ္ဃေါသံ၊ သိက္ခေ နိဗ္ဗာနမတ္တနော’’တိ.

၃၁. တေနဟာတပ္ပံ ကရောဟိ၊ [ဓောတကာတိ ဘဂဝါ]

ဣဓေဝ နိပကော သတော၊

ဣတော သုတွာန နိဂ္ဃေါသံ၊ သိက္ခေ နိဗ္ဗာနမတ္တနော.

တေနဟာတပ္ပံ ကရောဟီတိ အာတပ္ပံ ကရောဟိ၊ ဥဿာဟံ ကရောဟိ၊ ဥဿောဠှိံ ကရောဟိ၊ ထာမံ ကရောဟိ၊ ဓိတိံ ကရောဟိ၊ ဝီရိယံ ကရောဟိ၊ ဆန္ဒံ ဇနေဟိ သဉ္ဇနေဟိ ဥပဋ္ဌပေဟိ သမုဋ္ဌပေဟိ နိဗ္ဗတ္တေဟိ အဘိနိဗ္ဗတ္တေဟီတိ – တေနဟာတပ္ပံ ကရောဟိ.

ဓောတကာတိ ဘဂဝါ တံ ဗြာဟ္မဏံ နာမေန အာလပတိ. ဘဂဝါတိ ဂါရဝါဓိဝစနမေတံ။ပေ။ သစ္ဆိကာ ပညတ္တိ၊ ယဒိဒံ ဘဂဝါတိ – ဓောတကာတိ ဘဂဝါ.

ဣဓေဝ နိပကော သတောတိ. ဣဓာတိ ဣမိဿာ ဒိဋ္ဌိယာ ဣမိဿာ ခန္တိယာ ဣမိဿာ ရုစိယာ ဣမသ္မိံ အာဒါယေ ဣမသ္မိံ ဓမ္မေ ဣမသ္မိံ ဝိနယေ ဣမသ္မိံ ဓမ္မဝိနယေ ဣမသ္မိံ ပါဝစနေ ဣမသ္မိံ ဗြဟ္မစရိယေ ဣမသ္မိံ သတ္ထုသာသနေ ဣမသ္မိံ အတ္တဘာဝေ ဣမသ္မိံ မနုဿလောကေ. နိပကောတိ နိပကော ပဏ္ဍိတော ပညဝါ ဗုဒ္ဓိမာ ဉာဏီ ဝိဘာဝီ မေဓာဝီ. သတောတိ စတူဟိ ကာရဏေဟိ သတော – ကာယေ ကာယာနုပဿနာသတိပဋ္ဌာနံ ဘာဝေန္တော သတော။ပေ။ သော ဝုစ္စတိ သတောတိ – ဣဓေဝ နိပကော သတော.

ဣတော သုတွာန နိဂ္ဃေါသန္တိ ဣတော မယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ သုတွာ သုဏိတွာ ဥဂ္ဂဏှိတွာ ဥပဓာရယိတွာ ဥပလက္ခယိတွာတိ – ဣတော သုတွာန နိဂ္ဃေါသံ.

‘‘တေနဟာတပ္ပံ ကရောဟိ၊ [ဓောတကာတိ ဘဂဝါ]

ဣဓေဝ နိပကော သတော၊

ဣတော သုတွာန နိဂ္ဃေါသံ၊ သိက္ခေ နိဗ္ဗာနမတ္တနော’’တိ.

၃၂. ပဿာမဟံ ဒေဝမနုဿလောကေ၊အကိဉ္စနံ ဗြာဟ္မဏမိရိယမာနံ၊

တံ တံ နမဿာမိ သမန္တစက္ခု၊ ပမုဉ္စ မံ သက္က ကထံကထာဟိ.

ပဿာမဟံ ဒေဝမနုဿလောကေတိ. ဒေဝါတိ တယော ဒေဝါ – သမ္မုတိဒေဝါ၊ ဥပပတ္တိဒေဝါ၊ ဝိသုဒ္ဓိဒေဝါ. ကတမေ သမ္မုတိဒေဝါ? သမ္မုတိဒေဝါ ဝုစ္စန္တိ ရာဇာနော စ ရာဇကုမာရာ စ ဒေဝိယော စ. ဣမေ ဝုစ္စန္တိ သမ္မုတိဒေဝါ. ကတမေ ဥပပတ္တိဒေဝါ? ဥပပတ္တိဒေဝါ ဝုစ္စန္တိ စာတုမဟာရာဇိကာ ဒေဝါ တာဝတိံသာ ဒေဝါ ယာမာ ဒေဝါ တုသိတာ ဒေဝါ နိမ္မာနရတီ ဒေဝါ ပရနိမ္မိတဝသဝတ္တီ ဒေဝါ ဗြဟ္မကာယိကာ ဒေဝါ ယေ စ ဒေဝါ တဒုတ္တရိ [တတြုပရိ (သျာ.)]. ဣမေ ဝုစ္စန္တိ ဥပပတ္တိဒေဝါ. ကတမေ ဝိသုဒ္ဓိဒေဝါ? ဝိသုဒ္ဓိဒေဝါ ဝုစ္စန္တိ တထာဂတသာဝကာ အရဟန္တော ခီဏာသဝါ ယေ စ ပစ္စေကဗုဒ္ဓါ. ဣမေ ဝုစ္စန္တိ ဝိသုဒ္ဓိဒေဝါ. ဘဂဝါ သမ္မုတိဒေဝါနဉ္စ ဥပပတ္တိဒေဝါနဉ္စ ဝိသုဒ္ဓိဒေဝါနဉ္စ ဒေဝေါ စ အတိဒေဝေါ စ ဒေဝါတိဒေဝေါ စ သီဟသီဟော နာဂနာဂေါ ဂဏိဂဏီ မုနိမုနီ ရာဇရာဇာ. ပဿာမဟံ ဒေဝမနုဿလောကေတိ မနုဿလောကေ ဒေဝံ ပဿာမိ အတိဒေဝံ ပဿာမိ ဒေဝါတိဒေဝံ ပဿာမိ ဒက္ခာမိ ဩလောကေမိ နိဇ္ဈာယာမိ ဥပပရိက္ခာမီတိ – ပဿာမဟံ ဒေဝမနုဿလောကေ.

အာကိဉ္စနံ ဗြာဟ္မဏမိရိယမာနန္တိ. အကိဉ္စနန္တိ ရာဂကိဉ္စနံ ဒေါသကိဉ္စနံ မောဟကိဉ္စနံ မာနကိဉ္စနံ ဒိဋ္ဌိကိဉ္စနံ ကိလေသကိဉ္စနံ ဒုစ္စရိတကိဉ္စနံ၊ တေ ကိဉ္စနာ ဗုဒ္ဓဿ ဘဂဝတော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ၊ တသ္မာ ဗုဒ္ဓေါ အကိဉ္စနော. ဗြာဟ္မဏောတိ ဘဂဝါ သတ္တန္နံ ဓမ္မာနံ ဗာဟိတတ္တာ ဗြာဟ္မဏော – သက္ကာယဒိဋ္ဌိ ဗာဟိတာ ဟောတိ၊ ဝိစိကိစ္ဆာ ဗာဟိတာ ဟောတိ၊ သီလဗ္ဗတပရာမာသော ဗာဟိတော ဟောတိ၊ ရာဂေါ ဗာဟိတော ဟောတိ၊ ဒေါသော ဗာဟိတော ဟောတိ၊ မောဟော ဗာဟိတော ဟောတိ၊ မာနော ဗာဟိတော ဟောတိ၊ ဗာဟိတာဿ ဟောန္တိ ပါပကာ အကုသလာ ဓမ္မာ သံကိလေသိကာ ပေါနောဘဝိကာ သဒရာ ဒုက္ခဝိပါကာ အာယတိံ ဇာတိဇရာမရဏိယာ.

ဗာဟိတွာ သဗ္ဗပါပကာနိ၊ [သဘိယာတိ ဘဂဝါ]

ဝိမလော သာဓုသမာဟိတော ဌိတတ္တော၊

သံသာရမတိစ္စ ကေဝလီ သော၊ အသိတော တာဒိ ပဝုစ္စတေ သ ဗြဟ္မာတိ.

ဣရိယမာနန္တိ စရန္တံ ဝိဟရန္တံ ဣရိယန္တံ ဝတ္တေန္တံ ပါလေန္တံ ယပေန္တံ ယာပေန္တန္တိ – အကိဉ္စနံ ဗြာဟ္မဏမိရိယမာနံ.

တံ တံ နမဿာမိ သမန္တစက္ခူတိ. တန္တိ ဘဂဝန္တံ ဘဏတိ. နမဿာမီတိ ကာယေန ဝါ နမဿာမိ၊ ဝါစာယ ဝါ နမဿာမိ၊ စိတ္တေန ဝါ နမဿာမိ၊ အနွတ္ထပဋိပတ္တိယာ ဝါ နမဿာမိ၊ ဓမ္မာနုဓမ္မပဋိပတ္တိယာ ဝါ နမဿာမိ သက္ကရောမိ ဂရုံ ကရောမိ မာနေမိ ပူဇေမိ. သမန္တစက္ခူတိ သမန္တစက္ခု ဝုစ္စတိ သဗ္ဗညုတဉာဏံ. ဘဂဝါ သဗ္ဗညုတဉာဏေန ဥပေတော သမုပေတော ဥပါဂတော သမုပါဂတော ဥပပန္နော သမုပပန္နော သမန္နာဂတော.

‘‘န တဿ အဒ္ဒိဋ္ဌမိဓတ္ထိ [အဒိဋ္ဌမိဓတ္ထိ (သျာ. က.) မဟာနိ. ၁၅၆] ကိဉ္စိ၊ အထော အဝိညာတမဇာနိတဗ္ဗံ၊

သဗ္ဗံ အဘိညာသိ ယဒတ္ထိ နေယျံ၊ တထာဂတော တေန သမန္တစက္ခူ’’တိ.

တံ တံ နမဿာမိ သမန္တစက္ခု.

ပမုဉ္စ မံ သက္က ကထံကထာဟီတိ. သက္ကာတိ သက္ကော ဘဂဝါ သကျကုလာ ပဗ္ဗဇိတောတိပိ သက္ကော. အထ ဝါ၊ အဍ္ဎော [အဒ္ဓေါ (သျာ. က.)] မဟဒ္ဓနော ဓနဝါတိပိ သက္ကော. တဿိမာနိ ဓနာနိ၊ သေယျထိဒံ – သဒ္ဓါဓနံ သီလဓနံ ဟိရိဓနံ ဩတ္တပ္ပဓနံ သုတဓနံ စာဂဓနံ ပညာဓနံ သတိပဋ္ဌာနဓနံ သမ္မပ္ပဓာနဓနံ ဣဒ္ဓိပါဒဓနံ ဣန္ဒြိယဓနံ ဗလဓနံ ဗောဇ္ဈင်္ဂဓနံ မဂ္ဂဓနံ ဖလဓနံ နိဗ္ဗာနဓနံ. ဣမေဟိ အနေကဝိဓေဟိ ဓနရတနေဟိ အဍ္ဎော မဟဒ္ဓနော ဓနဝါတိပိ သက္ကော. အထ ဝါ၊ သက္ကော ပဟု ဝိသဝီ အလမတ္တော သူရော ဝီရော ဝိက္ကန္တော အဘီရူ အစ္ဆမ္ဘီ အနုတြာသီ အပလာယီ ပဟီနဘယဘေရဝေါ ဝိဂတလောမဟံသောတိပိ သက္ကော. ကထံကထာ ဝုစ္စတိ ဝိစိကိစ္ဆာ. ဒုက္ခေ ကင်္ခါ၊ ဒုက္ခသမုဒယေ ကင်္ခါ၊ ဒုက္ခနိရောဓေ ကင်္ခါ၊ ဒုက္ခနိရောဓဂါမိနိယာ ပဋိပဒါယ ကင်္ခါ၊ ပုဗ္ဗန္တေ ကင်္ခါ၊ အပရန္တေ ကင်္ခါ၊ ပုဗ္ဗန္တာပရန္တေ ကင်္ခါ၊ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု ကင်္ခါ. ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓာပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ဆမ္ဘိတတ္တံ စိတ္တဿ မနောဝိလေခေါ. ပမုဉ္စ မံ သက္က ကထံကထာဟီတိ မုဉ္စ မံ ပမုဉ္စ မံ မောစေဟိ မံ ပမောစေဟိ မံ ဥဒ္ဓရ မံ သမုဒ္ဓရ မံ ဝုဋ္ဌာပေဟိ မံ ကထံကထာသလ္လတောတိ – ပမုဉ္စ မံ သက္က ကထံကထာဟိ. တေနာဟ သော ဗြာဟ္မဏော –

‘‘ပဿာမဟံ ဒေဝမနုဿလောကေ၊ အကိဉ္စနံ ဗြာဟ္မဏမိရိယမာနံ၊

တံ တံ နမဿာမိ သမန္တစက္ခု၊ ပမုဉ္စ မံ သက္က ကထံကထာဟီ’’တိ.

၃၃. နာဟံ သဟိဿာမိ ပမောစနာယ၊ ကထံကထိံ ဓောတက ကဉ္စိ လောကေ၊

ဓမ္မဉ္စ သေဋ္ဌံ အာဇာနမာနော၊ ဧဝံ တုဝံ ဩဃမိမံ တရေသိ.

နာဟံ သဟိဿာမိ [သမီဟာမိ (က.)] ပမောစနာယာတိ နာဟံ တံ သက္ကောမိ မုဉ္စိတုံ ပမုဉ္စိတုံ မောစေတုံ ပမောစေတုံ ဥဒ္ဓရိတုံ သမုဒ္ဓရိတုံ ဥဋ္ဌာပေတုံ သမုဋ္ဌာပေတုံ ကထံကထာသလ္လတောတိ. ဧဝမ္ပိ နာဟံ သဟိဿာမိ ပမောစနာယ. အထ ဝါ၊ န ဤဟာမိ န သမီဟာမိ န ဥဿဟာမိ န ဝါယမာမိ န ဥဿာဟံ ကရောမိ န ဥဿောဠှိံ ကရောမိ န ထာမံ ကရောမိ န ဓိတိံ ကရောမိ န ဝီရိယံ ကရောမိ န ဆန္ဒံ ဇနေမိ န သဉ္ဇနေမိ န နိဗ္ဗတ္တေမိ န အဘိနိဗ္ဗတ္တေမိ အဿဒ္ဓေ ပုဂ္ဂလေ အစ္ဆန္ဒိကေ ကုသီတေ ဟီနဝီရိယေ အပ္ပဋိပဇ္ဇမာနေ ဓမ္မဒေသနာယာတိ. ဧဝမ္ပိ နာဟံ သဟိဿာမိ ပမောစနာယ. အထ ဝါ၊ နတ္ထညော ကောစိ မောစေတာ. တေ ယဒိ မောစေယျုံ သကေန ထာမေန သကေန ဗလေန သကေန ဝီရိယေန သကေန ပရက္ကမေန သကေန ပုရိသထာမေန သကေန ပုရိသဗလေန သကေန ပုရိသဝီရိယေန သကေန ပုရိသပရက္ကမေန အတ္တနာ သမ္မာပဋိပဒံ အနုလောမပဋိပဒံ အပစ္စနီကပဋိပဒံ အနွတ္ထပဋိပဒံ ဓမ္မာနုဓမ္မပဋိပဒံ ပဋိပဇ္ဇမာနာ မောစေယျုန္တိ. ဧဝမ္ပိ နာဟံ သဟိဿာမိ ပမောစနာယ.

ဝုတ္တဉှေတံ ဘဂဝတာ – ‘‘သော ဝတ၊ စုန္ဒ၊ အတ္တနာ ပလိပပလိပန္နော ပရံ ပလိပပလိပန္နံ ဥဒ္ဓရိဿတီတိ နေတံ ဌာနံ ဝိဇ္ဇတိ. သော ဝတ၊ စုန္ဒ၊ အတ္တနာ အဒန္တော အဝိနီတော အပရိနိဗ္ဗုတော ပရံ ဒမေဿတိ ဝိနေဿတိ ပရိနိဗ္ဗာပေဿတီတိ နေတံ ဌာနံ ဝိဇ္ဇတီတိ. ဧဝမ္ပိ နာဟံ သဟိဿာမိ ပမောစနာယ.

ဝုတ္တဉှေတံ ဘဂဝတာ –

‘‘အတ္တနာ ဟိ [အတ္တနာဝ (ဗဟူသု) ဓ. ပ. ၁၆၅] ကတံ ပါပံ၊ အတ္တနာ သံကိလိဿတိ၊

အတ္တနာ အကတံ ပါပံ၊ အတ္တနာဝ ဝိသုဇ္ဈတိ၊

သုဒ္ဓိ အသုဒ္ဓိ ပစ္စတ္တံ၊ နာညော အညံ ဝိသောဓယေ’’တိ.

ဧဝမ္ပိ နာဟံ သဟိဿာမိ ပမောစနာယ.

ဝုတ္တဉှေတံ ဘဂဝတာ – ‘‘ဧဝမေဝ ခေါ၊ ဗြာဟ္မဏ၊ တိဋ္ဌတေဝ နိဗ္ဗာနံ တိဋ္ဌတိ နိဗ္ဗာနဂါမိမဂ္ဂေါ တိဋ္ဌာမဟံ သမာဒပေတာ၊ အထ စ ပန မမ သာဝကာ မယာ ဧဝံ ဩဝဒိယမာနာ ဧဝံ အနုသာသိယမာနာ အပ္ပေကစ္စေ အစ္စန္တနိဋ္ဌံ နိဗ္ဗာနံ အာရာဓေန္တိ ဧကစ္စေ နာရာဓေန္တီတိ. ဧတ္ထ ကျာဟံ၊ ဗြာဟ္မဏ ကရောမိ? မဂ္ဂက္ခာယီ၊ ဗြာဟ္မဏ၊ တထာဂတော. မဂ္ဂံ ဗုဒ္ဓေါ အာစိက္ခတိ. အတ္တနာ ပဋိပဇ္ဇမာနာ မုစ္စေယျုန္တိ [မုဉ္စေယျုန္တိ (သျာ.)]. ဧဝမ္ပိ နာဟံ သဟိဿာမိ ပမောစနာယ’’.

ကထံကထိံ ဓောတက ကဉ္စိ လောကေတိ ကထံကထိံ ပုဂ္ဂလံ သကင်္ခံ သခိလံ သဒွေဠှကံ သဝိစိကိစ္ဆံ. ကဉ္စီတိ ကဉ္စိ ခတ္တိယံ ဝါ ဗြာဟ္မဏံ ဝါ ဝေဿံ ဝါ သုဒ္ဒံ ဝါ ဂဟဋ္ဌံ ဝါ ပဗ္ဗဇိတံ ဝါ ဒေဝံ ဝါ မနုဿံ ဝါ. လောကေတိ အပါယလောကေ။ပေ။ အာယတနလောကေတိ – ကထံကထိံ ဓောတက ကဉ္စိ လောကေ.

ဓမ္မဉ္စ သေဋ္ဌံ အာဇာနမာနောတိ ဓမ္မံ သေဋ္ဌံ ဝုစ္စတိ အမတံ နိဗ္ဗာနံ. ယော သော သဗ္ဗသင်္ခါရသမထော သဗ္ဗူပဓိပဋိနိဿဂ္ဂေါ တဏှက္ခယော ဝိရာဂေါ နိရောဓော နိဗ္ဗာနံ. သေဋ္ဌန္တိ အဂ္ဂံ သေဋ္ဌံ ဝိသေဋ္ဌံ ပါမောက္ခံ ဥတ္တမံ ပဝရံ ဓမ္မံ အာဇာနမာနော ဝိဇာနမာနော ပဋိဝိဇာနမာနော ပဋိဝိဇ္ဈမာနောတိ – ဓမ္မဉ္စ သေဋ္ဌံ အာဇာနမာနော.

ဧဝံ တုဝံ ဩဃမိမံ တရေသီတိ ဧဝံ ကာမောဃံ ဘဝေါဃံ ဒိဋ္ဌောဃံ အဝိဇ္ဇောဃံ တရေယျာသိ ဥတ္တရေယျာသိ ပတရေယျာသိ သမတိက္ကမေယျာသိ ဝီတိဝတ္တေယျာသီတိ – ဧဝံ တုဝံ ဩဃမိမံ တရေသိ. တေနာဟ ဘဂဝါ –

‘‘နာဟံ သဟိဿာမိ ပမောစနာယ၊ ကထံကထိံ ဓောတက ကဉ္စိ လောကေ၊

ဓမ္မဉ္စ သေဋ္ဌံ အာဇာနမာနော၊ ဧဝံ တုဝံ ဩဃမိမံ တရေသီ’’တိ.

၃၄. အနုသာသ ဗြဟ္မေ ကရုဏာယမာနော၊ ဝိဝေကဓမ္မံ ယမဟံ ဝိဇညံ၊

ယထာဟံ အာကာသောဝ [အာကာသော စ (သျာ.)] အဗျာပဇ္ဇမာနော [အဗျာပဇ္ဈမာနော (သျာ.)]၊ ဣဓေဝ သန္တော အသိတော စရေယျံ.

အနုသာသ ဗြဟ္မေ ကရုဏာယမာနောတိ အနုသာသ ဗြဟ္မေ အနုဂ္ဂဏှ ဗြဟ္မေ အနုကမ္ပ ဗြဟ္မေတိ – အနုသာသ ဗြဟ္မေ. ကရုဏာယမာနောတိ ကရုဏာယမာနော အနုဒယမာနော [အနုဒ္ဒယမာနော (ဗဟူသု)] အနုရက္ခမာနော အနုဂ္ဂဏှမာနော အနုကမ္ပမာနောတိ – အနုသာသ ဗြဟ္မေ ကရုဏာယမာနော.

ဝိဝေကဓမ္မံ ယမဟံ ဝိဇညန္တိ ဝိဝေကဓမ္မံ ဝုစ္စတိ အမတံ နိဗ္ဗာနံ. ယော သော သဗ္ဗသင်္ခါရသမထော သဗ္ဗူပဓိပဋိနိဿဂ္ဂေါ တဏှက္ခယော ဝိရာဂေါ နိရောဓော နိဗ္ဗာနံ. ယမဟံ ဝိဇညန္တိ ယမဟံ ဇာနေယျံ အာဇာနေယျံ ဝိဇာနေယျံ ပဋိဝိဇာနေယျံ ပဋိဝိဇ္ဈေယျံ အဓိဂစ္ဆေယျံ ဖဿေယျံ သစ္ဆိကရေယျန္တိ – ဝိဝေကဓမ္မံ ယမဟံ ဝိဇညံ.

ယထာဟံ အာကာသောဝ အဗျာပဇ္ဇမာနောတိ ယထာ အာကာသော န ပဇ္ဇတိ န ဂဏှတိ [နတ္ထိ။ သျာ. ။ ပေါတ္ထကေ] န ဗဇ္ဈတိ န ပလိဗဇ္ဈတိ၊ ဧဝံ အပဇ္ဇမာနော အဂဏှမာနော အဗဇ္ဈမာနော အပလိဗဇ္ဈမာနောတိ – ဧဝမ္ပိ အာကာသောဝ အဗျာပဇ္ဇမာနော. ယထာ အာကာသော န ရဇ္ဇတိ လာခါယ ဝါ ဟလိဒ္ဒိယာ [ဟလိဒ္ဒေန (သျာ.)] ဝါ နီလိယာ [နီလေန (သျာ.)] ဝါ မဉ္ဇေဋ္ဌာယ ဝါ ဧဝံ အရဇ္ဇမာနော အဒုဿမာနော အမုယှမာနော အကိလိဿမာနောတိ [အကိလိယမာနော (သျာ.)] – ဧဝမ္ပိ အာကာသောဝ အဗျာပဇ္ဇမာနော. ယထာ အာကာသော န ကုပ္ပတိ န ဗျာပဇ္ဇတိ န ပတိလီယတိ [ပတိဋ္ဌိယတိ (က.)] န ပဋိဟညတိ၊ ဧဝံ အကုပ္ပမာနော အဗျာပဇ္ဇမာနော အပ္ပတိလီယမာနော အပ္ပဋိဟညမာနော အပ္ပဋိဟတမာနောတိ – ဧဝမ္ပိ အာကာသောဝ အဗျာပဇ္ဇမာနော.

ဣဓေဝ သန္တော အသိတော စရေယျန္တိ. ဣဓေဝ သန္တောတိ ဣဓေဝ သန္တော ဣဓေဝ သမာနော ဣဓေဝ နိသိန္နော သမာနော ဣမသ္မိံယေဝ အာသနေ နိသိန္နော သမာနော ဣမိဿာယေဝ ပရိသာယ နိသိန္နော သမာနောတိ၊ ဧဝမ္ပိ – ဣဓေဝ သန္တော. အထ ဝါ၊ ဣဓေဝ သန္တော ဥပသန္တော ဝူပသန္တော နိဗ္ဗုတော ပဋိပ္ပဿဒ္ဓေါတိ၊ ဧဝမ္ပိ – ဣဓေဝ သန္တော. အသိတောတိ ဒွေ နိဿယာ – တဏှာနိဿယော စ ဒိဋ္ဌိနိဿယော စ။ပေ။ အယံ တဏှာနိဿယော။ပေ။ အယံ ဒိဋ္ဌိနိဿယော။ တဏှာနိဿယံ ပဟာယ ဒိဋ္ဌိနိဿယံ ပဋိနိဿဇ္ဇိတွာ စက္ခုံ အနိဿိတော၊ သောတံ အနိဿိတော၊ ဃာနံ အနိဿိတော၊ ဇိဝှံ အနိဿိတော၊ ကာယံ အနိဿိတော၊ မနံ အနိဿိတော၊ ရူပေ။ သဒ္ဒေ။ ဂန္ဓေ ။ ရသေ။ ဖောဋ္ဌဗ္ဗေ။ ဓမ္မေ။ ကုလံ။ ဂဏံ။ အာဝါသံ။ လာဘံ။ ယသံ။ ပသံသံ။ သုခံ။ စီဝရံ။ ပိဏ္ဍပါတံ။ သေနာသနံ။ ဂိလာနပစ္စယဘေသဇ္ဇပရိက္ခာရံ။ ကာမဓာတုံ။ ရူပဓာတုံ။ အရူပဓာတုံ။ ကာမဘဝံ။ ရူပဘဝံ။ အရူပဘဝံ။ သညာဘဝံ။ အသညာဘဝံ။ နေဝသညာနာသညာဘဝံ။ ဧကဝေါကာရဘဝံ။ စတုဝေါကာရဘဝံ။ ပဉ္စဝေါကာရဘဝံ။ အတီတံ။ အနာဂတံ။ ပစ္စုပ္ပန္နံ။ ဒိဋ္ဌသုတမုတဝိညာတဗ္ဗေ [ဒိဋ္ဌံ၊ သုတံ၊ မုတံ၊ ဝိညာတံ၊ သဗ္ဗေ. မဟာနိ. ၄၆ ပဿိတဗ္ဗံ] ဓမ္မေ အသိတော အနိဿိတော အနလ္လီနော အနုပဂတော အနဇ္ဈောသိတော အနဓိမုတ္တော နိက္ခန္တော နိဿဋော [နိဿဋ္ဌော (သျာ.)] ဝိပ္ပမုတ္တော ဝိသံယုတ္တော ဝိမရိယာဒိကတေန စေတသာ. စရေယျန္တိ စရေယျံ ဝိဟရေယျံ ဣရိယေယျံ ဝတ္တေယျံ ယပေယျံ ယာပေယျန္တိ – ဣဓေဝ သန္တော အသိတော စရေယျံ. တေနာဟ သော ဗြာဟ္မဏော –

‘‘အနုသာသ ဗြဟ္မေ ကရုဏာယမာနော၊ ဝိဝေကဓမ္မံ ယမဟံ ဝိဇညံ၊

ယထာဟံ အာကာသောဝ အဗျာပဇ္ဇမာနော၊ ဣဓေဝ သန္တော အသိတော စရေယျ’’န္တိ.

၃၅. ကိတ္တယိဿာမိ တေ သန္တိံ၊ [ဓောတကာတိ ဘဂဝါ]

ဒိဋ္ဌေ ဓမ္မေ အနီတိဟံ၊

ယံ ဝိဒိတွာ သတော စရံ၊ တရေ လောကေ ဝိသတ္တိကံ.

ကိတ္တယိဿာမိ တေ သန္တိန္တိ ရာဂဿ သန္တိံ၊ ဒေါသဿ သန္တိံ၊ မောဟဿ သန္တိံ၊ ကောဓဿ သန္တိံ၊ ဥပနာဟဿ။ပေ။ မက္ခဿ။ ပဠာသဿ။ ဣဿာယ။ မစ္ဆရိယဿ။ မာယာယ။ သာဌေယျဿ။ ထမ္ဘဿ။ သာရမ္ဘဿ။ မာနဿ။ အတိမာနဿ။ မဒဿ။ ပမာဒဿ။ သဗ္ဗကိလေသာနံ။ သဗ္ဗဒုစ္စရိတာနံ။ သဗ္ဗဒရထာနံ။ သဗ္ဗပရိဠာဟာနံ။ သဗ္ဗသန္တာပါနံ။ သဗ္ဗာကုသလာဘိသင်္ခါရာနံ သန္တိံ ဥပသန္တိံ ဝူပသန္တိံ နိဗ္ဗုတိံ ပဋိပ္ပဿဒ္ဓိံ ကိတ္တယိဿာမိ ပကိတ္တယိဿာမိ အာစိက္ခိဿာမိ ဒေသေဿာမိ ပညပေဿာမိ ပဋ္ဌပေဿာမိ ဝိဝရိဿာမိ ဝိဘဇိဿာမိ ဥတ္တာနီကရိဿာမိ ပကာသိဿာမီတိ – ကိတ္တယိဿာမိ တေ သန္တိံ.

ဓောတကာတိ ဘဂဝါတိ. ဓောတကာတိ ဘဂဝါ တံ ဗြာဟ္မဏံ နာမေန အာလပတိ. ဘဂဝါတိ ဂါရဝါဓိဝစနမေတံ။ပေ။ သစ္ဆိကာ ပညတ္တိ၊ ယဒိဒံ ဘဂဝါတိ – ဓောတကာတိ ဘဂဝါ.

ဒိဋ္ဌေ ဓမ္မေ အနီတိဟန္တိ. ဒိဋ္ဌေ ဓမ္မေတိ ဒိဋ္ဌေ ဓမ္မေ ဉာတေ ဓမ္မေ တုလိတေ ဓမ္မေ တီရိတေ ဓမ္မေ ဝိဘူတေ ဓမ္မေ ဝိဘာဝိတေ ဓမ္မေ သဗ္ဗေ သင်္ခါရာ အနိစ္စာတိ။ပေ။ ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မန္တိ ဒိဋ္ဌေ ဓမ္မေ ဉာတေ ဓမ္မေ တုလိတေ ဓမ္မေ တီရိတေ ဓမ္မေ ဝိဘာဝိတေ ဓမ္မေ ဝိဘူတေ ဓမ္မေတိ၊ ဧဝမ္ပိ – ဒိဋ္ဌေ ဓမ္မေ။ပေ။. အထ ဝါ၊ ဒုက္ခေ ဒိဋ္ဌေ ဒုက္ခံ ကထယိဿာမိ၊ သမုဒယေ ဒိဋ္ဌေ သမုဒယံ ကထယိဿာမိ၊ မဂ္ဂေ ဒိဋ္ဌေ မဂ္ဂံ ကထယိဿာမိ၊ နိရောဓေ ဒိဋ္ဌေ နိရောဓံ ကထယိဿာမီတိ၊ ဧဝမ္ပိ – ဒိဋ္ဌေ ဓမ္မေ။ပေ။. အထ ဝါ၊ သန္ဒိဋ္ဌိကံ အကာလိကံ ဧဟိပဿိကံ ဩပနေယျိကံ [ဩပနယိကံ (သျာ. က.)] ပစ္စတ္တံ ဝေဒိတဗ္ဗံ ဝိညူဟီတိ၊ ဧဝမ္ပိ – ဒိဋ္ဌေ ဓမ္မေ. အနီတိဟန္တိ န ဣတိဟီတိဟံ န ဣတိကိရာယ န ပရမ္ပရာယ န ပိဋကသမ္ပဒါယ န တက္ကဟေတု န နယဟေတု န အာကာရပရိဝိတက္ကေန န ဒိဋ္ဌိနိဇ္ဈာနက္ခန္တိယာ သာမံ သယမဘိညာတံ အတ္တပစ္စက္ခဓမ္မံ၊ တံ ကထယိဿာမီတိ – ဒိဋ္ဌေ ဓမ္မေ အနီတိဟံ.

ယံ ဝိဒိတွာ သတော စရန္တိ ယံ ဝိဒိတံ ကတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာ၊ ‘‘သဗ္ဗေ သင်္ခါရာ အနိစ္စာ’’တိ ဝိဒိတံ ကတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာ၊ ‘‘သဗ္ဗေ သင်္ခါရာ ဒုက္ခာ’’တိ။ပေ။ ‘‘သဗ္ဗေ ဓမ္မာ အနတ္တာ’’တိ။ပေ။ ‘‘ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မ’’န္တိ ဝိဒိတံ ကတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာ. သတောတိ စတူဟိ ကာရဏေဟိ သတော – ကာယေ ကာယာနုပဿနာသတိပဋ္ဌာနံ ဘာဝေန္တော သတော။ပေ။ သော ဝုစ္စတိ သတော. စရန္တိ စရန္တော ဝိဟရန္တော ဣရိယန္တော ဝတ္တေန္တော ပါလေန္တော ယပေန္တော ယာပေန္တောတိ – ယံ ဝိဒိတွာ သတော စရံ.

တရေ လောကေ ဝိသတ္တိကန္တိ ဝိသတ္တိကာ ဝုစ္စတိ တဏှာ. ယော ရာဂေါ သာရာဂေါ။ပေ။ အဘိဇ္ဈာ လောဘော အကုသလမူလံ. ဝိသတ္တိကာတိ ကေနဋ္ဌေန ဝိသတ္တိကာ။ပေ။ ဝိသဋာ ဝိတ္ထတာတိ ဝိသတ္တိကာ. လောကေတိ အပါယလောကေ။ပေ။ အာယတနလောကေ. တရေ လောကေ ဝိသတ္တိကန္တိ လောကေ ဝေသာ ဝိသတ္တိကာ၊ လောကေ ဝေတံ ဝိသတ္တိကံ သတော တရေယျ ဥတ္တရေယျ ပတရေယျ သမတိက္ကမေယျ ဝီတိဝတ္တေယျာတိ – တရေ လောကေ ဝိသတ္တိကံ. တေနာဟ ဘဂဝါ –

‘‘ကိတ္တယိဿာမိ တေ သန္တိံ၊ [ဓောတကာတိ ဘဂဝါ]

ဒိဋ္ဌေ ဓမ္မေ အနီတိဟံ၊

ယံ ဝိဒိတွာ သတော စရံ၊ တရေ လောကေ ဝိသတ္တိက’’န္တိ.

၃၆. တဉ္စာဟံ အဘိနန္ဒာမိ၊ မဟေသိ သန္တိမုတ္တမံ၊

ယံ ဝိဒိတွာ သတော စရံ၊ တရေ လောကေ ဝိသတ္တိကံ.

တဉ္စာဟံ အဘိနန္ဒာမီတိ. တန္တိ တုယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ နန္ဒာမိ အဘိနန္ဒာမိ မောဒါမိ အနုမောဒါမိ ဣစ္ဆာမိ သာဒိယာမိ ပတ္ထယာမိ ပိဟယာမိ အဘိဇပ္ပါမီတိ – တဉ္စာဟံ အဘိနန္ဒာမိ.

မဟေသိသန္တိမုတ္တမန္တိ. မဟေသီတိ ကိံ မဟေသိ ဘဂဝါ? မဟန္တံ သီလက္ခန္ဓံ ဧသီ ဂဝေသီ ပရိယေသီတိ မဟေသိ၊ မဟန္တံ သမာဓိက္ခန္ဓံ။ပေ။ ကဟံ နရာသဘောတိ မဟေသိ. သန္တိမုတ္တမန္တိ သန္တိ ဝုစ္စတိ အမတံ နိဗ္ဗာနံ. ယော သော သဗ္ဗသင်္ခါရသမထော သဗ္ဗူပဓိပဋိနိဿဂ္ဂေါ တဏှက္ခယော ဝိရာဂေါ နိရောဓော နိဗ္ဗာနံ. ဥတ္တမန္တိ အဂ္ဂံ သေဋ္ဌံ ဝိသေဋ္ဌံ ပါမောက္ခံ ဥတ္တမံ ပဝရန္တိ – မဟေသိ သန္တိမုတ္တမံ.

ယံ ဝိဒိတွာ သတော စရန္တိ ယံ ဝိဒိတံ ကတွာ။ပေ။ ‘‘သဗ္ဗေ သင်္ခါရာ အနိစ္စာ’’တိ ဝိဒိတံ ကတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာ၊ ‘‘သဗ္ဗေ သင်္ခါရာ ဒုက္ခာ’’တိ။ ‘‘သဗ္ဗေ ဓမ္မာ အနတ္တာ’’တိ။ပေ။ ‘‘ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မ’’န္တိ ဝိဒိတံ ကတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာ. သတောတိ စတူဟိ ကာရဏေဟိ သတော – ကာယေ ကာယာနုပဿနာသတိပဋ္ဌာနံ ဘာဝေန္တော သတော။ပေ။ သော ဝုစ္စတိ သတော. စရန္တိ စရန္တော။ပေ။ ယာပေန္တောတိ – ယံ ဝိဒိတွာ သတော စရံ.

တရေ လောကေ ဝိသတ္တိကန္တိ. ဝိသတ္တိကာ ဝုစ္စတိ တဏှာ. ယော ရာဂေါ သာရာဂေါ။ပေ။ အဘိဇ္ဈာ လောဘော အကုသလမူလံ. ဝိသတ္တိကာတိ ကေနဋ္ဌေန ဝိသတ္တိကာ။ပေ။ ဝိသဋာ ဝိတ္ထတာတိ ဝိသတ္တိကာ. လောကေတိ အပါယလောကေ။ပေ။ အာယတနလောကေ. တရေ လောကေ ဝိသတ္တိကန္တိ လောကေ ဝေသာ ဝိသတ္တိကာ၊ လောကေ ဝေတံ ဝိသတ္တိကံ သတော တရေယျံ ဥတ္တရေယျံ။ပေ။ ဝီတိဝတ္တေယျန္တိ – တရေ လောကေ ဝိသတ္တိကံ. တေနာဟ သော ဗြာဟ္မဏော –

‘‘တဉ္စာဟံ အဘိနန္ဒာမိ၊ မဟေသိ သန္တိမုတ္တမံ၊

ယံ ဝိဒိတွာ သတော စရံ၊ တရေ လောကေ ဝိသတ္တိက’’န္တိ.

၃၇. ယံ ကိဉ္စိ သမ္ပဇာနာသိ၊ [ဓောတကာတိ ဘဂဝါ]

ဥဒ္ဓံ အဓော တိရိယဉ္စာပိ မဇ္ဈေ၊

ဧတံ ဝိဒိတွာ သင်္ဂေါတိ လောကေ၊ ဘဝါဘဝါယ မာကာသိ တဏှံ.

ယံ ကိဉ္စိ သမ္ပဇာနာသီတိ ယံ ကိဉ္စိ သမ္ပဇာနာသိ အာဇာနာသိ ပဋိဝိဇာနာသိ ပဋိဝိဇ္ဈသီတိ – ယံ ကိဉ္စိ သမ္ပဇာနာသိ. ဓောတကာတိ ဘဂဝါတိ. ဓောတကာတိ ဘဂဝါ တံ ဗြာဟ္မဏံ နာမေန အာလပတိ. ဘဂဝါတိ ဂါရဝါဓိဝစနမေတံ။ပေ။ သစ္ဆိကာ ပညတ္တိ၊ ယဒိဒံ ဘဂဝါတိ – ဓောတကာတိ ဘဂဝါ.

ဥဒ္ဓံ အဓော တိရိယဉ္စာပိ မဇ္ဈေတိ. ဥဒ္ဓန္တိ အနာဂတံ၊ အဓောတိ အတီတံ၊ တိရိယဉ္စာပိ မဇ္ဈေတိ ပစ္စုပ္ပန္နံ. ဥဒ္ဓန္တိ ဒေဝလောကော၊ အဓောတိ အပါယလောကော၊ တိရိယဉ္စာပိ မဇ္ဈေတိ မနုဿလောကော. အထ ဝါ၊ ဥဒ္ဓန္တိ ကုသလာ ဓမ္မာ၊ အဓောတိ အကုသလာ ဓမ္မာ၊ တိရိယဉ္စာပိ မဇ္ဈေတိ အဗျာကတာ ဓမ္မာ. ဥဒ္ဓန္တိ အရူပဓာတု၊ အဓောတိ ကာမဓာတု၊ တိရိယဉ္စာပိ မဇ္ဈေတိ ရူပဓာတု. ဥဒ္ဓန္တိ သုခါ ဝေဒနာ၊ အဓောတိ ဒုက္ခာ ဝေဒနာ၊ တိရိယဉ္စာပိ မဇ္ဈေတိ အဒုက္ခမသုခါ ဝေဒနာ. ဥဒ္ဓန္တိ ဥဒ္ဓံ ပါဒတလာ၊ အဓောတိ အဓော ကေသမတ္ထကာ၊ တိရိယဉ္စာပိ မဇ္ဈေတိ ဝေမဇ္ဈေတိ – ဥဒ္ဓံ အဓော တိရိယဉ္စာပိ မဇ္ဈေ.

ဧတံ ဝိဒိတွာ သင်္ဂေါတိ လောကေတိ သင်္ဂေါ ဧသော လဂ္ဂနံ ဧတံ ဗန္ဓနံ ဧတံ ပလိဗောဓော ဧသောတိ ဉတွာ ဇာနိတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာတိ – ဧတံ ဝိဒိတွာ သင်္ဂေါတိ လောကေ.

ဘဝါဘဝါယ မာကာသိ တဏှန္တိ. တဏှာတိ ရူပတဏှာ သဒ္ဒတဏှာ။ပေ။ ဓမ္မတဏှာ. ဘဝါဘဝါယာတိ ဘဝါဘဝါယ ကမ္မဘဝါယ ပုနဗ္ဘဝါယ ကာမဘဝါယ၊ ကမ္မဘဝါယ ကာမဘဝါယ ပုနဗ္ဘဝါယ ရူပဘဝါယ၊ ကမ္မဘဝါယ ရူပဘဝါယ ပုနဗ္ဘဝါယ အရူပဘဝါယ၊ ကမ္မဘဝါယ အရူပဘဝါယ ပုနဗ္ဘဝါယ ပုနပ္ပုနဗ္ဘဝါယ၊ ပုနပ္ပုနဂတိယာ ပုနပ္ပုနဥပပတ္တိယာ ပုနပ္ပုနပဋိသန္ဓိယာ ပုနပ္ပုနအတ္တဘာဝါဘိနိဗ္ဗတ္တိယာ တဏှံ မာကာသိ မာ ဇနေသိ မာ သဉ္ဇနေသိ မာ နိဗ္ဗတ္တေသိ မာဘိနိဗ္ဗတ္တေသိ၊ ပဇဟ ဝိနောဒေဟိ ဗျန္တီကရောဟိ အနဘာဝံ ဂမေဟီတိ – ဘဝါဘဝါယ မာကာသိ တဏှန္တိ. တေနာဟ ဘဂဝါ –

‘‘ယံ ကိဉ္စိ သမ္ပဇာနာသိ၊ [ဓောတကာတိ ဘဂဝါ]

ဥဒ္ဓံ အဓော တိရိယဉ္စာပိ မဇ္ဈေ၊

ဧတံ ဝိဒိတွာ သင်္ဂေါတိ လောကေ၊ ဘဝါဘဝါယ မာကာသိ တဏှ’’န္တိ.

သဟ ဂါထာပရိယောသာနာ။ပေ။ သတ္ထာ မေ၊ ဘန္တေ ဘဂဝါ၊ သာဝကောဟမသ္မီတိ.

ဓောတကမာဏဝပုစ္ဆာနိဒ္ဒေသော ပဉ္စမော.