၁၂. ဘဒြာဝုဓမာဏဝပုစ္ဆာနိဒ္ဒေသော

၇၀. ဩကဉ္ဇဟံ တဏှစ္ဆိဒံ အနေဇံ၊ [ဣစ္စာယသ္မာ ဘဒြာဝုဓော]

နန္ဒိဉ္ဇဟံ ဩဃတိဏ္ဏံ ဝိမုတ္တံ၊

ကပ္ပဉ္ဇဟံ အဘိယာစေ သုမေဓံ၊ သုတွာန နာဂဿ အပနမိဿန္တိ [အပဂမိဿန္တိ (က.)] ဣတော.

ဩကဉ္ဇဟံ တဏှစ္ဆိဒံ အနေဇန္တိ. ဩကဉ္ဇဟန္တိ ရူပဓာတုယာ ယော ဆန္ဒော ယော ရာဂေါ ယာ နန္ဒီ ယာ တဏှာ ယေ ဥပါယုပါဒါနာ [ဥပယုပါဒါနာ (က.)] စေတသော အဓိဋ္ဌာနာဘိနိဝေသာနုသယာ၊ တေ ဗုဒ္ဓဿ ဘဂဝတော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ ဗုဒ္ဓေါ ဩကဉ္ဇဟော. ဝေဒနာဓာတုယာ။ပေ။ သညာဓာတုယာ။ သင်္ခါရဓာတုယာ။ ဝိညာဏဓာတုယာ ယော ဆန္ဒော ယော ရာဂေါ ယာ နန္ဒီ ယာ တဏှာ ယေ ဥပါယုပါဒါနာ စေတသော အဓိဋ္ဌာနာဘိနိဝေသာနုသယာ၊ တေ ဗုဒ္ဓဿ ဘဂဝတော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ ဗုဒ္ဓေါ ဩကဉ္ဇဟော.

တဏှစ္ဆိဒန္တိ. တဏှာတိ ရူပတဏှာ။ပေ။ ဓမ္မတဏှာ. သာ တဏှာ ဗုဒ္ဓဿ ဘဂဝတော ဆိန္နာ ဥစ္ဆိန္နာ သမုစ္ဆိန္နာ ဝူပသန္တာ ပဋိပ္ပဿဒ္ဓါ အဘဗ္ဗုပ္ပတ္တိကာ ဉာဏဂ္ဂိနာ ဒဍ္ဎာ. တသ္မာ ဗုဒ္ဓေါ တဏှစ္ဆိဒေါ. အနေဇောတိ ဧဇာ ဝုစ္စတိ တဏှာ. ယော ရာဂေါ သာရာဂေါ ။ပေ။ အဘိဇ္ဈာ လောဘော အကုသလမူလံ. သာ ဧဇာ တဏှာ ဗုဒ္ဓဿ ဘဂဝတော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ ဗုဒ္ဓေါ အနေဇော. ဧဇာယ ပဟီနတ္တာ အနေဇော ဘဂဝါ လာဘေပိ န ဣဉ္ဇတိ၊ အလာဘေပိ န ဣဉ္ဇတိ၊ ယသေပိ န ဣဉ္ဇတိ၊ အယသေပိ န ဣဉ္ဇတိ၊ ပသံသာယပိ န ဣဉ္ဇတိ၊ နိန္ဒာယပိ န ဣဉ္ဇတိ၊ သုခေပိ န ဣဉ္ဇတိ၊ ဒုက္ခေပိ န ဣဉ္ဇတိ န စလတိ န ဝေဓတိ န ပဝေဓတိ န သမ္ပဝေဓတီတိ. တသ္မာ ဗုဒ္ဓေါ အနေဇောတိ – ဩကဉ္ဇဟံ တဏှစ္ဆိဒံ အနေဇံ. ဣစ္စာယသ္မာ ဘဒြာဝုဓောတိ. ဣစ္စာတိ ပဒသန္ဓိ။ပေ။ အာယသ္မာတိ၊ ပိယဝစနံ။ပေ။ ဘဒြာဝုဓောတိ တဿ ဗြာဟ္မဏဿ နာမံ။ပေ။ အဘိလာပေါတိ – ဣစ္စာယသ္မာ ဘဒြာဝုဓော.

နန္ဒိဉ္ဇဟံ ဩဃတိဏ္ဏံ ဝိမုတ္တန္တိ နန္ဒီ ဝုစ္စတိ တဏှာ. ယော ရာဂေါ သာရာဂေါ။ပေ။ အဘိဇ္ဈာ လောဘော အကုသလမူလံ. သာ နန္ဒီ သာ တဏှာ ဗုဒ္ဓဿ ဘဂဝတော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ ဗုဒ္ဓေါ နန္ဒိဉ္ဇဟော. ဩဃတိဏ္ဏန္တိ ဘဂဝါ ကာမောဃံ တိဏ္ဏော ဘဝေါဃံ တိဏ္ဏော ဒိဋ္ဌောဃံ တိဏ္ဏော အဝိဇ္ဇောဃံ တိဏ္ဏော သဗ္ဗသံသာရပထံ တိဏ္ဏော ဥတ္တိဏ္ဏော နိတ္ထိဏ္ဏော အတိက္ကန္တော သမတိက္ကန္တော ဝီတိဝတ္တော. သော ဝုတ္ထဝါသော စိဏ္ဏစရဏော။ပေ။ ဇာတိမရဏသံသာရော နတ္ထိ တဿ ပုနဗ္ဘဝေါတိ – နန္ဒိဉ္ဇဟံ ဩဃတိဏ္ဏံ. ဝိမုတ္တန္တိ ဘဂဝတော ရာဂါ စိတ္တံ မုတ္တံ ဝိမုတ္တံ သုဝိမုတ္တံ၊ ဒေါသာ စိတ္တံ။ မောဟာ စိတ္တံ။ပေ။ သဗ္ဗာကုသလာဘိသင်္ခါရေဟိ စိတ္တံ မုတ္တံ ဝိမုတ္တံ သုဝိမုတ္တန္တိ – နန္ဒိဉ္ဇဟံ ဩဃတိဏ္ဏံ ဝိမုတ္တံ.

ကပ္ပဉ္ဇဟံ အဘိယာစေ သုမေဓန္တိ. ကပ္ပါတိ ဒွေ ကပ္ပါ – တဏှာကပ္ပေါ စ ဒိဋ္ဌိကပ္ပေါ စ။ပေ။ အယံ တဏှာကပ္ပေါ။ပေ။ အယံ ဒိဋ္ဌိကပ္ပေါ. ဗုဒ္ဓဿ ဘဂဝတော တဏှာကပ္ပေါ ပဟီနော ဒိဋ္ဌိကပ္ပေါ ပဋိနိဿဋ္ဌော. တဏှာကပ္ပဿ ပဟီနတ္တာ ဒိဋ္ဌိကပ္ပဿ ပဋိနိဿဋ္ဌတ္တာ တသ္မာ ဗုဒ္ဓေါ ကပ္ပဉ္ဇဟော. အဘိယာစေတိ ယာစာမိ အဘိယာစာမိ အဇ္ဈေသာမိ သာဒိယာမိ ပတ္ထယာမိ ပိဟယာမိ ဇပ္ပါမိ အဘိဇပ္ပါမိ. သုမေဓာ ဝုစ္စတိ ပညာ. ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ. ဘဂဝါ ဣမာယ မေဓာယ ပညာယ ဥပေတော သမုပေတော ဥပါဂတော သမုပါဂတော ဥပပန္နော သမုပပန္နော သမန္နာဂတော. တသ္မာ ဗုဒ္ဓေါ သုမေဓောတိ – ကပ္ပဉ္ဇဟံ အဘိယာစေ သုမေဓံ.

သုတွာန နာဂဿ အပနမိဿန္တိ ဣတောတိ. နာဂဿာတိ နာဂေါ. ဘဂဝါ အာဂုံ န ကရောတီတိ နာဂေါ၊ န ဂစ္ဆတီတိ နာဂေါ၊ န အာဂစ္ဆတီတိ နာဂေါ။ပေ။ ဧဝံ ဘဂဝါ န ဂစ္ဆတီတိ နာဂေါ. သုတွာန နာဂဿ အပနမိဿန္တိ ဣတောတိ တုယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ သုတွာ သုဏိတွာ ဥဂ္ဂဟေတွာ ဥပဓာရယိတွာ ဥပလက္ခယိတွာ ဣတော အပနမိဿန္တိ ဝဇိဿန္တိ ပက္ကမိဿန္တိ ဒိသာဝိဒိသံ ဂမိဿန္တီတိ – သုတွာန နာဂဿ အပနမိဿန္တိ ဣတော. တေနာဟ သော ဗြာဟ္မဏော –

‘‘ဩကဉ္ဇဟံ တဏှစ္ဆိဒံ အနေဇံ၊ [ဣစ္စာယသ္မာ ဘဒြာဝုဓော]

နန္ဒိဉ္ဇဟံ ဩဃတိဏ္ဏံ ဝိမုတ္တံ၊

ကပ္ပဉ္ဇဟံ အဘိယာစေ သုမေဓံ၊ သုတွာန နာဂဿ အပနမိဿန္တိ ဣတော’’တိ.

၇၁. နာနာဇနာ ဇနပဒေဟိ သင်္ဂတာ၊ တဝ ဝီရ ဝါကျံ အဘိကင်္ခမာနာ၊

တေသံ တုဝံ သာဓု ဝိယာကရောဟိ၊ တထာ ဟိ တေ ဝိဒိတော ဧသ ဓမ္မော.

နာနာဇနာ ဇနပဒေဟိ သင်္ဂတာတိ. နာနာဇနာတိ ခတ္တိယာ စ ဗြာဟ္မဏာ စ ဝေဿာ စ သုဒ္ဒါ စ ဂဟဋ္ဌာ စ ပဗ္ဗဇိတာ စ ဒေဝါ စ မနုဿာ စ. ဇနပဒေဟိ သင်္ဂတာတိ အင်္ဂါ စ မဂဓာ စ ကလိင်္ဂါ စ ကာသိယာ စ ကောသလာ စ ဝဇ္ဇိယာ စ မလ္လာ စ စေတိယမှာ စ [စေတိယမှာ စ သာဂရမှာ စ (သျာ.)] ဝံသာ စ ကုရုမှာ စ ပဉ္စာလာ စ မစ္ဆာ စ သုရသေနာ စ အဿကာ စ အဝန္တိယာ စ ယောနာ [ယောနကာ (က.) မဟာနိ. ၅၅] စ ကမ္ဗောဇာ စ. သင်္ဂတာတိ သင်္ဂတာ သမာဂတာ သမောဟိတာ သန္နိပတိတာတိ – နာနာဇနာ ဇနပဒေဟိ သင်္ဂတာ.

တဝ ဝီရ ဝါကျံ အဘိကင်္ခမာနာတိ. ဝီရာတိ ဝီရော. ဘဂဝါ ဝီရိယဝါတိ ဝီရော၊ ပဟူတိ ဝီရော၊ ဝိသဝီတိ ဝီရော၊ အလမတ္တောတိ ဝီရော၊ ဝိဂတလောမဟံသောတိပိ ဝီရော.

ဝိရတော ဣဓ သဗ္ဗပါပကေဟိ၊ နိရယဒုက္ခံ အတိစ္စ ဝီရိယဝါ သော၊

သော ဝီရိယဝါ ပဓာနဝါ၊ ဝီရော တာဒိ ပဝုစ္စတေ တထတ္တာတိ.

တဝ ဝီရ ဝါကျံ အဘိကင်္ခမာနာတိ တုယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ. အဘိကင်္ခမာနာတိ အဘိကင်္ခမာနာ ဣစ္ဆမာနာ သာဒိယမာနာ ပတ္ထယမာနာ ပိဟယမာနာ အဘိဇပ္ပမာနာတိ – တဝ ဝီရ ဝါကျံ အဘိကင်္ခမာနာ.

တေသံ တုဝံ သာဓု ဝိယာကရောဟီတိ. တေသန္တိ တေသံ ခတ္တိယာနံ ဗြာဟ္မဏာနံ ဝေဿာနံ သုဒ္ဒါနံ ဂဟဋ္ဌာနံ ပဗ္ဗဇိတာနံ ဒေဝါနံ မနုဿာနံ. တုဝန္တိ ဘဂဝန္တံ ဘဏတိ. သာဓု ဝိယာကရောဟီတိ သာဓု အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟီတိ – တေသံ တုဝံ သာဓု ဝိယာကရောဟိ.

တထာ ဟိ တေ ဝိဒိတော ဧသ ဓမ္မောတိ တထာ ဟိ တေ ဝိဒိတော တုလိတော တီရိတော ဝိဘူတော ဝိဘာဝိတော ဧသ ဓမ္မောတိ – တထာ ဟိ တေ ဝိဒိတော ဧသ ဓမ္မော. တေနာဟ သော ဗြာဟ္မဏော –

‘‘နာနာဇနာ ဇနပဒေဟိ သင်္ဂတာ၊ တဝ ဝီရ ဝါကျံ အဘိကင်္ခမာနာ၊

တေသံ တုဝံ သာဓု ဝိယာကရောဟိ၊ တထာ ဟိ တေ ဝိဒိတော ဧသ ဓမ္မော’’တိ.

၇၂. အာဒါနတဏှံ ဝိနယေထ သဗ္ဗံ၊ [ဘဒြာဝုဓာတိ ဘဂဝါ]

ဥဒ္ဓံ အဓော တိရိယဉ္စာပိ မဇ္ဈေ၊

ယံ ယဉှိ လောကသ္မိမုပါဒိယန္တိ၊ တေနေဝ မာရော အနွေတိ ဇန္တုံ.

အာဒါနတဏှံ ဝိနယေထ သဗ္ဗန္တိ အာဒါနတဏှံ ဝုစ္စတိ ရူပတဏှာ။ပေ။ အာဒါနတဏှာတိ ကိံကာရဏာ ဝုစ္စတိ အာဒါနတဏှာ? တာယ တဏှာယ ရူပံ အာဒိယန္တိ ဥပါဒိယန္တိ ဂဏှန္တိ ပရာမသန္တိ အဘိနိဝိသန္တိ. ဝေဒနံ။ပေ။ သညံ။ သင်္ခါရေ။ ဝိညာဏံ။ ဂတိံ။ ဥပပတ္တိံ။ ပဋိသန္ဓိံ။ ဘဝံ။ သံသာရံ။ ဝဋ္ဋံ အာဒိယန္တိ ဥပါဒိယန္တိ ဂဏှန္တိ ပရာမသန္တိ အဘိနိဝိသန္တိ. တံကာရဏာ ဝုစ္စတိ အာဒါနတဏှာ. အာဒါနတဏှံ ဝိနယေထ သဗ္ဗန္တိ သဗ္ဗံ အာဒါနတဏှံ ဝိနယေယျ ပဋိဝိနယေယျ ပဇဟေယျ ဝိနောဒေယျ ဗျန္တီကရေယျ အနဘာဝံ ဂမေယျာတိ – အာဒါနတဏှံ ဝိနယေထ သဗ္ဗံ. ဘဒြာဝုဓာတိ ဘဂဝါတိ. ဘဒြာဝုဓာတိ ဘဂဝါ တံ ဗြာဟ္မဏံ နာမေန အာလပတိ. ဘဂဝါတိ ဂါရဝါဓိဝစနမေတံ။ပေ။ သစ္ဆိကာ ပညတ္တိ၊ ယဒိဒံ ဘဂဝါတိ – ဘဒြာဝုဓာတိ ဘဂဝါ.

ဥဒ္ဓံ အဓော တိရိယဉ္စာပိ မဇ္ဈေတိ. ဥဒ္ဓန္တိ အနာဂတံ၊ အဓောတိ အတီတံ၊ တိရိယဉ္စာပိ မဇ္ဈေတိ ပစ္စုပ္ပန္နံ. ဥဒ္ဓန္တိ ဒေဝလောကော၊ အဓောတိ နိရယလောကော၊ တိရိယဉ္စာပိ မဇ္ဈေတိ မနုဿလောကော. အထ ဝါ၊ ဥဒ္ဓန္တိ ကုသလာ ဓမ္မာ၊ အဓောတိ အကုသလာ ဓမ္မာ၊ တိရိယဉ္စာပိ မဇ္ဈေတိ အဗျာကတာ ဓမ္မာ. ဥဒ္ဓန္တိ အရူပဓာတု၊ အဓောတိ ကာမဓာတု၊ တိရိယဉ္စာပိ မဇ္ဈေတိ ရူပဓာတု. ဥဒ္ဓန္တိ သုခါ ဝေဒနာ၊ အဓောတိ ဒုက္ခာ ဝေဒနာ၊ တိရိယဉ္စာပိ မဇ္ဈေတိ အဒုက္ခမသုခါ ဝေဒနာ. ဥဒ္ဓန္တိ ဥဒ္ဓံ ပါဒတလာ၊ အဓောတိ အဓော ကေသမတ္ထကာ၊ တိရိယဉ္စာပိ မဇ္ဈေတိ ဝေမဇ္ဈေတိ – ဥဒ္ဓံ အဓော တိရိယဉ္စာပိ မဇ္ဈေ.

ယံ ယဉှိ လောကသ္မိမုပါဒိယန္တီတိ ယံ ယံ ရူပဂတံ ဝေဒနာဂတံ သညာဂတံ သင်္ခါရဂတံ ဝိညာဏဂတံ အာဒိယန္တိ ဥပါဒိယန္တိ ဂဏှန္တိ ပရာမသန္တိ အဘိနိဝိသန္တိ. လောကသ္မိန္တိ အပါယလောကေ။ပေ။ အာယတနလောကေတိ – ယံ ယဉှိ လောကသ္မိမုပါဒိယန္တိ.

တေနေဝ မာရော အနွေတိ ဇန္တုန္တိ တေနေဝ ကမ္မာဘိသင်္ခါရဝသေန ပဋိသန္ဓိကော ခန္ဓမာရော ဓာတုမာရော အာယတနမာရော ဂတိမာရော ဥပပတ္တိမာရော ပဋိသန္ဓိမာရော ဘဝမာရော သံသာရမာရော ဝဋ္ဋမာရော အနွေတိ အနုဂစ္ဆတိ အနွာယိကော ဟောတိ. ဇန္တုန္တိ သတ္တံ ဇနံ နရံ မာဏဝံ [မာနဝံ (သျာ.)] ပေါသံ ပုဂ္ဂလံ ဇီဝံ ဇာဂုံ ဇန္တုံ ဣန္ဒဂုံ မနုဇန္တိ – တေနေဝ မာရော အနွေတိ ဇန္တုံ. တေနာဟ ဘဂဝါ –

‘‘အာဒါနတဏှံ ဝိနယေထ သဗ္ဗံ၊ [ဘဒြာဝုဓာတိ ဘဂဝါ]

ဥဒ္ဓံ အဓော တိရိယဉ္စာပိ မဇ္ဈေ၊

ယံ ယဉှိ လောကသ္မိမုပါဒိယန္တိ၊ တေနေဝ မာရော အနွေတိ ဇန္တု’’န္တိ.

၇၃. တသ္မာ ပဇာနံ န ဥပါဒိယေထ၊ဘိက္ခု သတော ကိဉ္စနံ သဗ္ဗလောကေ၊

အာဒါနသတ္တေ ဣတိ ပေက္ခမာနော၊ ပဇံ ဣမံ မစ္စုဓေယျေ ဝိသတ္တံ.

တသ္မာ ပဇာနံ န ဥပါဒိယေထာတိ. တသ္မာတိ တသ္မာ တံကာရဏာ တံဟေတု တပ္ပစ္စယာ တံနိဒါနာ၊ ဧတံ အာဒီနဝံ သမ္ပဿမာနော အာဒါနတဏှာယာတိ – တသ္မာ. ပဇာနန္တိ ဇာနန္တော ပဇာနန္တော အာဇာနန္တော ဝိဇာနန္တော ပဋိဝိဇာနန္တော ပဋိဝိဇ္ဈန္တော ‘‘သဗ္ဗေ သင်္ခါရာ အနိစ္စာ’’တိ။ပေ။ ‘‘ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မ’’န္တိ ဇာနန္တော ပဇာနန္တော အာဇာနန္တော ဝိဇာနန္တော ပဋိဝိဇာနန္တော ပဋိဝိဇ္ဈန္တော. န ဥပါဒိယေထာတိ ရူပံ နာဒိယေယျ န ဥပါဒိယေယျ န ဂဏှေယျ န ပရာမသေယျ နာဘိနိဝိသေယျ၊ ဝေဒနံ။ပေ။ သညံ။ သင်္ခါရေ။ ဝိညာဏံ။ ဂတိံ ။ ဥပပတ္တိံ။ ပဋိသန္ဓိံ။ ဘဝံ။ သံသာရံ။ ဝဋ္ဋံ နာဒိယေယျ န ဥပါဒိယေယျ န ဂဏှေယျ န ပရာမသေယျ နာဘိနိဝိသေယျာတိ – တသ္မာ ပဇာနံ န ဥပါဒိယေထ.

ဘိက္ခု သတော ကိဉ္စနံ သဗ္ဗလောကေတိ. ဘိက္ခူတိ ပုထုဇ္ဇနကလျာဏကော ဝါ ဘိက္ခု၊ သေက္ခော ဝါ ဘိက္ခု. သတောတိ စတူဟိ ကာရဏေဟိ သတော – ကာယေ ကာယာနုပဿနာသတိပဋ္ဌာနံ ဘာဝေန္တော သတော။ပေ။ သော ဝုစ္စတိ သတောတိ – ဘိက္ခု သတော. ကိဉ္စနန္တိ ကိဉ္စိ ရူပဂတံ ဝေဒနာဂတံ သညာဂတံ သင်္ခါရဂတံ ဝိညာဏဂတံ. သဗ္ဗလောကေတိ သဗ္ဗအပါယလောကေ သဗ္ဗမနုဿလောကေ သဗ္ဗဒေဝလောကေ သဗ္ဗခန္ဓလောကေ သဗ္ဗဓာတုလောကေ သဗ္ဗအာယတနလောကေတိ – ဘိက္ခု သတော ကိဉ္စနံ သဗ္ဗလောကေ.

အာဒါနသတ္တေ ဣတိ ပေက္ခမာနောတိ အာဒါနသတ္တာ ဝုစ္စန္တိ ယေ ရူပံ အာဒိယန္တိ ဥပါဒိယန္တိ ဂဏှန္တိ ပရာမသန္တိ အဘိနိဝိသန္တိ၊ ဝေဒနံ။ပေ။ သညံ။ သင်္ခါရေ။ ဝိညာဏံ။ ဂတိံ။ ဥပပတ္တိံ။ ပဋိသန္ဓိံ။ ဘဝံ။ သံသာရံ။ ဝဋ္ဋံ အာဒိယန္တိ ဥပါဒိယန္တိ ဂဏှန္တိ ပရာမသန္တိ အဘိနိဝိသန္တိ. ဣတီတိ ပဒသန္ဓိ။ပေ။ ပဒါနုပုဗ္ဗတာပေတံ ဣတီတိ. ပေက္ခမာနောတိ ပေက္ခမာနော ဒက္ခမာနော ဒိဿမာနော ပဿမာနော ဩလောကယမာနော နိဇ္ဈာယမာနော ဥပပရိက္ခမာနောတိ – အာဒါနသတ္တေ ဣတိ ပေက္ခမာနော.

ပဇံ ဣမံ မစ္စုဓေယျေ ဝိသတ္တန္တိ. ပဇာတိ သတ္တာဓိဝစနံ မစ္စုဓေယျာ ဝုစ္စန္တိ ကိလေသာ စ ခန္ဓာ စ အဘိသင်္ခါရာ စ. ပဇာ မစ္စုဓေယျေ မာရဓေယျေ မရဏဓေယျေ သတ္တာ ဝိသတ္တာ အာသတ္တာ လဂ္ဂါ လဂ္ဂိတာ ပလိဗုဒ္ဓါ. ယထာ ဘိတ္တိခိလေ ဝါ နာဂဒန္တေ ဝါ ဘဏ္ဍံ သတ္တံ ဝိသတ္တံ အာသတ္တံ လဂ္ဂံ လဂ္ဂိတံ ပလိဗုဒ္ဓံ၊ ဧဝမေဝ ပဇာ မစ္စုဓေယျေ မာရဓေယျေ မရဏဓေယျေ သတ္တာ ဝိသတ္တာ အာသတ္တာ လဂ္ဂါ လဂ္ဂိတာ ပလိဗုဒ္ဓါတိ – ပဇံ ဣမံ မစ္စုဓေယျေ ဝိသတ္တံ. တေနာဟ ဘဂဝါ –

‘‘တသ္မာ ပဇာနံ န ဥပါဒိယေထ၊ ဘိက္ခု သတော ကိဉ္စနံ သဗ္ဗလောကေ၊

အာဒါနသတ္တေ ဣတိ ပေက္ခမာနော၊ ပဇံ ဣမံ မစ္စုဓေယျေ ဝိသတ္တ’’န္တိ.

သဟ ဂါထာပရိယောသာနာ။ပေ။ သတ္ထာ မေ ဘန္တေ ဘဂဝါ၊ သာဝကောဟမသ္မီတိ.

ဘဒြာဝုဓမာဏဝပုစ္ဆာနိဒ္ဒေသော ဒွါဒသမော.