၂. ကာဠာယသင်္ဂပဉှော

၂. ‘‘ဘန္တေ နာဂသေန၊ ‘ကာဠာယသဿ [ကာဠဟံသဿ (က.)] ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ကာဠာယသော သုပီတော [သုထိတော (က.)] ဝမတိ [ဝဟတိ (သျာ. က.)]၊ ဧဝမေဝ ခေါ၊ မဟာရာဇ၊ ယောဂိနော ယောဂါဝစရဿ မာနသံ ယောနိသော မနသိကာရေန [ယောနိသော မနသိကာရေ (သီ. သျာ. က.)] အပီတံ ဝမတိ. ဣဒံ၊ မဟာရာဇ၊ ကာဠာယသဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ကာဠာယသော သကိံ ပီတံ ဥဒကံ န ဝမတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ယော သကိံ ဥပ္ပန္နော ပသာဒေါ၊ န ပုန သော ဝမိတဗ္ဗော ‘ဥဠာရော သော ဘဂဝါ သမ္မာသမ္ဗုဒ္ဓေါ၊ သွာက္ခာတော ဓမ္မော၊ သုပ္ပဋိပန္နော သံဃော’တိ. ‘ရူပံ အနိစ္စံ၊ ဝေဒနာ အနိစ္စာ၊ သညာ အနိစ္စာ၊ သင်္ခါရာ အနိစ္စာ၊ ဝိညာဏံ အနိစ္စန္တိ ယံ သကိံ ဥပ္ပန္နံ ဉာဏံ၊ န ပုန တံ ဝမိတဗ္ဗံ. ဣဒံ၊ မဟာရာဇ၊ ကာဠာယသဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန –

‘‘‘ဒဿနမှိ ပရိသောဓိတော [ပရိသောဓိကေ (သီ. က.)] နရော၊ အရိယဓမ္မေ နိယတော ဝိသေသဂူ၊

နပ္ပဝေဓတိ အနေကဘာဂသော၊ သဗ္ဗသော စ မုခဘာဝမေဝ သော’’’တိ.

ကာဠာယသင်္ဂပဉှော ဒုတိယော.