၈. ဇလူကင်္ဂပဉှော

၈. ‘‘ဘန္တေ နာဂသေန၊ ‘ဇလူကာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဇလူကာ ယတ္ထ အလ္လီယတိ၊ တတ္ထေဝ ဒဠှံ အလ္လီယိတွာ ရုဟိရံ ပိဝတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ယသ္မိံ အာရမ္မဏေ စိတ္တံ အလ္လီယတိ၊ တံ အာရမ္မဏံ ဝဏ္ဏတော စ သဏ္ဌာနတော စ ဒိသတော စ ဩကာသတော စ ပရိစ္ဆေဒတော စ လိင်္ဂတော စ နိမိတ္တတော စ ဒဠှံ ပတိဋ္ဌာပေတွာ တေနေဝါရမ္မဏေန ဝိမုတ္တိရသမသေစနကံ ပါတဗ္ဗံ. ဣဒံ၊ မဟာရာဇ၊ ဇလူကာယ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန အနုရုဒ္ဓေန –

‘‘‘ပရိသုဒ္ဓေန စိတ္တေန၊ အာရမ္မဏေ ပတိဋ္ဌာယ၊

တေန စိတ္တေန ပါတဗ္ဗံ၊ ဝိမုတ္တိရသမသေစန’’’န္တိ.

ဇလူကင်္ဂပဉှော အဋ္ဌမော.