၄. ဃရကပေါတင်္ဂပဉှော

၄. ‘‘ဘန္တေ နာဂသေန၊ ‘ဃရကပေါတဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဃရကပေါတော ပရဂေဟေ ဝသမာနော န တေသံ ကိဉ္စိ ဘဏ္ဍဿ နိမိတ္တံ ဂဏှာတိ၊ မဇ္ဈတ္တော ဝသတိ သညာဗဟုလော၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ပရကုလံ ဥပဂတေန တသ္မိံ ကုလေ ဣတ္ထီနံ ဝါ ပုရိသာနံ ဝါ မဉ္စေ ဝါ ပီဌေ ဝါ ဝတ္ထေ ဝါ အလင်္ကာရေ ဝါ ဥပဘောဂေ ဝါ ပရိဘောဂေ ဝါ ဘောဇနဝိကတီသု ဝါ န နိမိတ္တံ ဂဟေတဗ္ဗံ၊ မဇ္ဈတ္တေန ဘဝိတဗ္ဗံ၊ သမဏသညာ ပစ္စုပဋ္ဌပေတဗ္ဗာ. ဣဒံ၊ မဟာရာဇ၊ ဃရကပေါတဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန စူဠနာရဒဇာတကေ –

‘‘‘ပဝိသိတွာ ပရကုလံ၊ ပါနတ္ထံ ဘောဇနာယ ဝါ [ပါနေသု ဘောဇနေသု ဝါ (သီ. ပီ.)]၊

မိတံ ခါဒေ မိတံ ဘုဉ္ဇေ၊ န စ ရူပေ မနံ ကရေ’’’တိ.

ဃရကပေါတင်္ဂပဉှော စတုတ္ထော.