၂. သမုဒ္ဒဝဂ္ဂေါ

၁. လာဗုလတင်္ဂပဉှော

၁. ‘‘ဘန္တေ နာဂသေန၊ ‘လာဗုလတာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ လာဗုလတာ တိဏေ ဝါ ကဋ္ဌေ ဝါ လတာယ ဝါ သောဏ္ဍိကာဟိ အာလမ္ဗိတွာ တဿူပရိ ဝဍ္ဎတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အရဟတ္တေ အဘိဝဍ္ဎိတုကာမေန မနသာ အာရမ္မဏံ အာလမ္ဗိတွာ အရဟတ္တေ အဘိဝဍ္ဎိတဗ္ဗံ. ဣဒံ၊ မဟာရာဇ၊ လာဗုလတာယ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘ယထာ လာဗုလတာ နာမ၊ တိဏေ ကဋ္ဌေ လတာယ ဝါ၊

အာလမ္ဗိတွာ သောဏ္ဍိကာဟိ၊ တတော ဝဍ္ဎတိ ဥပ္ပရိ.

‘‘‘တထေဝ ဗုဒ္ဓပုတ္တေန၊ အရဟတ္တဖလကာမိနာ၊

အာရမ္မဏံ အာလမ္ဗိတွာ၊ ဝဍ္ဎိတဗ္ဗံ အသေက္ခဖလေ’’’တိ.

လာဗုလတင်္ဂပဉှော ပဌမော.

၂. ပဒုမင်္ဂပဉှော

၂. ‘‘ဘန္တေ နာဂသေန၊ ‘ပဒုမဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ပဒုမံ ဥဒကေ ဇာတံ ဥဒကေ သံဝဒ္ဓံ အနုပလိတ္တံ ဥဒကေန၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကုလေ ဂဏေ လာဘေ ယသေ သက္ကာရေ သမ္မာနနာယ ပရိဘောဂပစ္စယေသု စ သဗ္ဗတ္ထ အနုပလိတ္တေန ဘဝိတဗ္ဗံ. ဣဒံ၊ မဟာရာဇ၊ ပဒုမဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ပဒုမံ ဥဒကာ အစ္စုဂ္ဂမ္မ ဌာတိ. ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သဗ္ဗလောကံ အဘိဘဝိတွာ အစ္စုဂ္ဂမ္မ လောကုတ္တရဓမ္မေ ဌာတဗ္ဗံ. ဣဒံ၊ မဟာရာဇ၊ ပဒုမဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ပဒုမံ အပ္ပမတ္တကေနပိ အနိလေန ဧရိတံ စလတိ. ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အပ္ပမတ္တကေသုပိ ကိလေသေသု သံယမော ကရဏီယော၊ ဘယဒဿာဝိနာ ဝိဟရိတဗ္ဗံ. ဣဒံ၊ မဟာရာဇ၊ ပဒုမဿ တတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန ‘အဏုမတ္တေသု ဝဇ္ဇေသု ဘယဒဿာဝီ သမာဒါယ သိက္ခတိ သိက္ခာပဒေသူ’တိ.

ပဒုမင်္ဂပဉှော ဒုတိယော.

၃. ဗီဇင်္ဂပဉှော

၃. ‘‘ဘန္တေ နာဂသေန၊ ‘ဗီဇဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဗီဇံ အပ္ပကမ္ပိ သမာနံ ဘဒ္ဒကေ ခေတ္တေ ဝုတ္တံ ဒေဝေ သမ္မာ ဓာရံ ပဝေစ္ဆန္တေ သုဗဟူနိ ဖလာနိ အနုဒဿတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ယထာ ပဋိပါဒိတံ သီလံ ကေဝလံ သာမညဖလမနုဒဿတိ. ဧဝံ သမ္မာ ပဋိပဇ္ဇိတဗ္ဗံ. ဣဒံ၊ မဟာရာဇ၊ ဗီဇဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဗီဇံ သုပရိသောဓိတေ ခေတ္တေ ရောပိတံ ခိပ္ပမေဝ သံဝိရူဟတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန မာနသံ သုပရိဂ္ဂဟိတံ သုညာဂါရေ ပရိသောဓိတံ သတိပဋ္ဌာနခေတ္တဝရေ ခိတ္တံ ခိပ္ပမေဝ ဝိရူဟတိ. ဣဒံ၊ မဟာရာဇ၊ ဗီဇဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန အနုရုဒ္ဓေန –

‘‘‘ယထာပိ ခေတ္တေ [ယထာ ခေတ္တေ (သီ.)] ပရိသုဒ္ဓေ၊ ဗီဇဉ္စဿ ပတိဋ္ဌိတံ၊

ဝိပုလံ တဿ ဖလံ ဟောတိ၊ အပိ တောသေတိ ကဿကံ.

‘‘‘တထေဝ ယောဂိနော စိတ္တံ၊ သုညာဂါရေ ဝိသောဓိတံ၊

သတိပဋ္ဌာနခေတ္တမှိ၊ ခိပ္ပမေဝ ဝိရူဟတီ’’’တိ.

ဗီဇင်္ဂပဉှော တတိယော.

၄. သာလကလျာဏိကင်္ဂပဉှော

၄. ‘‘ဘန္တေ နာဂသေန၊ ‘သာလကလျာဏိကာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ သာလကလျာဏိကာ နာမ အန္တောပထဝိယံ ယေဝ အဘိဝဍ္ဎတိ ဟတ္ထသတမ္ပိ ဘိယျောပိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန စတ္တာရိ သာမညဖလာနိ စတဿော ပဋိသမ္ဘိဒါ ဆဠဘိညာယော ကေဝလဉ္စ သမဏဓမ္မံ သုညာဂါရေ ယေဝ ပရိပူရယိတဗ္ဗံ. ဣဒံ၊ မဟာရာဇ၊ သာလကလျာဏိကာယ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ရာဟုလေန –

‘‘‘သာလကလျာဏိကာ နာမ၊ ပါဒပေါ ဓရဏီရုဟော၊

အန္တောပထဝိယံ ယေဝ၊ သတဟတ္ထောပိ ဝဍ္ဎတိ.

‘‘‘ယထာ ကာလမှိ သမ္ပတ္တေ၊ ပရိပါကေန သော ဒုမော၊

ဥဂ္ဂဉ္ဆိတွာန ဧကာဟံ၊ သတဟတ္ထောပိ ဝဍ္ဎတိ.

‘‘‘ဧဝမေဝါဟံ မဟာဝီရ၊ သာလကလျာဏိကာ ဝိယ၊

အဗ္ဘန္တရေ သုညာဂါရေ၊ ဓမ္မတော အဘိဝဍ္ဎယိ’’’န္တိ.

သာလကလျာဏိကင်္ဂပဉှော စတုတ္ထော.

၅. နာဝင်္ဂပဉှော

၅. ‘‘ဘန္တေ နာဂသေန၊ ‘နာဝါယ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ နာဝါ ဗဟုဝိဓဒါရုသင်္ဃာဋသမဝါယေန ဗဟုမ္ပိ ဇနံ တာရယတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အာစာရသီလဂုဏဝတ္တပ္ပဋိဝတ္တဗဟုဝိဓဓမ္မသင်္ဃာဋသမဝါယေန သဒေဝကော လောကော တာရယိတဗ္ဗော. ဣဒံ၊ မဟာရာဇ၊ နာဝါယ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ နာဝါ ဗဟုဝိဓဦမိတ္ထနိတဝေဂဝိသဋမာဝဋ္ဋဝေဂံ သဟတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဗဟုဝိဓကိလေသဦမိဝေဂံ လာဘသက္ကာရယသသိလောကပူဇနဝန္ဒနာ ပရကုလေသု နိန္ဒာပသံသာသုခဒုက္ခသမ္မာနနဝိမာနနဗဟုဝိဓဒေါသဦမိဝေဂဉ္စ သဟိတဗ္ဗံ. ဣဒံ၊ မဟာရာဇ၊ နာဝါယ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ နာဝါ အပရိမိတမနန္တမပါရမက္ခောဘိတဂမ္ဘီရေ မဟတိမဟာဃောသေ တိမိတိမိင်္ဂလမကရမစ္ဆဂဏာကုလေ မဟတိမဟာသမုဒ္ဒေ စရတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန တိပရိဝဋ္ဋ ဒွါဒသာကာရ စတုသစ္စာဘိသမယပ္ပဋိဝေဓေ မာနသံ သဉ္စာရယိတဗ္ဗံ. ဣဒံ၊ မဟာရာဇ၊ နာဝါယ တတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သံယုတ္တနိကာယဝရေ သစ္စသံယုတ္တေ –

‘‘‘ဝိတက္ကေန္တာ စ ခေါ တုမှေ၊ ဘိက္ခဝေ၊ ‘‘ဣဒံ ဒုက္ခ’’န္တိ ဝိတက္ကေယျာထ၊ ‘‘အယံ ဒုက္ခသမုဒယော’’တိ ဝိတက္ကေယျာထ၊ ‘‘အယံ ဒုက္ခနိရောဓော’’တိ ဝိတက္ကေယျာထ၊ ‘‘အယံ ဒုက္ခနိရောဓဂါမိနီ ပဋိပဒါ’’တိ ဝိတက္ကေယျာထာ’’’တိ.

နာဝင်္ဂပဉှော ပဉ္စမော.

၆. နာဝါလဂ္ဂနကင်္ဂပဉှော

၆. ‘‘ဘန္တေ နာဂသေန၊ ‘နာဝါလဂ္ဂနကဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ နာဝါလဂ္ဂနကံ ဗဟုဦမိဇာလာကုလဝိက္ခောဘိတသလိလတလေ မဟတိမဟာသမုဒ္ဒေ နာဝံ လဂ္ဂေတိ ဌပေတိ၊ န ဒေတိ ဒိသာဝိဒိသံ ဟရိတုံ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ရာဂဒေါသမောဟူမိဇာလေ မဟတိမဟာဝိတက္ကသမ္ပဟာရေ စိတ္တံ လဂ္ဂေတဗ္ဗံ၊ န ဒါတဗ္ဗံ ဒိသာဝိဒိသံ ဟရိတုံ. ဣဒံ၊ မဟာရာဇ၊ နာဝါလဂ္ဂနကဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ နာဝါလဂ္ဂနကံ န ပ္လဝတိ [န ပိလဝတိ (သီ. ပီ.)] ဝိသီဒတိ၊ ဟတ္ထသတေပိ ဥဒကေ နာဝံ လဂ္ဂေတိ ဌာနမုပနေတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန လာဘယသသက္ကာရမာနနဝန္ဒနပူဇနအပစိတီသု လာဘဂ္ဂယသဂ္ဂေပိ န ပ္လဝိတဗ္ဗံ၊ သရီရယာပနမတ္တကေ ယေဝ စိတ္တံ ဌပေတဗ္ဗံ. ဣဒံ၊ မဟာရာဇ၊ နာဝါလဂ္ဂနကဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘ယထာ သမုဒ္ဒေ လဂ္ဂနကံ၊ န ပ္လဝတိ ဝိသီဒတိ၊

တထေဝ လာဘသက္ကာရေ၊ မာ ပ္လဝထ ဝိသီဒထာ’’’တိ.

နာဝါလဂ္ဂနကင်္ဂပဉှော ဆဋ္ဌော.

၇. ကူပင်္ဂပဉှော

၇. ‘‘ဘန္တေ နာဂသေန၊ ‘ကူပဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ကူပေါ ရဇ္ဇုဉ္စ ဝရတ္တဉ္စ လင်္ကာရဉ္စ ဓာရေတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သတိသမ္ပဇညသမန္နာဂတေန ဘဝိတဗ္ဗံ၊ အဘိက္ကန္တေ ပဋိက္ကန္တေ အာလောကိတေ ဝိလောကိတေ သမိဉ္ဇိတေ ပသာရိတေ သင်္ဃာဋိပတ္တစီဝရဓာရဏေ အသိတေ ပီတေ ခါယိတေ သာယိတေ ဥစ္စာရပဿာဝကမ္မေ ဂတေ ဌိတေ နိသိန္နေ သုတ္တေ ဇာဂရိတေ ဘာသိတေ တုဏှီဘာဝေ သမ္ပဇာနကာရိနာ ဘဝိတဗ္ဗံ. ဣဒံ၊ မဟာရာဇ၊ ကူပဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန ‘သတော၊ ဘိက္ခဝေ၊ ဘိက္ခု ဝိဟရေယျ သမ္ပဇာနော၊ အယံ ဝေါ အမှာကံ အနုသာသနီ’’’တိ.

ကူပင်္ဂပဉှော သတ္တမော.

၈. နိယာမကင်္ဂပဉှော

၈. ‘‘ဘန္တေ နာဂသေန၊ ‘နိယာမကဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ နိယာမကော ရတ္တိန္ဒိဝံ သတတံ သမိတံ အပ္ပမတ္တော ယတ္တပ္ပယတ္တော နာဝံ သာရေတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန စိတ္တံ နိယာမယမာနေန ရတ္တိန္ဒိဝံ သတတံ သမိတံ အပ္ပမတ္တေန ယတ္တပ္ပယတ္တေန ယောနိသော မနသိကာရေန စိတ္တံ နိယာမေတဗ္ဗံ. ဣဒံ၊ မဟာရာဇ၊ နိယာမကဿ ပဌမံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန ဓမ္မပဒေ –

‘‘‘အပ္ပမာဒရတာ ဟောထ၊ သစိတ္တမနုရက္ခထ၊

ဒုဂ္ဂါ ဥဒ္ဓရထတ္တာနံ၊ ပင်္ကေ သန္နောဝ [သတ္တောဝ (သီ. ပီ.)] ကုဉ္ဇရော’တိ.

‘‘ပုန စပရံ၊ မဟာရာဇ၊ နိယာမကဿ ယံ ကိဉ္စိ မဟာသမုဒ္ဒေ ကလျာဏံ ဝါ ပါပကံ ဝါ၊ သဗ္ဗံ တံ ဝိဒိတံ ဟောတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကုသလာကုသလံ သာဝဇ္ဇာနဝဇ္ဇံ ဟီနပ္ပဏီတံ ကဏှသုက္ကသပ္ပဋိဘာဂံ ဝိဇာနိတဗ္ဗံ. ဣဒံ၊ မဟာရာဇ၊ နိယာမကဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ နိယာမကော ယန္တေ မုဒ္ဒိကံ ဒေတိ ‘မာ ကောစိ ယန္တံ အာမသိတ္ထာ’တိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန စိတ္တေ သံဝရမုဒ္ဒိကာ ဒါတဗ္ဗာ ‘မာ ကိဉ္စိ ပါပကံ အကုသလဝိတက္ကံ ဝိတက္ကေသီ’တိ၊ ဣဒံ၊ မဟာရာဇ၊ နိယာမကဿ တတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သံယုတ္တနိကာယဝရေ ‘မာ၊ ဘိက္ခဝေ၊ ပါပကေ အကုသလေ ဝိတက္ကေ ဝိတက္ကေယျာထ၊ သေယျထီဒံ၊ ကာမဝိတက္ကံ ဗျာပါဒဝိတက္ကံ ဝိဟိံသာဝိတက္က’’’န္တိ.

နိယာမကင်္ဂပဉှော အဋ္ဌမော.

၉. ကမ္မကာရင်္ဂပဉှော

၉. ‘‘ဘန္တေ နာဂသေန၊ ‘ကမ္မကာရဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ကမ္မကာရော ဧဝံ စိန္တယတိ ‘ဘတကော အဟံ ဣမာယ နာဝါယ ကမ္မံ ကရောမိ၊ ဣမာယာဟံ နာဝါယ ဝါဟသာ ဘတ္တဝေတနံ လဘာမိ၊ န မေ ပမာဒေါ ကရဏီယော၊ အပ္ပမာဒေန မေ အယံ နာဝါ ဝါဟေတဗ္ဗာ’တိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဧဝံ စိန္တယိတဗ္ဗံ ‘ဣမံ ခေါ အဟံ စာတုမဟာဘူတိကံ ကာယံ သမ္မသန္တော သတတံ သမိတံ အပ္ပမတ္တော ဥပဋ္ဌိတဿတိ သတော သမ္ပဇာနော သမာဟိတော ဧကဂ္ဂစိတ္တော ဇာတိဇရာဗျာဓိမရဏသောကပရိဒေဝဒုက္ခဒေါမနဿုပါယာသေဟိ ပရိမုစ္စိဿာမီတိ အပ္ပမာဒေါ မေ ကရဏီယော’တိ၊ ဣဒံ၊ မဟာရာဇ၊ ကမ္မကာရဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘ကာယံ ဣမံ သမ္မသထ၊ ပရိဇာနာထ ပုနပ္ပုနံ၊

ကာယေ သဘာဝံ ဒိသွာန၊ ဒုက္ခဿန္တံ ကရိဿထာ’တိ.

ကမ္မကာရင်္ဂပဉှော နဝမော.

၁၀. သမုဒ္ဒင်္ဂပဉှော

၁၀. ‘‘ဘန္တေ နာဂသေန၊ ‘သမုဒ္ဒဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ မဟာသမုဒ္ဒေါ မတေန ကုဏပေန သဒ္ဓိံ န သံဝသတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ရာဂဒေါသမောဟမာနဒိဋ္ဌိမက္ခပဠာသဣဿာမစ္ဆရိယမာယာသာဌေယျကုဋိလဝိသမဒုစ္စရိတကိလေသမလေဟိ သဒ္ဓိံ န သံဝသိတဗ္ဗံ. ဣဒံ၊ မဟာရာဇ၊ သမုဒ္ဒဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ မဟာသမုဒ္ဒေါ မုတ္တာမဏိဝေဠုရိယသင်္ခသိလာပဝါဠဖလိကမဏိဝိဝိဓရတနနိစယံ ဓာရေန္တော ပိဒဟတိ၊ န ဗဟိ ဝိကိရတိ. ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန မဂ္ဂဖလဈာနဝိမောက္ခသမာဓိသမာပတ္တိဝိပဿနာဘိညာဝိဝိဓဂုဏရတနာနိ အဓိဂန္တွာ ပိဒဟိတဗ္ဗာနိ၊ န ဗဟိ နီဟရိတဗ္ဗာနိ. ဣဒံ၊ မဟာရာဇ၊ သမုဒ္ဒဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ မဟာသမုဒ္ဒေါ မဟန္တေဟိ မဟာဘူတေဟိ သဒ္ဓိံ သံဝသတိ. ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အပ္ပိစ္ဆံ သန္တုဋ္ဌံ ဓုတဝါဒံ သလ္လေခဝုတ္တိံ အာစာရသမ္ပန္နံ လဇ္ဇိံ ပေသလံ ဂရုံ ဘာဝနီယံ ဝတ္တာရံ ဝစနက္ခမံ စောဒကံ ပါပဂရဟိံ ဩဝါဒကံ အနုသာသကံ ဝိညာပကံ သန္ဒဿကံ သမာဒပကံ သမုတ္တေဇကံ သမ္ပဟံသကံ ကလျာဏမိတ္တံ သဗြဟ္မစာရိံ နိဿာယ ဝသိတဗ္ဗံ. ဣဒံ၊ မဟာရာဇ၊ မဟာသမုဒ္ဒဿ တတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ မဟာသမုဒ္ဒေါ နဝသလိလသမ္ပုဏ္ဏာဟိ ဂင်္ဂါယမုနာအစိရဝတီသရဘူမဟီအာဒီဟိ နဒီသတသဟဿေဟိ အန္တလိက္ခေ သလိလဓာရာဟိ စ ပူရိတောပိ သကံ ဝေလံ နာတိဝတ္တတိ. ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန လာဘသက္ကာရသိလောကဝန္ဒနမာနနပူဇနကာရဏာ ဇီဝိတဟေတုပိ သဉ္စိစ္စ သိက္ခာပဒဝီတိက္ကမော န ကရဏီယော. ဣဒံ၊ မဟာရာဇ၊ မဟာသမုဒ္ဒဿ စတုတ္ထံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန –

‘သေယျထာပိ၊ မဟာရာဇ [ပဟာရာဓ (သီ. ပီ.)]၊ မဟာသမုဒ္ဒေါ ဌိတဓမ္မော ဝေလံ နာတိက္ကမတိ၊ ဧဝမေဝ ခေါ၊ မဟာရာဇ၊ ယံ မဟာ သာဝကာနံ သိက္ခာပဒံ ပညတ္တံ၊ တံ မမ သာဝကာ ဇီဝိတဟေတုပိ နာတိက္ကမန္တီ’တိ.

‘‘ပုန စပရံ၊ မဟာရာဇ၊ မဟာသမုဒ္ဒေါ သဗ္ဗသဝန္တီဟိ ဂင်္ဂါယမုနာအစိရဝတီသရဘူမဟီဟိ အန္တလိက္ခေ ဥဒကဓာရာဟိပိ န ပရိပူရတိ. ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဥဒ္ဒေသပရိပုစ္ဆာသဝနဓာရဏဝိနိစ္ဆယအဘိဓမ္မဝိနယဂါဠှသုတ္တန္တဝိဂ္ဂဟပဒနိက္ခေပပဒသန္ဓိ ပဒဝိဘတ္တိနဝင်္ဂဇိနသာသနဝရံ သုဏန္တေနာပိ န တပ္ပိတဗ္ဗံ. ဣဒံ၊ မဟာရာဇ၊ မဟာသမုဒ္ဒဿ ပဉ္စမံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သုတသောမဇာတကေ –

‘‘‘အဂ္ဂိ ယထာ တိဏကဋ္ဌံ ဒဟန္တော၊ န တပ္ပတိ သာဂရော ဝါ နဒီဟိ၊

ဧဝမ္ပိ စေ [ဧဝမ္ပိ ဝေ (သျာ.)၊ ဧဝံ ဟိ မေ (က.) ဇာ. ၁ အသီတိနိပါတေ] ပဏ္ဍိတာ ရာဇသေဋ္ဌ၊ သုတွာ န တပ္ပန္တိ သုဘာသိတေနာ’’’တိ.

သမုဒ္ဒင်္ဂပဉှော ဒသမော.သမုဒ္ဒဝဂ္ဂေါ ဒုတိယော.

တဿုဒ္ဒါနံ –

လာဗုလတာ စ ပဒုမံ၊ ဗီဇံ သာလကလျာဏိကာ၊

နာဝါ စ နာဝါလဂ္ဂနံ၊ ကူပေါ နိယာမကော တထာ၊

ကမ္မကာရော သမုဒ္ဒေါ စ၊ ဝဂ္ဂေါ တေန ပဝုစ္စတီတိ.