၁၂. နိဗ္ဗာနသန္နိဟိတပဉှော

၁၂. ‘‘ဘန္တေ နာဂသေန၊ အတ္ထိ သော ပဒေသော ပုရတ္ထိမာယ ဝါ ဒိသာယ ဒက္ခိဏာယ ဝါ ဒိသာယ ပစ္ဆိမာယ ဝါ ဒိသာယ ဥတ္တရာယ ဝါ ဒိသာယ ဥဒ္ဓံ ဝါ အဓော ဝါ တိရိယံ ဝါ၊ ယတ္ထ နိဗ္ဗာနံ သန္နိဟိတ’’န္တိ? ‘‘နတ္ထိ၊ မဟာရာဇ၊ သော ပဒေသော ပုရတ္ထိမာယ ဝါ ဒိသာယ ဒက္ခိဏာယ ဝါ ဒိသာယ ပစ္ဆိမာယ ဝါ ဒိသာယ ဥတ္တရာယ ဝါ ဒိသာယ ဥဒ္ဓံ ဝါ အဓော ဝါ တိရိယံ ဝါ၊ ယတ္ထ နိဗ္ဗာနံ သန္နိဟိတ’’န္တိ.

‘‘ယဒိ၊ ဘန္တေ နာဂသေန၊ နတ္ထိ နိဗ္ဗာနဿ သန္နိဟိတောကာသော၊ တေန ဟိ နတ္ထိ နိဗ္ဗာနံ? ယေသဉ္စ တံ နိဗ္ဗာနံ သစ္ဆိကတံ၊ တေသမ္ပိ သစ္ဆိကိရိယာ မိစ္ဆာ၊ ကာရဏံ တတ္ထ ဝက္ခာမိ၊ ယထာ၊ ဘန္တေ နာဂသေန၊ မဟိယာ ဓညုဋ္ဌာနံ ခေတ္တံ အတ္ထိ၊ ဂန္ဓုဋ္ဌာနံ ပုပ္ဖံ အတ္ထိ၊ ပုပ္ဖုဋ္ဌာနံ ဂုမ္ဗော အတ္ထိ၊ ဖလုဋ္ဌာနံ ရုက္ခော အတ္ထိ၊ ရတနုဋ္ဌာနံ အာကရော အတ္ထိ၊ တတ္ထ ယော ကောစိ ယံ ယံ ဣစ္ဆတိ၊ သော တတ္ထ ဂန္တွာ တံ တံ ဟရတိ၊ ဧဝမေဝ ခေါ၊ ဘန္တေ နာဂသေန၊ ယဒိ နိဗ္ဗာနံ အတ္ထိ၊ တဿ နိဗ္ဗာနဿ ဥဋ္ဌာနောကာသောပိ ဣစ္ဆိတဗ္ဗော၊ ယသ္မာ စ ခေါ၊ ဘန္တေ နာဂသေန၊ နိဗ္ဗာနဿ ဥဋ္ဌာနောကာသော နတ္ထိ၊ တသ္မာ နတ္ထိ နိဗ္ဗာနန္တိ ဗြူမိ၊ ယေသဉ္စ နိဗ္ဗာနံ သစ္ဆိကတံ၊ တေသမ္ပိ သစ္ဆိကိရိယာ မိစ္ဆာ’’တိ.

‘‘နတ္ထိ၊ မဟာရာဇ၊ နိဗ္ဗာနဿ သန္နိဟိတောကာသော၊ အတ္ထိ စေတံ နိဗ္ဗာနံ၊ သမ္မာပဋိပန္နော ယောနိသော မနသိကာရေန နိဗ္ဗာနံ သစ္ဆိကရောတိ. ယထာ ပန၊ မဟာရာဇ၊ အတ္ထိ အဂ္ဂိ နာမ၊ နတ္ထိ တဿ သန္နိဟိတောကာသော၊ ဒွေ ကဋ္ဌာနိ သင်္ဃဋ္ဋေန္တော အဂ္ဂိံ အဓိဂစ္ဆတိ. ဧဝမေဝ ခေါ၊ မဟာရာဇ၊ အတ္ထိ နိဗ္ဗာနံ၊ နတ္ထိ တဿ သန္နိဟိတောကာသော၊ သမ္မာပဋိပန္နော ယောနိသော မနသိကာရေန နိဗ္ဗာနံ သစ္ဆိကရောတိ.

‘‘ယထာ ဝါ ပန၊ မဟာရာဇ၊ အတ္ထိ သတ္တ ရတနာနိ နာမ. သေယျထိဒံ၊ စက္ကရတနံ ဟတ္ထိရတနံ အဿရတနံ မဏိရတနံ ဣတ္ထိရတနံ ဂဟပတိရတနံ ပရိဏာယကရတနံ. န စ တေသံ ရတနာနံ သန္နိဟိတောကာသော အတ္ထိ၊ ခတ္တိယဿ ပန သမ္မာပဋိပန္နဿ ပဋိပတ္တိဗလေန တာနိ ရတနာနိ ဥပဂစ္ဆန္တိ. ဧဝမေဝ ခေါ၊ မဟာရာဇ၊ အတ္ထိ နိဗ္ဗာနံ၊ နတ္ထိ တဿ သန္နိဟိတောကာသော၊ သမ္မာပဋိပန္နော ယောနိသော မနသိကာရေန နိဗ္ဗာနံ သစ္ဆိကရောတီ’’တိ.

‘‘ဘန္တေ နာဂသေန၊ နိဗ္ဗာနဿ သန္နိဟိတောကာသော မာ ဟောတု၊ အတ္ထိ ပန တံ ဌာနံ၊ ယတ္ထ ဌိတော သမ္မာပဋိပန္နော နိဗ္ဗာနံ သစ္ဆိကရောတီ’’တိ? ‘‘အာမ၊ မဟာရာဇ၊ အတ္ထိ တံ ဌာနံ၊ ယတ္ထ ဌိတော သမ္မာပဋိပန္နော နိဗ္ဗာနံ သစ္ဆိကရောတီ’’တိ.

‘‘ကတမံ ပန၊ ဘန္တေ၊ တံ ဌာနံ၊ ယတ္ထ ဌိတော သမ္မာပဋိပန္နော နိဗ္ဗာနံ သစ္ဆိကရောတီ’’တိ? ‘‘သီလံ၊ မဟာရာဇ၊ ဌာနံ၊ သီလေ ပတိဋ္ဌိတော ယောနိသော မနသိကရောန္တော သက္ကယဝနေပိ စီနဝိလာတေပိ အလသန္ဒေပိ နိဂုမ္ဗေပိ [နိကုမ္ဗေပိ (သီ. သျာ. ပီ.)] ကာသိကောသလေပိ ကသ္မီရေပိ ဂန္ဓာရေပိ နဂမုဒ္ဓနိပိ ဗြဟ္မလောကေပိ ယတ္ထ ကတ္ထစိပိ ဌိတော သမ္မာပဋိပန္နော နိဗ္ဗာနံ သစ္ဆိကရောတိ. ယထာ၊ မဟာရာဇ၊ ယော ကောစိ စက္ခုမာ ပုရိသော သကယဝနေပိ စီနဝိလာတေပိ အလသန္ဒေပိ နိဂုမ္ဗေပိ ကာသိကောသလေပိ ကသ္မီရေပိ ဂန္ဓာရေပိ နဂမုဒ္ဓနိပိ ဗြဟ္မလောကေပိ ယတ္ထ ကတ္ထစိပိ ဌိတော အာကာသံ ပဿတိ၊ ဧဝမေဝ ခေါ၊ မဟာရာဇ၊ သီလေ ပတိဋ္ဌိတော ယောနိသော မနသိကရောန္တော သကယဝနေပိ။ပေ။ ယတ္ထ ကတ္ထစိပိ ဌိတော သမ္မာပဋိပန္နော နိဗ္ဗာနံ သစ္ဆိကရောတိ.

‘‘ယထာ ဝါ ပန၊ မဟာရာဇ၊ သကယဝနေပိ။ပေ။ ယတ္ထ ကတ္ထစိပိ ဌိတဿ ပုဗ္ဗဒိသာ အတ္ထိ၊ ဧဝမေဝ ခေါ၊ မဟာရာဇ၊ သီလေ ပတိဋ္ဌိတဿ ယောနိသော မနသိကရောန္တဿ သက္ကယဝနေပိ။ပေ။ ယတ္ထ ကတ္ထစိပိ ဌိတဿ သမ္မာပဋိပန္နဿ အတ္ထိ နိဗ္ဗာနသစ္ဆိကိရိယာ’’တိ. ‘‘သာဓု၊ ဘန္တေ နာဂသေန၊ ဒေသိတံ တယာ နိဗ္ဗာနံ၊ ဒေသိတာ နိဗ္ဗာနသစ္ဆိကိရိယာ၊ ပရိက္ခတာ သီလဂုဏာ၊ ဒဿိတာ သမ္မာပဋိပတ္တိ၊ ဥဿာပိတော ဓမ္မဒ္ဓဇော၊ သဏ္ဌပိတာ ဓမ္မနေတ္တိ၊ အဝဉ္ဈော သုပ္ပယုတ္တာနံ သမ္မာပယောဂေါ၊ ဧဝမေတံ ဂဏိဝရပဝရ တထာ သမ္ပဋိစ္ဆာမီ’’တိ.

နိဗ္ဗာနသန္နိဟိတပဉှော ဒွါဒသမော.

ဝေဿန္တရဝဂ္ဂေါ တတိယော.

ဣမသ္မိံ ဝဂ္ဂေ ဒွါဒသ ပဉှာ.