၆. ကမ္မဇာဒိပဉှော

၆. ‘‘ဘန္တေ နာဂသေန၊ ကတမေ ဧတ္ထ ကမ္မဇာ၊ ကတမေ ဟေတုဇာ၊ ကတမေ ဥတုဇာ၊ ကတမေ န ကမ္မဇာ၊ န ဟေတုဇာ၊ န ဥတုဇာ’’တိ? ‘‘ယေ ကေစိ၊ မဟာရာဇ၊ သတ္တာ သစေတနာ၊ သဗ္ဗေ တေ ကမ္မဇာ၊ အဂ္ဂိ စ သဗ္ဗာနိ စ ဗီဇဇာတာနိ ဟေတုဇာနိ၊ ပထဝီ စ ပဗ္ဗတာ စ ဥဒကဉ္စ ဝါတော စ၊ သဗ္ဗေ တေ ဥတုဇာ၊ အာကာသော စ နိဗ္ဗာနဉ္စ ဣမေ ဒွေ အကမ္မဇာ အဟေတုဇာ အနုတုဇာ. နိဗ္ဗာနံ ပန၊ မဟာရာဇ၊ န ဝတ္တဗ္ဗံ ကမ္မဇန္တိ ဝါ ဟေတုဇန္တိ ဝါ ဥတုဇန္တိ ဝါ ဥပ္ပန္နန္တိ ဝါ အနုပ္ပန္နန္တိ ဝါ ဥပ္ပါဒနီယန္တိ ဝါ အတီတန္တိ ဝါ အနာဂတန္တိ ဝါ ပစ္စုပ္ပန္နန္တိ ဝါ စက္ခုဝိညေယျန္တိ ဝါ သောတဝိညေယျန္တိ ဝါ ဃာနဝိညေယျန္တိ ဝါ ဇိဝှါဝိညေယျန္တိ ဝါ ကာယဝိညေယျန္တိ ဝါ၊ အပိ စ၊ မဟာရာဇ၊ မနောဝိညေယျံ နိဗ္ဗာနံ၊ ယံ သော သမ္မာပဋိပန္နော အရိယသာဝကော ဝိသုဒ္ဓေန ဉာဏေန ပဿတီ’’တိ. ‘‘ရမဏီယော၊ ဘန္တေ နာဂသေန၊ ပဉှော သုဝိနိစ္ဆိတော နိဿံသယော ဧကန္တဂတော၊ ဝိမတိ ဥပ္ပစ္ဆိန္နာ၊ တွံ ဂဏိဝရပဝရမာသဇ္ဇာ’’တိ.

ကမ္မဇာဒိပဉှော ဆဋ္ဌော.